Jeremiah 18

Allahdi Yeremia tep, tulepra buk mau ketekemne ngebo tep, pepu upu

1Allah er si Yahwehdi ne Yeremia tep yan peipneu upuda ake. 2“Kan adipapu menmena tu telepra buk mau ketekemne ngebo, er ati benkurume. Bemem pangeda, nedi kan tep mambul upu peipkamakene. Ada, ‘Israel nesala tep ukunkamne,’ pepra lap pen upu pepra deipkamakene,” pepneu. 3Upepneu pangeda, ne adipapu tu telepra buk mau ketekemne ngebo er ati besi. Er ati besidi dinmasipa, akeca pel don ngeboda tupa tu telepra buk mau batamdinmaupa, epsi.

4Bena dinmasipa, angebodi buk mau betamdinmaunge, er urasin mali kupne pangeda, adipapu, tulepra buk mau ketekemna deiyo ngebodi, tamupra er tenepmautopu kupra, urasin telepngepu buk mau betamdinmau. Ada malinge doupra tapnedi, urasin pio telep kupnengepu punupra, betamdinmaupa epsi. 5Ukupmaupa, epsi pangeda, Allah er si Yahwehdi ne tep, “Kandi ne nyapu Israel nesala tep perbenkurume,” pepneu.

6Asipetepneu upuda ake. “Uo, ne nyapu sisa Israel nesalao, nedi sun tep, utopu men kupra deipkamsene. Ukupmantoda, kerah tu dopra telepra buk mau ketekemau deiyo ngebodi, urasin malinge dopra tapudi, ka tamupra urasin telepnge punupra, keteneiputopu, nedi sun tep ukupra men kupsetene do? Abukmau ketekemne deiyo ngebodi, kerah tu dopra er tenepmautopu, buk mau ketenepra deipmautopu, nedi sun talepra kusenedi, ne teneamsisitopu kupkamsene. 7Apepmasen upuda deiyo ake. Ware taru do yuma, nedi ‘Ukupkune,’ tenepne tumi kupre pangeda, tenpu mutu kunge nesala cap, sun ila deiyo neng cap, popra yawaraptapkamne. Nedi tenepne tarupu, ‘Sunda nedi poptapra gawal dakamsene,’ pepnune.

8Dinino, nedi, ‘Sun wenepra popkamasene,’ pepnepa, sun amutu neng gekepmengedi, ‘Uo, nun mali kunupa tep wenepra poptapkamsere,’ teneptengedi, sun mali kuramenge keca tapmengedi, tamupra ne damaipu yange pangeda nedi, ‘Sun popra gawal dakamne,’ tenepsi ngeda tapkamne. 9Ange utopu, yuk taruda, ne tenepne taru kupyopda, nedi yuk mutu kunge nesala cap, sun talepra ila deiyo dakunge neng cap, ada ila mutu keRajaan perameng mutu tep, nedi ka tamupra telep kupra deipnedi puto kepra deipkamne. Ne tenepnetopu kununa tep pepne.

10‘Ukupkamne,’ teneptene dinin, sun anesaladi, ne upu gekepra bouna di men kungedi, nedi, ‘Angeda ukuna meme,’ peramsi keca dinin, malipu kungedi, ne damai tupa-tupa mali kunge pangeda, nedi, ‘Amutu telep kupra deipkamne,’ teneamsi ngeda tapkamne. 11Ange tep nengeda, kan Yeremiadi, sun Israel nesala tep upepkamrume. Ukutaruda, ‘Yehuda yala nesala cap, Yerusalem mutu kunge nesala yuma cap tep, bena popbisipkamne,’ tenenun ngeda, bena lap pepkurume. ‘Ada kerah tu dopra, buk mau telepra ketekemre ngebo kuretopu, sun amutu kunge nesala wenemna cap, sun pona tep, nun nai Allah, er si Yahwehdi sun wenemna keca konum ketenemrure. Sun nong deiki ila ikin keca derinkamser ngeda, konum keteneipseue.’ Atep, kandi, sun Israel nesala tep, ‘Sun mali kurumu keca yumada taprumudi, dumsisi telep kupra kunkamrume,’ pepra, anesala damai bena lap pepkurume,” Allahdi Yeremia tep pepu.

12Upepudi, aupu ton pepu. Kandi apepman upu bena pepkamrum dinin, sun anesaladi tamupra upenkamkenge. ‘Gume, kandi pepserem upuda, men gekepkukepe. Ware deiyo tep apepserem ngeda kunkamep do? Nunda, nun pedi tenepmepengepu kunkamepa. Tonda, nun balila weik kunup nesala cadi, nun pedi tenepmepetopu, adipapu nun yuk-yuk mali kunkamepe,’ pepkamkenge. Allahdi pepu.

Israel nesaladi Allah tamaminge tep, pepu upu

13Allah er si Yahwehdi pepu.

Ware mutu nesala do yuma, sun damai bememdi bena asipetepkamrume. “Israel nesaladi tupa mali-mali kunung ngeda, ange utopu kecada, ware nesaladi ton gekeramrum do? Yuk mutu nesala yumada, amali keca utopu ton kunung do?” pepra asipkurume. Gume, Israel nesalada, nimi kapul men doramre ner, kaber ner utopu kurami dinin, ukutaruda, mali keca pio weika di konum kununge. 14Ukupmantoda, Libanon mutu gel si deiki di, es me bungredi, bul kupra terep-terep peramre ngeda, men gum kuptue. Utopu mutu dam di popredi, embaramre me bul terep-terep peredi, mikip kuramre meda, pio men ceproptue. Ange utopu, yuk nesala yumadi, ‘Angeda men kuptepe,’ tenenge keca dinin, Israel nesaladi, akecapu kungedi, pio mali kecapu weik kununge.

15Ada, ne Allahdi weamsi nesala, ne mawa neng Israel nesala yumadi, ne tep konum lumdongonenunge. Ukunengedi, tali keca tep, ‘Nun nai bo ake,’ pepra, tek sisi men melipmanto keca dinin, sun yumadi isok sipu erepra gispal dongedi, siltong telep keca cap, gam keca cap dopra, uku dongomnunge. Pumun taru, nedi sun tep, “Abisi telep kupra bankamrume,” pepra, peteremamsi bisida tapra, tali mali kun bisipu banunge. Ukupmantoda, ila karayong bisi, dumsisi kuna tep, telep bisi yapra deiamsinge tapra, tali bura tara gwalin bisipu banunge.

16Ukununga deiki di, amutu neitamai kunung nesaladi, sun pe mutu tep mali kuipmange. Sun mutu konum mali kupra deipmengopda, yuk mutu nesala yuma epmengedi, “Uo, sun anesala cap, sun kunge mutu capda, pio malipu kurure,” pepra nalemkemenge. Tonda amutu embankameng nesala yumadi, amutu mali kupra deipnepa, walangpu kupkamrenge, epmengedi kwar kuprepa, giso gong-gong penkamenge.

17Ukupmantoda, keteng yakan tara di kumanya yakaredi, pung pepra, bute doupra baramretopu, ne nyapu Israel nesala, sun pona taru damai kupre pangeda, nedi dopra sun podan neng damai deipkamne. Ukunedi, ‘Anesalada dapopmenge’ tenen, amnyo karikronkamne. Ukupkamne taruda, sun anesala men melimkamne. Sun wenemna tep, sun nong deiki ikin keca weik deipnedi, kange mun keca karepkamsen taruda, sun ton men kalekra dinkamsene. Kau kemkamsene. Allahdi pepu.

Israel nesaladi, ‘Angebo Yeremia popkamepe,’ pepya tep, pepu upu

18Allahdi Yeremia tep peipu upu dopra, sun damai lap perbeu pangeda, sun Israel nesala, Yudea mutu neitamai kurami nesaladi aupu sisingmai. Sundi sun kayapu yuk neng tep, “Sun yuma yakaso. Nun yumadi Yeremia tep, bena wenepmepedi, popkupa tep, upu sisingkamepe,” pepra, yuk neng yuma upupi. Tonda, aupu ton pepi. “Yeremia er dipapu Allah upu lap perya tep do? Gume, nun damaida, Allah er si eremna ati pumbon pel dona deiyo neng, imam cap, Allah upu lap pena deiyo neng, nabi cap tonda, nun mutu ila kael keami neng cap, tupa akunge neng dipu, ‘Ukunkamsere,’ pepra, sun upu yan pepsetenga.

Yeremiada, er tali ngebo dinin peserura cadi, nun mutu upu bongdina deiyo nengdi, ‘Er nong doupra wenemna ati dongombenkameng’ tenen, Yeremia tep, ‘Er mali perur upuda ake,’ pepra, mali upu peipkamepe. Atep, Yeremiadi peserur upu ton men gekenkamepe.” Sun Israel nesaladi, Yeremia tep pepi.

19Upepi pangeda, Yeremiada sundi pepi upu gekepudi, Allah tep moropu. “Uo kanda, ne nai Allah Yahweh kurume. Ne tep, ‘Nun songe, angeboda popkupe,’ tenenge nesaladi, ne tep, ‘Popkamep’ tenen, upu sisingnenunga tep, apenmanenung upuda, kan gekepra kael kepmarem do? Melipneo,” pepra moropu. Tonda aupu pepu.

20Ne nai Allah, kan kaele. ‘Kandi Israel nesala yuma popra gawal dakamrum’ tenen, “Sun melimna tep, atenepmum ngeda, yapkurume,” pepra, sun tep moropkesi naio. Nedi telepnge kupsipane, sun Israel nengdi tamupra, ne tep mali kudinmanengada, telep do? Kandi peipnemum upu lap penmasipa, sun anengdi, ‘Angebo Yeremiada tali ngebo cadi popkupe’ tenen, upu sisingmanenge. Ukupneidi, ne tep, ‘Bon sangna kuptupa, deptue’ tenen, bon konum palipra ketenepnei. Ukupnei dinin, nedi sun tep Allah moropkesi. Ada, sun mali kuraminge tep, ‘Allahdi anesala tep, bicau teneptudi, men wenepra popkamre’ tenen, Allah kan damai yana moropkesi.

21Atep, ukutaruda, Allah kandi sun tep tapmempa, jen putana cap, mar podana cap deiki di, sun nyapu yuma dena telepe pua. Tonda podana deiki di, sun anesala yuma potamna telepe pua. Tonda yuk mutu neng yangedi, sun neng yapu yuma popmengepa, gum kupyopda, sun amutu neitamai yumada, nerapu solu kunkamenge. Tonda, nyapu men derinkamenge. Tonda, wisi-wisi nengda, ila kange mun pu jena deiki di dedonkamenge. Sun kaber nengda, podana neitamai, ya di sektapmengepa denkamenge, pepne.

22Tonda kandi, yuk karen mutu yu nesala pepmempa, dato-dato di sun ati dam yangepa epmengedi, sun amutu nesala yuma kwar dankamenge. Ukupmantoda, ‘Yu weik neng, upula dona tep yangepa, sun ati kunmange nesala epmengedi, kware weik kuprepa, engeramengtopu kupkameng’ tenen, pepne. Ada amutu nesaladi, ‘Angebo popkup’ tenen, upu sisingnunga tep pepne. Ukupmantoda, ne bun sangna tep, sundi konum tu palipra keteneipnei. Ange utopu, sundi ne tep, pena pumbon wengna tep, konum ketenepra derinenunge. Atep nengeda, anesala yumada kandi wenepkurume, naio.

23Dinino, ne nai Allah, kan si Yahwehda, akeca-keca yuma kael kemrum ngebo cadi, ne kaele. Kandi sun aneng tenenenung kange yuma cap, ‘Angebo popmepedi, gum kupra deiptepe’ tenen, upu sisingnenung nge capda, kan konum kael kepmume. Atep nengeda, sun tep bicau tenena cap, sun mali kunung keca daemna capda, gume. Sun mali kunge keca kaukemna gum di, ‘Sun anesalada, kandi wenepra poptapkurum’ tenen, moropkene. Ukupmemdi, kan tupa yu weik kukere taruda, kandi tenememtopu, sun damai mali kupra deipkureme. Ne nai Allah kan tep moropkene. Yeremiadi Allah tep pepu.