Jeremiah 16

Allahdi Yudea tara nesala wenepkamra tep, pepu upu

1Allah Yahwehdi ne nabi Yeremia damai yana, aupu peipneu. Aupuda ake.

2Kanda, amutu neitamai kunkamrem taruda, ner pio men dopkamrume. Tonda, amutu neitamai di sal nyapu pe, ner nyapu pe ton, pio men derinkamrume. 3Aupu pepmakena deiyoda, ake. Ada, ne Allah Yahwehdi amutu neitamai konum deiami do, amenda taru derinkameng do, sun sal nyapu cap, ner nyapu cap, tonda anyapu yuma, sun nai yapu cap, sun nin yapu cap, anesala yumadi derinkameng nyapsilip yuma cap tep, aupu ton pepsene. Anesala yuma, sun deiki ikin weik kupkamrengeda, lap pepkusene.

4Ada ake. Amutu neitamai kunkameng nesala yumada, ila kange mun pu jena deiyo keca yaredi doupra, amutu neitamai kunkameng nesala pio weika di depropkamenge. Adepkameng nesalada, sun kayapu nengdi, aneng tep men engepkamsenge. Tonda, amutu nesala yuk ngeda, sun mar podanmankap, nimi pona parang ya di popkamsenge. Ton nengda, sun jen keca gum kuprepa, jen putana di depkamenge. Tonda, sun depkameng nesala, sun tara nengdi sun nong dopra, tu palipra, telep kupra men peinkamenge. Sun adepkameng nesala nongda, tali tu deikipu, dana-dana tara tapsengepa, lupropkamenge. Ada nimidi, tu deiki dei tali lyektamamengtopu, kunkamenge. Atep nengeda, anesala konum depmengopda, sun gemnada, tali tu deikipu tapsengepa, im alau tara lakra embaramre ma cap, bura mutu tali dakuramre gam keca cap dipapu, adepkameng nesala, sun nong dopra jenkamsenge.

5Tek sisa, ne Allah Yahwehdi aupu pepra deipsene. Sun nimi depmengepa deipmangedi, ‘Uo’ tenen, wekmange neng, sun atida pio men benkamrume. Nimi depre ngebo deipmange atida, sun yuk nesaladi men wengkamrume. Tonda, adepmange nesala gemna dopra, deipmange ati bemumdi, akati wekmange neng cap, kikiman wekrumudi, ‘Uo, nun kayapu neng depmanga gispal dona tep, bicau tenepra, aneng cap kikiman engepkamepe,’ pio men tenenkamrume. Sundi, ‘Uo, nun tara neng depmangepa, deipmange ati bena, epmepedi, bicau tenepra tonpa engepkamepe,’ pio men tenenkamrume.

Tonda, ‘Nun kayapu neng engepmangepa, nundi sun dipru kwadipkamepe,’ tenena pio gume. Sun damai men bena engenkamrume. Ange men kunkamruma deiyoda, ake. Ada, ne Allahdi sun amutu nesala tep, ‘Telep kupra deipsenepa, sun yumada teleppu kunkamenge. Telep kweipsenepa, teleppu kungopda, sun cap, yuk mutu neng cap, podana gum dipapu, kange deipra, tenpu kange doupra, bouna dipu kikiman kunkamenge,’ tenemsisi ngeda, konum tapne. Tonda, sun amutu nesaladi mali kuraminge tep, adipapu wenepra poptapmatene dinin, ange gum di, bicau tenesenedi, “Ukupra telep kupra deipkamsene,” pepra, pedina upu deiki di pemsisinge capda, ne Allah Yahwehdi, “Ange yumada tapne. Atelep kun kecada, sun damai di konum tamupra doropkamne. Ange yumada, sun tep pio men melipra karepkamsene,” pepra deipsene.

6Yambul mambul neng pe, ila mambul neng pe, tali kankan nesala peda, amutu neitamaipu weika di depkamenge. Sun adepkameng nesala tep, kange mun kuprepa, ‘Uo, bicaue’ tenen, kungedi ton men engepkamenge. Tonda, sun nong doupra, tu palipra telep kupra men peipkamenge. Tonda, sun adepmenge nesala, sun kayapu nengdi, ‘Uo nun kayapu depmanga cadi, sun tep gispal donkamep’ tenen, mali kange doupra, nong bol deiki men dila doipdankamenge. Tonda, sun Israel yala nesaladi, sun kayapu depmange neng engepra, gispal dona tep kuramrumtopu, sun pe giso potong yumada, touptapra, delaupu men kunkamrume. 7Depmare ngebo deipra kunmange neng tep, yuk ngebodi, ‘Ne kayapu neng dipru kwa dipkamne’ tenen, roti kwaneng dapra doupra yaredi, men yana karepkamre. Tonda, ‘Uo sun wisi nesala, ne kayapu nengda, sun nai cap, sun nin cap konum depmarengpa, mali kange doupra kunmange neng tep, sun ikin kange baripra deipkup’ tenen, telep jen keca cap, jen me cap gwepra, men yana karepmengepa, jepkamenge. Ange yumada yapronkamrume.

8Angetopu, ton neng, kange deipmengedi, jen keca cap, me cap, ketenepra deipmengedi, ila kalya kalepra deipmangedi, jenkunge atida, sundi kange deipra, akati bena wekmumdi, aneng cap kikiman bukmumdi, sun kalemna keca kikiman men jenkamrume. 9“Ange-ange men kunkamrume,” pepmasena deiyoda, pepkusene. Ada, neda akeca-keca yuma talepra, pio deiki tara kunun ngebo, neda Allah Yahweh, im deiki jen talena malaikat yuma, sun ila deiyo ngebo kunune. Sun Israel nesala yumadi, ne tepapu, “Nun nai bo,” pepra, ne si eremnenunga cadi, ne dipapu sun yuma tep pepsene. Tek sisi, amutu kunmarem taru dipapu, sun pe asuru dipu epkamreme. Kange deipra upu sisingrumnge cap, pining kange dourumnge cap, tonda ner don kalya jepmengedi, kari pongenge cap, nimidi nerapu dopkameng neng cap, sundi dopkameng nerapu cap, anesaladi, kange deipra pining kange doupmengedi, kange lon mut penkamenge ngeda, ne Allahdi akeca yuma gum kupra deipkamne.

10Uda kanda, Yeremiadi apepmaken upu doupra, amutu nesala sun gekenai bena pepmem pangeda, aupu gekepmengedi, sundi tamupra asipetepkamkenge. “Uo, ware keca deiyo tep, Allahdi nun wenemna tep, ila ikin keca dopra, nun deiki deipkamser do? Tonda, ware mali kun keca kupmepupa, Allahdi wenepkamser do? Tonda, ware mali kun keca nundi, nun nai bo Allah damai kunup do?” pepra, kan Yeremia tep yana asipkamkenge. 11Asipkengopda, kan Yeremiadi tamupra, sun Israel yala nesala tep, upepkurume. Allahdi upepsere.

“Ada, sun ataru kurum nesala, sun apu yapu nengdi, ne Allah tep konum tapneidi, tali keca tep melipra baramaidi, ‘Nun nai,’ pepra, isok si eremamidi, atali keca tepapu gispal doramya tepa. Ukurami dinin, nedi, “Angeda kunkamrume, angeda pio men kunkamrume,” pepra deipsipa, Musadi sekamu upuda, moupra men taleamidi, ne tep konum amnyo karekra tamamneia tepa. Ange yuma tep nengeda, sun wenemna tep, sun nong deiki ikin keca deipkamsene. Ange yumada, Israel nesala, sun gekenai lape pepmemdi, ‘Allahdi upeipmasere,’ pepra, lape pepkamarume.

12Tonda, sun ataru kunmarum Israel nesalada, mali pio weik tupa kurume. Sun apu yapu nesala, men taru mali kurami nengda, yambul malipu kurami dinin, sun ataru kurum nesalada pio mali weik kurume. Sun ataru kunmarum nesalada, moupra tenepso! Sun ataru kurum nesalada, balila weik nesala kuruma cadi, sun pe kange dipapu tenepra kurum ngeda, ‘Angepu kupkamepe’ tenen, pio malipu kurume. Ukurumudi, nedi pesene upu yuma tep nengeda, sundi, ‘Aupuda, pio men gekepkamer pe,’ tenerumudi, ne upu tamnerume!

13Ange kuruma tep nengeda, ne Allahdi sun akurum mutu neitamai di dopra, yuk karen mutu neitamai enepra dokotepkamsene. Ada, sun kael kemna gum mutu dopra donokamsene. Tonda, sun apu yapu neng peda, amutu men kael keami. Sun enepra yuk karen mutu neitamai donokamsene. Amutu bena kunkamrum taru neitamai yumada, nedi sun tep, ‘Bicau’ tenena gum dipapu, pio men melimkamsene. Ukupkamsena cadi, ataruda, sun kael kemna gum keca, tali isok keca tep, ‘Nun deiyo ngebo akurure,’ pepra, walwal dipapu akeca si eremkamrume. Ada, keteng komuni taru pe, sintara taru peda, akeca tepapu si eremkamrume. Ataruda, nedi sun tep, ton tupa bicau pio men tenenkamsene. Allahdi pepu.

Allah Yahweh er nyapu sisa, yuk nimi bo mutu di tamupra yankamenga tep, pepu upu

14Allahdi aupu konum pepudi, aupu ton dukdongopra pepu. Atep nengeda, ne Allah Yahwehdi aupu pepra deipsene. Pio tek sisi, pepsene. Amenda taruda, ne tenepsi taru konum kepyopda, yuk mutu nesaladi, sun Israel yala nesala tep perami ngeda, yapronkamenge. Ada, men taruda, sundi sun Israel yala nesala tep, uperami. ‘Gume, Allah Yahweh, gam pio kurur ngeboda, er nyapu sisa Israel nesalada, Mesir mutu neitamai ikin weik kuramipanen, loptapra lyepropudi, anesala doupra yanamudi, kange di telep kupra deipu,” perami. Ukupra perami dinin, amenda taruda aupu ton cap pio men penkamenge.

15Tonda, ange utopu, aupu ton uperami. “Gume, Allah Yahwehda, gam pio kurur deiyo ngeboda, er nyapu sisa, sun Israel nesaladi mali kuramipa, erdi, sun Israel nesala enepra donokupa, yuk karen mutu, dapu tara (arah utara) mutu dubenamipa, ikin weik kurami. Sun yuma dabena kuramipane, amenda taru Allahdi anesala doupra, kange di tamupra sun pe mutu duyanamu. Tonda, utara tamna di doupra yanamutopu, yuk-yuk karen mutu neitamai di, Allahdi sun Israel nesala lyeprapudi, tamupra, sun mutupu duyanamu.” Menop taruda, yuk-yuk mutu nengdi, uperami dinin, amenda yankamre taruda, aupu ton cap men penkamenge. Ange deiyoda ake. Ada, amenda doryankamre taruda, nedi sun ataru gam tupa kunmarum Israel nesalada, sun co puna neng tep kareamsi mutupu, sun ataru kurum nesala pe tep, tamupra duyana karepsenepa, acapu kunkamrume.

16Dinino, ukutaruda, ne Allahdi ukupmantonge pepsene. Mekina tomon nengdi, mekina weik tomoramengtopu, nimi upupnepa, yangedi amutu nesala yana tomopkamenge. Tonda, nedi bura gam kuramre keca domna nengdi, akeca domengedi, poramengtopu, nimi pepnepa, amutu deiki kunung nesala cap, amutu buma deiki kunung nesala cap, gel imir inipra kunung neng cap yumada, yana epra ebenkamenge. Epmengopda, enepra ponkamenge. 17Ukupkamna deiyoda ake. Ada, nedi sun amutu nesala kunung keca yumada, konum dinune. Sun kunung keca yumada, ne damai di men inipmanto cadi, ware keca do yuma, katawaipu dinune. Atep nengeda, sun amutu nesaladi, pio mali keca talepra kunge keca yumada, dinapu kunune. Ange yumada, men inipmanto. Atep, nedi anesala yuma wenepra popkamne ja.

18Sun mali kunung nge yuma tep nengeda, yu weik kunerura cadi, nedi tamupra sun amutu nesala tep, ue butene deiki di wenepnedi, kwang dakamne. Deiyoda ake. Ada, sundi tali isok keca tep, “Nun nai bo,” pepra, si eremenge deiki di, ne mutu sisa yuma konum mali kupra deipneiya tep, amutu neitamaida, ne damai yangedi, ne si men erepnetenge. Sundi, ‘Nun nai,’ pepra, isok si eremnung kecada, tali keca, gam ton men kurur keca tep, si eremnunge. Nedi, ‘Amutuda pio talenkamne,’ tenemsi mutu, ne mutu sisa neitamaida, sun isok si eremna keca weika di konum deriramya deiki di, amutu konum mali kupra deipye. Sundi amali kunge keca cap, aisok-isok yuma si eremna tep, patung keca deriraminge cap tep nengeda, ‘Ne pio dabale, ange yumada, ne pio songe,’ tenenune.

Allahdi ne Yeremia tep pepneu.

Nabi Yeremiadi er teka teneamunge tep, Allah Yahweh damai lap pepu upu

19Allahdi upepupa, nabi Yeremiadi tamupra pepu.

Ne nai Allah Yahweh, kanda erepra kumemdi, puto kepra derinerume. Ne kange mun kunere taruda, ne nai kanda, ne puto kemdinerur ngebo kureme. Tonda, kange mun kange doupra kunerur taru do, ikin keca yana kunere taru do, ne podan nengdi popmanto kunenung taru do yumada, kan dipapu melipra kalengnereme. Kan damaipu yana inipra kunepa, yuk nengdi men popnetenge. Teleppu kunune. Tuai mutu im sirik, mutu sirik kunung nesala yumada, ‘Er dipapu melipra lyepropkamser’ tenen, kan damaipu yakankamenge. Mutu ban-ban yuma kunge nesala, kan damai yangedi upenkamenge. “Nun co puna nengdi talepra, si eremami kecada, nong gum keca, tali kecapu talepra si eremami. Mok upupu teka tenepra taleamidi, tek sisi nong men kupkamre keca, nimi men melipmanto kecapu talepra kurami,” penkamenge.

20Nimidi, ‘Isok si eremkamep’ tenen, tali keca dopra, petupra deiptengedi, “Ada nun nai bo,” pepra, si eremtenge dinino, angeda, telep do, gum do? Ukuptenga peda, ange deiki di, nimi dipapu, Allah utopu keca ketekepra deiptenge do? Gume, ada men kupmanto! Nimidi, ‘Tali keca si erepkamep’ tenen, sun pe kange dipapu betapra derinung patung keca yumada, tek sisi, Allah utopu keca pio gume. Ange yumada, tali kecapu kurure! Nabi Yeremiadi pepu.

21Upepupa, Allahdi tamupra pepu. Atep nengeda, kan kael kepkurume. Ne tenenun ngeda, sun Israel nesala damai pepkamne. Ton cap nedi sun damai pepterepnedi deipnepa, sun yumadi kael kepkamnenge. Ada, ne ila puto kununa cap, ila puto di pel donun keca yuma cap, peterepnepa kael kepmengedi, sundi, ‘Uo, Allahda, tek sisi er si sisada, Yahweh kurure. Allahda, Yahweh erpu kurure,’ tenepmengedi, kael kepkamnenge.”

Allahdi upepra deipupa, nabi Yeremiadi gekepra seku.