Isa 9 | XteSC | STEP | Allahdi peipupa, nabi Yesayadi pepu. “Allah tep teka men tenenung nesalada, ikin keca weik kuprepa, kange mun kange dounkameng dinin, amenda taruda, ange yuma ka di tamupra telep kupra deipkamsere. Menmenada, Zebulon yala nesala kunge mutu cap, Naftali yala nesala kunge mutu capda, amu keipkamrepa, ikin weik kunkameng dinin, amenda dorkupkamre taruda, yuk mutu telep kupra deipkamre. Ada, Galilea mutu, sun Yahudi yala gum nesala cap, wisipra kunge mutu, telep kupra deiprepa, yuk nesala yumadi amutu tep, ‘Uo, amutuda mambul weik mutu,’ pepra gispal donkamenge. Ada Galilea tara dinin, ila laut mokon damai cap, Yordan me embaramra damai cap, telep kupra deipkamra tep pepsene,” Yesayadi pepu. Tonda, amenda dorkupkamre ngeda, Allahdi amutu yuma telep kupra deipkamunge tenena tep, Yesayadi aupu gekepudi, dukdongopra sekeipu. Ada, amenda dor kupkamunge tep, lap pepu.

Isaiah 9

Nimi Lyemna Deiyo Ngebo dortaru yankamrenge tep, pepu upu

1 Allahdi peipupa, nabi Yesayadi pepu. “Allah tep teka men tenenung nesalada, ikin keca weik kuprepa, kange mun kange dounkameng dinin, amenda taruda, ange yuma ka di tamupra telep kupra deipkamsere. Menmenada, Zebulon yala nesala kunge mutu cap, Naftali yala nesala kunge mutu capda, amu keipkamrepa, ikin weik kunkameng dinin, amenda dorkupkamre taruda, yuk mutu telep kupra deipkamre.

Ada, Galilea mutu, sun Yahudi yala gum nesala cap, wisipra kunge mutu, telep kupra deiprepa, yuk nesala yumadi amutu tep, ‘Uo, amutuda mambul weik mutu,’ pepra gispal donkamenge. Ada Galilea tara dinin, ila laut mokon damai cap, Yordan me embaramra damai cap, telep kupra deipkamra tep pepsene,” Yesayadi pepu. Tonda, amenda dorkupkamre ngeda, Allahdi amutu yuma telep kupra deipkamunge tenena tep, Yesayadi aupu gekepudi, dukdongopra sekeipu. Ada, amenda dor kupkamunge tep, lap pepu.

2 Menmena taru, ikin keca weik kuramupa, pio kange mun kange doupra, kunungaipu kurami nesalada, ataru neitamai ila dirin kure keca konum epmange. Ikin keca cap, nimi dena cap, weik kuramu mutu neitamai kurami nesalada, ukutaruda ila dirin keca konum epmange. Ada, ipna taru keteng dopredi, dirine weik kuramretopu, anesaladi dirine utopu keca, ila mambul keca konum dinmange. 3 Sun Yahudi yala nesalada, ikin weik kuramipa, sun nimida metek kupbaramyane, gum kupmanto kurami dinin, Allah kandi sun tep meliamuma deiki di, ukutaruda sun nimi gung weik tapakra kupbanmange. Tonda, kandi ukupmempa, ila kange deipra teleppu kupbankamenge. Kandi sun tep meliamuma deiki di, pio telep kange deipra kunmange.

Ukupmanto ngeda, nimidi wa pepra sun kouramenge keca yuma, konum nong weik kupre taruda, akeca yuma kipra deipmengedi, pio telep kange deipra kuramengtopu, ukutaruda sun Yahudi yala nesala, kange deipra pingpinga di kununge. Ukupmanto ngeda, ton tara nengdi, yuk tara neng tep, popbisipmengedi, amutu talerami keca yuma dalupra dopropmengedi, ila di kange deipra, pingpinga di kuramengtopu, ukutaruda sun Yahudi yala nesaladi, kange deipra kununge.

4 Ukupmanto ngeda, yu nengdi, sun popbisipmenge nesala tep, co balena di bongoramengtopu, nun popbisipsei nesaladi, ikin keca weik nun nong deiki deriramseinge yumada, Allah kan puto deiki di konum gum kupra deipmaserema tep, kange deipmepe. Pumun taru, Gideon cap, er jen talen neng cap, nimi yambulanunpu kurami dinin, kan meliamuma deiki di, sun Midian tara nesala puto weik kurami dinin, aneng yuma popbisipitopu, ukutaruda, kandi nun tep konum melipmaserempa, teleppu kunkamepe. 5 Tonda, sun jen talen nengdi yan kirameng keca er sida sepatu cap, sun kenengnung opkal cap, keneknedi, nimi poramipa, yapi bapunge yumada, uku dongopkamepe. Uku dongopmepyopda, akeca yuma uku di jepropkamre ja.

6 Ange yumada, mesum tep men penupe. Amenda taru, pio teleppu kunkamserenge deiyoda ake. Ada, Allahdi teneramseutopu, ukutaruda nun lyemna tep, sal mi tenpu konum deipmaserenge. Allahdi ila mambul mi konum ketenepra karepmasere. Nun lyemna tep ami konum karepmaser mi erda, amenda taru akeca-keca yuma talepra, nun ila nimi deiyo ngebo kunkamsere.

Ukupra dakuramrepane, nimi yumadi er si eremengedi, er si tep penkameng ngeda, ake. Pio Mambul Ngebo kurure. Nimi makuna tep, Dipru Kwa Dimna Deiyo Ngebo kurure. Ila Puto Weik Ngebo Allah kurure. Nun Nai Allah, Pio Gam Kunkamre Ngebo kurure. Allah cap nimi cap, kikiman telep kuna tep, Antamdina Deiyo Ngebo kurure. Ange-ange yuma, nimidi er si tenepra pena tep, aupu penkamenge.

7 Erda, akeca-keca yuma cap, nesala yuma cap talepredi, ila nimi deiyo ngebo pio akunkamre. Erdi akeca-keca yuma talepra kunkamre taruda, men gum kupkamre. Tonda, erdi ‘Allah cap, nimi cap telep kupra kikiman kunkameng’ tenen, antamdina deiyo ngebo kunkamser ngeda, pio akunkamre. Ange peda, men gum kupkamre.

Pumun taru ila nimi deiyo ngebo Raja Dauddi taleamu mutu cap, nesala cap yumada, er dipapu pio taleredi, ila nimi deiyo ngebo pio akunkamre. Raja Daud nimi deiyo ngebo kuna tep, ila mambul bungna keca deiki bungamutopu, angebo peda, akeca deiki pio abungkamre.

Raja Dauddi taleamu mutu cap, nesala cap yumada, ayankamre ngebo, er si puto deiki di akeca-keca yuma pio talenkamre. Erdi pio telep kupra upu bongdinkamsere. Tonda, er mali kun keca tenpunge peda men kuredi, pio dumsisipu kunkamra deiki di, amutu yuma cap, amutu kunkameng nesala yuma cap, telep kupra talenkamre. Erda ila nimi deiyo ngebo kuredi, talenkamrenge yumada, pio akunkamre. Ukutaru cap, yuk taru yuma cap, pio tep kunkamre. Erdi pio telep kunkamrenge yuma, men gawal dakmanto kunkamre.

Ange yumada, mesum tep men kupkamre. Allah Yahwehda, akeca-keca yuma taleredi, im deiki jen talen malaikat yuma, sun ila deiyo ngebo kurure. Allah Yahweh, akeca-keca yuma talepra deiki tara kuredi, Ila Eremna Ngebodi, pio pe deipra, ‘Angeda tek sisi kupkamne ja,’ tenepredi, er ila puto deiki dipapu, ange yuma tek sisi pel dorya deiki di kunkamre. Allahdi peipua, Yesayadi sekra deipu.

Allahdi Israel nesala tep, yu kuprepa wenepkamra tep, pepu upu

8 Allahda, akeca-keca yuma taleredi, ila puto weik ngebodi, Yakubdi deipupa dadeipdanen yakarami nesala tep, aupu pepu. “Sun Israel mutu kunge nesala yumada, sun mali kunange tep, wenemna keca konum ketenepsi,” pepupa, sun Efraim mutu kunge Israel yala nesala yuma cap, tonda Samaria mutu kunge nesala yuma capda, aupu gekepidi, ‘Allahdi wenemna upu konum pepmaser,’ tenepra, kael kepi dinin, sun anesalada dipru eremna cap, salnong-nong kuna cap deiki di, “Dyo, ukupkamsera peda, dakwapye. Nundi ukupkamepe. 9 Nun podan nengdi, gel duduya deiki di bupra, deia doupu ila-ila ati arum yumada, konum dakra tapsenga peda, dakwapye. Nundi ukupu ila-ila atida, gel di dopmupu ngeda, nun ati arum yuma tamupra, telep kupra lepsisikra deiya dopkamepe. Tonda, nun urasin telep co yumada, konum kweptapsenga peda, nundi Libanon mutu paramre wapum co, ada cemara co urasin pio telepnge, adipapu tamupra punupkamepe. Atep popsetenga peda, nundi ange yuma lepsisikra dopkamep ja!” pepi.

10 Upepya tep nengeda, Allah Yahwehdi sun mar podan neng tep, dipru puto keipu. Ada, sun yana popra bisbisa kemna tep, puto weik keipupa, anesaladi, ‘Israel tara nesala porbenkupe’ tenen, konum ketenepi. 11 Ukupra ketenepidi, keteng yakan tara di sun Siria mutu kurami jen talena neng cap, tonda keteng dangban tara kurami Filistin yala jen talena neng cap, sun yumadi Israel yala amutu kurami nesala tep, adipapu bena popidi gawal daki. Ayu nengdi, Israel yala nesala tep popra sikke buktapi. Uda, Allahdi sun Israel nesala tep, ikin keca weika di sun nong deiki deiamu dinin, erdi, ‘Dyo, akonuma’ tenen, er yuda gum men kupu. Erdi tupa yu kupupa, er buru erepudi, Israel yala nesala tep, tupa wenemnapu kuramu.

12 Deiyoda, Allah Yahweh akeca-keca yuma deiki tara erepra, ila puto kurur ngebodi, im deiki kunge jen talena malaikat yuma, sun deiyo ngebo kurure. Ukurur dinin, Israel nesala sun deiki pio ikin keca deipra wenepka peda, sundi, ‘Uo aikin deipser ngeda, pio mambule,’ men tenepi. Tonda sun mali kuraminge tep, ‘Uo, nun mali kunange tapra, nun nai bo Allah Yahweh, er damaipu tamupra bena, er sipu eremkamepe,’ men tenepi. 13 Ange men tenepya tep nengeda, Allah Yahwehdi, tenpu taru dipapu, ukupmanto, sun giso tara cap, sun der tara capda, sektapudi donoku. Ada, sun Israel mutu neitamai talepra kurami nimi deiyo neng cap, sun amutara kupra, yuk mambul pel talepra dorami deiyo neng cap yumada, tenpu tumi dipapu poptapra gawal daku.

14 Ada, tek sisi ngeda, Allah upu talepra kurami wisi-wisi neng, sun ila kael keami neng cap, tonda amutu kurami nesaladi si eremamidi, puto kurami deiyo neng cap, sun yuma tep nengeda, wenepra poptapu. Tonda, Allahdi, ‘Upepkamrume,’ pepra, peramunge gekeramidi, er upu lap perami deiyo neng, nabi-nabi neng kurami dinin, mok upupu peteremami neng cap yumada, popra gawal daku. 15 Ada tali tep guma. Deiyoda, amutu neitamai nimi deiyo kepra taleamidi kurami nengdi, sun taleami nesala tali bisipu doupra barami. Ukuramya tep, adeiki di sun taleamipa, sun upu gekerami nesalada, kange wang-wangpu pepnapu kupka cadi, wilipra yuk-yuk kemdiramipa, mali kuna bisipu barami.

16 Sun Israel mutu neitamai kurami deiyo-deiyo nesalada, ukuramya deiki di, sun Israel yala nesala yuma, tek sisi bisi tapra, mali bisipu dombaramidi, sunda pio dipru kika nesala kurami. 17 Ange tep nengeda, Allah Yahweh, erdi akeca-keca yuma taleredi, ila puto weik ngeboda, erdi amutu kurami kaber neng yuma cap, tonda amutu neitamai kurami solu nerapu cap, amutu kurami wein nyapu cap yuma tep nengeda, Allahdi, ‘Uo, sunda bicaue, amutu nesala men wenepkamne,’ men tenepu. Ange gum dinin, sun yuma tep adipapu tamna gum di wenepu. Ukupka peda, tali tep guma. Deiyoda, sun ataru kurami Israel nesala yumada, mali kun kecapu talepra kuramidi, Allah tep men tenerami. Erdi, ‘Ange kunkamrume, angeda pio men kunkamrume,’ pepra deipu upu yumada, gekena gum di, yanitamami. Tonda, sun yumada, tali-tali upu cap, deiyo men kapu upu cap, tali pertamami. Atep, Allah bicau men kupudi, er yu kupupa, anesala yuma tep wenepu. Allahdi sun Israel nesala tep ikin keca weika di, sun nong deiki deiamu dinin, erdi, ‘Dyo, akonuma’ tenen, er yuda gum men kupu. Erdi tupa yu kupupa, er buru erepudi, Israel yala nesala tep, tupa wenemnapu kuramu.

18 Allahdi sun tep, ila wenemna keca karepka deiki di, sunda kange mun kupu. Ukupmantoda, amutu neitamai sun mali kurami kecada, tali paramre keca cap, takke keca cap utopu kupupa, uku bu jeramredi, atali keca yuma jedoramre utopu kurami. Tonda, nimidi, bura mutu neitamai, uku sekmengepa, ila uku buda, bura mutu yuma jenmaredi, ila ket im alau tara bukra weleramretopu kupu. Ada, Allahdi sun mali kurami keca cap, sun cap, popra gawal dakudi kupu. 19 Allah Yahwehda, akeca-keca yuma deiki tara kuredi, im deiki kunge jen talena malaikat yuma talepra, sun deiyo ngebo kurure. Allah erdi, sun Israel yala nesala tep, pio yu weik kupupa, anesala wenepu. Yu weik kupupa, amutu kurami Israel nesala, sun tep wenepka deiki di, ila uku bu jeramretopu kupupa, sun talerami mutu yuma uku jepropu. Sun amutu kurami nesala yuma peda, uku bu jerepa, adeiki co kwepra dongomamengtopu kupipa, uku di jepra gawal daku. Ton ngebodi, er kabo tep popnapu kupu. Tenpu ngebo peda, ton men bicau tenepdai. Sun yumadi podanapu kurami.

20 Ataruda, ila jen putan taru kupkamra cadi, tenpu ati nengdi, sun dumsisi tara kunge nesala tep, orbena popidi, sun jen keca dalupra dopropi dingeda, jepra gawal dakropi. Dinino, men boupupa, tupa jen putanapu kuramu.

Atep, sun tebalal tara kikiman kurami nesala tep, orbena popidi, sun jen keca peda dalupra dopropi dingeda, jepra gawal dakropi. Dinino, ange jepropya peda, men boupka cadi, tupa jen putanapu kuramu. Pio jen putana weik kuramnga cadi, sun pedipapu deiami nyapu cap, sun tara neng cap yumada, poprapidi sun nong peda jepropi. 21 Ataruda, ila ikin keca kupka tep, sun yumada, Israel yala nesala dinin, daneitamai di bokra, sun Manasye yala neng cap, Efraim yala neng cap, tupa podanapu kuramrei. Ukuramrei dinin, angepu gum. Sun Efraim yala neng cap, Manasye yala neng cap, sun butene kikiman kepropreiopda, sun Yehuda yala neng tep porbenamrei. Ukuramreiya peda, Allah er yu tupa kupupa, sun anesala tep tupa wenemudi, ataru peda, ‘Kange di ton cap wenepkamne,’ teneredi, ketenemrure.