Jeremiah 10

Tali keca petupra deipmengedi, “Nun nai bo,” pepra, si eremnung nge tep, pepu upu

1Nabi Yeremiadi, sun Israel yala nesala tep upepu.

Uo, sun Israel yala nesalao, “Allah Yahwehdi sun tep, peipmaser upuda, moupra gekepkurume! 2Allah Yahwehdi peipmaser upuda ake. Yuk-yuk mutu neitamai kunge nesala, yala-yala yumada, anesala sun men di mali keca talepra kupyakanung kecada, sun Israel nesalada, ange kael kepmumdi, men kunkamrume. Tonda, im alau tara cap, im neitamai cap di, peten-peten kemamre keca cap, Allahdi, ‘Ne pel dopnepa, nimi kael kepkamneng’ tenen, im neitamai di pel dore kunupsek pen pel capda, ange epmum dingeda, kwar men dangkamrume. Sun yuk mutu kunge nesala yumada, ato keca epmengedi, ‘Uo’ tenen, mambul kange doupra, kwar dangnunge. Dinino, sun kunge utopu, sun Israel nesalada, ange men kunkamrume. 3Ange pepmasena deiyoda ake. Ada, sun yuk-yuk mutu kunung nesalada, sun men di talepra kupyakanung kecada, tali kecapu kurura cadi, akecada tek sisi nong men kupkamre. Sundi bura mutu tengrur co kweprapmengedi, tali gam keca do, nimi do, akeca urasin utopunge kupra, petupra dona tep, aco dopra, ila kael neng, sun damai duyakangepa, anengdi tali gam keca urasin utopunge, er si patung petupra derinunge.

4Ukupra deipmengepa, yuk nengdi akeca deikida, urasin pio telep kuna tep, emas cap, perak cap di, palepra derinunge. Ukupmengopda, ‘Dim pepra acapu kupkamsere’ tenen, palu di paku dangdongonunge. 5Anesaladi, “Nun deiyo keca ake,” pepra, si eremnung keca patungda, tali kecapu kurure. Ada ukupmanto, nimidi sumi wa peamengai, ‘Ma yana akeca epmengedi, kwar kuprepa, bendopkamenge. Nun sumnye du men jepkamseng’ tenen, gam kunange gum dinin, nimi urasin utopu keca petupra derirnunge. Sun yuk-yuk mutu nesalada, atali keca utopu kununge. Apetupra derinung kecada, upu pio men peptenge. Tonda, gamapra men embanunga cadi, nimi dipapu akecada erepra deipbanunge. Atep nengeda, sun Israel nesaladi akeca tep, kwar men kunkamserure. Deiyoda, akeca di sun tep, yu tenepsengedi, mali men kweipsetenge. Tonda utopu, atali keca di sun tep, telep men kudinkamsenge. Yeremiadi pepu.

Allah si eremna tep, pepu upu

6Nabi Yeremiadi Allah er si eremna tep, aupu ton pepu.

Uo, Allah Yahweh, kanda pio ila eremna ngebo kurume. Kan utopu ngebo ton, pio men kurure. Kan tenpua. Nimi pio weika di, kan si pio ila di eremkenunge. Tonda, kanda pio ila puto ngebo kuruma cadi, kan si peda, nimi yuma gekepmengedi, ‘Uo, erda ila mambul ngebo,’ tenen, kan sipu eremkenunge. 7Naio, kanda Allah Yahweh, tuai mutu neitamai yumada, Raja-Raja kepra, nimi talenung deiyo neng dakunung dinin, kan dipapu aneng talepmumdi, sun deiki tarapu kurume. Atep, tuai nesala kankan, wareto ngebo ton, Allah kan tep kwar men kuptu do? Tek sisi Allah, kanda pio mambul ngebo kuruma cadi, nimi yumadi kan tepapu, pio gispal donkamkenge. Tonda, nesala yuma akununga kan-kan di, ila kael keami neng ton akununge. Tonda, Raja-Rajadi, tuai nesala yuma talepra kununga kan-kan di, Allah kan utopu ngebo ton men kurure. Ange tep nengeda, sun aneng kankan neitamai yumada, ne nai Allah kan utopu ngebo ton, tenpu ngebo peda, pio men kurure. Tek sisi ila ngeboda, kan tenpu kurume.

8Tuai mutu neitamai yuma, yuk-yuk yala nesala yumada, walwal kununge. Sunda, ila di men kael kemami. Tali copu dinin, akeca dopra, nimi urasin utopu keca petupra deipmengedi, “Nun nai bo,” pepra, si eremenge kecada, upu men peptenge dinin, upu peptenga peda, nong men kuptue. Tonda pio men gamapmanto kununge. Akecadi nimi tep, ‘Ange kupkamrume, angeda pio men kupkamrume,’ pepra, telep kuna upu men pepsetenge. Adopra deipmengedi, ‘Nun nai bo,’ pepra si eremnung ngeda, tali co sisa dipu dopra derinunga cadi, akecada, pio men gamapmanto kununge.

9Tonda, ange utopu, yuk nengdi, kunumna weik keca, er si perakda, doprapmengedi, deipmengopda, yuk nengdi karen mutu, er si Espanyol mutu bena, akeca dopra, tamupra atara mutu duyakanunge. Tonda, yuk kunumna weik keca, er si emasda, karen mutu er si Ufaz mutu di, duyakanunge. Ukupmengedi, ‘Co dopra, nimi urasin utopu keca betaipmepedi, ange deiki, emas cap, perak cap dopra, palepra derinkamep’ tenen, gat keca dopra derina neng, ila kael keami neng tep karepmengepa, perak cap, emas cap di, sun patung keca urasin telep kuna tep, palepra derinunge. Tonda, sun akeca deiki, opkal urasin pio telep ngeda, im kalum birunge cap, mirin ungu nge cap, doprapmengedi, sun aopkal wina ila kael neng damai, doupra yangepa wingedi, sun patung keca deiki derinunge.

10Sunda pio walwal nesaladi, ukunung dinino, tek sisi Allah er si Yahweh kurure. Er dipapu gam kuna deiyo ngebo kurure. Er tenpuda, gam kurur Allah kurure. Er Allah Yahwehda, akeca-keca talepra, pio tep ila nimi deiyo ngebo Raja kunkamre. Er cap, erdi talerur keca yuma capda, pio men gum kuptue. Pio akunkamre. Tonda, Allah erdi, tuai mutu cap, tuai mutu kunge nesala cap tep, yu tenepyopda, tuai mutu ban-ban yumada ila di longkamre. Tonda, Allah erdi, atuai mutu kunung nesala yuma tep, yu teneptudi, wenepsetuopda, tuai mutu kunge nesala yumada, men darapdongopra kutenge dinin, gum kupkamenge.

11Ange tep nengeda, sun Israel nesaladi, yuk-yuk mutu nesala, tali keca tep si eremenge nesala yuma tep, aupu pepkamrume. “Anengo, moupra gekepso! Sundi, tali-tali keca cap, isok-isok cap, si eremrumu ngeda, im deiki cap, tuai mutu yuma capda, abutene neitamai kuramre keca yuma cap, men ketekepra deipi. Akecada, tali keca kurura tep, si eremrum nge yumada, pio gum kupkamre. Atuai mutu neitamai pe, im neitamai peda, ato keca yumada, pio gum kupkamre ja! Amenda doryankamre taru yumada, ton pio men kwapkamre.

“Allah tep gispal don mutpu penkamrume,” pepu upu

12Allah er ila puto deiki di, atuai mutu ban-ban yuma ketekepra deipu. Allah er ila kael deiki di, atuai mutuda urasin telep kupra ketenepra deipu.
Tonda, er ila kael deiki di, tuai mutu yuma telep kupra deipudi, aceipu gat kepra deipupa, acapu kunkamre. Men long-long pepkamre.
Tonda, Allahdi, ila deiyo keca neitamainge yuma, ila di kael keamu ngebo capdi, im alau tara cap, im neitamai kure keca yuma cap, keteneprapudi, telep kupra bepekra deipu.
13Allah erdi, “Angeda kupkure,” pepre pangeda, im alau tara di, long-long pepredi, ila me lelim peramretopu lelim perure. Allah er dipapu, ‘Tuai mutu sirik-sirik di, dua weleptue,’ tenepre taruda, adipapu dua welepredi, tuai ban-ban yuma singidongorure.
Tonda, Allah er dipapu, ‘Ila mo cemredi, perelang-lang ton penkamre’ tenen, pepre taru dipapu, mo cemredi perenglang penange peda perure.
Tonda, ‘Allahdi kumanya dopra, mawa deipkai di, embankure,’ tenepre taruda, kumanya dopra deiprepa, tuai mutu deiki embarure.
14Nimi tuai nesaladi utenenunge. ‘Nun kaele,’ tenedanung dinin, sun yumada, walwal nengpu kununge. Akeca-keca yuma men kael kemnunge. Gam keca urasin utopu betapra derina tep, ila di kael kepidi, ketenemna deiyo neng yumada, ali dakamenge.
Ada, sun anengdi betapra derinung kecada, aketenepra derinun ngedi, akeca-keca ton pel dopra men kununge.
Atep nengeda, emas deiki di dopra, betamnung keca yumada, gam pio men kungedi, isinada sun men wekmanto kurure. Gam kuna keca betapra men derinunga cadi, nong pio gumngepu ketekemnunge.
15Tali keca tep, “Nun deiyo keca,” pepra, si eremnung keca yumada, nong men kupkamre. Atep nengeda, akeca betaipmenge neng pe, akeca tep, “Nun nai bo ake,” pepra si eremnung nesala peda, tali upupu pedanunge.
Atep, sundi tali keca pepra nalemumdi, malya depra autunkamrume. Allahdi, ‘Ataru konuma,’ tenemunge konum damai yaryopda, akeca yumada, Allahdi gum kupra deipkamre.
Atep, akeca yala-yala yuma tep nengeda, sundi nalepra autunkamrume.
16Allah er si Yahwehdi, akeca-keca yuma ketekepra derina deiyo ngebo kurure. Allahdi sun Israel yala nesala yuma tep, upepu. “Yakubdi deiamupa, dadeipdanen yakarami nesala yumada, ne mawa nesalapu kunkamenge.
Ne nyapu sisa kunkamnenge’ tenen, wepra deiamsi,” pepu. Allah Yahweh, er sida, “Im deiki kunge jen talena malaikat yumada, sun deiyo ngebo kurure,” pepra penupe.

Allahdi, sun Yerusalem nesala atep, “Sun pona tep nengdi yana popkamsenga tep, ketenepkurume,” pepu upu.

17Allahdi pepu. “Uo, sun Yerusalem mutu neitamai kumum nesalao, sun pona tep nengdi, amutu yana popkusenga cadi, sundi talerum bung keca yumada, ketenepra getepdonkurume. Sun pona tep nengdi, amutu yuma wareksengedi, sun doupra dubenkamsenga cadi, sun keca adipapu ketenepkurume! 18Angeda, tali tep men pepsene. Deiyoda ake. Ada, ataruda, ne Allah Yahwehdi Yehuda yala nesala yumada, dopra enepra donoksenepa, sun pona tep nengdi, karen mutu dubenkamsenge. Ne dipapu ila kange mun keca, sun deiki deipsenepa, kupkamsere. Ne Allahdi go karepnepa, sun pona tep nengdi, popsengedi, sikke buktapkamsenge. Ukupsengopda, sundi, ‘Uo, Allahdi nun tep, ‘Ukupkamsene,’ pepra, deipseu ngeda, tek sisi konum kupmasere,’ tenen, kael kepkamrume! Allahdi sun Israel nesala tep pepu.

19Upepu pangeda, sun Israel nesaladi, uperami. “Uo, nun Yerusalem mutu kunup nesaladi, ‘Nunda ikin weik kunmapa cadi, ila susu jeramretopu kuserure. Nun susuda, men kwetepmantonge jeserure. Dinino, nun mali weik kuramepunge tep, aikin keca nun deiki yaserya cadi, nun menenga keca dopropkamepa cadi, akonuma. Dinino, aikin kecada, men dopropmanto kupkamsera tepa,’ tenenkamenge. 20Ukupmanto ngeda, nun opkal bol di domepu dodina ati yumada, konum uruptapsei. Tonda, ‘Atenda ati sakrur’ tenen, tapu puto di geteamepunge yumada, konum bulukra sakseu. Tonda, nun tenda ati pumbon, ati yuk-yuk bokra wilimderina tep, lepsisikra kapkotepmanto nyapu yumada, yuk mutu konum bendopseia tep, nun opkal bol di donup dodin tenda ati men dopsetenge.

21Tonda, nun deiyo kepra talesenung deiyo-deiyo neng yumada, walwal nengpu kununge. Sundi Allah Yahweh tep, “Nun naio, ‘Telep kuna ngeda ake, mali ngeda ake,’ pepra peterepserume,” pepra, Allah tep men moronunge. Allah tep men moronunga cadi, sun pe kange dipapu tenepra kunung ngeda, nong men kupkamre. Telep men kupkamepa cadi, sun aneng amutara kunup Israel nesala yumada, nun pona tep nengdi eneprosengepa, yuk-yuk mutu dabena kunkamepe. Amenda taru tenpu mutu neitamaipu men kunkamepe. 22Ukutaru sun gekeso! Moupra gekeprumudi, sun ton gekenkamrume. Ila lelim penmarpa, gekenmapada ake. “Dapu tara di (arah utara) kunung nimida, ketenepmangdi, lelim weik penmange. Amutu kunung jen talena nengdi, nun Yehuda tara kunup nesala damai yangedi, nun ila ati arum dopra, deipmepudi akunup mutu yumada, yana popsengedi, gum kupra deipsengepa, dim bulung pepkamre. Tonda, amutu nesala ton pio gum kupkamenge. Nun mutu yumada walangyopu kupkamsere. Ukupyopda, nun mutuda, bura yu kampu, ton inipra akunkamenge. Ukunge pangeda, sun Israel nesaladi penkamenge.

Nabi Yeremiadi Allah tep, moropudi pepu upu

23Ne nai Allah, ne kaele, tenpu ngebo peda, er puto dipapu, er kunkamre keca men taleptue. Er pedi, ‘Ukupkamne, ange ton ukupkamne. Tonda, telep kuna tep abisi benkamne. Tonda, ukupkamner kecada, ake’ tenepeteptua peda, men taleptue. Tek sisi ngeda, tuai nesala sun puto deiki di, ange yuma men talenunge. Tonda, moupra men kael keptenge. Sun bisi benkamengaida, moupra men teneptenge. 24Ange tep nengeda, ne nai Allah kandi, nun tep wenepkamserum dinino, nun nai Allah Yahweh, kan yu weik kupkere taru di, nun deiki ila kange mun keca deipra wenepra ponada gume. Tek sisi, kan yu kupkere taru di, wenepsememnyopda, nunda adipapu kan damai di, gum kupropkamsere. Atep, ‘Yambul ikin ngepu, nun deiki deipra wenepsetume’ tenen, moropkene naio. 25Allah kan ila yuda, doprapmemdi, kan si moupra men tenekenge nesala, yuk-yuk mutu nesalada, sun deikipu deipkamrume. Tonda, kan ila yu kupkere ngeda, kan si pio men eremkenung neng, sun deikipu, deipkamrume. Deiyoda ake. Anengda, sundi, kan nyapu sisa, Yakubdi deiamupa, dadeipdanen yakaramepu nesala popra, konum gum kupmanto, konum kupra deipsei. Tonda, anengdi nun kunup mutu peda, sundi yawa popra, sikke buktapseia tep, moropkene naio.” Nabi Yeremiadi Allah tep upepra moropu.