James 1

Yakobusdi, gonga kemna tep, pepu upu

1Ne Yakobusdi Yahudi yala neng 12 yala bokra, yuk-yuk amutu-mutu kumumdi, teka tenerum neng yuma tep, aupu sekeipsene. Ne Yakobusda, nun nai Allah cap, nun Deiyo Ngebo Yesus cap, sun talepnereipa, sun amutara kunedi, sun pelpu dopra kune ngebodi, aupu sekeipsene. Telepe pepsene.

Kurpeten keca kuserenge cap, kange mun keca kuserenge cap tep, pepu upu

2Ne kayapu, Yesus teka teneruma tep, nun weite-du utopu nesalao, gekepneso. Kange mun keca yala-yala weik kusere taru yumada, tenimtona gum, kange deiprap kunkamrume. 3Ada, mesum tep men pepsene. Sun kaele, teka tenepmepepa, kange mun keca kurpeteserya deiki di, teka tenenup kecada wisiserure. Wisipseryopda, tamna pio gum di, teka tenenapu tenepedi, pel pio palepra don neng kunkamepe. 4Teka tenenapu kupra, pel pio palepra doramepyanen, dipru wisipseryopda, nun telep kupra kun keca yumada, men suktalepkamre, pio dekpepra teleppu kunkamsere.

5Sun kan-kan neitamai di, ware neng do yuma, telep kuna tep, ila kaele deiyo keca men kwapseryopda, Allah tep moronkamrume. Sundi sun putapretopu, Allah tep moropmenge nengda, wenemna gum di tali lupra weika di karerura cadi, Allahdi tek sisi karenkamsere. 6Dinino, Allah moropkamre ngeboda, kange bongtona gum di, ‘Tek sisi karepkamnere’ tenen, moronkamre. Kange bongtona ngeboda, me longteng peprepa, me kait porai ayanapyanen, giproprepa cedoramre utopu kurure. Ukurura tep, kange bongtona gum dipapu teka tenena deiki dipu Allah moronkamrume.

7Kange bongtonapu kure ngeboda, ‘Allahdi akeca-keca karepkamnere,’ teneptu dinin, men karenkamemere. 8Ato ngeboda, er kange dipru tenpu men teneredi, butenemrure. Er kun keca neitamai yumada, kange moupra men teneredi, pio tenimtonapu kurure.

Amutara kunge neng cap, eremna neng cap tep, pepu upu

9Tali kankan kunge nengda, sun neitamai dadi teka teneramenge nengda, Allahdi konum lyepra ereipka tep, Allah er kangeda, ‘Anengda mambul nengpu,’ tenerura cadi, aneng kange deipra kunkamenge. 10Ila mambul neng, isomka nengda, sun kan-kan di teka tenemya deiki di, amutara kepbankamenge. Dinino, konum teka tenenunga tep, sun dipru cap, sambala capda, pio kunkamra cadi, sun peda kange deiprap kunkamenge. Ada mutmuta kait popmaryanen, ue tenpu di gum kuramretopu, sun nong cap, sun talepra kunge keca cap, gum kupkamra tep pepsene. 11Ketenge deipredi, bupu weik kupyopda, amutmutada, gelal sepredi koludorure. Kolupredi, kait sakreyopda, er urasin telep kuramre ngeda, gum kurure. Akeca gum kuramretopu, isomka neng peda, sun pel doramenga neitamai di, sun nong gum kupkamre.

Ikin keca kupserepa kurpeteserur keca cap, mali keca putapserepa, dipru gidoserenge cap tep, pepu upu

12Kange mun keca kupredi, kurpetere taru men tamredi, pio palepra pel doramre ngeboda, kange deipra teleppu kunkamre. Ada kurpeten taru neitamai yumadi, ikin keca weik kupmarea peda, ikin kange dakuramrepane, erda pio daramdinapu kuryopda, er menenga keca dopropkamra tepa. Amenenga keca dopropkamrada, Allahdi, “Ne tep kange deipnenge nengda, ukupra karepkamsene,” peiputopu, pio gam kuna deiyo keca dopropkamre.

13Ware neng do yuma, sun dipru mali tenena deiki di gidore taruda, “E, ada Allahdi, ‘Mali kupkur do?’ tenen, kurpetenmanere,” men penkamrume. Aupu men penkamruma deiyoda, Allah erda mali kun keca yumada men putarura cadi, mali keca deiki di, er dipru men gidomemetue. Mali keca di er tep, men kurpetepmemetue. Tonda, Allahdi nesala yuma tep, ‘Mali kuptenge’ tenen, mali keca deiki di, sun dipru men gidorure, tonda men kurpeteserure.

14Allahdi nun dipru men gidoserurdi, men kurpeteserur dinin, nimi yumada, sun pedipapu, ‘Ne yuk mali kupkun’ tenen, dipru mali tenena deiki di putaprepa gidorure. 15Pio putaprepa tenenapu kupyopda, amendada mali keca katuai nong kurure. Mali kun keca nong konum kupredi nepyopda, dapio mali kupbaramenganen, amenda sirya taruda, Allahdi uku jen ban dokotepkamre. Dokoteprepa, uku pio jenkamre.

16Uda ne kayapu, ne weite-du utopu kurum neng tep, ne dipru karesenune. Aupu ton pepkusene. Sun pedipapu mok keca men tenenkamrume. Tonda nong men kupkamre keca men pedidankamrume. 17Ware telep kun keca do yuma, pio telep dumsisi kun keca yumada, Allah er dipapu kareserepa, im deiki di yakaserure. Ada, im deiki dirin kure keca yuma ketekepra deipu ngebo, Allah er dipapu pio telep keca kareserure. Tonda, Allah erda, keteng deipredi kuki urasin yuk-yuk yaim-yaim peramretopu, pio men kurure. Allah er pel dopra kure keca yumada, pio tupa teleppu kurure.

18Allah er kange tenena deiki dipapu, dopropseudi, er tek sisi upu deiki di er nyapu kepra deipseue. Er tek sisi upu deiki di er nyapu kepra deipseuada, akeca-keca yuma ketekepra deipka neitamai di, uteneamu. ‘Ne nyapu sisa keipsi nengda, sunda menmenange, ila mambule kunkamenge. Akeca-keca yumada, ukupunge ketekepra deipkamne dinin, ne nyapuda menmenange utopu kunkamenge’ teneamseue. Uteneamseudi, nun dopra er nyapu kepra deipseu.

Telep kuna cap, amul di upu gekena cap tep, pepu upu

19Ne kayapu, nun weite-du utopu kurum nesala, sun yuma tep, ne bicau tenesenune. Apepkusen upuda, moupra gekepso. Nesala yumada, nimidi upu pepmengepa, ‘Adipapu gekenkamep’ tenen, dipru ketenem dinkamrume. Dinino, yuk nengdi upu penmangepane, ‘Sun upu yaniptapnedi, menmenada ne pe upupu adipapu pepkune,’ tenena gume. Upu pepkurum taru yumada, menmenada moupra tenepmumdi, upu nemupra bouna dipu penkamrume. Tonda, menmena yu kuna gume. 20Ada, Allahdi, nun tep, ‘Dumsisipu kunkamenge’ tenen, putare ngeda, nimi yu kuna deiki di telep kupra men kuptuma tep pepsene.

21Ange tep nengeda, sun dipru mali tenerum keca yuma cap, sun kankan mali kun keca weik akwapmarenge yuma cap, tamkamrume. Tapmumdi, Allahdi, ‘Ne upu sun dipru neitamai du moupkamre’ tenen, karepseu ngeda, kange bouna di kumumdi, gekepra doronkamrume. Allah er upu karepseu ngeda, lyepkamsera tepa.

22Allah upu pepsengepa, sun amul deikipu gekeptapmumdi, ‘Akonuma,’ men tenenkamrume. Ada, tali amul deikipu gekeptapmumyopda, sun pedipapu mok upu tenedarameng neng utopu kuruma tep, “Ukuna meme,” pepsene. Allah er upu deiki peseretopu, moupra gekepmumdi, angepu talepra pio dombankamrume.

23– 24Ware neng do yuma, Allah upu amul deiki dipapu gekenung dinin, men talepra dombange nengda, sun kurameng keca utopu ngeda, pepkusene. Ada, tenpu ngebodi oktu dopra, er pe urasin dipterepdaredi, er urasin kael kemrur dinin, oktu deipra yukai beryopda, adipapu er urasin epmare ngeda, lumdongorure. Angetopu, Allah upu pengepa, amul deikipu gekenung nengda, ‘Allahdi upepnere, ange ton ukupra pepnere,’ moupra men tenengedi, lumdongonapu kununga tep pepne.

25Dinino, ware neng do yuma, Allahdi, ‘Ukunkameng’ tenen, dumsisi kareamseu upuda, moupra pio kael kepmengedi, lumdongona gum di, pio talepra dombarameng nengda, sun kange deipra kunge keca yumada, teleppu kunkamenge. Allahdi dumsisi upu kareamseu ngeda, mali keca ateng koupra kuramseua neitamai di lopra derirserure.

26Ware ngebo do yuma, erdi er pe tep, “Ne teka tenepsa tep, dumsisi ngebo kunune,” tali petamrur dinin, er pere upu moupra tenena gum di, tali lupra pepyopda, angeboda mok upupu pedarure. Ato ngeboda, er teka tenepra talepra kurur kecada, deiyo men kupka tep, nong men kupkamre. Teka tenepu ngeda, talipu kurure. 27Nun nai Allah er kangeda, ‘Dumsisi teka tenen keca talepra kuna ngeda, ada mali keca yuma tapakra kuna gum kupmarenge. Ukupra teka tenenge nengdi, sun telep kunge kecada ake. Ada, sundi lyan nyapu cap, solu nerapu cap tep, bicau tenepra makununge’ tenerure. Tonda anengda, teka tenena gum nesaladi talepra kunge mali keca utopu kecada, pio talepra men kununge. Dumsisipu kununge.