Isa 7 | XteSC | STEP | Ataru neitamaida, Raja Uzia er mi Yotamdi deipu mi Ahasda, Yehuda yala nesala, sun ila nimi deiyo ngebo Raja kuramu. Raja Ahasdi, Yehuda yala nesala talepra kuramu taru neitamaida, Israel yala nesala cap, Aram mutu nesala cap, ‘Yehuda tara neng popbisipkamep’ tenen, yanmai. Ada, Aram mutu taleamudi ila nimi deiyo ngebo, er si Resin cap, tonda, Remalyadi deiamu mi, er sida Pekah, ada Israel nesala taleamudi ila nimi deiyo kuramu ngebo cap, ‘Yehuda tara nesala popbisipkamep’ tenen, antapra wisipropidi, Yerusalem mutu warengbei. Ukupra wareng bena podanmai dinin, Yerusalem mutu kurami nesala tep, men popbisipmanto kupi.

Isaiah 7

Allahdi peipupa, Yesaya cap, nimi deiyo ngebo Raja Ahas cap, upu talepdarei

1 Ataru neitamaida, Raja Uzia er mi Yotamdi deipu mi Ahasda, Yehuda yala nesala, sun ila nimi deiyo ngebo Raja kuramu. Raja Ahasdi, Yehuda yala nesala talepra kuramu taru neitamaida, Israel yala nesala cap, Aram mutu ^{▼▼Aram mutu tenpu kuramu dinin, amutu si tep si butene siperami. Ton sida, Aram perami. Ton sida, Siria perami dinin, ada tenpu mutu pua.} nesala cap, ‘Yehuda tara neng popbisipkamep’ tenen, yanmai. Ada, Aram mutu taleamudi ila nimi deiyo ngebo, er si Resin cap, tonda, Remalyadi deiamu mi, er sida Pekah, ada Israel nesala taleamudi ila nimi deiyo kuramu ngebo cap, ‘Yehuda tara nesala popbisipkamep’ tenen, antapra wisipropidi, Yerusalem mutu warengbei. Ukupra wareng bena podanmai dinin, Yerusalem mutu kurami nesala tep, men popbisipmanto kupi.

2 Ataruda, yuk nengdi, Daud er yala nesala kori upu perbeidi, “Gume, sun Aram mutu nesala cap, Efraim yala nesala cap wisiprapmengedi, ‘Yehuda yala nesala porbenkamep,’ tenen, wareng yanmasenge,” pepra lap penmai. Upepipa, sun deiyo ngebo Raja Ahasdi gekenmaudi, er cap, er tara nesala yuma cap, mambul kange doupidi, sun kware kupu. Ada, Israel tara nesaladi, sun mutu warengyanmaiya tep, Yehuda tara nesala yuma cap, sun deiyo ngebo Ahas cap, kware kupupa, kange dipru yuma moropsepudi, co tekamrepane kumanya yana doprepa, longtoramretopu kupu.

3 Ukupu pangeda, Allahdi Yesaya tep pepu. “Telepe kan cap, kandi deipmum mi, er sida Syear-Yasyub cap, beremumdi, Raja Ahas cap antapkamrume. Ahasda, ‘Yerusalem mutu deiki tara deiamu mokon di, me embankamre’ tenen, palipra keteneipi bisi, sirikai kunkamra tep, er epmemnyopda, upu talepkurume. Abisida, kan kaele. Ada opkal me kurbana tep, banung bisi ake. Abisi beremumnyopda, Ahas cap antapkamruma tep, abisipu benkurume.

4 Beremumnyopda, nimi deiyo ngebo Ahas tep pepkurume. ‘Kanda dipru puto kupra kange moupra, ketenepra kunkurume. Dinino, kware men kunkamrume. Kanda dipru bongtokerepa, kwar men kunkamrume.’ Ada, Aram mutu talerura deiyo ngebo Resin cap, Ramalya deipu mi, Israel nesala ila nimi deiyo ngebo Pekah cap, sun jen talen neng cap yuma tep nengeda, ‘Sun yuma yangedi, warekra popkamseng do?’ tenen, kwar dangna gume. Animi deiyo nengda, ‘Sunda puto weik neng,’ tenerum dinin, nedi tek sisi pepkene. Sunda, co uku dongopmengepa jenmaryane, co kol sirik tamdoramretonun, kununge. Sun men di teneramrei ngeda, nong men kupkamra tep, kanda kware dangna gume.”

5 “Sun anengda, Aram mutu talepra kure nimi deiyo ngebo Resin cap, Efraim yala nesala cap, Israel yala nesala sun deiyo ngebo Pekah cap, upu sisikidi, ‘Yehuda yala nesala popbisipkamepe’ tenenmangedi, yu weik kupupa, sun damai yanmang dinin, sun tep kwar dangna gume. 6 Sundi tenepmangada ake. ‘Nun yumadi, Yehuda yala nesala kungai bena warekra popbisipmepedi, sun kunge mutu cap, sun ati cap yuma, urupra sikke buktapkamepe. Ukupmepedi, nun kabo Tabeel er mipu, amutu talepra nimi deiyo ngebo kunkamre. Amutu yumada, bokra dopropkamepe,’ tenen, yanmange.”

7 “Sun anengda, utenenung dinino, akeca-keca talepra deiki tara kunedi, ila puto weik ngebo Allah Yahwehdi ^{▼▼Allah Yahweh – Indonesia Alkitab neitamaida, TUHAN sengnung dinin, nundi, Ibrani upu deiki sekinge deiyoda, jenek kupra sekmepu. Aupu deiyoda ake. Ada, “Allah Yahweh erda akeca-keca yuma talepra, deiki tara ila eremna kurur ngebodi, ‘Ukupkamne,’ teneretopu kurure.”} pepkene. Ne pedinetopu kununa cadi, sundi, ‘Ukupkamepe,’ tenenge ngeda, tek sisi nong men kupkamre. Sundi tenepmang ngeda, men kupmanto kunkamenga cadi, talipu kununge. Angeda pio tek sisi men kupkamsenge, pepmasene,” Allahdi peipneu. Upepneu dingeda, aupu ton pepu.

8 “Aupuda tali tep men pepkene. Deiyoda ake. Aram mutu ila nimi deiyo neng kunungaida, Damsyik mutu kununge. Atep, Aram mutu deiyoida, Damsyik mutu puto yambulpu kuretopu, sun Aram mutu nesala yuma peda, puto yambulpu kununge. Tonda, Damsyik mutu peda utopu, puto weik men kurure. Amutu talepra, ila nimi deiyo ngebo Resinda, er puto yambulpu kuretopu, er kure mutu Damsyik mutu deiyoi peda, puto yambulpu kurure. Amenda taru, keteng tamun enam puluh lima tahun (65) ton konum kupyopda, nedi peipnepa, yuk nengdi, Efraim yala nesala yuma, popbisipmengedi, gawal dakmanto kupkamenge.

9 Ange utopu, Efraim yala nesala, sun mutu deiyoida, Samaria kurure. Samaria mutu talepra, ila nimi deiyo ngeboda, Remalyadi deipu mi, Pekah kurure. Samaria mutu nesala cap, Pekah capda, puto yambulanunpu kununge. Sun puto weik gum cadi, aneng tep kwar men dangkamrume. Atep nengeda, ne tek sisi upu pepkene. Kange bongtona gum dipapu, sundi, ‘Allah er dipapu melipra kalengkamsere’ tenen, pio pe deipra, teka men tenepnemumnyopda, telep kupra men kunkamrume.” Allahdi nabi Yesaya tep peipupa, Yesayadi, Raja Ahas tep pepu.

Allahdi kareprepa, Imanuel penkameng ngebo yankamua tep, pepu upu

10 Ton taruda, Allah er si Yahwehdi, nabi Yesaya deiki aupu peipupa, Yesayadi, Raja Ahas tep, ton cap pepra deipu upu ake. 11 “Ahas, kandi si eremrum Allah, er si Yahweh tep moropkurume. Ada, ‘Allahdi ware keca ton peten keipsetupa, eptepedi teka teneptepe do?’ tenen, moropkurume. Allah Yahweh erdi sun tep, peten keipkamser ngeda, nimi depnedi banungaida, karenai utara do? Im deiki tara do? Kandi tenepmemtopu moropmemnyopda, Allahdi peten kemdina keca karepsetupa, ikin men kuptue.” Allahdi peipu. 12 Upepu dinin, Ahasdi tamupra pepu. “Uo, nedi peten kemdina keca tep men moropkamne. Deiyoda, nedi ne nai Allah Yahweh tep, men asimpetenkamne,” pepu.

13 Upepupa, nabi Yesayadi tamupra pepu.

Uo, nun apu bo Dauddi deipupa, dadeipdanen, yakararum nesala yumada gekepneso. Sundi yuk neng tep, ‘Derepsenung do?’ tenena gum dipapu, kurpeterum ngeda, yambul mali kurum dinin, ‘Allahdi derepserur do?’ tenena gum dipapu, er tep kurpeterum ngeda, ila mali weik cadi, warya tep kurum do? 14 Ange tep ngeda ukutaruda, Allah ^{▼▼Allah – Acada, Ibrani upu deiki di, Allah er si tep, ‘Adonay’ ton pepra sekya cadi, nundi aupu deiyo ngeda, konum jenek kupra sekmupu.} akeca-keca yuma taleredi, ila puto weik ngeboda, er pedipapu apeten kemne kecada, sun damai peten keipkamsere. Akecada ake. Tek sisi nimi dona gum kaber ner tenpu di, mundu douamyanen, sal mi deipkamre. Konum deipre pangeda, ami er si tep Imanuel ^{▼▼Imanuel – Ibrani upu deiki di Imanuel penunga deiyoda, ‘Allah nun cap, nun cap, kikiman kunup ngebo’ tenen, ‘Imanuel’ penunge (Mat 1:23). Apepu ngeda, Yesus amenda dortaru yankamua tep pepu.} penkamenge. 15 Ami deipmengepa, nepbaramreyane, kange doupredi, jen keca er yuk dopra jere taruda, ‘Mali kun kecada ace, telep kun kecada ace,’ tenen, telep kun kecapu, wepra teneredi kunkamre. Malinge yumada, men kunkamre.

16 Ange yuma kapul men kupre taruda, kandi, ‘Uo atara nengda, ila puto nengdi, popbisipsenung’ tenen, kware kukere nesala yumada, ne Allahdi gum kupra deipkamne. Ada, Aram mutu nesala cap, Pekahdi talerur Israel nesala cap yumada, nedi wenepnedi, anesala gum kupra deipkamne. Amutu-mutu yumada, mali kupra deipkamne. 17 Ada, ne Allah Yahwehdi, ukupkamne ngeda, lap pepkukene. Nedi peipnepa, sun Asyur mutu nesaladi, kan cap, kandi talerum nesala cap, kan nai bodi deipupa, dadeipdanen, yakarami nesala cap, kan pe nyapu sisa cap, anesala yuma tep, sun nong deiki ikin keca weik deipsengepa, kange mun kange dounkamrume. Sun Efraim yala nesala cap, Yehuda yala nesala cap, dipru wilimdaramidi, bokra yuk-yuk keami taruda, ‘Angeda ila mambule,’ teneramrum dinin, angeda yambul mambul pua. Amenda taru ikin kupkamsere ngeda, ila mambulnge kunkamsere. Ada, ne Allah Yahwehdi, Asyur mutu yu neng cap, sun ila nimi deiyo ngebo cap, dopra deipnepa, sun Efraim yala nesala kurum mutu cap, Yehuda yala nesala kurum mutu cap, yangedi popbisipkamsenga tep pepkene.

18 Ataru kupkamre ngeda, Allah Yahwehdi Mesir mutu neng cap, Asyur mutu neng cap, dopra deiprepa, abutene mutu jen talenge nengda, nimi weika di yankamenge. Ada ukupmantoda, Mesir mutu neitamai, Nil me deiki deibum weika di amuramretopu, anengda weika di, sun mutu poryankamsenge. Tonda, ukupmantoda, Asyur mutu neitamai mong gung weik kuramengtopu, sun Asyur nengda, denge weika di, sun mutu poryankamsenge. 19 Ayu neng dopra deipnepa, sun kumum mutu neitamai konum yangedi, gung weik bupra wekamengada, ukupmantoda, daromdongonai cap, gel tengne pumbon cap, kot damai cap, mutmuta papra, telem tamamrai cap, mokon derirurai yuma cap, deibum weik amuramretopu, anengda denge weika di, sun mutu yangepa dekpepkamre.

20 Uda ataruda, Allah er si Yahweh, akeca-keca yuma taleredi, ila puto weik ngebodi, Efrat me ortara Asyur mutu neng doupra yaredi, kupkamser ngeda ake. ‘Sun Yahudi yala neng yuma ali dakamenge’ tenen, sun potong yuma toupkamsenge. Ada, ware neng do yuma, sun giso potong cap, nong potong yuma cap, yan potong cap, bana potong yuma cap, toupsengedi, gum kupra deipkamsenge. Ukupsenge pangeda, ali weik dangkamrume.

21 Ataruda, sun Mesir mutu neng cap, Asyru mutu neng cap, sun Yahudi yala nesala kumum mutu neitamai talepra koumum keca yuma cap, sun talepra peimum gam keca yala-yala yuma cap, gum kupra deipkamsenge. Ukupkamsenga tep nengeda, ware ngebo do, sapi bisam tenpu kwaptuopda, kange deipkamre. Domba bisam tenpupu akwaptuopda, kange deipra kunkamre. Deiyoda, yuk jen keca yala-yala yuma, gum kupkamra cadi, abisam butene di, moum teyungpu dopra jeptuopda, gam kutue. Tonda, bura tara mong mokonpu dopra jeptuopda, gam kutue. 22 Sun yu nengdi, Yahudi yala nesala kumum mutu yuma, gawal dakamseng dinin, amutu neitamai nimi yambulanunpu tapsengepa, gam kunkameng nesala yumada, tek sisi moum teyung cap, bura tara mong mokon cap jepra kunkamenge. Yuk jen keca yala-yala yuma, gum kupkamra tepa.

23 Tonda atarupu, dan mutu do yuma, anggur wa peramengai ngeda, kunumna pio weik, kunumna weik gat keca, er si perak, 11 kilo deiki di kunuamtenge dinin, telep keca wai dam yuma, sun yu nengdi gum kupra deipmengopda, sun kunumna weik keca anggur wa peramengai, takke keca cap, tali mutmuta cap, punupra papkamre. 24 Ukuprepa amutu bankameng neng yumada, ‘Anggur tapu du dakra kipkamep’ tenen, men benkameng dinin, sun dipapu pe deipra, jen cap, mar cap doupra benkamenge. Amutu yumada, takke keca cap, tali mutmuta cappu papkamra tep, pepkene. 25 Ada mutu bukamya damai, wa peramengai yuma men benkamrume. Ada amutu yumada, takke kecapu paptapkamra tepa. Ukuprepa, nimidi awaidam men benkameng dinin, amutuda sapi bisam cap, domba bisam cap pein tuaipu kupkamre. Allahdi nabi Yesaya tep peipupa, Yesayadi, Raja Ahas tep lap pepu.