Jeremiah 15

Allahdi, “Israel yala nesala wenemna sun nong deiki deipkamne, tenepsi ngeda, men tapkamne,” pepu upu

1Allahdi ne Yeremia tep pepneu.

Nedi anesala tep, sun wenemna keca men tapkamne. Sun apu yapu, ila mambul neng, Musa cap, Samuel cap, ne damai yan tekrengedi, ‘Israel nesala tep bicau teneprume,’ pepra, yan moropnerenga peda, bicau men tenepkamne. Sun anesala mali kununga cadi, menenga tep wenepkamne. Anesalada, tek sisi nedi sun tep dina dabal kunurura cadi, sunda adipapu bendopkununge. Kandi, anesala tep, ‘Allah damai di tapra beso,’ pepkamrume.

2Upepmempa, sun anesaladi kan tep, ‘Uo, nunda dan mutu benkamapa tep pepmaser do?’ pepra asipkengopda, kandi tamupra upepkurume. Allahdi pepmaserada ake. Nedi, teneramsitopu kunkamenge. Nedi, ‘Anesala ila kange mun pu jerya deiki di depkamenge,’ tenepsi. Anesalada, ila pu jeramrepane, tek sisi depkamenge. Tonda nedi tenepsitopu, ‘Mar podanai bengepa, ya deiki di popmengepa depkamenge,’ tenepsi.

Tonda, anesalada, mar podanmangai bengepa, ya pona deiki di depkamenge. Tonda, nedi, ‘Jen keca putana deiki di depkamenge,’ tenepsi nesalada, jen yuma putarya deiki di denkamenge. Ukupmenga deiki di, sun yumada, dena bisipu bankamenge. Tonda nedi, ‘Wenemna ati bena deipmengepa, bukamenga deiki di denkamenge,’ tenepsi nesalada, ateng koupmengedi, wenemna ati dongopmengepa, akuramenga deiki di depkamenge. Nedi sun Israel nesala teneamsitopu, sun yumada dena bisipu bankamenge.

3Ne Allahdi pepne. “Nedi sun Israel nesala wenemna deiyo keca dumbari ngeda, sun deiki deipkamne. Ada, nimi yuma popra gawal dakamne ngeda, ake. Sun yu nengdi parang ya dopra, anesala podanmangai di, anesala popmengepa depkamenge. Allah Yahwehdi poptaprepa adepmange nesala, sun nongda kamdi doupra benkamenge. Kamdi doupra datambendangepa, tali lakra embarameng ma cap, tali bura tara gam kunung keca yuma cap, yangedi adepmange nesala, sun nong yan jenkamenge.

4Ne Allahdi anesala tep, ila wenemna keca karepnepa, mutu ban-ban dakunung nesala ange epmengedi, kware weik kupkamre. Kware weik kuprepa, sun yumadi, ‘Uo, Israel nesalada, nun songe. Mali kudiramipa, Allahdi wenepu ngeda, ikin weik cadi, angeda nundi ton cap men teneptepe,’ tenenkamenge. Ne Allahdi akupkamnenge yumada, mesum tep gume. Ada, Hiskia er mi Manase, erdi Yehuda yala nesala, sun nimi deiyo ngebo Raja talepra kuramu taru, Yerusalem mutu neitamai, ila mali kuramunge menenga tep, anesala yuma wenepkamne.” Allahdi pepu.

5Allahdi pepu. “Uo, Yerusalem mutu kumum nesalao, ware ngebodi bicau tenenkamser do? Ware ngebodi, ‘Uo, ware keca tep kange mun keca anesala nong deiki yanmar do?’ tenen, sun tep dipru pu jenkamre do? Tonda, ware ngebo ton yaredi sun tep, ‘Israel nesalada, ikin weik tupa kunung do? Telep kunung do?’ tenepredi, asipkamser do? Gume, yuk nesaladi sun Israel nesala tep, men tenenkamenge. 6Ne Allah Yahwehdi pepsene. Sundi ne tep konum tapnerume. Sundi, ‘Gume amenda taru nun mali kun keca tapra, teleppu kunkamepe,’ penerum dinin, tupa malipu kuruma cadi, tek sisi wenepkamsene. Menmena di, ‘Kaukepnepa, amenda telep kupkameng do?’ tenen, dinapu kuramsisi dinin, ukutaruda ne dabal kunerura tep, dimpepra men kunkamne. Nedi, ‘Sun wenemna tep, sun popkamsen’ tenen, keteneamsisi ngeda, men tapkamne. Ukutaru karepkusene.

7‘Israel nesala wenemna tep, ikin keca karepnyopda, sun mali kun keca taptengedi, telep kunkameng do?’ teneamsidi, sun wenemna keca weika di kareramsisi dinin, sun mali kun keca tupa men tamrume. Atep, sun mutu neitamai, ati arum dopra kurum nesala yumada, kurpeten keca karenkamsene. Ukupmantoda, wa pen nengdi, ‘Gandum du sakrepa, bupra mawa deipkamep’ tenen, kelkela keca wepra donongbaramengtopu, mali keca weik kumum nesala yuma, wepra poptapkamsene. Sunda tali nesala gume. Ne nyapu kurum dinin, sun wenemna tep, ila kange mun keca, sun nong deiki derinkamsene. Deiyoda, sun mali kun keca tapra, telep men kuruma tep, ukutaruda tek sisi wenepsenedi, popra gawal dakamsene.”

8“Tonda sun kumum mutu neitamai yumada, nimi weika di popnyopda, nerapu solu tapmengepa, denge pio weik men nukmanto kupkamre. Ukupmantoda, ila laut mokon pirimanai, me wenenga yamuramretopu kupkamre. Tonda, sun neng yapuda kaber taru dipapu popropnepa, nerapu yumada solupu kunkamenge. Tonda, sun anesala yuma pona tep, nesala doproipnepa, keteng komuni taru yakangepa, amutu nyapu sun nin yapu epmengedi, kwar kuprepa, ‘Uo, ware kuptepe do?’ tenepkameng dinin, sun men tenepmenge taru di, menmena sun pona deiyo nengdi, amutu kaber nyapu yuma poptapkamenge. Sun nin yapuda, ila kange mun kange doupra, dipru pu jenkamre.

9Ataru neitamaida, go karepnepa, nimi weik popmengopda, ner tenpu er nyapu yoneitam bari deamrepane, sun anyapu yuma depmengopda, aner, ‘Uo’ tenen, tenimtonmankap, kange tu pepredi, isin gum kuprepa dea sakamre. Keteng komuni dinin, anerapu sun kangeda, ‘Konum kunukmaserdi, lukunda utopu kupsere,’ tenenkamenge. Tek sisi anerapuda, sun nyapu yuma depkamenge tep, ali weik kupkamre. Menmena taru di men popmengepa, tupa gam kunmang neng peda, nedi go karepnepa, sun podan neng deiki, parang ya di, anesala yuma popra gawal dakamenge. Ange yumada, ne Allah Yahwehdi, sun wenemna tep kupkamsene.” Allahdi pepu.

Yeremiadi Allah tep, ‘Uo, kandi peipnemum upu penada, ne ikine tep, ware kuptene do?’ pepu upu

10Ne Yeremiadi, Allah tep upepsi. “Uo, tek sisi ne men kupmanto kupnere. Warya tep nanin dadeiamneu do? Nanindi men deiamnetu teptoda, telepe pua. Allahdi peipneupa, amutu kunge nesala tep lap penun upuda, gekepmengedi, ila kange mun kange doupra kununge. Tonda, aupu lap pepnyopda, sun gekepmengedi, upu deiki pangdana cap, podana cap kununge. Pumun taru di dipra ukutaru peda, nedi sun keca ton, jepdongopra men kunune. Tonda, sun putana keca, ke taru tep karepnenge ngeda, co bo weika di tapakrap upula men donune. Ange yuma men kunun dinin, sun amutu kunung neng yumadi, ne tep mali upu pepra widongonenunge. ‘Angeboda, nun pio songe,’ tenenenunge.” Ne Yeremiadi Allah tep pepsi.

11Upepsipa, Allah er si Yahwehdi tamupra pepneu. “Teka amutu nesaladi, kan tep, ‘Nun songe,’ penkamkeng dinin, tek sisi ne Allahdi lyepropkamkene. Nedi kan tep, teneamkesitopu, kan damai kunedi, dukdongopra telepe dipapu pel dokenyopda, amenda taru kan damai kunkamre kecada, teleppu kupkamkere. Ukutaruda, sundi kan tep, ikin keca derikenung nesalada, amenda taru, nedi kange mun keca sun nong deiki deipnepa, ikin weik kupmengopda, sundi kan tep, ‘Allah melipsetu’ tenen, kandi melipra, ‘Allah tep moronkamserume,’ pepra moropkamkenge.” Allahdi ne Yeremia tep pepneu.

12Upepneudi, Allahdi sun Israel nesala tep pepu. “Tonda tenpu ngebodi pio gat keca, besi kecada, er buru dipapu men coptaptue. Ukupmantoda, gat keca besi keca cap, tembaga keca cap, men coptaptue. Ange utopu, menmena utara mutu di, sun tep poryankamseng nesalada, sundi men popbisiptume, pepsene. 13Ne Allahdi sun podan neng dopra deipnepa, yangedi amutu talepra kunkamenge. Ukungedi, sun Israel nesala taleamrum isomka kun keca yuma, yana dalupra dopropkamsenge. Kunumna gum dipapu, amutu neitamai sun kunumna weik keca, tali lupra dopropkamsenga deiyoda, amutu yuma kurumu nesala yumadi, mali-mali weik kuramrumpa, sun wenemna tep kupkamsenge.

14Nedi sun podan nesala tep, go karepnepa yana popsengedi, gam tupa kunkameng nengda, ateng koupra, sun pe mutu tamupra dubenkamsenge. Sundi men kael keamrum nesala, karen mutu yu nesala kan-kan dopra deipsenepa, nimi bo neng utopu kurumudi, sunda amutu neng tep, tali pel dopra melimna nengpu kurumudi, sun anesala mutarapu ikin kange doupra kunkamrume. Sundi, ‘Uo, ware keca tep, ikin kunmaser do?’ men tenenkamrume. Ada, ne yuda uku bu jeramra utopu kunerura tep pepne. Auku bu jento kunere ngeda, ware ngebodi tapdongoptu do, pio gume. Ila uku pio jeramretopu, ne yuda men gum kupkamre.” Allahdi pepu.

15Upepupa, ne Yeremiadi Allah tep tamupra pepsi.

Uo, ne nai bo, kanda Allah Yahweh kurume. Ne ikin weik kunere ngeda, kan konum kael kemnerume. Atep, ne ikin kunerenge, pio tenepnememdi melipneo. Amutu nesaladi, ne tep domembanengedi, mali upu penenunga cadi, anesala tep, wenepkamrume. ‘Kandi sun tep kwang dakmemdi, ne nong deiki ikin keca derinenunga tep, kandi sun tep wenepkamrum’ tenen, moropkene. Ada, kandi upu peipnemumpa, apeipnemumtopu anesala tep perbanune. Ukununa tep nengeda, anesala yumadi ne tep, mali upu penengedi, ne tep popmanto kunenunga tep pepkene. Atep, ‘Kandi ne tep melipra kalengnememdi, lyemdonkamnerum’ tenen, moropkene.

16Ne nai Allah kan kaele. Kandi, ne tep peipnemum upu yumada, konum gekepra doronune. Kandi penurum upuda, pio talenuna cadi, ne pio telep kange kupnere. Kandi penurum upu gekenedi, aupu tep pingpinga di kunune. Ne nai bo Allah Yahweh, akeca-keca yuma cap, im deiki jen talen malaikat cap yuma talepra, sun ila deiyo ngebo kurume. Ukuruma tep, neda, kan mi kunune. Atep, yuk nengdi, ne tep, ‘Angeboda, Allah er amutara pel don ngebo kurure,’ penenunge.

17Neda nimi yuk neng bulupra wekmangedi, kange deipra pio telep-telep upu penmangaida, ne men kunune. Kanda, ila mambul upu peipnemumdi, mambul pel karepnemuma deiki, ne ikin kange doupra kunune. Tali kange doupra kunge nesala cap, sun cap men kunune. Kan buru di, ne deiki deipnemumpa, mambul kange doupra ne yukpu kunune. Ada, sun amutu nesaladi, mali kun keca weike kununga tep, ne peda, ‘Uo, sun Israel nesalada malipu kununge’ tenen, mambul kange doupra kunune.

18Ukununa cadi, ne nai bo, kanda ne ware keca deiyo tep, tupa-tupa kange mun deikipu kunun do? Ukupmantoda, ne ila susu jenere ngeda, warya tep men kaekmanto kunerur do? Ne nai Allah, nedi kan tep, ‘Melipkamner do, gum do?’ tenenedi, kan tep ne kange bongtonerure. Ukupmantoda, mo li mo weik cemamre taruda, yambul me peda deipredi, puto di embaramre dinin, dou maramre taruda, cedoramretopu kurure. Ange utopu, me bungna me bukra embaramya cedoramretopu, ‘Ne nai Allah erdi melipkamner do, gum do?’ tenen, ne kange bongtonerure. Atep ne nai Allah, ne ikin weik kunerure. Yeremiadi Allah tep pepu.

19Upepupa, Allah er si Yahwehdi Yeremia tep tamupra pepu. Tek sisi pepkene. Kandi ne damai tamupra yamem pangeda, nedi kan dopropkenedi, melimkamkene. Ukupkenepa, kanda ne damai ton cap kumemdi, ne pel don ngebo kunkamreme. Nedi kan tep, ila mambul upu peipkenepa, kandi aupu gekepra dopropmemdi, ‘Aupuda deiyo akapkamre,’ pepra penkamrume. Tali mok upuda men penkamrume. Atep, sundi, mali upu penkamkenge ngeda, men gekenkamrume. Ukupmemnya deiki di, ne upu peipnepa, ne upu lap pena deiyo ngebo, nabi tupa kunkamreme. Ukumem pangeda, sun Israel nesala yumada, tamupra kan damaipu yangedi, kandi penkamrem upu gekenkamenge.

20Sun anesala kan-kan, nedi wepra deipkenedi, talepra melimkenepa, puto di kunkamreme. Ukupmantoda, pio gat keca er si perunggu di, lyom beilya wipmengepa, gat kuramre utopu, kanda sun anesala kan-kan balila di kunkamreme. Ukumempa, sun anesaladi, ‘Angebo nun song’ tenen, warengyakankamkeng dinin, men popkamkenge. Ada tali tep men pepkene. Nedi kan damai kunedi, kan tep melipra lyemdokenepa, ne amutamna kunkamrema tep pepkene. Ne Allah Yahwehdi pepkena tep, tek sisi nong kupkamre.

21Ukutaru kanda, pio mali-mali kungedi, ila tulum weik kunung nesala, sun kan-kan kuramempa, nedi tek sisi melipra lyemkamkene. Ada deiyo men kupmarepapu, yuk weik kungedi, yuk nesala tep, tali lupra portamnung nesala kan-kan kunkamrum dinin, ne Allah Yahwehdi, tek sisi lyemdonkamkene pepne. Allahdi Yeremia tep pepu.