Isa 65 | XteSC | STEP | Ne Allah Yahwehdi pepsene. Ne men weamsi nesala, yuk karen mutu nesaladi, ‘Allah Yahwehda, ware ngebo do?’ tenen, ne tep menop taru men asimpeteramnei nesaladi, ukutaruda, ne tep “Allahda, wareto ngebo do? Wareto Allah kurur do?” pepra asimterenenunge. Tonda, menop taruda, ‘Nun cap, Allah Yahweh cap antaptepe’ tenen, ne tep men eramneidi, pio men mororamnei nesala dinin, ukutaruda, sundi ne tep enenunge. Ukunge nesalada, ne tep, “Nun nai,” pepra moropnetengopda, nedi gekepra meliptene. Nedi sun tep, “Ne akunune,” penkamne.

Isaiah 65

Allahdi peramu upu yanirtamami dinin, ‘Anesalada ka di lyepkamne’ tenen, pepu upu

1 Ne Allah Yahwehdi pepsene. Ne men weamsi nesala, yuk karen mutu nesaladi, ‘Allah Yahwehda, ware ngebo do?’ tenen, ne tep menop taru men asimpeteramnei nesaladi, ukutaruda, ne tep “Allahda, wareto ngebo do? Wareto Allah kurur do?” pepra asimterenenunge. Tonda, menop taruda, ‘Nun cap, Allah Yahweh cap antaptepe’ tenen, ne tep men eramneidi, pio men mororamnei nesala dinin, ukutaruda, sundi ne tep enenunge. Ukunge nesalada, ne tep, “Nun nai,” pepra moropnetengopda, nedi gekepra meliptene. Nedi sun tep, “Ne akunune,” penkamne. 2 Dinino, ‘Ne mawa nesala kunkameng’ tenen, weamsi nesala, sun Israel nesala tep nengeda, ‘Nedi sun tep melimkamsene’ tenen, nedi buru yangdiramsisipane, sunda dipru gat nesala cadi, ne upu men gekepmanto kuramnei. Sunda, balila kange doupra mali-malipu kungedi, sundi ‘Ukunkamepe,’ tenenge ngepu kununga cadi, mali weik kununge.

3 “Sunda pio tupa-tupa yapi keca popra, isok si eremna tep ketenemenge wai dam dubengedi, gam keca popra bena uku dongonunge. Tonda, isok si eremna tep, siltong telep keca dopra, gel taplakra yakeiamenga deiki deipra, uku dongorbanunge. Akunungada, ‘Nun nai Allah epseredi, kael kepserur’ tenen, men inimnunge. Ne tep nengeda, ‘Allah dakwapye’ tenen, katuai dipu isok si eremnunge. Ukununga tep nengeda, neda ila di yu kunerure. 4 Tonda, ila mali weik kunge keca ton ake. Sun Israel nesalada, lukunda taruda nimi pein gil imir dam cap, nimi peindam cap, inipra benge dingedi, deamenge neng sambala tep, ‘Sundi ton nun tep bisi peterepseso,’ pepra moronunge. Tonda ne Allahdi sun tep, ‘Israel nesala sunda bisam men jenkamrume. Tonda, ayala keca ake, ange peda sun men jenkamrum keca ake,’ peramsisi dinin, aperamsi upu yanipra lukundada inipra jenunge. Nedi, ‘Angeda jena meme,’ pemsingepu, sun mau pumbon dongopmengedi gapra jenunge. Ange utopu, nedi sun tep, ‘Akeca jena meme,’ peramsisi yala weik dinin, sundi gapmenge mokon peda jenunge.”

5 “Sun amali keca kunge nengdi, yuk nesala yuma teppu penunge. ‘Nunda pio telep dumsisipu kunupedi, lek nengpu kunupa cadi, nun damai yakana gume. Beipra karenaipu kunkamrume,’ penunge. Ukununga tep, ne Allahdi pepsene. Nimidi uku sekmengepa, ila ket bukredi, nimi u pumbon wekrepa kange mun kuramretopu, sun amali keca kunge neng tep, ne dabal kunerepa, nedi sun aneng tep men dinune. Nedi aneng tep yu tenene ngeda, men gum kupmanto kunerure. Ukupmantoda, uku jenmarya men tamamretopu, aneng tep yu weik kunerure. 6 Sun mali kunge nesala tep, wenepra ikin keca karenkamsen keca yumada, ne damai konum sekra deiamsi. Tek sisi anesala wenemna tep, tali dimpeprappu men kunkamne. Sun mali kunge nesala tep, nedi tamupra sun mali kunge keca kunumnada utotopu karenkamne.

7 Amali nesala kunumna karenkamna deiyoda, ake. Ada sun cap, sun apu yapu cap, mali-mali weik kuramya tep, kunumna karenkamne. Sun cap, sun apu yapu cap, mutu deiki welepnedi, isok si eremna tep, siltong telep keca cap, gam keca popra kareraminge cap deiki di, ne tep mali kudiramnei. Ukuramneiya kunumna tep, sun mali kuramitopu, sun wenemna keca tenpunge peda tamna gum di, ayuma nukra ikin keca weika di, sun nong deiki karenkamne.”

8 Ne Allah Yahwehdi pepsene. “Ukupmantoda, nimidi anggur tapu du mouamya dakmengedi, malinge tapra, telepnge wepra dororamengtopu, Israel nesala ne wepra deiamsi nesala kan-kan di, mali kunge nengda wepra tapkamne. Dinino, ne si eremengedi, telep kunge nengda, lyepra dopropkamne. 9 Yakubdi deipupa dadeipdanen yakarami nesala yuma gum dinin, sun kan-kan di, Yehuda yala nesala gung yambula dipu lyepnedi telep kudinkamne. AYehuda yala nesaladi deipmengepa, dadeipdanen bankamenge nesala neitamai di, dopropkamne nesalada, ne talene mutu karepnepa, talepra kunkamenge. Nedi wepra deipkamne nesaladi, ne si tupa-tupa eremkamnenge, Ukupra eremnenge nesalapu amutu talepra kunkamenge.

10 Ne sipu tupa-tupa eremnenge nesala tep nengeda, melipkamna deiki di, anesaladi peinung domba bisam cap, sapi bisam cap yumada, ila pala mutu ban, er si Saron mutu cap, tonda Akhor mutu cap, paramre manmaneng cap, betei cap, akeca batupu jenkamenge.” 11 “Dinino, ne Allah Yahweh tep tapra mali kurum nesaladi, ‘Ne si amutu deiki eremkamnenge’ tenen, wepra deiamsi mutu, Sion mutu pio telepai. ‘Amutuda ila mambule,’ men tenemumdi tamamrum neng cadi, ne si eremna ati tapra men wengrum nengda, nedi wenemsenepa ikin weik kunkamsere. Sundi ukurume. ‘Amenda nun kunkamep keca cap, talenkamep keca cap, telep kudinkamserenge’ tenen, isok si butene sun sida, Gad cap, Meni cap tep, jen keca yala-yala yuma cap, anggur me cap, ketenepra derirume. Aisok si eremrum nesala yumada, wenepra ponkamsene.

12 Dipru gat kuramseua deiki di, mali weik kuramruma tep, nedi popra gawal dangkamsene. Wenepra popkamsena deiyoda ake. Ada, nedi sun tep upuramsisi taru yumada, sundi ne upu men gekeramnerumdi, kaukemdongoramnerume. Ange tep nedi sun tep, upu pediramsisi taru yumada, sundi ne upu men gekeramnerume. Nedi, ‘Angeda mem keca tep, ukuna meme,’ pepra deiamsisi kecada, tupa kurume. Ange utopu, nedi, ‘Angeda ne songe,’ pepra lap peramsisi ngeda, sundi tupa kurume. Ukuramrumnya deiki di, nedi peramsi upu metek kemdiramnerumdi, sun pe kun keca tepapu weik kepropnen, baramrumdi, ne tep yanipra malipu kuramrume. Atep nengeda, nedi peipnepa, yuk karen mutu yu nesaladi, sun yuma popra gawal dangkamenge.”

13 Sunda pio malipu kuruma tep nengeda, ne Allah ^{▼▼Allah – Acada, Ibrani upu di, ‘Yahweh’ cap, tonda, ‘Adonay’ cap pepra sekya cadi, nundi aupu deiyonge jenek kupra sekmupu.} Yahwehdi, akeca-keca yuma talenedi, ila puto weik deiyo ngebo kununa cadi, nedi, ‘Ukupkamne,’ tenenetopu kunune. Nedi pepsene. “Tek sisi ne si tupa eremnengedi, ne amutara pel dopra kunge nesalada, jen jenkamenge. Dinin, sun malipu kurum nengda, tupa putanapu kunkamre. Ne si tupa eremnenge nengda, me jenkameng dinin, sun malipu kurum nengda, me tupa putanapu kunkamsere. Ange utopu, ne si tupa eremnenge nesalada, kange deipra pingpingapu kunkamenge. Dinin, sun malipu kurum nengda, tupa kange mun kange doupra kunkamrume. Ukumumdi, ali dangkamrume.

14 Tek sisi ne si tupa eremnengedi, ne amutara pel dopra kunge nesalada, ne si eremengedi kange deipra kunkamenge. Dinino, sun mali-malipu kurum nesalada, engeplulup perumudi, kange mun kange doupra kunkamrume. Tonda, dipru pio pu jeserepa, ikin kange douprumudi, engenkamrume.” 15 “Nedi, ‘Anesalada ne mawa’ tenen, wepra deiamsipa, ne si tupa eremnenung nengdi, sun mali kurum nesala tep, dipdongopra sun si mali pedinkamsenge. Tonda, ne Allah Yahwehdi, akeca-keca yuma talepra, ila puto deiyo ngebo kununa cadi, nedi, ‘Ukupkamne’ tenenetopu kunupsek pen pel dona deiyo ngebodi pepsene. Ne dipapu sun mali-mali kurum nesala tep, popra gawal dangkamsene. Dinino, ne amutara kungedi, ne si eremenge nesala tep, ukupu si pio telepnge karepkamne.

16 Ange yuma konum kupne pangeda, amutu neitamai kunkameng nesalada, ‘Ware ngebodi melimsetupa, nun kun keca yuma telep kuipsetu do?’ tenenkameng taru yumada, ne Allah pio dumsisi upu penun ngebo tep moronkamnenge. Nedi, ‘Ukunkamne’ penetopu, tamna gum dipapu angepu kunun ngebo tep moronkamnenge. Ange utopu, amutu kunkameng nesaladi, yuk neng tep, ‘Ukunkamsepe,’ pepra pedina upu penkameng taru yumada, ne Allah pio dumsisi upu penun ngebo, ne si deiki di pedina upu penkamenge. Ukunkamenga deiyoda, pumun taru mali kuramrumu keca yumada, konum kaukepsenedi, kange di ton cap pio men tenenkamne. Ange yuma gum kupra deipnedi, lupronkamne.” Allahdi Israel nesala tep pepu.

Allahdi “Im neitamai kure keca yuma cap, tuai cap yuma ukupunge ketekepra deipkamne,” pepu upu

17 Allah Yahwehdi, pepu. “Tek sisi nedi, im neitamai kure keca yuma cap, tuai mutu kure keca yuma capda, ukupunge punupra ketekepra deipkamne. Ukupne dingeda, pumun kupyakaraminge yumada, gum kupra deipnepa, nimidi, lumdongonkamenge. Kange di ton cap men tenenkamenge. 18 Ukupu keca yuma ketekepra deipkamna tep nengeda, ‘Uo, pumun ngepu kupsetue’ tenena gume. Ange gum dinin, ukupunge ketekepra deipkamna tep nengeda, sun Israel nesala pio tep teleppu kumumdi, kange deipra kunkamrume. Yerusalem mutu pio telepnge, ukupu ketekepra deipnepa, amutu kunkamrum nesalada, kange deipra pingpinga di kunkamrume.

19 Ne peda, Yerusalem mutu ukupu ketekepkamnenge tep, ila kange derinkamne. Ange utopu, ne Allahdi Yerusalem mutu kunkamrum nesala tep, kange derinkamsene. Ukunkamsena tep, Yerusalem ukupunge, keteneipkamne mutu neitamai kunkamrum taru yumada, ikine keca kuserepa, ila di, ‘Melipseo,’ pepra, ngolokra engemumdi, ne tep men moronkamnerume. Tonda, kange mun kange doupra, ngolokra men engenkamrume. Kange deipra teleppu kunkamrume.

20 Sun amutu kungedi derinkameng nyapu yumada, yambul taru di, ue tumi buteneto, wenerito gam kunmanganen, adipapu men denkamenge. Pio gam kunkamenge. Ange utopu, sun wisi nesalada, dakuramrumyanen, wisi deipmumdi, menmena dena gum di, pio dakuramumyanen, wisi deiprumupa, kul potongpu kunkamsere. Kaber tupa kumum taruda, men denkamrume. Apepmasenada, mesum tep men pepsene. Amutu neitamaida, keteng tamun denge weik, 100 tahun deiki di wisi konum deiamenge neng tep nengeda, yuk nengdi, ‘Anengda kaber nengpu kununge,’ tenedankamenge. Ange tep nengeda, keteng tamun denge weik 100 tahun men kepmarepapu, depre ngebo ton akaptu teptoda, yuk nengdi, ‘E, erda mali kuramya menenga tep, Allahdi wenemna keca er deiki deipmarpa depmara,’ tenedankamenge. Ada, Yerusalem ukupu mutu kunkameng nesalada, keteng tamun denge pio weik gampu kunkamenga tep pepne.”

21 “Amutu neitamai ati dopkamenge nengda, adopmenge nengepu talepra kunkamenge. Yuk mutu nesaladi, akati upula men doronkamenge. Akati pumbonda, yuk nesala ton pio men kunkamenge. Sun ati domenge nengpu, akati talepra kunkamenge. Akati kunge neng dipapu, anggur tapu du wa pepra kunkamenge. Sun pedipapu anggur du dakmengedi, taikra purupmengedi, sun pedipapu anggur me jenkamenge. 22 Pumun taruda, sundi domrum atida, yuk karen mutu nengdi yan dalupra dororamseitopu, pio men kunkamsenge. Ange utopu, sun wa peamruma yuma, yuk karen mutu nengdi yan dalupra kiramseitopu, pio men kunkamsenge. Amutuda, ne wepra deiamsi neng, sun kunkamengada, go weik ton cap, tapakra karepnepa kunkamenge.

Ukupmantoda, co pio tekamre utopu, ne mawa nesala sunda keteng tamun denge pio weika di gampu kunkamenge. Sun pe buru deiki di, akeca-keca yuma pel donkamenge yumada, sun pedipapu talepmengedi, kange deipra kunkamenge. 23 Sundi, pel donkameng keca yala-yala yumada, nongpu kemkamre. Sun amutu kungedi derinkameng nyapu yumada, deiyo men kuapmarepapu tali dato-dato di yambul taru ton men denkamenge. Tonda, yuk karen mutu nesaladi, men poryakankamenge. Ada ne Allah Yahwehdi, sun cap, sundi deipmengepa dadeipdanen bankameng nesala cap tep, sun damai kunedi, pio tep teleppu kudinkamsene.”

24 “Sun amutu kunkameng nesaladi, ne tep ‘Melipseo,’ pepra kapul men moropmanenge taru di, ne adipapu gekepra makunkamne. Tonda, tupa moronmanga neitamai, kapul men gawal dakmange taruda, ne gekepnedi, ‘Telepe,’ pepra karenkamsene. 25 Yerusalem mutu ukupunge ketekepra deipne taruda, domba mi cap, ila pus utopu yu keca er si singa cap, sun tonpa mutmuta batu jenkamrenge. Tonda sapi bisam manmaneng batu jeramretopu, ila yu pus er si singa peda, yuk gam keca popra men jenkamre dinin, er peda manmaneng batupu jenkamre. Ton ngeda, nimi porepa, kuramnung bal yumada, tuai mutu akupu kalkal tupu jenkamenge. Abal yuma tep, puto boun kuipnepa, yu men kunkamenge. Ada ne Allah Yahweh ila puto ngebo kunkamne mutu deiki yumada, ne damai di yu kuramre keca yala-yala yuma cap, nimi tep mali kudirur keca yuma capda, bounpu kuipkamne. Pio mali keca ton, tenpunge peda, men kunkamra cadi, pio telep kecapu kunkamre,” Allahdi pepu.