Jam 3 | XteSC | STEP | Ne kayapu, nun weite-du utopu kupra deipseu nesalao. Nesala penge upu deiki di, mali keca yala-yala weik belepredi, mali kudiserura cadi, aupu ton pepkusene. Sundi, ‘Nun kan-kan di nun peteremna deiyo neng weik kunkamepe,’ tenena yaprume. Angeda, deiyo pepkusene. Sun kaele. Allahdi tali neng tep, upu bokeipkamre utopu gum dinin, nun peteremna deiyo neng tep nengeda, tenpu keca pe kaukemdongona gum di, nun kupe keca yuma lelepra asipetepseredi, kurpetepseryopda, upu puto di bokeipkamsera tep pepsene.

James 3

“Nimi lyemu di mali penunge,” pepu upu

1 Ne kayapu, nun weite-du utopu kupra deipseu nesalao. Nesala penge upu deiki di, mali keca yala-yala weik belepredi, mali kudiserura cadi, aupu ton pepkusene. Sundi, ‘Nun kan-kan di nun peteremna deiyo neng weik kunkamepe,’ tenena yaprume. Angeda, deiyo pepkusene. Sun kaele. Allahdi tali neng tep, upu bokeipkamre utopu gum dinin, nun peteremna deiyo neng tep nengeda, tenpu keca pe kaukemdongona gum di, nun kupe keca yuma lelepra asipetepseredi, kurpetepseryopda, upu puto di bokeipkamsera tep pepsene. 2 Nun yumadi, ‘Ne mali men kupkun do?’ tenen, kundenkap, mankau di akeca-keca yala yuk-yuk mali kunupe. Tenpu ngebodi, er pere upu neitamai yumada, tenpu mali keca pe men pepyopda, angeboda tek sisi dumsisi ngebo kurure. Angeboda, er pere upu yuma moupra tenepredi, telepngepu perurtopu, er nong cap, er kun keca yuma cap tep, ‘Mali kupnun’ tenen, moupra kalengdarure.

3 Uda, ukupmanto upu pepkusene. Kuda ^{▼▼Kuda Kudada, sapi bisam nong yambul utopu kurur keca dinin, er yanda lyom weike. Tonda, sapi bisam giso deiki takke weik kuramre keca, er sida abolyakot tengamra utopu kecada, kuda bisam giso deiki men kurure. Sapi bisam bali deikida, nimi bukra men banunge. Dinino, kuda bisam puda, er bali deiki nimi bukmengepa embarure.} bisamda ila puto weik keca dinin, ‘Nun tenepmepetopu kupkuser’ tenen, gat keca er si arekdongopmepedi, dana-dana tara tapu gerekmepyopda, nundi gidopepa, nun tenepmepe bisipu embarure. 4 Ton ngeda ake. Laut mokon deiki embarameng ila gapung co ton tenipterepso. Ila nong weik gapung coda, ^{▼▼Gapung co di mokon deiki bana tep, lap pena upu nomor 33 dirume. Tonda, Matias 8:27 dirume.} ikin weik keca kurur dinin, kumanya puto dipu puprepa, mokon deiki embarameng. Embarameng dinin, gapung co der tara me bungne co metekngepu dinin, bon potokra aco ketenepra deiamenga di, gapung co deiyo ngebodi tamoretopu, abisipu embaramenge.

5 Aupu pepmasentopu, nun nimi lyemuda, nun nong neitamai metek kecapu kupseu dinin, alyemu di sal nong-nong upu weik pepya deiki di, mali keca weik kuserure. Ton tenipterepso. Ila co palpal pamtua peda, dou maptudi, gelal sepra kalkal peptu paneda, tenpu tong ukudi iptengepa, yuma uku jeptue. 6 Ange utopu, mali upu penupa deiki di, uku bu jeramra utopu kuserure. Nun nong neitamaida, nun lyemu deiki di mali kun keca yala-yala weik belepseredi, nun nong cap, nun kun keca yuma cap, mali kudiserure. Ukuda, co neitamai wekroredi, uku bu ila di jeramretopu, nun lyemu deiki di, nun kun keca yuma mali kudiserure. Sirya taruda, amali upu penge nesala cap, sun lyemu capda, uku jen ban uku di pio jenkamre.

7 Akeca-keca gam kure keca yala-yala yumada, ma yala yuma cap, bal cap, laut mokon pumbon kure keca yala-yala yuma cap, nimidi am taramitopu tupa tanunge. 8 Akeca-keca yuma nimidi tanung dinin, ware neng do yuma, lyemuda men taptenge. Lyemuda pio ila mali keca tep, pio parap-parap perura cadi, men tapmanto. Nimi dena tep, nimi pon bal, yu weik baldi si topsengepa, pu jepra deramengtopu, nun lyemu deiki, pio mali upu pepmepya deiki di, nimi mali kupmengepa, denunge.

9 Nun sipyal cap, lyemu capda tenpu dipunen, ton taruda alyemu dipu dinin, nun nai Allah tep si eremnupe. Ton taruda, er yambulanun utopu ketekepra deipu nesala dinin, nunda alyemu dipu sun nong deiki mali upu pepra derinupe. 10 Nun sipyal tenpu dinin, adeiki dipu Allah si eremna upu cap, nimi mali pedina upu cap penupe. Uo, ne kayapu tek sisi angeda, pio men kuptepe. Ada pio mali tepa.

11 Tenipterepso, yo me cap, sisilya me cap tenpu me bungna dipapu yakarur do? 12 Ange utopu ne weit yapu tenipterepso. Tenpu yala co du mouramre co di, yuk yala co du mouptu do? Tonda tenpu du mouramre tapu di, yuk yala tapu du mouptu do? Gume, kwarang co di seria co du men mouptue. Ange men kupmanto. Ange utopu, yo me cap, sisilya me cap, tenpu me bungna dipapu men yatue. Ange utopu, nun sipyal tenpu dipapu, Allah si eremna upu cap, yuk nesala tep mali pedina upu cap, tali tapakrap men penkamepe. Angeda, pio mali.

Ila kael kemna deiyo keca tep, pepu upu

13 Sun kan-kan neitamai di ware neng do, kwirye kun bisi kael neng cap, akeca-keca yuma ila kael neng cap kunung do? Sun akutengopda, sun telep kun keca yuma deiki di katuai lap penkamsenge. Tonda, Allahdi ila kael kemna deiyo keca sun tep karepka deiki di, dipru boun kupra telep kun pel doramenga deiki di, katuai lap penkamsenge. 14 Dinino, sun dipru neitamaida, yuk neng keca asuru epmumdi, ‘Akeca nepu doproptene’ tenen, putana cap, uda, ‘Nepu ereipnetenge’ tenen, putana cap, akapsere pangeda, akeca tep kange deipra sal nong-nong men kunkamrume. Tonda, akeca akapseryopda, men inimkamrume.

15 Ukun kecada, nun nai Allah im deiki di men kareserure. Ada Allahdi, ‘Ukunkamenge,’ teneseretopu kun keca gume. Ada nun pe kange dipru neitamai putasere keca pua. Amali kusere kecada, sun teka tenena gum nesalada, Allah er Lek Sambala pesere upu men gekengedi, yanitamnapu kunge keca tep pepsene. Tonda akecada, Kain Jen Ngebodi perepane, mali kupmengopda, mali kudiserure. 16 Apepmasenada tali tep gume. ‘Yuk neng keca nepu doproptene,’ tenena cap, ‘Nepu ereipnetenge,’ tenena cap, akapseryopda, dan mutu do yuma, ato kunge nesala kunge mutu yumada, balila kupra tali-tali kuna cap, pio mali tenepra mali kun keca yala-yala yuma cap akunkamre ja.

17 Amali kun keca konum pepmasen dinin, Allahdi ila kael kemdina deiyo keca kareseryada, ukuda pepkusene. Menmenada, er kael kemdina deiyo keca karesere ngeda, yuk mali keca tenpu pe tapakra men kurure, dumsisipu kurure. Ton anengda, ‘Nun yuma dipru bounpu kuprap, teleppu kikiman kuramtepe’ tenen, putarure. Tonda, sundi, ‘Ne upu pepnyopda, yuk neng gekepmengedi, ali kuna cap, kware kuna cap, dipru ikine cap, kange derina cap, kunkameng do, gum do?’ tenen, menmena moupra tenimpetenunge.

Tonda, nimidi upu pepmengepa, moupra gekepmengedi, bouna dipu kununge. Tonda, yuk neng mali kupmengopda, ‘Ne adipapu wenepra poptene,’ men tenengedi, aneng tep, bicau tenepra kaukemdongonunge. Sun upu yumada, inimna gum di, katuaipu lap penunge. Ton nimi urasin epmengedi, sun dipru men bongdinunge. Sun telep kupra dumsisi kunge keca neitamai yumada, du teleppu mourure.

18 Anengda, ‘Nun yuma dipru bounpu kuprap, pangdana cap, podana cap gum di, teleppu kikiman kunkamepe’ tenen, ukupra ukuramenganen, sun telep kun keca deiki di du moupkamrada, dumsisi kun keca pua.