Jer 17 | XteSC | STEP | Allahdi sun Israel nesala tep pepu. Uo, sun Yehuda tara kurum nesalao, sun mali kurum keca yumada, konum sun dipru neitam pio akunkamre. Ukupmantoda, nimidi gat keca er si besi dopmengedi, gat gel deiki sekra deriramengtopu, sun mali kurumu keca pio akunkamsere. Ukupmanto ngeda ton, nimidi sun mesba sirikai, dana-dana tara dumbari beleramrenge deiki, ada sapi bisam giso deiki tengamre takke keca utopunge, akeca deiki pio gat sengna keca doptengedi, sekra deiptengetopu, sun mali kurumu kecada, sun dipru neitamai pio tep akunkamre.

Jeremiah 17

Yehuda yala nesala mali kuraminge tep wenepu upu

1 Allahdi sun Israel nesala tep pepu.

Uo, sun Yehuda tara kurum nesalao, sun mali kurum keca yumada, konum sun dipru neitam pio akunkamre. Ukupmantoda, nimidi gat keca er si besi dopmengedi, gat gel deiki sekra deriramengtopu, sun mali kurumu keca pio akunkamsere. Ukupmanto ngeda ton, nimidi sun mesba sirikai, dana-dana tara dumbari beleramrenge deiki, ada sapi bisam giso deiki tengamre takke keca utopunge, akeca deiki pio gat sengna keca doptengedi, sekra deiptengetopu, sun mali kurumu kecada, sun dipru neitamai pio tep akunkamre. 2 Sun Yehuda tara nesala yumadi, isok ner er si Asyera, aisok si eremna tep, mutu-mutu dupai di isok si eremnai dominge cap, ila co tekamudi, bo weik douramrenge amutarada, aisok si eremnai cap, isok karena tep, mesba-mesba dominge cap, Asyera isok si eremna tep, lyom ayomnya co ikra betapra deiameng capda, sundi isok-isok si eremna tep, tupa-tupa karerbarume.

3 Tonda, ila ati arum dopra kurumai di tapra, bura tara dinin, katawai mutu dupai barume. Ada, amutu neitamai yuma, mutu-mutu buma deikida, sundi isok si eremna tepai, konum betapra deiprumdi, aisok tep karerbarume. Adeiki di, sunda konum mali weik kurume. Atep nengeda, nedi pepnepa, sun pona tep nengdi, sun kurumu mutu neitamai yuma yana, sun talerum keca cap, derirum kunumna weik keca cap yumada, puto di dalupra doupra benkamsenge. 4 Nedi, ‘Sun amutu pio kunkamrume’ tenen, telep mutu tu konum bokra kareamsisi ngeda, kange di dopra, sun podan neng karepkamne. Tonda, nedi sun doprapsenedi, sun podan neng deiki deipsenepa, sun anengdi sun Israel tara nesala doupra, sun kael kemna gum mutu dubesengedi, ikin pel dipsengepa, donkamrume. Ange yuma ukupkamsena deiyoda, sun mali kurumya menenga tepa. Ne yuda, konum uku bo jeramre utopu kunerure. Auku jeramretopu kunerur ngeda, auku men tapmanto kurura cadi, pio jenkamre ja! Ange tep nengeda, ‘Ukupkamsene,’ pepmasen keca yumada, tek sisi sun wenemna tep nedi sun damai deipkamsene. Allahdi pepu.

Allahdi peteremna keca yuknge ton pepra, deipu upu

5 Ne Allah Yahwehdi pepsene.

Neda sun nai bo Allah Yahweh kunun dinin, sundi tapnemumdi, nimi sisa tepapu, ‘Sun puto deiki di melipkamseng ja,’ tenepmumdi, tali tuai nesala tep, ‘Sun yuk mutu neng dipapu melipra lyepropsetenge,’ tenerume. Ange utopu tenepmenge nesala yuma tep nengeda, nedi wenepra popnedi, ila kange mun keca sun deiki deipkamne ja! Deiyoda, sundi ne tep, teka tenena gum dipapu, sun kange dipru neitamai di amnyo karekra tamnenunga tepa. 6 Aneng utopu kunge nesala yumada, pio ikin weik kunkamenge. Telep keca ton, sun damai pio men yakankamra cadi, telep keca ton men dinkamenge. Ukupmantoda, pio katawai mutu, me men kwamre mutu neitamaida, amutu tu pumbon garam uwa weik akapka cadi, nimidi kouameng keca yala-yala yumada, amutu neitamai telep kupra men bongoptu. Atep, mutu katauai tu deiki di, tali paramredi neramre dinin, telep kupra men belepra tengamre utopu, anesala peda utopu, telep kupra men kunkamenge. Sunda telep mutu gum dinin, me gumai, pio bupu weik katawai mutu neitamaipu kunkamenge.

7 Dinino, ne tepapu teka tenenenung nesaladi, ne tep, ‘Allah Yahweh, er dipapu melipra lyepropkamser’ tenen, sun kange dipru ne deiki deipnengedi, tupa teka tenenenung nesalada, nedi pio telep kupra deipkamsene. Telep kecada, sun deiki dopra derinkamna tep, anesalada, tupa-tupa telep kupra kunkamenge. 8 Ukupmantoda, sun anesalada, nimidi metek co dopra, me pirimanai bongopmengepa, aco tekra neramredi, er yaten pulpulada me dongoprepa, dou mapmareya peda, bo telep-telep kupredi, men koluramre utopu kunkamenge. Amutu neitamai, dou man li kupmareya peda, aco men kolunkamre dinin, er du telep kupra tupa-tupa mounkamre. Ange utopu, ne tep teka tenenenung nesalada, ikin kunkamre taruda, kware kuprepa, ‘Uo ware kuptepe do?’ tenen, kange tenimtona pio men kunkamenge. Sundi tupa telep kupra kunkamenge.

9 Nimi kange dipru neitamai di tenenung ngeda, jenek kupra men keal keptenge. Nimi dipru kangeda, mawa dipu tali-tali upupu peserura cadi, pio yuk kurure. Yuk keca ton mok upupu perur dinin, nimidi sun kange dipru neitamai di tenenungada, pio mali weik kurura cadi, mok kecapu tep, ‘Teka,’ tenengedi, tali kecapu talepra kununge. Atep nengeda, nimidi sun pe kange dipru neitamai di tenenung keca peda, betapra men kael keptenge. 10 Dinino, ne Allah Yahweh dipapu, nimi sun kange dipru neitamai di kure keca cap, nimidi tenenge keca capda, katuai di epra kael kepne dingeda, nedi sun tep, ‘Telep kunkameng do, malipu kunkameng do?’ tenen, sun yuma tep kurpetenune. Nedi tuai nesala yuma tep, tenpu-tenpu nengdi, sun kunge keca dakuramengepa, nong konum kupyopda, nedi epnyopda, sun kuramengepa, du moupyopda, nedi sun tep kwang dangnune. Ada, nedi sun pe kuramengetopu, menenga keca karenune.

11 Ukupmantoda, madi er du deiamrepane, yuk madi yana, adu dalupra dopra iriramretopu, er dumsisi kuna gum ngebodi, tali upu peramra deiki di, bung keca weik talepra, keana taru tep, isomka ngebo kurure. Abung keca talepra kuramreyanen, konum wisi deipyopda, er angebo talerur keca yumada, gum kudorure. Ukupra gum kuprepa, siria taruda, erda mali kunange cap, pio walwal di kuramunge capda, katuai kuprepa, yuk nengdi kael kepkameng ja! Allahdi pepu.

12 Upepupa Yeremiadi tamupra pepu.

Uo, nun nai Allah, kan si eremna tep dopmepu atida, pio-pio teleppu kurure! Akati tep nengeda, ukupmantonge pepkune. Ada, ila nimi deiyo nengdi bungamengai, er si tahkta bungna keca, pio urasin telepnge utopu kurure. Tonda, akati dopmepu taru di gonga keap, ataru-ataru neitamai yumada, kan si eremna atida, ila di erepra, mutu deiki bukupa, kan pe ila dirine weik akapu. Ange utopu kuramupa, pio tupa akurure. 13 Uo, Allah kan tep, kan nyapu Israel nesala, nun yumadi, ‘Nun nai Allah Yahweh er dipapu melipra lyepropkamsere,’ tupa tenenkamkepe. Nun kange dipru yumada, kan deikipu derinupe. Ton nengda, kan tep tamkamkeng nengda, ikin keca sun damai yarepa, tek sisi ali kupkamre.

Kan Allah tep, ‘Nun song’ tenen, tapkengedi, yuk bisipu bankameng nesala yumada, depmengopda, sun konum depra kunung neng kunge mutupu, tuai amutara, sun damai wengbenkamenge. Ada tali tep gum dinin, sun anesaladi, kan Allah tep konum tapkeidi, amnyo kemdongokenunga cadi, depmengopda, konum deami nesala damai bena kunkamenge. Naio, kanda Allah Yahweh, gam kuna deiyo ngebo kurume. Ukupmantoda, kanda tuai mutu nesala yuma tep, gam me bungna utopu ngebo, Allah Yahweh kurume. Dinino, sun mali kunge nengdi kan tep tamkenunge.

Yeremiadi Allah tep, ‘Melipneo,’ pepra, moropu upu

14 Ne nai Allah Yahweh, kandi kwetepra deipnemempa, neda pu tenena gum di, teleppu kunkamne. Tonda, kandi ne lyepropnemempa, neda teleppu kunkamne. Nedi kan tepapu, gispal dokenedi, kan si erepra, kange deipkenedi, ‘Kanda pio telepe,’ pepra, pio penkamkene. 15 Naio kan peda dinkurume. Yuk nesaladi ne tep, upenenunge. “Allahdi nun tep, ‘Sun mali kunange tep, ikin keca dopra deipnepa, sun damai yankamre,’ pepupa, kandi lap pepsemum ngeda, aupu nongda, dan cei kupmar do? Akecada, dan taru di nun damai yankamser do?” pepra, nyek-nyek penenunge. Ange tep nengeda, nedi upepne. “Naio, kandi nun Israel nesala tep, wenepra karepkamserem kecada, adipapu nun damai yana konum kupsetue,’ pepra, morokenune.

16 Upenun dinino, ne nai Allah kan kaele. Kan mawa nesala, sun Israel yala neng tep, ‘Domba bisam peina deiyo ngebo utopu kuramsi ngeda, men tapsi. Kan amutarapu apel tupa talepra donune. Tonda, naio kan kaele. Ne Yeremiadi, ‘Sun Israel nesala damaida, Allahdi kange mun keca ton deiptua deiki di, anesala yuma popra gawal daktue,’ tenen, putapneupa men peramsi. Ange pepra, men moropkesi. ‘Sunda ikin weik kuptue,’ men tenenune. Apepmanada, tali men penune. Gume, nedi penun upu yumada, kan damaipu penuna cadi, kandi ne upu gekepra konum kael kemnerume.

17 Ne nai Allah, kandi ne tep, ‘Kware weik kuptupa, dipru pu jeptue’ tenena ngeda, ne damai kuna gume. Dan taru do yuma, kange mun keca ne damai yaryopda, neda kan damaipu yana inipnedi, bouna di telep kupra kunune. Kanda erepra kumemdi, ne melipra kalengnemempa, neda kan amutarapu yana teleppu kunune. Nabi Yeremiadi Allah tep upepra moropu. 18 Moropu dingeda, aupu ton moropu. Naie, telep ngeda ake. Sundi ne tep domnengedi, ikin keca ne deiki derinenung neng puda, Allah kandi sun damai ali kunange cap, kwar dangnange cappu karepkamrume. Dinino, ‘Kandi ne damaida, ange yuma karena gume’ tenen, moropkene. Naio, kandi sun damaipu ila kange mun kecada, sun deiki dopra deipmempa, yaredi popra tapredi, yuma sikke buktapredi, gum kupropkamenge. Dinino, ‘Kandi ne damaida, ange yuma karena gume’ tenen, moropkene.

Nabi Yeremiadi, sun Israel yala nesala tep, pepu upu

19 Allahdi ne nabi Yeremia damai yana peipneu.

“Yeremiao, kanda Yerusalem ila ati arum dana-dana tara wipra deiami lyom gel beilya neitamai dinin, Israel nesala yuma tali lupra wengyakankameng bisi tep, ‘Nimi wengna bisi buplan,’ pepra, potokeipi bisi, abisi buplan damai benkurume. Apotokeipi buplan bisida, Yehuda yala nengdi, nimi deiyo kepra talenung nengda, amutu ati arum dopra kunungai benkun taruda, abuplan bisi di wekra banunge. Tonda, animi deiyo nengdi tamupra banung buplan bisida, ange dipapu wekmengedi, ka tamupra banunge. Atep nengeda, aca bisi buplan damaipu benkurume. Tonda, Yerusalem mutu ati arum ongopgenepra doami gel beilya neitamaida, yuk-yuk buplan bisi ketenepra potokamyai yumada, dipra embenkamrume.

20 Abisi buplan dam bemem dingeda, sun Israel nesala yuma tep aupu pepkamrume. Ada, ne Allahdi pepra deipkuken upuda, abuplan bisi wekmemdi, sun Israel yala nesala yuma tep, aupu pepkamrume. Ada abisi buplan di bena yana kemnung nesalada, sun nimi deiyo neng, Raja-Raja neng cap, Yehuda yala neng yuma cap, tonda Yerusalem mutu ila ati arum doamipa, dakunung nesala cap, sun damai bena aupu pepkurume. 21 Abena pepkurum upuda ake. ‘Ada, nun nai bo Allah Yahwehdi upepsere.

‘Nun mali kupmepepa, Allahdi adipapu wenepra popserepa, depkupe,’ tenepmumdi, tonda, ‘Allahdi popserur’ tenen, sunda Sabat ^{▼▼Sabat tumi – Sabat tumi upu deiyoda, ake. Ada, men taruda, Allahdi sun Israel nesala tep pepu. “Sabat tumi neitamaida, ne si eremna tumipu pio akupkamra tep, atumi neitamai yumada, tali pelpu pio men donkamrume. Atumi deikida, pel yala-yala yumada, tapmumdi, beipye peikrumudi, ne sipu eremkamnerume. Atumida ila tumi, ne si eremna tumi kupkamra tepa,” pepu.} tumi neitamai di, sun bung keca ikin nge doupra, yuk mutu embanada, pio meme. Tonda, bung keca doupra, ‘Yerusalem mutu ati arum dana-dana tara gel beilya neitamai potokeipi buplan bisi di, amutu wengbenkamepe,’ tenena meme. Atep, Sabat tumi deiki di, Yerusalem mutu lyom gel beilya neitamai potokeipi bisi buplan wengna cap, ka tamupra bana capda, pio meme pepsene. 22 Tonda, Sabat tumi neitamai yumada, tali pel men dopkamruma cadi, sun ati bo di, ware bung keca yuma peda, doupra yukai dubanada, pio meme. Atumida, nedi konum ketenepra deipsidi, sun co puna neng tep, ‘Atumida ne mawa tumi kurura cadi, tali pel dona gum dipapu, beipye peikmumdi, ne sipu eremkamnerume,’ pepra deiamsi. Atep, sunda ange utopu ketenepra kunkamrume. Ada, Sabat tumi neitamaida, ne mawa tumi cadi, sundi tali pel dona gum di, beipye peikrumudi, ne sipu eremkamnerume.

23 Dinino, sun co puna nengdi, ne pepra deiamsi upuda, men gekepmanto kurami. Tonda, sundi, ‘Aupuda, Allahdi pepra deipseue’ tenen, men moupra taleami. Ada, sundi, pio balilapu kuramidi, ‘Gume, Allahdi pepsetua peda, erdi peiamseu upu men moupra talenkamepe,’ teneramidi, balila weik kurami. Sunda, weneptenya peda, men gekepmanto nesala kurami. 24 Sun apu yapu ukurami dinino, nedi pepsene. Ne Allahdi pepra deipsisi upu yumada, moupra talepkurume. Tonda, Sabat tumida, Yerusalem mutu buplan bisi di bung keca erepra abisi wengap-banap men kunkamrume. Ange gum dinin, Sabat tumi neitamaida, ne mawa tumi cadi, ne si eremna tumi kurura tep, sundi tali pel yala-yala yumada, atumi deiki di pel men donkamrume. Ukupmumnyopda, telep keca ton karepnepa, sun damai yankamre.

25 Ada ake. Tek sisi, sunda ne pepra deipsisi upupu moupra talepmumdi dombamumnyopda, nimi deiyo ngebo, Raja Dauddi amutu yuma talepra kuramutopu, amenda taru yuk deiyo neng, Raja-Raja neng cap, tonda sun amutara pel dona deiyo kepra talenung neng cap, Daud utopu Raja neng cap, tonda Yehuda yala nesala cap, Yerusalem mutu ila ati arum neitamai kunung nesala cap, amutu bisi buplan wengyakankamenge. Ada, menop taru sun tonpa, Yerusalem mutu ila ati arum domidi, ila gel beilya ongopdongopra wiamidi, abeilya neitamai buplan potokra deipyai yumada, abisi wekra embanapu kunkamenge. Tonda, sun Raja-Raja neng cap, sun amutara pel dona deiyo neng capdi, sun nimi porbana tep, tu deiki embana keca, er si kereta kuda perang cap, kuda bisam cap, akeca deiki bukmengedi, embankamenge. Tonda, Yerusalem mutuda, walang yo mutu pio men kupkamre. Nesala pio weika di, amutu yana, pio akunkamenge. Dorkunkamre taru yumada, Yerusalem mutu neitamaida, nimi pio akunkamenge.

26 Tonda, sun Yerusalem mutu dana-dana tara di, yuk-yuk mutu di nimi weik yangedi, ‘Allah gispal donkupe’ tenen, gam keca dopra kareryakankamenge. Ada, Yehuda tara neitamai domi yambul ati-ati yuma cap, Yerusalem mutu ila ati arum dopra kunung mutu dinin, dana-dana tara kunge nesala cap, amutu yakankamenge. Tonda, Yerusalem mutu dana-dana tara yambul ati arum dopra kunung nesala cap, Benjamin yala neng, sun tara mutu kunge nesala cap peda, amutu yakanapu kunkamenge. Tonda, Yerusalem kota dipra, keteng dangbaramre tara, (arah barat) mutu buma amutara kunung nesala cap, ila mutu-mutu deiki tara kunung nesala cap, tonda Yehuda yala neng kunungai dinin, dapu tara (arah selatan) tara mutu, er si Negeb mutu kunung nesala cap, sun yumada, Yerusalem mutu yangedi, ne Allah tep kareryakankamnenge.

Sun anesala yumada, neda Allah Yahweh, ne si eremna tep, yapi keca popnedi, doupra kareryakankamnenge. Ada, uku dongopmengepa, uku di jepropkamrenge cap, tonda apopkameng keca tu bokmengedi, tongeda, uku dongonkamenge cap, uku men dongonkameng dinin, imam nengdi jenkamenge cap, tonda gandum du cap, nintong telep keca, er si kemenyan cap, kareryakankamnenge. Akeca-keca yumada, ne Allah Yahweh tep, telepe penange cap, ‘Er cap nun cap telep kupra kikiman kunkamep’ tenen, karenkamenge cap, ange yuma doupra, Yerusalem mutu kareryakankamenge.

27 Dinino, sun Israel yala nesalada, ne Allahdi, “Angeda kunkamrume, angeda pio men kunkamrume,” pepra deipsisi upupu, moupra men talepmumnyopda, ikin keca karepnepa, sun damai yankamre ja! Ada, nedi “Sabat tumida, ne tep ketenepra deipnetumdi, tali pel dona gum dipapu, beipye peikrumudi, ne sipu eremkamnerume,” peipsisi upu cap, tonda, “Atumi neitamaida, ware yala bung keca yuma peda, erepra embamumdi, Yerusalem mutu bisi buplan wengbana gume,” peipsisi upu cap, sundi ne upu men gekepnerumdi, yanipnerum pangeda, nedi sun tep ila di wenepkamsene.

Ada ake. Yerusalem mutu ila ati arum wengna buplan bisi yuma cap, tonda nimi deiyo neng, Raja neng kunung ila ati yuma capda, uku deipnepa, akeca-keca yuma jepra gawal dakamre. Ukupne pangeda, ajenkamre ukuda, pio men tapmanto kupkamenge. Pio jenapu kunkamre ja!

Ne Allahdi pepsene.