Jeremiah 13

Deiyo deiki deipra, nong kemna tep dongona ngeda, mali kupka tep, pepu upu

1Allah Yahwehdi ne Yeremia tep yana pepneu. “Kanda bememdi, kan deiyo deiki deipra, nong kemdongona tep, kain lenan di bum celana wipra deipi ngeda, kunupra kenekurume. Dinino, anong lelimna tep bum celanada, me pumbon neitamaida, pio men dongopkurume,” peipneu. 2Allahdi apepra deipneutopu, abum celana bena kunuprapsidi, ne nong lelipdongopra kemna tep, deiyo deiki deipra, getepdongopsi. 3Ange konum kunupra getepdongopsidi, konum kepsopda, ue butenenge Allahdi ne damai yana, upu pepra deipneu. Aupuda ake.

4Kanda adipapu, ila me, er si Efrat mekin bememdi, kan adipapu nong kemdongomna tep, deiyo deiki getepra deipmaremdi, kenekmarem bum opkalda, kwiripra gel tengna imir pumbon neitamaipu bena, inipra deipkurume!” peipneu. 5Allahdi upeipneu atep, Allah Yahwehdi peipneutopu, ne adipapu besidi, nong getedongona tep, abum celanada, ila Efrat me embenamngai, pirman tara bena, gel tengna imir pumbon inipra deipsi.

6Dabena inipra deipmasidi dakunmasipanen, ware kupra taru konum kupkopda, Allah Yahwehdi ne damai yana pepra deipneu. Ada “Kan adipapu bememdi, nedi kan tep, ‘Bum celana Efrat mekin damai inimbenkurume,’ peipkesipa inipmum ngeda, bena doupra yankurume!” pepneu. 7Upepneupa, ne adipapu Efrat mekin besidi, ainipra deiamsi bum celanada, enmasanen, gel tengna imir pumbon, adipapu epra doropsi. Dinino, abum celana konum lyupka sakamnga cadi, deiyo deiki deipra getedongona tep nengeda, ataru men ketenepmanto kupu. 8Ange kupka tep nengeda, Allah Yahwehdi ne damai yana pepneu. Allah Yahwehdi ayana pepra deipneu. Aupuda ake.

9“Ne Allah Yahwehdi pepkene. Abum celana konum lyupra sakupa, nimidi men kenekmanto kupra, mali kupmartopu, Yehuda yala neng cap, Yerusalem mutu neitamai kunung nesala cap, sun dipru erepra, salnong-nong kamnung nesala capda, nedi gum kupra deipkamne. Ukupkamne tarupu, sun anesala yumada, popra sikke buktapnedi, ila kange mun keca, sun damai dopra deipkamne. 10Amali kunung nesala yumada, sun dipru pio mali kununga cadi, sunda pio balila deipra kunung nesala cadi, nedi sun tep pepra derinun upu yumada, pio moupra men gekenunge. Sunda, balila weik kungedi, sun pe kange dipapu tenenge kecapu talepra kununge. Tonda, sunda tek sisi tali keca tepapu, “Nun nai,” pepra, dombangedi, isok sipu erepra kununge. Atep nengeda, abum celana konum lyupra, mali kupupa, men kenekmanto kupka cadi, adipapu tapkurume. Ange utopu, sun amali kun keca talepra kunge Israel nesala tep nengeda, ne dabale cadi, anesala peda, nedi tapkamne.

11Ukupmantoda, nimi opkal bum celana kepmengedi, deiyo deiki deipra darapdongopmengepa, getepdongopmengepa, sun nong bol damai paledongoramretopu, nedi sun Yehuda yala neng cap, Yerusalem mutu kunge nesala capda, ‘Sunda ne deikipu kunkamenge. Ne damaipu pio akunkamenge’ tenen, ne mawa nesala keipsi. Ada, nedi, ‘Sunda, ne nyapu sisa kunkamenge’ tenen, anesala ne damai deipsidi tenepsi. Ada, ‘Israel nesalada, ne si kael kemna cap, ne sipu eremna cap, kunkamnenge. Ukupmengopda, ne sipu erepmengedi, ne tep, ‘Uo, nun nai bo Allahda, pio teleppu kurure,’ pepra, gispal donkamnenge’ tenen, anesala telep kweipsi. Ukupsi dinino, ne nyapu sundi, balila weik kupidi, nedi pepra deipsi upu yumada pio moupra men gekenenunge.” Allahdi ne Yeremia tep pepneu.

Anggur me kipra derina tep keca, bongopu upu

12Upepneudi, Allahdi ne Yeremia tep, aupu ton dukdongopra pepu.

Aupuda, sun Israel nesala tep bena pepkurume. Neda, sun Israel nesala, sun nai bo Allah Yahwehdi kunune. Nedi sun tep pio melipra kalengamsipanen, sundi ne si eremami dinin, konum tamnenunge. Atep, nedi adomon upu pepkuken ngeda dopra, sun Israel nesala damai perbenkurume. Ada ake. Anggur me kina tep, nimidi domba bol kolupunge di wipra deipi ngeda, anggur me kipra deipmengepa, dinikra derinunge. Tenpunge peda, men tamnunge,” pepkurume. Upepmemnyopda, sundi tamupra kan tep upepkamkenge. “Gume, apepserem ngeda, nundi konum moupra kael kepmepu. Nundi anggur me kina tep, betapra deipmepunge yumada, anggur me gwepra kipmepepa, dinipkamre. Kan Yeremiadi, ‘Anesalada, ange men kael kepi,’ tenepmaserema tep, aupu pepmaserem do?’ pepra, pepkamkenge.

13Ukupra pepkengopda, atep nengeda, kan Yeremiadi sun amutu neitamai kunung nesala yuma tep, tamupra pepkurume. “Allah Yahwehdi pepsere. Tek sisi, amutu neitamai kurumu nesala yuma, sun Yerusalem ila ati arum neitamai kurum nesala pe, amutu dana-dana tara kurumu nesala peda, sun kange yawaramre deiyo keca karepkamsene. Ada, amutu tali dakurumu nesala yuma cap, tonda amutu talepra, Raja kepmengedi, Raja Daud erdi deipra deipdanen, yakanung neng cap, Daud er bungna keca, er si tahkta deiki bungnung deiyo neng yuma cap, Allah er si eremna ati pumbon pel donge neng, sun imam neng cap, Allah er upu lap pena deiyo neng cap, amenda kupkamre keca lap pena deiyo neng, sun nabi-nabi neng cap yumada, sun kange yawaramre deiyo keca karepkamsene. Ada, ukupmantoda, nimidi yu anggur me pio weika jepmengopda, sun giso biri-biri pepredi, kange yawaramre utopu, nedi ukupra deipkamsene. Ukunyopda, sun amutu neitamai kurumu nesala yumada, sun kange pio yawarapkamsere.

14Ange ukupnepa kunkamre taruda, ne Allahdi tenpu ngebo doprapnedi, ton ngebo deiki donoknepa, pio sikke buktapkamre. Tonda, amutu neitamai kunge wisi neng cap, nyapu cap yuma capda, dopra sun deiki donokamne. Ne Allahdi sun tep, bicau tenepnedi, men tapkamne. Nedi sun tep, men kaukepkamne. Pio gum kupra deipkamsene. Aupuda, ne Allahdi konum pepra deipne.

Yudea tara nesala dopra, pio karen mutu dubena deipkamenga atep, pepu upu

15Sun amul pakeipra gekenkunerume. Sun dipru eremna deiki di pio men kunkamrume. Ada, Allah Yahwehdi aupu konum pepra deipmasera tep, pepsene. 16Sun nai bo Allah Yahweh, erdi keteng komuni tumi tamupra men kunungna karepmare taru dipapu, Allah er tepapu, si eremkurume. Kunukmatim peprepa, sun yane mutu buma deiki kwepra, kapul men yana giso dukmakere taru dipapu, sun si eremrum Allahda, er si erepmumdi, ‘Erda pio telepe,’ penkamrume. Sundi, ‘Nun dirineda, dan tara yankamre do?’ tenen, ketenepra dikamrum dinin, Allah erdi tamupra, “Atumida kunukra deipkamre. Ukuprepa, atumi neitamaida, pio kunukmeteng,” pepkamre. 17Sunda, ne Yeremiadi peipsen upu, men gekepnemumnyopda, ne adipapu nimi peda pio men embanungai dabenedi, dadim peprapnedi engenkamne. Ada, sun dipru eremna deiki di, salnong-nong kamruma tepa. Ne asi me longom pepneredi sakamnere. Ada, ukupmantoda, sunda Allah er peirur domba utopu kurum dinin, yu nengdi sun tep popmengedi, tomopra sun pe mutu tamupra dubengedi, wenemna ati dongopkamsenga tep, ange epnedi engenkamne pepsene. Nabi Yeremiadi pepu.

18Upepupa, Allahdi aupu ton pepu. “Kan Yeremiadi amutu Raja cap, er ner cap, sun tep pepkurume. ‘Sun ila eremdin bungna keca deiki bungrerum ngeda, tapra tuai bungna keca deiki bungyankurerume. Ada, tali tep gum dinin, deiyoda, Raja kanda ila deiyo ngebo kurema tep, pio telep giso galurum topi, er si mahkota, kan podan nengdi, kan giso deiki di dalupra dopropkamkenge. 19Yudea tara dinin, iknapi dam tara (arah selatan), atara er si Negeb mutu neitamai, ila ati arum dopra kungedi, lyom gel beilya wipra, buplan potokeipyaida, konum dekdongopra ongopdopmangdi, warekdongopmange. Deiyoda, sun podan nengdi, konum yana ongopdongopra warekmasengdi, ponmasenga tepa.

Atep, ‘Nun podan nengdi popra gawal daksenung’ tenen, adekdongopmang buplanda, tenpu ngebo peda, men bena, sun ila buplan pakra deiptue. Sun podan nengdi, sun Yehuda tara kunge nesala yuma popsengedi, ateng koupra, sun pe mutu dubena deipkamsenge. Yuk karen mutu neitamaipu donokamsenge. Amutu neitamai kurum nesala yumada, adipapu doupra, yuk karen mutupu dubena donokamsenge.

20Atep nengeda, Allahdi pepu. Uo, sun Yerusalem mutu neitamai kurum nesalao, sun asuru erepra, dapu tara (arah utara) dipetepkurume. Sun poryakana tep, sun podan neng ton konum yakanmange! Atep nengeda, Allahdi sun deiyo neng tep kareamseu nesala, sun domba utopu talepra kurum nesala yumada, dan tara bena kunkameng do? Tonda sundi mun peramrum nesala tep nengeda, dan mutu bei do? Atep sundi ware upu penkamrum do? 21Ne kayapu, sun tenipetepso! Allahdi go kareprepa, sun podan nengdi yana konum ‘Popkamep’ tenen, talepsetengopda, sundi sun aneng tep ware peptum do? Menop taruda, sundi, ‘Gume akaren mutu nesalada, nun kayapu neng kununga cadi, yuk mutu nengdi poryankamseng taruda, anengdi ton yana melipkamsenge,’ tenerum dinino, tek sisi ataruda, aneng dipapu, sun tep poryankusenge. Anengdi yana popsengopda, ukupmantoda, ner mundu douamyanen, mi deiyo sengrepa, pu jeramretopu kupsetua. Amenda taru sun ton, ange utopu men kupserepa, kange mun kange doupra men kupkamser do?

22Tonda, amenda taru sun kange neitamai dipapu tenepmumdi, asimdankamrume. Ada, ‘Uo, ware keca deiyo tep aikin keca yumada, nun deiki yaseupa, dopropmepu do?’ tenenkamrume. Atenenkamrumada, sun mali kun keca weik kuna deiki di, akange mun keca sun damai konum yakanmar adano! Sun mali weik kuruma cadi, sun wenemna tep, sun podan nengdi, sun mutu neitamai kunge nerapu dalupra dopropmengedi, nyangkamenge. Sun kemnung opkal kain sirik erepropsengedi, mali kweipkamsenge.

23Sun kael kemna tep, tenipetepso! Ukupmantoda, Etiopia mutu nengda, sun bol miripu ngeda, bol men tamuptupa, kulyan neng men kuptenge. Tonda, bura tara gam kuramre yu keca, er si singa pus ner ngeda, harimau bol torboroma kurur ngeda, men gum kupmanto. Ukuramretopu peda, sun tupa-tupa konum mali kurum nesalada, kange di tamupra teleppu men kweipdatume. 24Ne Allahdi anesala sun wenemna tep kupkamsen ngeda ake. Ukupmanto, katuai mutu di kumanya puto di pung peprepa yaredi, sepmenga keca yuma adipapu doupra, yuk-yuk datambaramretopu kupra, sun ton dadoupra enepra dokotepsenepa, yuk-yuk mutu neitamai dadoupra tambenkamsene.

25Angeda, sun menenga tep doropkamrume. Tonda, sundi ange doropkamruma tep nengeda, ne Allahdi sun tep, “Akonuma, ‘Ange doropkameng’ tenen, konum kunupetepra deipsi,” pepra, ne Allahdi konum peipsisi. Deiyoda, sundi ne Allah tep, konum lupronerumdi, tali mok upu tepapu teka tenepruma tep, aupu konum pepra deipsisi. 26Sun wenemna tep, ukupmantoda, sun ali dangna tep, yu neng dipapu sun nerapu lyom kain sirik tara taleprapsengedi, erepra giso tara dubesengepa, acelana sirik tara yumada gwelepra deipkamserepa, sun nong yumada banangapu kupserepa, ali weik dangamtengetopu, nedi ila di wenepsenepa, yuk neng yumadi epsengopda, sunda ali dangkamrume.

27Ne Allahdi sun mali kurum ngeda, konum disenune. Nedi sun tep, ‘Dabale’ tenen, yu tenenun ngepu, tupa talepra kurume. Sunda, ne tapnerumdi, ‘Isok si erepkup’ tenen, mutu deiki welena cap, wa pen damai cap berumudi, isok-isok tep, ‘Ne nai,’ pepra, aisok sipu eremrume.

Ukupmantoda, nimidi er kabo domre ner tep, ‘Uo, ne dipapu aner doroptene’ tenen, putap-putap peprepa, upula nyangamretopu kurume. Tonda ukupmanto, kuda bisam jemngedi, ‘Ner kuda bisam wal nepmarepa nyaktene,’ tenepredi, putap-putap peprepa, wal doramretopu, sun Yudea mutu nesala peda, ne tapnerumdi, yuk tali keca tep dombarumnya deiki di, ange utopu kurume. Atep, sun Yerusalem mutu kurum nesala yumada, sun wenemna tep, ikin keca yumada yarepa, doropkamrume. Atep, sunda pio tep, mali kun kecapu talepra tupa kunkamrem do? Ware kuprap taru ton konum kuprepa, sundi amali keca tapmumpa, nedi tamupra telep kweipkamsen do? Sundi mali kun kecapu talepra tupa kunkamrum do? Allahdi pepu.

Aupuda Allahdi konum lap pepra deipupa, ne Yeremia gekepsidi seksi.