Jam 2 | XteSC | STEP | Ne kayapu, nun weite-du utopu kupra deipseu nesalao, Allah erda ila mambul ngebo kuredi, pio telep-teleppu kuretopu, nun Deiyo Ngebo Yesus Kristus peda utopu kurure. Sundi Yesus tep, konum teka tenepruma cadi, nimi urasin epmumdi, dipru men bongdinkamrume.

James 2

“Nimi urasin dipetepra, dipru bongdina gume,” pepu upu

1 Ne kayapu, nun weite-du utopu kupra deipseu nesalao, Allah erda ila mambul ngebo kuredi, pio telep-teleppu kuretopu, nun Deiyo Ngebo Yesus Kristus peda utopu kurure. Sundi Yesus tep, konum teka tenepruma cadi, nimi urasin epmumdi, dipru men bongdinkamrume. 2 Ukupmantonge pepkusene. Uda, sundi, ‘Allah upu gekepkup’ tenen, Allah upu ati ^{▼▼Allah upu peteremna ati – Yahudi yala neng, sun Allah upu peteremna atida, nun gereja yambul atonun kwamu dinin, yambul yuk. Ada sundi hari Sabtu wengamidi Allah er si eremami. Yahudi yala nesala kurami mutu yuma neitamai, Allah upu geken ati domi. Tonda, yuk-yuk tumida, Allah upu gekena cap, peteremna cap, nimi pepdaramipa sun upu bongdina tep nengeda, akati wekami. Ila mambul ati, Yerusalem mutu neitamai, Allah er karena tep domi atida, tenpu atipu kwamu. Bahasa Indonesia deiki di, ‘rumah ibadah’ penunge. Allah upu geken ati lap pena upuda, nomor 26 dirume.} konum wekrum taruda, tenpu isomka ngebo, ila ngebodi kunumna weik keca, emas di betami buru du dongorur keca cap, pio telep opkal cap keprap, wekrotupane, ataru dipu pio kankan ngebo ton, pune di bon dakamtu opkal kepra wektu panenda, sundi ware kupkamrum do?

3 Isomka pio telep opkal kemrur ila ngebo tep, ‘Uo erda mambule,’ teneprap, bouna di, “Telepe kao, telepai dabungyayo,” pepkamrum do? Tonda, tali kankan ngebo tep nengeda, “Orkarenaipu tengbenkurume. Agum dingeda, nun yan yaniramep ason deikipu bukrume,” pepkamrum do? Aupu utopu pepmumyopda, angeda, pio mali kurume. 4 Ato upu tek sisi upepmumya deiki di, sun kan-kan neitamai di, ton tamna neng tep nengeda, ‘Telepe,’ ton tamna neng tep nengeda, ‘Mali,’ tenepra konum dipru bongdinmarume. Tonda, ato upu peptuma deiki di, upu bongdina neng utopu dinin, mali keca tenepra, mali neng utopu konum kupkamrume. Atep ukunada, pio meme pepsene.

5 Uda ne kayapu, ne pepkusen upu moupra gekepso. Ange men tenipmarum do? Sun teka tenena gum di, tali tuai nesala yumadi, kankan kunge nesala epmengedi, ‘E, anengda pio kankan kunge nesala cadi, sunda mambule pio gume,’ tenenunge. Dinino, sun kankan kunge nesalada, Allahdi konum weipseue. Allahdi weipseuada deiyoda, ‘Teka tenena deiyo keca weik karepkamne’ tenen, weipseue. Ada ‘Anengda, ne Allah tep, ila di teka tenepkamnenge,’ tenen, weipseue.

Uda, ware kun keca do yuma, Allah erda ikin men kuptue. ‘Akeca-keca yuma kanam dipapu kurure’ tenen, ‘Ila di teka tenenkamnenge,’ tenen, weipseue. Weika di teka tenenupa cadi, bung keca weik men talenup dinin, isomka neng utopu konum kweipseu.

Tonda, Allahdi, “Ne tep, kange deipra kunge nengda, ne im deiki talepra kune kecada, sirya taru karepkamsene,” peiamseutopu, karepserepa doronkamepe. Atep, nunda tali kankan kunge nesala weipseua deiyoda, men tenipmarum do? 6 Kankan nesala weipu dinin, sundi, ‘Kankan nesala mambule gume,’ teneprumnyopda, ange tenepmumnya deiki di, kankan kunge neng sun nong deiki mali upu deipkamrume.

Ton tenipterepso. Sun isomka nengdi, sun nong deiki ikin keca deipsengedi, sun keca dopra mali kudisenungada, men tenipmarum do? Tonda, sun isomka nengdi, ‘Sun talepdaro, sun keca dalupra dopropkamepe’ tenen, upu bongdina deiyo neng damai dubasengada men tenipmarum do? 7 Tonda, sun isomka nengdi, nun lyepra talesere ngebo, er si pio telep ngebo Yesus tep, mali upu pepra, luludinungada, men tenipmarum do? Ange tep nengeda, nimi urasin dipterepra dipru bongdina gume, pepsene.

8 Allahdi, ‘Ukunkamenge’ tenen, er upu deiki di ila mambule peipseu ngeda, ake.
‘Ada, sundi sun pe putapsere keca, ‘Ange mambule’ tenen, makudaramrumtopu, sundi sun cap kikiman kurum neng tep, bicau tenepra makudankamrume, peipseu.’ (Imamat 19:18)

Apeipseu upuda moupra gekepmumdi, dombaramrumyopda, pio teleppu kunkamrume. 9 Dinino, sundi yuk neng tep, urasin dipterepra, dipru bokeipmum pangeda, adeiki di mali kurume. Ada Allahdi, “Ukunkamrume, ange ton men kunkamrume,” pepra peipseu upu, mem upu deiki di, “Ukuna meme,” peipseua tep, aupu yaniptapmumyopda, ada Allahdi peiamu upu yanitamna neng kurume.

10 Aupu pepmasenada, tali tep gume. Ware neng do yuma, Allahdi peiamu upu yuma dombanung dinin, tenpunge ton yanipmengopda, ada aupu yuma yanitamna utopu kununge. 11 Apepmasen upu deiyoda, ake. Ada, “Sun pe ner tapra, yuk ner dopra tali nyangdana meme,” peipu ngebo, er dipu aupu ton, “Nimi tali portamna meme,” peipu. Aupu peipka deiyo ngeboda, tenpu ngebo kurura cadi, sun ner tapra yuk ner men nyangrum dinin, nimi popmumyopda, ada er peipu upu yuma yanitamna utopu kurume. Deiyoda aupu yuma peipka deiyo ngeboda, er tenpu tepa.

12 Allah er upuda, mali keca di ateng koupra kuramepua neitamai di lopra deipseue. Tonda, tupa-tupa lotamserure. Sirya taruda, Allah er upu deiki di nun kupe keca yuma tep, upu bokeipkamsere. Atep, sun penkamrum upu yuma cap, sun kunkamrum keca yuma cap neitamai di, angepu tenepra, pio dumsisipu kunkamrume.

13 Angepu tenepra kunkamruma deiyoda, ake. Ada, ware neng do yuma, yuk nengdi sun tep mali kupmengepa, bicau tenepra kaukemna gum di, balila kupra, yu kuprepa puto di wenepmenge nengda, Allahdi aneng sun mali kun keca tep, tali kaukepkamre do? Gume, Allahdi awenepmenge neng tep, sundi yuk neng tep yu kuprepa wenemnapu kuramengtopu, Allahdi aneng tep bicau tenepra kaukemna gum di, tamupra ila di wenepra popkamre. Dinino, yuk nengdi, sun mali kupsengepa, bicau tenepra kaukemenge neng tep nengeda, Allah er pedi aneng tep, bicau tenepra, kaukemdongonkamre cadi, ila di men wenepkamre.

Teka tenepmepedi, Allah upu tek sisi dombana tep, pepu upu

14 Ne kayapu, nun weite-du utopu kupra deipseu nesalao, ware neng do yuma, sun tali upu deiki di, “Ne konum teka tenepsi,” peptaptenge dinin, sun dumsisi kun keca men kwapyopda, ada tali penunga cadi, sun teka tenenung kecada nong men kupkamre. Ato upu, tali pertamamtu upu deiki di, Allahdi ato ngebo tep lyepmemetu do? Gume. Pio tek sisi teka men tenerura tep, Allahdi angebo men lyepkamre.

15 – 16 Apepsen upuda, ukupmanto upu ton pepkusene. Uda, tenpu ngebo do, tenpu ner do, sun tumi-tumi yuma jen keca cap, opkal cap putaprenge men kaptu pangeda, sun kan-kan tenpu ngebodi anesala epredi sun tep, “Kao, telepe, bupu opkal kepra, telep jenpu jeprap kunkamrume,” pepra talipu peptaptudi, tek sisi aneng sun putapre keca tep, men meliptu panenda, tali upu deiki di meliptu do? Akuna ngeda, telep do? Gume. 17 Apepmasen keca utopu, sun teka tenena keca akaptupane, tek sisi dumsisi kun keca ton men kupre pangeda, sun teka tenerumnge peda talipu kurure. Nong men kupkamre. Dena utopu kurure.

18 Dinino, bon tenpu di, ne tep pepnetue. “Gume, ton ngeboda, teka tenena kecapu kwapmare. Yuk ngeboda, dumsisi kun kecapu kwapmare,” pepnetue. Dinino, ato upu pepnetuma peda, nedi tamupra pepsene. Sundi, sun kun keca lap pena gum di, “Ne teka tenepsi keca ake-ake,” pepra, tali upu deiki di, lap pepterepnetum dinin, katuai nong men kael kepsetene. Ne dingeda, sun tep, ne dumsisi kune keca lap pepsetenyopda, ne kun keca deiki di, teka tenepsi keca, nong katuai kupre pangeda, ange deiki di kael kepkamnerume. 19 Sunda, ‘Allah er tenpupu kurure’ tenen, teka tenerume. Ateka tenerum kecada, teleppu dinin, isok-isok yuma, sun peda sun tenemumnya utopu tenengedi, Allah tep kware kupmengedi moropsemnunge.

20 Uo, sun walwal di, kange douna gum neng utopu kurume. Nedi, teka tenena keca akaptupane, tek sisi dumsisi kun keca men kupre pangeda, dena utopu kurure pepmasene. Apepmasen upuda, ‘Deiyo akwaptupa gekeptepe’ tenen, putapmaserpa, teka men tenepmanerum do? Atep nengeda, deiyo keca tenpu kupunge ton lap pepkusene.

21 Ange ton men tenipmarum do? Nun apu bo Abrahamdi er mi tenpu kuramu dinin, ange mi Isak dopra gel pala yakra deipmaua deiki deipudi, ‘Allah karena tep popkun’ tenen, keteneipka deiki di, Allahdi utenepu. ‘Abrahamda, apel ne tep dopnera deiki di, ne epra konum kael kepne. Ne kangeda, Abraham erda tek sisi dumsisi ngebo kurure,’ tenepu.

22 Allahdi utenepka tep, sun ton tenipso. Abraham apel dopka deiki di, erdi Allah tep teka tenepunge katuai kupka tep, kael keptume. Abraham er teka tenepunge cap, er pel tek sisi dopunge capda, kikiman utopu kupu. Utopu kupka tep, er teka tenepu ngeda, apel dopka deiki di, telep kupra pio wisipke. 23 Abrahamdi akupu ngeda, Allahdi pediramutopu kupu. Allah pediramu upuda ake.
‘Abrahamdi Allah tep tek sisi tenepka deiki di, Allah er kangeda, ‘Abrahamda pio dumsisi ngebo kurure,’ tenepudi, telep kweipu.’ (Kejadian 15:6)

Tonda, yuk nengdi, Abraham tep upepi, ‘Abraham erda Allah er kabo sisa kurure,’ pepi. 24 Ange tep nengeda, konum katuai kupre. Allahdi nesala yuma tep, ‘Anengda dumsisi neng,’ teneseredi, aupu pepra derirseryada, ‘Nun tali teka tenepmepe,’ pertamepya deiki di gume. Nun teka tenena cap, dumsisi kuna cap, kunupa deiki Allahdi, ‘Anengda telep neng, dumsisi kun neng kununge,’ teneseredi, aupu pepra telep kemdiserure.

25 Ange utopu, Rahabda, tali-tali nyangami ner, mali ner kuramu dinin, er telep pel dopka deiki di, Allahdi, ‘Anerda telep ner kurure,’ tenepudi, aupu pepra deipudi aner tep telep keipu. Rahabdi pel dopkada ake. Ada, Rahabda Israel yala ner men kuramu dinin, Israel nengdi, ‘Amutu kunge nesala popra bisipkamep’ tenen, miryareipa, anerdi abutene neng dopra, er ati neitamai inipra deipupa maprei. Mapmareia berekyopda, amutu nengdi, ‘Israel neng butene popkup’ tenen, diryakanmai bisi tapra, yuk bisi dokotepupa berei. Apel dopka deiki di, Allahdi, aner tep, “Anerda konum telep kupra deipne,” pepke.

26 Atep, aupu ton pepsene. Nimi nong depmenge taru, nimi sambala konum bere pangeda, nimi nong denapu kununge. Utopu, sun teka teneptum dinin, sun dumsisi kun keca ton men kuryopda, sun teka tenena keca peda, dena utopu kurure.