Jer 11 | XteSC | STEP | Allah Yahwehdi, ne Yeremia damai yana pepra deipneu upuda ake.

Jeremiah 11

Allahdi Yeremia damai pedina upu yana peipu upu

1 Allah Yahwehdi, ne Yeremia damai yana pepra deipneu upuda ake.

2 Moupra gekepkunerume! Nedi, ne nyapu sisa, sun Israel nesala, sun damai pedina upu pena tep nengeda, “Angeda kunkamrume, angeda pio men kunkamrume. Ukupmumnyopda, nedi sun makuna tep, ukupkamsene,” pepra, pedina upu pepkukenada, moupra gekepkurume. Kandi, aupu gekepmemnyopda, sun Yerusalem mutu ila ati arum neitamai kunge nesala cap, tonda Yehuda tara kunge nesala yuma cap, sun damai perbenkurume. Aupuda ake. 3 Kandi aupu pepkurume.

Allah Yahwehdi upepsere. Neda, Allah Yahweh kunune. Nedi sun Israel nesala tep, pio melipra kalengsenepa, sundi ne si eremneruma cadi, neda sun nai bo Allah kunune. Ware ngebo di do? Sundi, ne pepkusen pedina upu pepnepa, gekepmenge dinin, aupu tep nengeda, men talepra kuramengopda, nedi sun ato nesala yuma tep, wenepra wipdongopkamne. 4 Nedi pedina upu pepkusenada, ukupu upu guma. Ada, nedi menop taru, Israel nesala, sun apu yapu tep, Mesir mutu neitamai ikin weik kuramipanen, nedi doupra yanamsi taru di, sun damai konum yana pepra deiamsi. Sun Mesir mutu kurami taruda, pio ikin weik kuramya tep, ukupmantoda, nimidi besi keca tep, ‘Telep kweipkamep’ tenen, uku weik jeramredi, pio bupu kuramre neitamai besi dongopmengepa, abesi keca deiki mali keca palepmarenge jepra, telep kudiramre utopu, Israel nesala, Mesir mutu kurami taruda, sun nong deiki ikin keca kareamsi.

Ataruda, nedi sun apu yapu tep, pepra deiamsi ngepu, ‘Apepsen upu yuma moupra gekepnemumdi, angepu talepra, dumsisipu kunkamrume,’ peiamsi. Nedi sun tep, ‘Angeda kunkamrume, angeda pio men kunkamrume,’ peiamsitopu tek sisi kupmumnyopda, nedi sun Israel yala nesalada, ne nyapu sisa kunkamrume. Tonda, neda sun nai bo Allah kunkamsene,” pepra, pedina upu deiki di peiamsi. 5 Sunda, ne nyapu sisa kupmumnyopda, nedi sun apu yapu tep peipsitopu, ‘Pio telep tu mutu, akeca-keca yuma, telep kupra bongorur mutu karepkamsene,’ peamsi mutuda, sun ataru kurumu nesala tep karepkamsene. Ada, ukutaru kurumu nesaladi, ne peiamsi upu, moupra taleprumudi, kupmumnyopda, nedi sun tep, amutuda tek sisi karepkamsene. Allahdi ne nabi Yeremia tep pepneu.

6 Aupu yuma pepra deipkopda, nedi tamupra Allah Yahweh tep pepsi. “Naio, ‘Teka, apepmaserem utopu, kupkamser’ tenen, kan tep, ‘Telepe,’ pepra, moropkepe!” pepsi. Upepsi pangeda, Allah Yahwehdi ne Yeremia tep, ton cap aupu peipneu. “Nedi peipkuken upu dopra, sun Yehuda tara mutu neitamai kunge nesala yuma cap, Yerusalem ila ati arum dopra kunge nesala cap, sun damai bememdi, ‘Aupu gekepkung’ tenen, bisi-bisi yuma embamemdi, apepra deipkuken upu yumada, sun gekenai lap pepra embankamrume. Kandi sun tep upepkurume.

Allahdi sun tep, ‘Angeda kunkamrume, angeda pio men kunkamrume,’ peiamseutopu, tek sisi talepra ukupmumnyopda, Allahdi sun Israel yala nesala tep, pedina upu deiki di, ‘Telep kudinkamsene,’ pepra, deipseu upu, nedi pepkusen upuda, moupra gekepkurume. Gekepmum dingeda, adipapu moupra talepra kunkamrume. Aupuda ake. 7 Menop taru sun apu yapu, Mesir mutu neitamai ikin weik kuramipa, doupra yankusi taru di dipra, aupu pepyakaramsanen, ukutaru peda, nedi sun tep, tupa pesenune. Ada, nedi sun tep, ‘Angeda kunkamrume, angeda pio men kunkamrume,’ pepra, upu ila puto di pesenun upuda, moupra gekepmumdi, kunkamrume. Atep, men di apeiamsi upupu, atumi peda, ne nyapu, ataru kunmarum nesala tep, kange di ton cap, aupupu yana pepra deipsene.

8 Uda, menop taru di dipra, ukutaru neitamai peda, tupa pesenune. Ange pesenun dinino, sunda, ne upu moupra men gekenerume. Tonda nedi sun damai pesenun upuda, men talepra kurume. Dinino sun apu yapu pe, sun ataru kurum nesala peda, ne upu moupra men gekepra taleprumudi, men kurume. Ange gum dinin, sun apu yapudi pio balila kupra, mali kuramitopu, sun ataru kurum nesala peda, ‘Gume, nun pe kange dipapu tenenup kecapu, mali tupa kunkamepe’ tenen, malipu tupa kurume. Ange tep nengeda, nedi sun wenemna tep, ‘Ange-ange men kupmumnyopda, ikin keca sun nong deiki derinkamsene,’ pepra, pedina upu deiki peiamsinge yuma dopra, sun anesala deiki konum deiamsi. Tonda, sun ataru kurum nesala peda, sun deiki ton derisenune. Allahdi pepu.

9 Tonda, Allahdi, ton cap ne Yeremia damai peipneu.

Yehuda tara mutu neitamai kunge nesala cap, tonda Yerusalem ila ati arum neitamai kunung nesala yuma capda, ‘Gume, Allahdi pesere upu men gekenkamepe. Er upu yaniptapmepedi, nun tenenup kecapu, kunkamepe,’ tenengedi, mali kuna ngepu tupa talepra kununge. Neda, sundi, ‘Dabale’ tenen, tamengedi, konum upu talenunge. 10 Uda, men taru sun apu yapudi, ne pepra deiamsi upu moupra men taleamidi, balila kupra, mali-mali kuramitopu, sun ataru kunung nesala peda, utopu konum mali kununge. Ada, sun anesaladi tali keca tep, ‘Nun nai bo,’ pepra, isok si eremenga deiki di, nedi sun apu yapu tep, ‘Ukunkamrume,’ pepra, deiamsi pedina upuda, konum yanitamnapu kununge. Sundi aupu moupra talengedi, men domyakanunge. Ada, sun Israel yala nesala pe, Yehuda yala nesala peda, sun apu yapu tep, ‘Ange-ange talepra kunkamrume,’ peiamsi upuda, sun ataru kunung nesaladi, konum tapra yanidongonunge. Ukununga deiki di, nedi peiamsi upu konum tapra yanitamnenunge.

11 Ange tep nengeda, ne Allah Yahwehdi, sun tep aupuda pepsene. Ada, sun mali-mali weik kunge keca menenga tep, nedi ikin keca dopra, sun deiki deipnepa doropkamenge. Ukupnedi, sun deiki aikin keca deipkamne ngeda, men lyepdanmanto kupkamenge. Aikin kecada, tek sisi sun nong deiki yana deipnepa, dopropkamenge. Sundi, ne tep, ‘Uo, nun nai bo Allah, kandi nun damai yana lyepsetume,’ pepra moropnetengedi, engeptenga peda, ange men gekepkamsene. Tonda, sun tep men lyepropkamsene. 12 Nedi sun tep men melipne pangeda, Yehuda tara kunge neng pe, Yerusalem mutu neitamai kunge nesala peda, yapi keca popra, sun isok tep karepmengedi, akeca tep si eremnung isok-isok damai bengedi, “Uo, nun nai yapu, melipseso!” pepra, bena moropmengedi, engenkamenge. Upepra moropmengedi, engenkameng dinin, ikin keca sun deiki yarepa doropkameng ngeda, sun si eremnung tali kecadi, men yana melipra lyepropkamsenge.

13 Angeda, tali tep men pepsene. Sun Yehuda tara kurum nesaladi, ‘Nun deiyo keca, nun nai bo,’ pepra, isok si eremrumu keca yala yumada, weik akurure. Ada, Yehuda tara kunge neng, sun ati arum weik dopra, dakunung utopu, sundi isok si eremnung keca peda, pio weik kurure. Tonda, ange utopu, sun Yerusalem mutu kurum nesalada, Yerusalem mutu neitamai tali bisai-bisai pio weik akuretopu, sun amutu kurum nesaladi, sun isok si eremna tep, mesba-mesba men nukmanto, dopra ketenemdirume. Ada sundi, ‘Nun nai bo,’ pepra, er si Bahal isok, pio mali kure keca, er si eremna tep, yapi keca popra karerbanai dopra, ketenepra derirume. Amali kun keca kuruma tep nengeda, ali weik dangkamrume. Allahdi pepu. 14 Upepu dingeda, ne nabi Yeremia tep, aupu ton peipneu.

Atep nengeda, kanda Yeremiao, kandi sun tep kumemdi, ne Allah tep, men moronkamnerume. Tonda kandi ne Allah tep, ‘Uo nun nai Allaho, sun Israel nesala tep melipseo,’ pepra, morona cap, enegena capda gume. Deiyoda, sundi tali isok tep, ‘Nun deiyo keca,’ pepra, si eremnunga deiki di, nedi karepnepa, ila ikin keca, sun nong deiki yarepa, doropkameng taruda, kandi ne tep, ‘Nun naio, melipserume,’ pepra, men moronkamnerume. Moropnetuma peda, men gekenkamne.

15 Tonda, ange tenipetepso! Ne Allahdi, ne nyapu sisa tep, bicau teneramsipane, sundi mali kecapu tupa kununge. Atep nengeda, ne Allah si eremna ati wekra yangedi, men mororyakankamnenge. Ne si eremna ati pumbon men wektenge. Nedi sun tep, men kaukepkamsene. Tonda, sundi tenenungada, ‘Gume, nundi Allah tep, pedina upu pepra derinupnge cap, tonda er karena tep, yapi keca popra kareryakanupnge cap deiki di, Allah er kange telep deipkamsera tep, erdi ikin keca karepserepa, nun damai yaserepa, men doropkamepe,’ tenenunge. Ukupra tenengedi, kange derinung dinino, ange teneptenga peda, nedi sun wenemna tep, popra sikke buktapkamsenada, adipapu gum kupra deiptu do? Gume, angeda, men kupmanto.

16 Menop taruda, ne Allah Yahwehdi, sun Israel yala nesala yuma tep, ukupmanto ngeda, “Sunda pio telep saitun co, telep kupra tekredi, co bo cap, saitun du cap, weika di telep kupra mourur co utopu kurume,” peramsisi. Dinino uku taruda, nedi doproipnepa, sun pona tep nengdi, yankameng taruda, ila upu lelim pepmenga deiki di, yana popkamsenge. Ukupmantoda, saitun co damai, ila uku dongopnepa, uku bu di saitun co bo cap, tonda saitun co teru yuma peda, copra tapnepa, uku di jeproprepa, sikke buktapkamre ja! Ange utopu, sun mutu yumada, popra gawal dakamsene.

17 Neda, Allah Yahweh, ^{▼▼Yahweh – Akayat neitamai cap, ayat 20 neitamai capda, Ibrani upu di, ‘Yahweh Sebaot’ seki. Atep aupu deiyo ngeda, katuai di sekmepu.} im deiki jen talena malaikat yumada, sun deiyo ngebo kununa cadi, ne puto weik ngebo kunune. Atep, nedi Israel yala nesala cap, Yehuda tara kurum nesala capda, betapra deiamsidi, telep kweipsisi. Dinino nedi, ‘Ukupkamne taruda, wenepra mali kweipkamsene’ tenen, konum ketenepsi ngeda, karepkamsene. Ada, nedi sun deiki, ikin keca deipnepa, kange mun kupkamre. Ikin keca, sun deiki yarepa, doropkamrum ngeda, sun pe mali kurumunge menenga dia. Ada, sun atara kurum nesala yumadi, Bahal isok si, pio mali keca tep, ‘Nun deiyo keca,’ pepra, si eremrumudi, er karena tep, yapi keca popra, karebaruma deiki di, nedi sun tep, yu kunerepa, wenepkamsene. Allahdi ne Yeremia tep pepneu.

Yeremia er pona tep nengdi, ‘Ange bo, popmeko!’ pepra, sisiki upu

18 Ne pona tep nengdi, ne Yeremia tep, “Ange bo popkamepe,” pepra, upu taleamnei ngeda, ne nai Allah Yahwehdi, ne damai yana pepra, lap pepneu. Lap peipneua deiki di, sun mali weik kunge keca kael kepsi. 19 Allahdi ne ponange tep, upu kapul men yana peiamneu taruda, ne Yeremiada, anengdi mali teneraminge men kael kepsa tep, walwal ngebo utopu kuramsi. Ukupmanto, domba bisam mankau kange doupra kunmanpapu, pona damai doupra dubaramengtopu kupnei. Ne kael kemna gum, mankau dipapu, ne pona tep, upu sisingamnei ngeda, men kael keamsi. Sun anengdi, ne tep uperamnei. “Ukupmantoda, du mourur coda, ataru di kwepra tapmepepa, gum kupkamretopu, angebo popmepepa, gum kupkamre. Tonda, er angebo popra tapmepepa, amutu nesalada er si ton cap, pio men si penkamenge. Er tep nengeda, pio lupronkamenge,” pepra, upu taleamnei.

20 Uperamneipa, konum kael kepsi dingeda, nedi Allah tep moropsi. “Ne nai Allah Yahweh ^{▼▼Yahweh – Akayat neitamai cap, ayat 22 neitamai capda, Ibrani upu di, ‘Yahweh Sebaot’ seki.} kanda, im deiki jen talena malaikat yumada, sun deiyo ngebo kuruma cadi, kanda ila puto ngebo kurume. Ne kaele, kanda upu bongdina ila deiyo ngebo kumemdi, nimi tuai nesala yuma tep, dumsisipu upu bokra deriserume. Kan dipapu, nun tuai nesala kange dipru neitamai tenenupnge peda, katawai di epra kael kemserume. Atep naio, sundi ne tep, ‘Ange bo popkamep,’ penenung nge yumada, nedi, ‘Allahdi lyepropkamner’ tenen, dopra kan deikipu deipkene. Atep nengeda, kandi tenepmemdi, sun aneng deiki menenga dopra deipkamrem ngeda, ne ton epnedi, kael keptene’ tenen, moropkene.

21 Ne Yeremiada, ne mutu sisa, Anatot mutu ati arum dopra kunung nesaladi, ne Yeremia tep, upenenunge. “Gume, kanda dim pepkurume. Upu ton cap men penkamserume. Kandi, ‘Allah Yahweh er si deiki di, amenda dortaru yankamre kecada lape peipkusene,’ pepra, lap peserum upuda, adipapu yapkurume. Gum dingeda, nun damai tupa peryakasememnyopda, nun pe buri dipapu, kanpu poptapkamkepe,” pepra, puto di penenunge. 22 Ne mutu nengdi upenenunga tep nengeda, Allah Yahwehda, im deiki jen talena malaikat yumada, sun deiyo ngebo kurura cadi, erda ila puto ngebo kuredi, upepmasere. “Nedi sun Anatot mutu neng tep, wenepra popkamne. Sun mutu kunung kaber neng yumada, mar podanai di, nimi pon parang ya di popmengepa depkamenge. Tonda, aneng sun nyapu cap, ner nyapu cap yumada, jen keca putana deiki di depropkamenge.

23 Allah Yahwehdi sun Anatot mutu kunung nesala tep, ikin keca kareprepa, doropkameng taruda, konum ketenepra deipu. Tonda, Allahdi sun amutu kunung nesala tep, ‘Wenepra poptapkamne,’ tenepu keteng tamun cap, atumi cap konum yaryopda, tenpu ngebo peda, ton men bura saka benkamenge. Ne Allahdi ila kange mun keca karepkamna deiki di, aneng yuma poptapnapu kupkamne ja!” Allahdi ne Yeremia tep peipneu.