Jam 4 | XteSC | STEP | Sun yu kupserepa, pangdana cap, upu deiki mali upu pedana cap kurumada, ware keca deiyo di kuserur do? Gume, telep keca cap, mali keca cap, sun dipru neitamai putapserepa, tenimdamumnya deiki di, sun dipru neitamai di pangdaserure.

James 4

“Teka tenena gum nengdi, sun kunge keca talepra kuna gume,” pepu upu

1 Sun yu kupserepa, pangdana cap, upu deiki mali upu pedana cap kurumada, ware keca deiyo di kuserur do? Gume, telep keca cap, mali keca cap, sun dipru neitamai putapserepa, tenimdamumnya deiki di, sun dipru neitamai di pangdaserure. 2 ‘Akeca doproptene’ tenen, pio putaserur dinin, men dororume. ‘Yuk neng talenge keca dalupra doproptepe’ tenen, ton taru di pio putaprepa, tenimtonapu kurume. Ton taruda, anengda portamnapu kurume. Ukurum dinin, sun putapserepa tenemum kecada, men gum kuserure. Tonda, sun putapsere kecada, men dopmanto kurume. Sun putapsere kecada, ‘Allah er dipapu karepkamser’ tenen, Allah tep men mororuma cadi, men dororume. Pangdana cap, upu deiki mali upu pedana cappu kurume.

3 Ton taruda, Allah tep mororum dinin, sun dipru neitamai mali keca putapserepapu, atenena deiki di mororuma tep, Allahdi akeca men kareserure. Men kareserya deiyoda ake. Ada, ‘Akeca doproptepedi, nun putaserengepu talepra kunkamepe’ tenen, putaserepa teneruma deiki di mororuma tep, Allahdi men gekepra kareserure.

4 Sunda, Allah er teppu kange deipra dombaramtum dinin, yuk keca putapserepa, kange deriruma cadi, ukupmanto ngeda, sun donge ner tapra, yuk ner dororameng neng utopu kurume. Ada Allah tapra yuk kecapu teneruma tepa. Sundi ange men tenipmarum do? Tali tuai kapu keca cap, teka tenena gum nengdi, Allah er Lek Sambala pesere upu yanitamengedi, mali kunge keca cap, mali keca putapserenge capda, ada ‘Allah song,’ tenepra kuna utopu pepsene. Ware neng do yuma, ‘Tali tuai kapu keca yuma, apu talepra kunkamne,’ tenepra kuramenge nengda, utenenunga deiki di, ‘Allah ne songe,’ tenepra konum kununge. Ada tuai mali keca cap, teka tenena gum nesaladi, mali kunge keca cap, Allah cap kikiman talepra men kupmanto tepa.

5 Allah er upu deiki di upeserure. “Allahdi karepseupa nun dipruai Lek Sambala kuseryadi, ‘Anengda ne mawa,’ teneseredi, ‘Yuk keca putaprepa ne tapnenung’ tenen, pio kalengserure.” Aupu peipseuada, tali upupu peipseua tenerum do? Gume, Allah er Sambaladi, ‘Yuk mali keca talepra benung’ tenen, pio kalengserur dinin, Allahdi, ‘Sun mali kupnung’ tenen, er puto kareserya deiki di, pio tupa-tupa talepra melimserure. 6 Ange tep nengeda, Allah upu deiki aupu peipsene.
‘Allahdi sun dipru kange eremna neng tep, yanitamrure. Dinino, sun dipru kange darapra amngai kunge neng tep, er puto karerya deiki di talepra melimrure.’ (Amsal 3:34)

Dipru bouna di kupra, Allah er amutara kuna tep, pepu upu

7 Ange tep nengeda, sun kange dipru bouna di kuprap, Allah er amutara kumumdi, er upupu gekenkamrume. Kain Jen Ngebo tep nengeda, er upu gekepra dombana gum di, kika deipra dimpepromum pangeda, Kain Jen Ngebo sun damai di sepdaro yukai benkamre. 8 Allah er tara kepromumdi, er teppu talepmum pangeda, Allah erdi sun damai kunkamsere. Sun mali keca paleprepa buru me kuramengtopu, sun mali kumum nengda, sun mali keca tamkamrume. Sun kange butenepserepa, kange bongtosere nengda, sun kange dipru neitamai mali kwapsere keca yuma tamkamrume. Allahdi pesere upupu gekepra kunkamrume. ‘Tenpu kangepu dopra kunkamrum’ tenen, pepsene.

9 Sun mali kumum keca tep, kange mun kange doupra, dipru sukudamumdi, malye pepra engenkamrume. Sun mali kumumnge cap, tali-tali kumumnge cap, tenepra nemamumdi autunmum ngeda, amali kun keca pununa tep, dipru sukupmumdi, pio engenkamrume.

Tonda, mali kuramumdi, kange deipra kumum ngeda, amali kun keca pununa tep, yo dakserepa kange pio tenimtonapu kumumdi, kange sukun-sukunapu kunkamrume. 10 Sun kange dipru bouna di kuprap, Allah er amutara kepromum pangeda, Allahdi sun tep erepra deipkamsere.

“Yuk neng tep, minina upu pena gume,” pepu upu

11 Ne kayapu neng, nun teka tenena neng kunupa cadi, sundi sun kayapu neng tep, minina upu men pedankamrume. Sun teka teneprum nengdi, yuk teka tenepi neng tep, mali upu cap, minina upu cap pepmumdi, sun nong deiki deipmumyopda, Allahdi, ‘Ukunkamenge, ange ton men kunkamenge’ tenen, peipseu upu yanina utopu kurume. Ada tali tep gume. Sun peda teka teneprum nengdi, yuk teka tenenge neng tep, “Sunda mali neng kurume,” pepra mali upu pepdamum dingeda, ada sunda upu lepsisikra bongdina deiyo neng utopu kurume. Angeda, mali.

Allah er upu deiki di, “Mali upu men pedankamrume,” peipseu dinin, ange konum kupmumyopda, er upu konum yaniprume. Allahdi peipseu upu neitamai dinin, aupu yuma dombana gum di, ton upu yanitamna, ton upu gekena wilipmumdi kumumnya deiki di, upu lepsisikra bongdina deiyo neng utopu konum kumumdi, er upu yuma yanitamrume. Atep ukuna meme pepsene.

12 Allahdi, ‘Nesala yuma ukunkameng, ange ton men kunkamenge’ tenen, upu deiyo karepseua Deiyo Ngeboda, Allah er tenpu kurure. Tonda, nesala yuma sun kun keca tep, Upu Bongdina Deiyo Ngeboda, er tenpu kurure. Allahdi ton nesalada lyemdiredi, ton nesalada, wenepredi potamrure. Ukurura deiyo ngeboda, Allah er tenpua. Allah er dipapu ukurur dinin, sunda wareto ila neng kumumdi, sun dipru dukdongopra kikiman kurum neng tep, ‘Kanda telepe, kanda mali,’ pepra upu bongdidarum do? Angeda, mali tep ukuna meme pepsene.

“Sal nong-nong pena cap, kamna cap, gume,” pepu upu

13 Uda, sundi, ‘Ambutumi do, tumi do, ortara ila karen mutu bepedi, keteng tamun tenpu deiki di pel doramepyanen, sengpepmepyopda, co bo weik doronkamepe’ tenen, tali lupra perum neng tep, ne pepkusen upu gekepso. 14 Sundi aupu perum ngeda warya tep do? Ambutumi kupkamaser keca, ange peda tenepra men kael keptuma tep, upena gume. Sun gam kunkamrum taru yuma utopu keca pepkusene. Dua puto welerepane, keteng dopredi, keteng bupu di menmena gum kuramretopu kurume.

15 Atep nengeda, “Ukunkamepe, ukunkamepe,” peruma utopu gum dinin, telep upu penkamrum ngeda, pepkusene. Upenkamrumada, “Allahdi, ‘Ukunkamenge, ukunkamenge,’ tenepsetudi, melipsetu pangeda, adeiki dipapu ukuramepyanen, apel ton, apel ton donkamepe,” peptume. 16 Ukupra peptum dinin, ukutaru, ‘Ukunkamepe’ tenen, tali lupra perum ngeda, ada sal nong-nong neng upu peramengtopu perume. Aupu utopu sal nong-nong upu penada, pio mali. Atep ukuna meme. 17 Atep, ware neng do yuma, ‘Telep kun keca ake,’ tenepra, konum kael kemnung dinin, ‘Ange dakwapye, men kupkupe’ tenen, dimpepra kaukepnapu kupmengopda, ada mali konum kununge.