Jer 12 | XteSC | STEP | Ne Yeremiadi tenenun ange pepkukene. Ne nai Allah Yahweh, nedi kan tep, ‘Angeda ware keca deiyo tep kupre do?’ tenen, ne mali kange doupnyopda, kan tep morokenepa, kandi tupa-tupa telep kupra dumsisinge penerume. Dinino, ne men kael kemnun ngeda, kan tep asipetepkukene. Ada, “Warya tep, sun mali kunung nesalada, sun kunung keca yumada, nong tupa kemrepa, teleppu kunung do? Tonda, ware keca tep, telep dumsisi men kungedi, mali kecapu talepra kunge nesalada, sun damai ikin keca yarepa, men doronung do?

Jeremiah 12

Yeremiadi Allah tep, “Ne tenene ngeda, ake,” pepra moropu upu

1 Ne Yeremiadi tenenun ange pepkukene. Ne nai Allah Yahweh, nedi kan tep, ‘Angeda ware keca deiyo tep kupre do?’ tenen, ne mali kange doupnyopda, kan tep morokenepa, kandi tupa-tupa telep kupra dumsisinge penerume. Dinino, ne men kael kemnun ngeda, kan tep asipetepkukene. Ada, “Warya tep, sun mali kunung nesalada, sun kunung keca yumada, nong tupa kemrepa, teleppu kunung do? Tonda, ware keca tep, telep dumsisi men kungedi, mali kecapu talepra kunge nesalada, sun damai ikin keca yarepa, men doronung do? 2 Allah kandi, sun anesalada telep kupra derirume. Ukupmantoda, kandi sun tep, tali bongopredi tuai paramre keca utopu kupra derirume. Ukupmempa, sunda yaten tu pumbon beredi, telep kupra bongopredi, du mouramre utopu kupra derirume. Sun anengda, Allah kan damai, sun sipyal deiki dipu, telep-telep upu pertamkenung dinin, sun dipru neitamai di kan tep, tek sisi tenepra men pekenunge.

3 Dinino, ne nai Allah Yahweh, kandi ne tep kael kepnemume. Tonda, nedi Allah kan tep tenekene ngeda, ne dipru neitamaipu dinerume. Nedi kan tep moropkene. Sun malipu kunung nesalada, kandi ukupmanto, nimidi popkunge domba bisam gerekdara, er pokungai dubaramengtopu, kupkamrume. Ada, kandi sun anesala tep, kalengamempanen, sun poryankameng nengdi yana popkameng taru kupkamrure. 4 Ware kuprap taru di ton cap kunmapepanen, amutu neitamaida gelal sepropkamre do? Tonda, wa penai tengrur mutmuta yumada, nunupra kolupropkamre do? Tonda, tali gam kunung keca cap, ma cap yumada, amutu nesala nun mali kunupa deiki di konum depropi. Depropipapu, nundi aupu penupe. Aupu penup ngeda, “Nun kupedi, tenenkamep nge deiki di kunkamep ngeda, Allahdi men dinkamsere,” penupe. Ne Yeremiadi Allah tep pepsi.

5 Upepsipa, Allahdi ne Yeremia tep, ne damai yana tamupra pepneu.

“Gume Yeremiao, kan cap, yuk ngebo cap, ‘Bisipdankunem’ tenen, sepra bamemnyopda, konum bepekukerure. Atep kandi ware kupra kuda bisam cap, sepdara betumdi, bena bisiptum do? Angeda men kuptume. Tonda, telep banai sepra bandenkap, sakmatumopda, bura mutu Yordan me dumanda, takke keca cap, mutmuta paramrai cap, daneitamaida, kan sepra banada, piripeteptum dinin, ware kupkamker do? 6 Uda, kan du yapu cap, kan weit yapu cap, tonda kan tara nesala cap, sun yumadi, kan perum upu men gekekengedi, ‘Erda nun song cadi, Yeremia erpu popkamepe’ tenen, upu sisingkengedi, ‘Poryankamepe,’ pekenunge. Atep nengeda, sun anesaladi kan damai yana, telep upu peipkengya peda, sun upu gekepmemdi, teka tenena gume!” Allahdi ne Yeremia tep pepneu.

Allahdi er nyapu tep, bicau kupkamra tep, pepu upu

7 Allahdi pepu.

Ne Allahdi Israel mutu neitamai kunkameng nesala tep, ton cap tupa men tenenkamne. Israel mutuda, ne mutu sisi kurur dinin, amutuda konum tapkamne. Tonda, ne nyapu sun tep, bicau teneramsi nesalada, nedi dopra, sun podan neng deikipu deipkamne. 8 Nedi wepra deiamsi nesala, sundi ne tep, bura tara kurur gam keca, er si singa pusdi, ‘Angebo popkun’ tenen, bisbisa kamamretopu, sundi ne tep konum bisbisa kamnenunge. Ada, sundi ne deikida, mali upu pepra derinenunga tep pepne. Atep nengeda, nedi sun tep, yu kupnerepa, ‘Anesala ne songe,’ konum tenenune.

9 Nedi sun Israel mutu neitamai kunge nesala tep kupkamnada, ukupmantonge pepkune. Ada, ayam ma bulupra, tenpuai kunmangepa, ma pongedi, ‘Ayam ma yana popra jepkun’ tenen, yakaramretopu kupra, ne mawa nesala, sun podan nengdi damai poryankamenge. Tonda, ukupmantoda, bura mutu dana-dana tara tali dagam kure keca, yala yumada, nedi upupnedi go karepnepa, yangedi, sun anesala yuma yana popra, gawal dakamenge. Angetopu, nedi go karepnepa, Israel nesala, sun podan neng yala-yala yumadi poryankamenge. 10 Yuk mutu nimi deiyo kepra kunung nengdi, ne anggur wa yumada, konum yana mali kupra deipnei. Tonda, ne wa peamsiai yumada, konum yanipdongopra nyekdongopnei. Tonda, ne tu pio urasin telep kwamneu mutu yumada, sun yuk mutu nengdi, nimi deiyo kepra talepidi, pio mali kupra deipipa, katuai sengtamne mutu, nimi men kurameng mutu utopu, walang yo kupra deipnei. Ada, yuk mutu yu nengdi, ne mawa neng, Israel nesala tep, konum poryakanunga tep pepne.

11 Teka, ne mutuda, sun yuk mutu nengdi nimi deiyo kepra talepidi, pio ati walangyopu kupra deipnei ngeda, konum dinune. Amutu tu neitamai yumada, sun yuk mutu nengdi nimi deiyo kepra talepidi, pio mali kupra deipipa, ‘Uo,’ pepra ngolongredi, mali perure. Amutu tuai yumada, katawai seng tamne mutu neitamai pio walangyopu kupupa, nesala ton amutu tep men dinunge. Nimi men kurameng mutu utopu kupneu.

12 Nedi sun yuk karen mutu podan neng tep go karepnedi, doproipnepa, nesala kuna gum, pio katuai kupu mutu buma deikida, yanipra embanmangdi, ne mawa nesala tep poryakanunge. Nedi sun mar podana neng dopra deipnepa, amutu tuai yumada, yana mali kupra deipkamenge. Ukupnepa, nimi tenpu ngebo peda, telep ton men kunkamre. Ukupmantoda, ne Allah Yahwehdi, ne nimi pon ya dopra, Israel nesala kunge mutu neitamai yuma, ormutu sirik, atara sirik, daneitamai yuma peda, Israel nesala weika di popra, gawal dangmang adano! Nimi tenpunge peda, tali kange doupra men kunkamre.

13 Ukupmantoda, ne nyapu Israel nesaladi gandum yal konum boloki dinin, er du men dakamenge. Tali takke kecapu kipra deipkamenge. Kange mun kange deiki di, sun wa konum piripetepra pepi ngeda, nong keca ton pio men kipi. Ukupka cadi, sundi, ‘Uo ware keca tep kupser do?’ tenen, beipye tarepa, dipru bulungsangrure. Sundi, ‘Ange kipmepedi, kunupmepyopda, isomka kunkamep’ tenen, piripeterami dinin, nong pio men kapu. Atep, ne Allahdi sun tep, yu kupnerepa, sun deiki ikin keca deipne pangeda, sun wa penung ngeda, nong ton kipra men jepkamenga tep, ali weik dangkamenge.

Allahdi ne Yeremia damai yana peipneu.

Allahdi Israel nesala, sun tara nesala tep, pedina upu peipkamre upu

14 Allahdi ton cap, ne Yeremia damai yana peipneu.

Ne Allahdi Israel yala nesala, sun dana-dana tara kunge yu neng, ada yuk negara-negara kepra kunung nesalada, nedi wenepra poptapkamne ja! ‘Sun ayuk-yuk yala nesaladi, ne nyapu sisa Israel yala nesala tep kareamsi mutuda, sun yuk negara nengdi, ‘Nun dipapu amutu upula dopropmepedi, talepra kunkamepe’ tenen, piripetenunge. Ukupmantoda, nimidi koun keca tuai kouamengepa, amenda, ‘Akecada nun song’ tenen, ka di kwenerameng utopu, nedi sun amali nesala dopra, Israel nesala sun mutu yuma neitamai di, dopra donokamne. Ukupnyopda, Yehuda yala nesala peda, sun amali nesala kan-kan neitamai di kunge nesalada, sun pe mutu neitamai di doropnedi, yuk karen mutu neitamaipu deipkamsene.

15 Dinino, sun Yehuda yala nesalada, nedi konum dopra yukai deipnyopda, dakuramenganen, amenda taruda, nedi tamupra, Israel yala nesala tep, ka di ton bicau tenepnedi, sun tep lyepropnyopda, nedi anesala yuma dopra, tamupra sun men di kurami mutu, sun tep kareamsi mutupu dubena deipkamsene. Tenpu ngebo peda men tapkamne. 16 Ukupne pangeda, sun dana-dana tara kunge yuk-yuk yala nesala, yuk negara-negara kunge neng yuma, sun dipru neitamai di, moupra tenepmengedi, ne nyapu sisa sun Israel nesala, sundi ne tep, si eremnengedi, telep kupra kungedi, tek sisi bisi dombaramengtopu, kael kepmengopda, ayuk-yuk yala nesala peda, telep kweipkamne. Ada, ne nyapu sisa, ne mawa nesaladi, ‘Nun nai bo Allah Yahweh, er si deiki dipapu kunkamepe,’ pepra, pedina upu di pengetopu, sun yuk yala nesaladi ange kael kepmengedi, talepra kupmengopda, nedi anesala peda melimkamne.

Tonda, sun yuk-yuk yala nengdi, menop taru ne nyapu sisa Israel nesala tep, ‘Nun nai bo isok Bahal, er si deiki dipapu pedina upu penkamrume. Erpu talepra kunkamrume,’ pepra peteremamitopu, sundi isok Bahal tapmengedi, ne sipu erepnengopda, ayuk yala nesala peda melimkamne ja. Ada, sun yumadi, “Allah Yahweh kanda, gam kuna deiyo ngebo pio kurume,” penkamnenge. Upepmengedi, ne sipu eremnengopda, nedi sun anesala peda, ne nyapu Israel nesala kan-kanpu, duyana tapakra deipnepa, tonpa kunkamenge.

17 Dinino, ne peipne upu moupra gekepra, men domyankameng nesala yala-yala yumada, tapnedi, gum kupra deipkamne ja. Ukupmantoda, nimidi tuai kouamenge keca kwenepra donongamengtopu, nedi sun anesala yumada, pio kwenepra tapnepa, gum kupropkamenge. Nedi sun tep sikke buktapra gawal dakamne ja! Ne Allah Yahwehdi aupuda konum pepra deipmana tep, tek sisi nong kupkamre ja pepsene.

Allahdi ne Yeremia tep pepneu.