Isa 66 | XteSC | STEP | Ne Allah Yahweh im deiki bukra kune ngebodi upepsene. “Ukupmantoda tuai mutu ila nimi deiyo nengdi, ila bungna keca deiki bukmengedi, upu bongdiramengtopu, neda, im deikipu pio bukra kunune. Im deiki kununa cadi, ukupmantoda, tuai mutuda, yan beipye peingna tep deriramengtopu, kunune. Atep nengeda, wareto ati doptumpa, akati pumbon pio kutene do?”

Isaiah 66

‘Ban-ban yuma kure keca yumada, Allah dipapu ketekepra deipu,’ pepu upu

1 Ne Allah Yahweh im deiki bukra kune ngebodi upepsene. “Ukupmantoda tuai mutu ila nimi deiyo nengdi, ila bungna keca deiki bukmengedi, upu bongdiramengtopu, neda, im deikipu pio bukra kunune. Im deiki kununa cadi, ukupmantoda, tuai mutuda, yan beipye peingna tep deriramengtopu, kunune. Atep nengeda, wareto ati doptumpa, akati pumbon pio kutene do?” 2 Ne Allah Yahwehdi pepsene. “Tuai mutu neitamai kure keca yuma cap, im neitamai kure keca yuma capda, ne pe buru di ketekepra deipsipa kurura cadi, ange-ange yumada, nengepu konum akurure. Nedi kange deipnedi, melimnun nesalada ake. Ada, dipru eremna gum di, ‘Uo, nun mali kunupe’ tenen, kware kuprepa, bouna di kunge nesala tep, ne kange derinune. Tonda, sun mali kunge keca tapmengedi, nedi, ‘Angeda kunkamrume, angeda men kunkamrume,’ pedisene upu yumada, moupra gekepmengedi, ‘Mali kupmepepa, Allahdi wenepserur’ tenen, kware kuprepa, moropsepmengedi, ne upupu moupra talepmengedi dombanung nesala tep, ne kange deipnedi, melimsenune.” Allahdi sun Israel nesala tep pepu.

3 Dinino, sun Israel yala nesalada, sun pe kange dipapu, ‘Ukupkamepe’ tenen, mali tenerumu kecapu kurume. Ada, sundi isok er sipu eremruma deiki di, pio malinge weik kurum dinin, tonda, ‘Allah tep karepkupe,’ tenerumudi, ne karena tep, yuk keca ton karenerume. Ukuprum ngeda, pio mali pua.

Ada, ware ngebo do yuma, jem sapi bisam popra, Allah er si eremna tep dopra, yana karepmenge tarupu, aneng dipapu, sun pe nyapu ton sun pe ton popmengedi, isok si eremna tep dopra karerbanunge. Tonda, domba bisam mi ukupu weni nenmarenge, ne Allah tep bena karepmenge tarupu, sun aneng dipapu, sun Kanaan tara nesala kuramengtopu, sun kam dopra yangedi, er kum talepra dukeptapmengedi, isok si eremna tep karerbanunge. Ange utopu ton, gandum du dopra, ne Allah gispal dona tep, yana karepmenge tarupu, aneng peda, sun Kanaan tara nesala kuramengtopu, bisam yapi dopra, isok si eremna tep bena karenunge.

Tonda, gandum du taikmengedi, nintong telep me, er si kemenyan tapakmengedi, ne Allah telepe pena tep nengeda, ne si eremengedi, akeca uku dongonge tarupu, aneng peda, sun Kanaan tara nesala kuramengtopu, isok si eremna tep, isok urasin utopu keca ketekepra deipinge tep, ‘Nun nai telepe,’ pepmengedi, aisok si eremnunge. Atep nengeda, sun amali keca talepra kunge nesala yumada, ne tapnengedi, sun pe kange dipapu, ‘Ukupkamepe,’ tenepmenge ngepu kupra, pio mali keca kungedi, ange yuma tep kange deipra kununge. Ange yumada, pio mali weik kununge.

4 Ange kununga tep nengeda, ne peda, ne kange tenepnetopu kupkamne. Angeda, nedi sun tep, ‘Ne peipsi upu moupra talepmengedi, ne tepapu domyakankamnenge’ tenen, sun tep kong pepsisidi, upu peipsisi dinino, ataruda, sundi tamupra upu men pepnei. Tonda, nedi, “Angeda ukunkamrume, angeda pio men kunkamrume,” pepra, sun damai mambul upu peramsi taru peda, sundi ne peipsi upu moupra men gekeramnei. Ne upu gekena gum di, sunda mali kun kecapu talepra kurami. Ada, nedi, “Sunda pio mali kuna ngeda, ne pio dabale, akun kecada ne song cadi, pio men kunkamrume.

Ange yumada meme,” pepsidi, ‘Ne damai di, ange yumada, pio mali weik kurure,’ tenemsi kecada, sunda balila deipra kuramidi, amem kecapu tupa talepra kurami. Sun kika deipra tapmengedi, mali kecapu pio weika di kununga tep nengeda, nedi sun wenepkamsene. Ada, sun akeca kunge nesala yumada, ila di wenepra popkamsene. Sundi, ‘Uo, tek sisi kange mun kecada, ange ton, ange ton, nun damai yaserur’ tenen, kware pio weik kungedi, kange mun kange doupra, kunung keca dopra, sun deiki deipkamsene!

Allahdi sun Israel yala nesala yuma tep pepu.

Allahdi, Israel nesala, sun dipru kwadimna tep, pepu upu

5 Nabi Yesayadi, sun Israel yala nesala tep pepu.

Allah Yahwehdi konum peipseu upuda, moupra gekepkurume! Ada ware nesala do yuma, sundi Allah perur upu moupra gekepmenge nesala tep pepsene. Allah Yahwehdi, ‘Angeda kunkamrume, angeda men kunkamrume,’ pepra peserur upu yumada, moupra gekepmengedi, ‘Uo, mali kupmepepa, Allahdi wenepserur’ tenen, kware kuprepa, moropsepmengedi, er upupu moupra talepmengedi, dombanung nesala tep, pepsene. Sundi ne tep teka tenepra, kware tenepra moupra kurume.

Sundi ukurum dinino, yuk Yudea tara kunge nesala, sun damai kunge nesalada, anengdi sun tep, mali upu pepsengedi, ‘Sun cap tonpa kunada, nun songe,’ tenepsengedi, nalemsenunge. Sun anengda, nalemsengedi, upenkamsenge. “Ukutaruda, nundi moupra dinkupe. Allah er ila puto cap, er telep kuna cap deiki di, er dirine sun damai katawai kupra deiprepa, ila di kange deipmum pangeda, nun ton ange yuma dinkamepe,’ pepra, nalemsengedi, nyek-nyek penkamsenge. Upesenung dinino, tek sisi amenda taruda, aupu penge nesalada, ne Allahdi sun tepapu wenepnepa, sun pepu ali dakamenga tepa.

6 Tonda, sun yuma pio moupra gekepkurume! Amutu ila ati arum donga neitamai di, ila lelim penmange! Tonda, Allah er si eremna ati domyai pumbon di, Allah Yahweh dipapu, ila upu deiki di penmare! Angeda, Allah Yahweh tep, “Nun songe, erdi, ‘Ukupkamrume,’ peipseu upuda, nun songe! Er tara men kepronkamepe,” pepra, Allah tep sundi mar penge neng tep nengeda, Allahdi sun tep upenmare. Ada erdi, “Amali kunge nesala tep nengeda, sun kwangdana tep, ila di wenepkamsene, ukupkamne,” penmara deiki di, ila lelim gekenmape.

7 Allahdi sun Sion mutu nesala tep, ukupmanto upu upenmare.

Gekepso! Sun Sion mutu kurum nesala tep nengeda, ukupmanto upu pepsene! Tenpu nerdi mundu kapul men douamu taru dinin, er mi konum deipu. Tonda, anerda, mi deiyo jena gum deiki dipapu, er mi konum deipu. Ada mi deipkunge taruda, pu men jepu dipapu, er sal mi konum deipu. 8 Dinino, ware nengdi, ato keca epidi, ‘Ange kupke,’ pepra lap peramipa, yuk neng yuma ton, ange upu gekerami do? Ware ngebo ton autopunge kupupa, er pe asuru di epu do? Gume, angeda men kupmanto. Tonda, sun tenipetepso! Tenpu tumi neitamai dipapu, nimidi ila ati arum kwamre keca yuma, adipapu dopra keteneiptenge do? Tonda tenpu tumi neitamai dipapu, nimi yala tenpudi, sun nyapu deiptengepa, dadeipdanen, yakaramyanen, atumi dipapu, tenpu ila mutu neitamai bena dekpeptupa, nesala weika di kuptenge do? Gume, ange peda men kupmanto. Dinino, ukupmantoda, nerapu mi deiyo ukupu gonga kepra, pu jenmankap, adipapu mi deiptua utopu kupra, Sion ^{▼▼Sion – Sion mutu pepka deiyoda, ada Yerusalem mutu neitamai kunkameng nesala tep pepu. Tonda, ada Allahdi, Israel yala nesala weika di ton cap, telep kweiprepa, amenda taru Yerusalem mutu kunkaminge tep pepu.} mutuda, tenpu tumi deiki dipapu, er nyapu yuma adipapu tenpu taru dipu deipu ^{▼▼deipun – Aupu neitamaida, ‘deipu’ pepu dinin, ada ukupmanto upu deiki di, amenda dortaru kupkamunge tep pepu. Ange kapul men kupu taru di pepu, dinin, ‘Angeda tek sisi ukupnepa, nong katuai kupkamre,’ tenepka tep, konum kupu utopu pepu.}.

9 Tonda, sundi tenipetepso! Ne Allah Yahwehdi pepsene. Ukupmantoda, nerapudi mi deipkunge taru damai kuprepa, nyapu derina deiyonge karenun ngebodi, ange tapnepa, sun pedipapu nyapu deiptenge do? Tonda, mi derina damai kuptupane, nedi mi yakan bisi adipapu sekdongopkamne do? Gume, angeda pio men kupkamne. Gume, sundi si eremnerum Allahda, ne akonum kunune. Nedi sun tep pio melipra kalengsenune. Neda, mi derina deiyo keca, karena deiyo ngebo kununa cadi, ange yumada, tek sisi men kupkamne. Gume, nedi, ‘Ukupkamne-ukupkamne,’ pepra, pedina upu deiki pemsisi keca yumada, tek sisi angepu kupnepa, nong kupkamre ja! Ne Allah Yahwehdi upepsena cadi, ne tenemsi keca yumada, tek sisi nong kupkamre!

10 Ange tep nengeda, ware nesala do yuma, sundi Yerusalem mutu ila ati arum kunge nesala tep, teneprumudi, kange pio deiprum nesalada, ila kange deipra, pingpinga di kunkurume. Tonda, menop taru yu jen nengdi yana, Yerusalem mutu ila ati arum urupra sikke buktapipa, kange mun keca kupupa, sundi, ‘Uo’ tenen, mali kange doupra engeramrum nesala yumada, ataru dipapu, sun Yerusalem mutu kunge nesala cap, tenpu kange doupra, kikimanpu ila kange deipra, pingpinga di kunkurume. 11 Yerusalem mutu tep kange deipra kunkamruma deiyoda ake. Ada, ukupmantoda, nerapudi ukupu deipmenge nyapu, er nin moum tuyungpu tupa pio kareramrepa, jenmaryanen, bouprepa kange deipra, tali dim pepra kuramretopu, sun peda utopu kupra, kunkamrume. Deiyoda, amenda taru Yerusalem mutu ka tamupra pio telep kupra deipnepa, amutu neitamai di, pio telep keca yala-yala yuma, weika di akaprepa, sundi ange dopra jemumdi, talepra kunmamumyanen, telep kange doupra kumumdi, dim pepra kunkamrume. Ange utopu, ne Allahdi, sun tep telep kweipsenepa, pingpina di kunkamrume.

12 Ange yumada, tali tep men pepsene. Deiyoda ake. Ada, ne Allah Yahwehdi aupu pepsena cadi, nong tek sisi kupkamre ja. Ukupkamsenada, ake. Nedi sun Yerusalem mutu nesala cap, amutu yuma cap tep, ka tamupra pio telep kweipne pangeda, akeca-keca yumada, yamupra karepkamsene. Ukupkamsen ngeda, ukupmanto upu pepsene. Ada, ila me pio cedona gum di, me puto di embaramre utopu, nedi akeca-keca yuma weika di karenkamsene. Tonda, yuk-yuk mutu neng, yala-yala yumadi, pio telep bung keca weika di, Yerusalem mutu damai duyana karenkamsenge.

Ukupkamengada, metekanun guma. Ila me opredi, puto di pio embaramre utopu, sun kunumna weik keca yala-yala yuma dopra, Yerusalem mutu damai duyana karenkamsenge. Ukupmanto ton ngeda, nyapu er nin ongon deiki moupra bukmangedi, kange deipra bungamengtopu, sun peda utopu kunkamrume. Tonda, nyapu iribongboi deipmengedi, moum karepmengepa, mokupmengedi kange deirameng utopu, nedi sun tep utopu kupkamsene. Nerapudi, sun metek nyapu dopra, sun kail deiki deipmengedi, esu pedingepa, sun nyapu kange deriramengtopu, nedi sun tep utopu kuipsenepa, kange deipra teleppu kunkamrume.

13 Tonda ukupmantoda, nerapudi, sun nyapu engenge taruda, anyapu moupra doupmengedi, boun upu pepmengedi, kalengameng utopu, ne Allahdi, sun Yerusalem mutu kurum nesala yuma tep, sun dipru kwa dipsenedi, melipra kalengkamsene. Yerusalem mutu neitamai di dipru kwa dipsenyopda, sunda kange deipra, tali dim pepra, pio telep-teleppu kunkamrume. Allahdi pepu.

Allah Yahweh, er ila puto deiki di kupkamrenge tep, pepu upu

14 Allahdi sun Israel yala nesala tep pepu.

Ange yuma konum kupnedi, sun tep pio telep kupra deipsenyopda, sun Yerusalem mutu kumum nesala epmumdi, sun ila kange deipkamrume. Tonda, ne Allahdi sun puto kweipsenepa, sun nong teleppu kunkamrume. Ukupmantoda, mo ceprepa, ukupu mutmuta menmena bongopredi, pio weika di tengamretopu, melipsenyopda, sunda pio teleppu kunkamrume. Ange konum telep kweipsenyopda, ne amutara pel moupra donerum neng tep nengeda, nesala yuma epsengedi, ‘Uo, tek sisi Allah Yahwehdi, er mawa nesala tep, er pio puto buru di, er mawa nesala tep melimrure. Tonda, er tep, ‘Nun songe’ tenen, er tep mar podan neng tep nengeda, er yu kuprepa, sun menenga tep popra, yawa portamrure,’ tenepmengedi, kael kepkamnenge.

15 Angeda tali tep guma. Ne Allahdi ange yuma kupkamnenge deiyoda ake. Ada, tek sisi ne Allah Yahwehdi, aneng sun wenemna tep, uku cap doupra yankamne. Tonda ne yankamne taruda, ila kumanya puto yaredi, lelim weik peramre utopu tonda, kuda bisamdi gipra, tu deiki dubarameng keca, er si kereta perang, menmena sepdaro baramretopu, ne Allah peda menmena di yankamne. Ange yuma ukupne dingeda, sun mali kunange, kwang dangna tep, ne ila yu kwamneunge dopra, sundi ne tep, ‘Nun songe,’ tenepmengedi, ne yaninenung nesala, sun damai deipnepa, ila kange mun keca kupkamre. Sun tep wenepkamne ngeda, ila uku bo jeramredi, bupu weik kuramretopu, ila puto di anesala wenepra popkamne ja.

16 Ange peda, tali tep men pepsene. Tek sisi ne Allah Yahwehdi, ware neng do yuma, sun mali kuramenge keca ton epnyopda, ne uku bu cap, ne nimi pon parang ya cap di, sun mali kunge nesala, tuai mutu ban-ban yuma neitamai di, upu bokeipsenedi, amali kun nesala yuma popra gawal dakamne. Ange yuma konum kupne pangeda, ataruda ne Allah Yahwehdi, ikin keca deipra, wenepra popnepa, nimi denge pio weik, parang ya di poptapnepa, adipapu depkamenge.

17 Tonda, ware neng do yuma, sun Yudea tara kurum nesala dinin, sun Kanaan yala nesaladi mali-mali kuramengtopu, sun nong bol deiki ngepu me gekra telep kweipdangedi, yuk neng cap melipra, isok si eremnai tep, isok si eremna keca petupra deiamenge, mem waidam ^{▼▼mem wai dam – Aupu deiyoda, pumun taru, sun Kanaan tara neitamai kurami nesalada, Allah tep men kael keamya cadi, teka men teneramidi, sun isok si eremna tep, apel ton dorami. Atep Israel nesala kankan di, ton nengda ange ton diramidi, amali kun kecapu talepra pio mali kurami.} bengedi, isok si eremnung nesala yumada, popra gawal dakra, gum kupra deipkamne. Sun yumada, adipapu tenpu taru dipu depkamenge. Ne Allah Yahwehdi aupu pepsena cadi, angeda tek sisi nong kupkamre ja! Anengda, Allahdi, “Akecada sun yuma pio men jenkamrume. Ange jepmumnyopda, ne damai ton men yankamrume. Akecada ne dabale cadi, angeda mem keca ^{▼▼mem keca – Mem keca pepunge kael kemna tep nengeda, Imamat pasal 11 neitamai di dinkurume.} tepa,” pepra deipseunge, bisam sisa cap, kupe cap, kapang cap, yuk mali gam kure keca yala-yala yuma cap, jeramenge nesalada, ayuma gum kupra deipkamne,” ne Allah Yahwehdi pepsena cadi, angeda tek sisi nong kupkamre ja! Allahdi pepu.

18 Uda, ne Allahdi, tuai nesala ban-ban yumada, sun kange teneramenge nge cap, sundi mem pel donge keca cap, sundi kunge keca yuma capda, ne konum diramsa cadi, ne kaele. Amenda taruda, ne tamupra yane dingeda, tuai nesala ban-ban yuma cap, nimi yala-yala yuma cap, upu yuk-yuk peramenge nesala yuma cap, daneitamai di nimi ton, nerapu ton bulupra deipkamne. Sun anesala, konum bulupra deipnepa, wekmenge taruda, ne pio telep kunya cap, ne ila puto kunerenge cap tep, dirine weik kunere ngeda, katuai kuprepa, epnengedi, moupra kael kepkamnenge.

19 Ne Allahdi abulupra deipkamne nesala kunkamenga neitamaida, ‘Ne puto kael kepkamenge’ tenena tep, ton petenkemna keca ketenepra deipkamsene. Ukupnepa, sun anesala kankan di, ton neng men poptapnepa, tupa gam kunkameng nesalada, wepra deipne pangeda, sun aneng yumadi, ne upu cap, ne kune keca cap tep dopropmengedi, ange yuma kapul men gekerami nesala damai bena lap perbenkamenge. Doproipnepa, lap perbengopda, ne pio telep kunya cap, ila puto di pel doramsinge cap, ne ila eremna kunenge cap yumada, sundi epmengedi, gekepra kael kepkamnenge. Ada, nedi doproipkamne nengdi, sun dana-dana tara kunge nesala damai bena, ne pio telep kune keca yuma lap perbenkamenge. Sun perbenkamengaida, ake.

Ada, Tarsis mutu cap, Pul mutu cap, Lud mutu cap Mesek mutu cap, Rosh mutu, Tubal mutu cap, Yawan mutu cap, Spanyol ^{▼▼Spanyol – Yuk Allah upu buku neitamaida, amutu-amutu si tep nengeda, si yuk-yuk sengnunge. Tarsis, ada Spanyol mutu cap, Pul mutu cap, ada Libia mutu, tonda Lud mutu cap, ada Lidia mutu, Yawan mutu cap, ada Yunani upu di sengnunge.} mutu cap, Yunani mutu cap, bena lap perbenkamenge. Amutu-amutu yuma kunung nesala damai lap pepmengepa, ne pio telep kunya cap, ne ila puto kunerenge capda, gekepmengedi, moupra kael kepkamnenge.

20 Nedi wepra deipkamne nengdi, amutu yuma peterep embankamenga neitamai di, sun kayapu neng, Israel yala neng ton, amutu-amutu neitamai di dopra, Yerusalem mutu tamupra duyakankamenge. Ada, nimidi Allah er si eremna tep, menenga keca doupra, yana kareramenga utopu, sun yuk-yuk mutu nesala duyangedi, ne Allah Yahweh tep, kareryankamnenge. Tonda, anengda, douprapmengedi, ne wepra deiamsi mutu dup, Yerusalem pio lengna telep mutu duyankamenge.

Duyakankamnenge ngeda, ada kuda bisam bali deiki bungna cap, keledai bisam bali deiki bungna cap, unta bisam deiki cap, kuda bisamdi gipra, duyakange kereta perang deiki cap, anesala deipra duyakankamnenge. Sun amutu neng dopura, ne damai duyankamnenge. Angeda ukupmanto, sun Israel nesaladi, ne Allah tep, ne si eremna tep, gandum du bupra ketenepmengedi, telep lungna keca me kupne dingeda, akeca deipnedi, ne si eremna ati damai duyakaramitopu kupkamenge. Ada, gandum du kipra, telep keca deiki kareryakaramenga utopu, sun yuk-yuk mutu nesala dopra, ne damai duyakankamnenge.

21 Tonda, sun karen mutu di tamupra duyankameng neng neitamai di, nedi, ‘Imam-imam pel dona deiyo neng cap, imam neng pel melipra dona Lewi neng cap utopu kepra deipnepa, anengdi ne si eremna ati pumbon pel donkamnenge’ tenen, wepra deipkamne. Ne Allah Yahwehdi pepsena cadi, angeda tek sisi kupkamne ja! 22 Tek sisi pepsene. Nedi ukupu im ketekeipkamnenge cap, tonda, ukupu tuai mutu ketekeipkamnenge cap, ange ketekeipnepa pio akapkamretopu, ne mawa nesala, sun Israel neng, sun cap, sun si cap, sundi deipmumpa dadeipdanen benkameng nesala cap yumada, ne damai pio akunkamrume. Sunda men gum kupkamrume! Ne Allah Yahwehdi upepmasena cadi, angeda teki sisi nong kupkamre ja!

23 Ange utopu, war ukupunge kepre taru di, orware ukupu war kepkamre taru, daneitam taru yumada, nimi yuma yana, ne si eremkamnenge. Tonda, tali pel dona gum di, ne si eremne tumi, Sabat ^{▼▼Sabat – Sabat tumi pepka deiyoda, ake. Ada, pumun taruda, Allahdi sun Israel nesala tep, tali pel dona gum di, ne si eremna tep, hari Jumat lukunda neitamai di, berekyopda, hari Sabtu lukunda neitamaida, beipye peikrumudi, ne si eremna pelpu donkamrume. Tonda, beipye peikra kunkamrume.} tumi kepre taru di dipra, orminggu kepkamre Sabat tumi, daneitam taru yuma cap yumada, tuai nesala mutu ban-ban yuma kunge nesala neitamaida, ton neng buluprapmengedi, ne si eremna tep, Yerusalem mutu neitamaipu dinin, ne damai yakangedi, ne sipu eremkamenge. Ne Allah Yahwehdi upepmasena cadi, angeda teki sisi nong kupkamre ja!

24 Yerusalem mutu neitamai yana kuramenganen, ne si erepmengedi konum sengpepmengopda, tamupra akati arum neitamai di tapra, Yerusalem mutu ati neitamai di gupsaka, bura bange taruda, ne upu yanipra, ‘Allahda nun songe, er upu moupra men talenkamepe,’ pepra, ne tep yaniptapkamneng nesalada, konum popra tapnepa depmangepa, sun nong katuai kupmarepa epkamenge. Tonda, anesala sun nongda, lyuramrepa, jenkamre ku duda, pio ilwalingnapu kunkamre.

Ukunkamre ku duda, pio men depkamenge. Ange utopu, tonda sun nong jenkamre ukuda, pio men tapropkamre. Pio jenapu kunkamre. Ange yumada, nedi poptapnepa lyunkamre nesala yuma dinkamenga cadi, amali kuramipa popsi nesala tep, ila kwar dangne kecada, ukupmantoda peten kemne keca tenpu deipkamne. Ada mutu urasin telep kuprepa dirameng utopu keca deipnepa, pio kuramrepa, tupa gam kunkameng nesala yumadi, ‘Nunda adepi nesalada, nun dinada pio songe,’ tenenkamenge.

Allahdi sun Israel yala nesala yuma tep pepu.