Jam 5 | XteSC | STEP | Uda, sun teka tenena gum di, isomka kurum nengda, ne pepkusen upuda moupra gekepso. Sun pio ikin keca amenda kupkamserenge tep, kange mun kange doupmumdi, mali pepra ila di engenkamrume.

James 5

Teka tenena gum, isomka neng kununga tep, wenepu upu

1 Uda, sun teka tenena gum di, isomka kurum nengda, ne pepkusen upuda moupra gekepso. Sun pio ikin keca amenda kupkamserenge tep, kange mun kange doupmumdi, mali pepra ila di engenkamrume. 2 Akeca-keca yuma kunumna weik di kunupra mawa deiamrum ngeda, konum lyupke. Sun pio telep opkalda sine cap, keklu capdi konum jepropseue. Sun gat keca, kunumna weik keca, emas cap, perak capda, ‘Ne mawa’ tenen, deiamrumpane, sisilya kupupa, konum mali kupke. 3 Sun kunumna weik keca sisilya kupka deiki di, “Anengda mali neng,” pepra, si keipkamsere.

Tonda, uku bu di pelum-peluma jeroramretopu, asisilya utopu kupu keca di, sun nong pio pu jenapu kunkamsere. Ukuda sirya gawal dangne taru neitamai di konum kunupe. Akupser taru neitamai, ange moupra tenena gum di, sundi, ‘Akeca yuma, nepu talenkamne. Akecada, ne mawapu’ tenen, moupra deriramrum ngeda, pio mali kurume.

4 Sun moupra tenipkurume. Sundi, “Nun wa peipserume,” pediramrumpa, sun wa peiramsei dinin, wa pena pununa tep kunumna keca men kareramrumdi, sun atipu moupra deriramruma deiki di si keipkamsere. Sun wa pepra kouami keca kipra gawal daka yakarami nengdi, mali pepra engerami upuda, Allah nun Ila Deiyo Ngebo damai beupa gekepke. Allahda akeca-keca yuma talena deiyo ngebo kuredi diserura cadi, sun bicaue. Ikin weik kupkamsere.

5 Sun tuai mutu kumum taru yumada, nimi kange derina pio telep keca yuma talepra, ngangan neng kurume. Ukupmanto ngeda, sunda, ‘Sapi bisam orwar pojepkamep’ tenen, er jen ila di kareramengepane, ila nepredi, bol telep kupre dingeda, asapi bisamdi, ‘Ne popkamneng,’ men tenemre dinin, popra jeramengtopu kurume. Sun mali kun keca weika di kumumpane, amenda taru Allahdi wenepra popkamsera tepa.

Asapi bisam mankau kange doupra kunge utopu, sun peda utopu, ‘Nun mali kun keca weik kupseryopda, Allahdi wenepra popkamsere’ tenen, mambul kange men douruma tep, pepsene. 6 Tonda, yuk nengdi, sun isomka neng tep, ‘Sun upuda nundi yanipra bisipkamepe,’ men teneramidi, mali kun keca men kurami dinin, sun isomka nengdi aneng tep, mali upu pepra bongdiramrumdi, portamamrume. Atep, sunda pio mali kurume pepsene.

“Ikin keca kupserya peda, tenimtona gum di, dimpeprappu kunkamrume,” pepu upu

7 Uda, ne kayapu. Nun weite-du utopu kupra deipseu nesala tep pepsene. Nun deiyo ngebo Yesus tamupra kapul men yanmare taruda, tenimtona gum di, telep kange doupra dimpeprappu kunkamrume. Ukupmanto upu tep pepkusene. Ada, wa pepra kouramra deiyo ngebodi, ‘Ne koupsi kecada telep kupra bongopre pangeda, kipkamne ja’ tenen, tonda, ‘Dou tali manmarae, amendada mo yankamar ja’ tenen, telep kange deipra, tali lupra kuramretopu, sun peda utopu kunkamrume.

8 Ada, ‘Yesus talepra kunkamne do, yapronkamne do?’ tenen, tenimtona gum di, telep kange deipra, Yesus teka tenepra, pio dimpeprappu kunkamrume. Ada tali tep gume. Nun deiyo ngebo Yesus, er yankamre taru damai kupmara tep pepsene. 9 Tonda, sunda sun dipru dukdongopdarum neng tep, mali upu men pedankamrume. Mali upu pepdamum pangeda, amendada, Allahdi upu bokeipseredi wenepkamsere. Ukuda nun upu bokeipkamser Deiyo Ngeboda, buplan dam konum tengyanmardi dinmasere.

10 Ne weite-du utopu kurum neng tep pepsene. Allah er si deiki di, er upu lap perami neng, sun nabi-nabi ^{▼▼Nabi-nabi neng, Allah er upu lap pena neng – Allah er upu lap pena nengda, Allahdi, ‘Nimi gekepkameng’ tenen, erdi wepra deiamu neng tep, er tek sisi upu cap, amenda kupkamre keca upu cap, lap pepu pangeda, anengdi, yuk nesala yuma tep lap perbarami. Anengda ‘nabi neng’ penupe. Nabi neng, sun lap pena upuda, nomor 25 dirume.} nengdi kurami kecada, ka di ton cap pepsenepa, tenipterepso. Sun kange mun kange douami taru neitamaida, kange tenimtona gum di, dimpepra kuramiyada, tenipterepso. Ikin keca weik kwamu dinin, sun kange deipra kuramyada, pio telep kuramya cadi, sun angepu tenepmumdi sun kuramitopu kupbankamrume.

11 Sun kaele, ikin keca weik kuramupane, sun tamna gum di, teka teneramidi, pio pe deipra, palepra pel dorami neng kurami. Ukuramya tep, Allahdi sun tep, telep kudiramupa, kange deipra kurami. Tonda, nundi, ‘Anengda, ila mambule, sun pio teleppu kurami,’ tenen, aneng tep gudinupe. Sunda aupu konum gekeramrume. Ayubda, er nong deiki ikin keca pio weik kuramupane, tenimtona gum di, Allah teka tenepra, pio palepra dimpeprappu kuramu. Dakuramupane, Allahdi ka di tamupra karepu ngeda, konum gekeramrumdi kael keprume. Nun nai Allahda pio bicau teneseredi, nun mali kunup keca tep poptapsetu dinin, kaukemdongoseredi, nun putasere keca yuma tep, tali lupra kareserure.

12 Ukuda nun weite-du utopu kunup neng tep, ila mambul upuda pepkusene. Sundi, “Ukunkamepe,” pemum taru yumada, ‘Yuk nengdi teka tenepkamseng’ tenen, mambul keca si cap deiki di pedina gume. Tonda, upu lyoma di pena meme. Ada, ware keca si do yuma, im deiki kure keca si cap, tuai kure keca si cap, tapakra pena meme. Tonda, ‘Yuk nengdi teka tenepkamneng’ tenen, “Neda tali ngebodi pepmaken do?” pepra upu weika di peramengtopu kuna meme. Atep, mali upu pepmumpa, Allahdi wenepserura tep, ‘Telepe, ange kupkune,’ tenepmumyopda, “Telepe, ukupkune,” pena pua. ‘Gume, ange men kupkune,’ tenepmumyopda, katuai di, “Gume ange men kupkune,” pena pua. ‘Yuk nengdi, nun penup upu teka tenepkamseng’ tenen, mambul keca si cap tapakra pedina meme.

“Pio teka tenena deiki di, Allah moronkamrume,” pepu upu

13 Sun kan-kan neitamai di, tenpu ngeboto kange mun keca kupyopda, adipapu erdi Allah moronkamre. Tonda, yuk ngebo ton, telep keca akwaprepa, kange deipra kupyopda, kange deipra Allah tep, “Telepe,” pepra, Allah er si erepra mut penkamre. 14 Sun kan-kan neitamai di yuk ngebo ton pu jepyopda, Allah upu ati talena deiyo neng, majelis neng tep upunkamre. Upuprepa yangopda, anengdi minyak me dopra, Allah er si deiki di angebo er nong deiki likeipmengedi, ‘Allahdi kweteipkur’ tenen, Allah moronkamenge.

15 Kange bongtona gum di, Allah pio teka tenepmenga deiki di moropmengopda, Allahdi pu jere ngebo kweteipkamre. Kwetepredi, gam bungdinkamre. Apu jere ngeboda, men di mali kuramtuopda, Allahdi angebo er mali kupunge tep, kaukepredi, gum kupra deipkamemere. 16 Ange tep nengeda, ‘Allahdi kweteipkamser’ tenen, sun mali kumum keca yuma katuai di lap pepra deipdamumdi, Allah morodankamrume. Pio dumsisipu kunge nesaladi, Allah mororamengada, puto weik kurya deiki di, Allah gekepredi, telep kudiserure.

17 Uda, pumun taru kuramu nabi ngebo Eliada, nun ataru kunup neng utopu, tali tuai ngebo kuramu dinin, erdi ‘Mo men cemkamre’ tenen, pio teka tenepudi, pio pe deipra, Allah moropua deiki di, keteng tamun weneri cap, ton keteng tamun neitamai cap deiki di, mo pio men cemamu. Doupu maramu. 18 Ukupra moropupa dou maramupane, nabi Eliadi, ‘Ka di mo ceptu’ tenen, Allah moropu pangeda, ka tamupra mo cemamupane, nimidi kourami keca bongoramu.

19 Ne kayapu, nun weite-du utopu kupra deipseu nesalao, upu ton pepkusene. Ada ware neng do yuma, Allah er tek sisi upu deiki pesere bisi bandenkap, abisi tapra, yuk bisi lerekra beryopda, yuk nengdi angebo dopra, telep bisaipu yana tamupra deipmengopda, ada pio telepe. Atep, apepkusen upuda, ka di ton cap tenenkamrume.

20 Ware neng do yuma, yuk neng mali bisi bangepane, telep bisaipu yana tamupra deipmenge nengda, pio mambul pel donunge. Ada, amali bisi bange nengda, abisi pio dombetengopda, deptengepa, uku jen ban dongoptupa, apio kunkamtenge. Dinino, anengdi tamupra, telep bisiai deriryakamenga deiki di melipmengepa, Allahdi mali bisi benmangu nesala tep lyemrure. Tonda, apel melipra doramenga deiki di, Allahdi sun mali kun neng, sun mali kunge keca yuma kaukepra, telep kupra derinkamre.

Acapu sekra deipsene.

Telepe, ne Yakobusdi pepsene, akonuma.