Isa 8 | XteSC | STEP | Allah er si Yahwehdi, ne Yesaya tep pepneu. “Domba bol kopra ketengai deipipa, kalapudi ila pala kupunge dopropmemdi, adeiki di, sengna keca lap pepra sekeipkurume. Ada, ‘Maher-Syalal Hash-Bas,’ upepra sekeipkurume. Aupu deiyoda ake. Ada, ‘Amutu yuma, menmena sikke bukra gawal dakurume. Tonda, amutu kure keca yuma, dalupra dopropkurume,’ pepra sekurume.

Isaiah 8

Samaria mutu neng talerami bung keca yumada, sun Asyur mutu nengdi, ange yuma dalupra dopropkamenga tep, lap pepu upu

1 Allah er si Yahwehdi, ne Yesaya tep pepneu. “Domba bol kopra ketengai deipipa, kalapudi ila pala kupunge dopropmemdi, adeiki di, sengna keca lap pepra sekeipkurume. Ada, ‘Maher-Syalal Hash-Bas,’ upepra sekeipkurume. Aupu deiyoda ake. Ada, ‘Amutu yuma, menmena sikke bukra gawal dakurume. Tonda, amutu kure keca yuma, dalupra dopropkurume,’ pepra sekurume. 2 Aupu sekumem taruda, kandi nimi butene kongpepmempa, asengne keca yana dipeteprengedi, ‘Asekmarem ngeda, Allahdi peipkeutopu, pio tek sisi sekmaruma,’ pepkamkerenge. Ada, ne si eremna ati pumbon pel dona deiyo ngebo Uria cap, tonda, Yeberekya er mi Zakaria cap, upupmempa yana dipetepkurenge.” Allahdi ne Yesaya tep pepneu.

3 Upepneu taru nati tamupra besi. Besidi, ne ner cap kikiman dakuramnumupane, ne ner mundu doupu. Douamnganen, sal mi konum deipu pangeda, Allah Yahwehdi pepneu. “Amida, er sida, ‘Maher-Syalal Hash-Bas,’ pepkurume. 4 Ami si pepkamrumada, mesum tep gume. Ada, ami kapul men nepredi, erdi ‘Nanino, ne naio,’ kapul men pepmare taruda, Asyur mutu ila nimi deiyo ngebodi, amutu neitamai yaredi, Damsyik mutu cap, Samaria mutu cap wekredi, sun talenge keca yala-yala yuma, dalupra dopropredi, er pe mutu tamupra dubenkamre.” Allahdi ne Yesaya tep peipneu.

5 Allah er si Yahwehdi ton cap dukdongopra, ne tep lap pepneu. 6 “Ne Allahdi kareramsi mutu neitamai, bouna di embaramre me, me si Syiloah me tep, amutu kunge nesaladi, ‘Ameda nun songe,’ tenenunge. Tonda, ne Allahdi Aram mutu deiyo ngebo, er si Resin cap, Israel nesala sun deiyo ngebo er si Ramalya, er mi Pekah cap tep, wenepkamneng ngeda, konum gekepidi, kange deipra kununge. Anesaladi ukununga tep nengeda, wenepkamne. 7 Amutu nesaladi, mali weik kununga tep, ne Allah Yahweh, akeca-keca talenedi, ila puto weik ngebo kununa cadi, amenda taru kupkamne ngeda ake. Asyur mutu ila nimi deiyo ngebo cap, er jen talen neng yuma cap, dopra deipnepa, Yehuda yala nesala mutu yana warekamenge. Sundi yana kupkamseng ngeda, ortara ila me er si Efrat, ame deipra opbaredi, me pirman pamre keca dopra baramretopu, kupkamsenge. Ada, Asyur mutu ila nimi deiyo ngeboda, er mambul kurenga cap, er puto kurenga cap deiki di, yana gemeseredi, popkamsere. Efrat me deipredi, me dana-dana diniksaka baredi, akuamre keca yuma doupra baramretopu, Asyur mutu ila nimi deiyo ngebo yaredi, sun tep utopu kupkamsere.

8 Me deipra opbaredi, orkepra, akepra kemseredi, tenpu mutu yuma me dipapu inimdongoramretopu, Asyur mutu jen talen nengdi, sun Yehuda yala nesala kumum mutu yuma yana wareksengedi, dekpepkamsenge. Ukupmanto ngeda, mokon pumbon wekmengepa, giso buntumamsertopu kupkamsenge. Ukupkamseng ngeda, sun pedi men lyepdatume. Tonda, ma pol di tenpai inimdongoramretopu, Asyur mutu jen talen nengdi, sun kurum mutu yuma elipronkamsenge. Akeca yuma ukupkamsenga tep nengeda, sundi upenkamrume. ‘Uo, Imanuel, Allah nun cap kikiman kutepedi melipsetue,’ pepra, mali kange doupra engenkamrume.” Allahdi ne Yesaya tep peipneu.

9 Allah er dipu pepu. “Akupkamrenge tep, mutu-mutu yuma dakumum nesalada, aupu gekepmumdi, kange men deipkamrume. Sundi, ‘Nimi porbenkamep’ tenen, kange deipra, ila upu pepra kulmana derinkamrum dinin, ne Allahdi wenepra popkamsena tep, kange mun kange doupra kunkamrume. Sun yuk karen mutu dakumum nesalada, gekepneso. ‘Nimi porbenkup’ tenen, jen cap, mar cap, ya cap, akeca-keca yuma ketenem dinkamrum dinin, ne Allahdi wenepra popkamsena tep, kange mun kange doupra kunkamrume. Nedi sun yuma popra gawal dakamsene.

10 Tonda, sundi, ‘Yuk mutu nesala porbenkamep’ tenen, ‘Ukupkupe,’ pepra, upu sisingkamrum dinin, nedi sun tep upu seksenyopda, sun tenepmarumnge nong men kupkamre. ‘Ukupkamep’ tenen, ketenepkamrum dinin, sun tenepmamumnya utopu, men kunkamrume. Atenepmarumnge yuma, gum kupra deipkamsene. Aupu yuma pepmasenada, mesum tep men pepsene. Imanuel penungtopu, Ne Allah cap, Israel yala nesala yuma cap, kikiman kunkamapa tep pepsene. Atep sundi, ‘E Yahudi yala nesala yuma popra, gawal dakamepe’ tenen, kange men derinkamrume.” Ne Allahdi pepsene.

Allahdi Yesaya tep, “Angeda ukuna gume,” pepu upu

11 Allah Yahwehdi, puto upu di ne tep peipneu ngeda ake. “Sun tali-tali dakunge nengdi, tenepra kungetopu, men tenenkamrume. Ukuna gume pepkene,” pepneu. 12 “Ware deiyo neng do yuma, ati buplan dekdongopra wekmengedi, sundi, ‘Ukupkupe,’ tenepra penge upu tep gekepmumdi, kwar dangna gume. Atep, sun yuk mutu yu neng upu sisikmengedi, pesenge upu gekepmumdi, ‘Uo, sundi nun Yahudi nesala yuma popra, gawal dangkamsenge,’ tenen, kwar dangna gume. 13 Ware neng do yuma, sundi kwar dangamengtopu, sunda kware men dangkamrume. Dinino, tenipkamrume. Ne Allah Yahweh, akeca-keca yuma talepra, im deiki jen talen malaikat yuma, sun ila deiyo ngebo kununa tep, kwar kunkamrume. Neda, mali keca tenpunge peda men kunedi, Pio Lek Ngebo kunune. Atep, ne sipu eremnemumdi, ne tepapu kware tenepra kumumnyopda, yuk keca tep ton kware men dangkamrume.”

14 “Sun Yahudi yala nesala yumada, sun teleppu kunkamruma tep, melipra kalengkamsen ngebo, ne tenpua. Dinino, neda yan giso dungne gil utopu kununa tep, ukupmantoda, nimidi bisi bange taruda, gel di yan giso dukrepa, kot sangamengtopu, nedi wenepkamsen taruda, sun Yehuda yala nesala cap, Israel yala nesala cap, utopu kupkamsene. Ada, nedi wenemna keca weik, sun deiki karepsenepa, sundi, ‘Uo,’ tenen, kange mun kupseredi, dipru pu jenkamsera tep pepsene. Ange utopu ukupmantoda, nimidi, ‘Kapang youpkamre’ tenen, pena pemengai kapang mangkau di barepa youramretopu, nedi wenemna keca weik sun deiki karepsenepa, sun Yerusalem mutu kumum nesala yumada, pena youprepa, koudaramretopu kupkamsere. Ange konum peipsene.

15 Nimidi bisi bange taruda, gel di yan giso dukrepa, kot sangamengtopu, sun Yerusalem mutu kurum nesala weika di, yan giso dukserepa, sakmumyopda, kange di ton cap men bukronkamrume. Ada, sun yuk karen mutu yu nengdi, sun Yerusalem mutu kurum nesala weika di, yan talepra ateng kousengedi, sun pe mutu tamupra dubenkamsenge.” Allah Yahwehdi, sun Yahudi yala nesala yuma tep pepu.

16 Upepupa, nabi Yesayadi, aupu pepu. “Allah Yahwehdi, kunkamser keca yumada, ‘Betapra kael kepkamruma’ tenen, sekra deipkusene. Aupu sekra deipsenedi, ne upu moupra talenge neng karepnepa, sundi, sun Israel yala nesala cap, Yehuda yala nesala capdi deipmumpa, dadeipdanen bankameng nesala yuma kael kemkamenga tep, peterembankamenge. 17 Yakubdi deipupa dadeipdanen, baramyane, deipi nesala yumada, Allah er si Yahwehdi, ‘Sun mali kunge kecada ne dabale’ tenen, amnyo karekra konum tapmasere. Dinino, ‘Nun nai Allah Yahweh, dan taru tamupra melipkamser do?’ tenen, teka tenepra dinapu kunkamne. Neda, ‘Allah er dipapu melipsetu’ tenen, Allah tepapu teka tenepra, er damaipu benkamne. ‘Yuk keca di ton melipnetue’ tenepra men kunkamne,” nabi Yesayadi pepu.

18 Yesayadi pepu. Ne cap, Allah Yahwehdi kareramneupa, deipsi nyapu cap tep, Allah Yahweh erdi ila mambul si ^{▼▼mambul si – Yesayadi apepu ngeda deiyo ake. Ibrani upu deikida, er pe si Yesaya deiyoda, ‘Allah Yahwehdi lyemserure’ tenen, ‘Yesaya’ perami. Er men di deipu mi sida, Syear Yasub deiyoda, ‘Nimi yambulanunpu tamupra yankamenge’ tenen, ‘Yasub’ perami. Mi butene deipunge, er si Maher-Syalal-Haz-Baz aupu deiyoda, ‘Amutu menmena sikke buktapkamrume. Amutu keca menmena dalupra dopropkurume’ tenen, asi perami. Atep, ‘Allahdi kupkamsere ngeda, asi-asi deiki di kael keptepe,’ tenepudi, Yesayadi pepu.} konum karepseue. Asi moupra tenepmepya deiki di, Allah Yahwehdi kunkamserenge yumada, betapra kael keptepe. Tonda, Allah Yahwehdi akeca-keca yuma talepra deiki tara kuredi, im deiki jen talen malaikat, sun ila deiyo ngebo kurure. Er si cap, puto capda, Sion ^{▼▼Sion mutu perami ngeda, ada Yerusalem mutu tep perami. Tonda, amutu si tupa penunge. Amutuda tenpu mutu dinin, amutu sida butene penunge. Yerusalem mutu ton penunge.} mutu deiki karepseupa, kurure.

19 Erdi nun tep, kunkamsere ngeda, konum teneramseua cadi, ware keca deiyo tep, mali neng kori asimbarum do? Ada, asuru kwa neng cap, deramenge neng sambala tep, upu sisingbange neng cap, ‘Amenda ware kupkamser do?’ tenen, asimbarumum ngeda, mali kurume. Sun anengdi inipra mur-mur penung upu cap, meri penung upu capda, ware keca deiyo tep gekerum do? Nun gam tupa kunup nesaladi, konum deamenge nesala sambaladi penge upu deiki di, amenda kupkamserenge tep, tek sisi kael keptepe do, gum do? Angeda men kupmanto cadi, sunda ware keca deiyo tep, sun nai bo Allah tep men asimbarum do? 20 Sun ton moupra tenepkurume. Allahdi ne tep peipneupa, sekeipmasen upu utopu tenepra, men penge neng yumada, tali nong yopu kununge. Ware neng do yuma, ne sekeipmasen upu utopu tenepra, men penge neng yumada, amenda taru sunda dirinai men kunkamenge. Sun yumada, tek sisi gum kupkamenge.

21 Aneng cap, ato neng sun upu gekenge neng cap, amutu yuma jene putapredi, gum kupre taruda, kange mun kange doupmengedi, mutu dana-dana yuma neitamai, jene tep epra embankamenge. Dinino, epra men jepmengopda, pio putanapu kurepa, sundi sun ila nimi deiyo neng, Raja neng cap, sun nai bo Allah cap tep, mali-mali upu pepra deremkamenge. 22 Sun urasin erepra, im deiki dipetepkameng dinin, Allahdi men makupyopda, ka tamupra tuai tara ton, ‘Ware ngebo melipsetu do?’ tenen, dirbenkamenge. Dirbenkamenga peda, tuai tara yumada, jene putana cap, yuk kange mun keca yala-yala yuma cap, kunungna kecapu kuprepa epmengedi, kware weik kunkamenge. Amenda taruda, Allahdi anesala yuma dopra, pio kunungnaipu dokotepkamre.

Ila nimi deiyo ngebo amenda taru yankamrenge tep, peiamu upu

23 Dinino, sun Yahudi yala nesala yuma kurumu mutu neitamaida, kange mun kange doupra kunkamrum ngeda, tupa men kunkamsere. Amenda sirya taruda, Allahdi ange yuma gum kupra deipkamre. Yahudi yala nesala kan-kan neitamai di, sun Naftali yala nesala cap, Zebulon yala nesala capdi, tapra bendomi mutuda, Allah Yahwehdi, ‘Amutuda, mambul gum mutu,’ teneramudi amu keamu mutu dinin, amenda taruda, kange di ton cap amutu ereipkamre. Amenda taruda, Allahdi amutu neitamai yuma telep kupra ereiprepa, yuk mutu nesala yumadi amutu tep, ‘Ila mambul mutu kurure’ tenen, gispal donkamenge. Ada, keteng wengbaramre tara, ila laut mokon damai di dipra, Yordan me gupra ortara keteng yakan tara yuma, telep kupra ereipkamre. Ange utopu, Galilea tara peda, yuk nimi bo neng yana ke tep kurami dinin, tapra bendopi mutu peda, amenda taru Allahdi amutu telep kupra ereipkamre.