Jer 19 | XteSC | STEP | Allah er si Yahwehdi, ne Yeremia tep yana peipneu. Kanda kerah tu di dopra, ketkemameng mau kunumbenkurume. Ada kan cap, sun wisi-wisi neng Israel nesala talepra, ne si eremna ati pumbon pel dona deiyo neng, imam-imam neng, keteng tamun weik deiki di pel dorami neng cap pepmempa, sun tonpa benkurume.

Jeremiah 19

Allahdi Yeremia tep, “Kerah tu dopra ketkemdinung mau doprapmemdi amutu nesala dinmangai di oloktapkurume,” peipu upu

1 Allah er si Yahwehdi, ne Yeremia tep yana peipneu.

Kanda kerah tu di dopra, ketkemameng mau kunumbenkurume. Ada kan cap, sun wisi-wisi neng Israel nesala talepra, ne si eremna ati pumbon pel dona deiyo neng, imam-imam neng, keteng tamun weik deiki di pel dorami neng cap pepmempa, sun tonpa benkurume. 2 Ada sun cap, kan cap, tonpa Hinomdi deipu mi, er ila banai mutu si tep, Ben-Hinom mutu pepra, si perum mutu banai benkurume. Bemum dingeda, ila lyom gel beilya buplan potokeipipa, bura bangedi, kerah tu dopra ketekemdinge me mau, olokrenge dopra donongbarameng bisi, wekra benkurume. Konum wekra bemumnyopda, nedi peipkuken upu yumada, sun aneng damai pepkamarume.

3 Kandi aneng tep pepkamarum upuda, ake.

Uo gekepso, sun Yerusalem mutu nimi deiyo kepra talerum neng cap, Yerusalem mutu kunung nesala yuma cap tep, ne Allah Yahwehdi pepkusen upu gekepneso. Neda, akeca-keca cap, im deiki kunung jen talen malaikat yuma cap talepra, sun ila deiyo ngebo kunune. Tonda, Israel nesala sun kalekra melimnun ngebo, ne Allah Yahwehdi pepkusene. Ada, ne Allahdi sun kumum mutu neitamai yumada, ila ikin keca karepsenepa, sun yuma kange mun kange doupra, kwar weik kupkamsere. Ware mutu nesala do yuma, aikin keca karepsenepa, konum kupyopda, yuk nesala gekepmengedi, ‘Uo, angeda, tek sisi ila mambule, ato ikin kecada, nun ton pio men gekeramepu,’ penkamenge.

4 Akupkamne ngeda tali tep gume. Deiyo weik akapmara cadi, aupu ton lap pepkusene. Tenpu ngeda, sun amutu kurum nesaladi, ne tamneruma tep, wenepkamsene. Tonda, ne si eremna ati cap, ne mawa mutu Yerusalem capda, sundi pio mali kudiramrume. Ada, sun ukutaru kurum nesala cap, sun apu yapu cap, Yehuda mutu nesala, sun ila deiyo Raja neng capdi, sun si kael kemna gum tali ubo keca, isok si eremna tep, yapi keca popra kareryakarume.

Ukuruma deiki di, amutu neitamaida, konum mali kudirume. Ange utopu, amutu kunung nesala ton, mali men kupmangepapu, sun deiyo nengdi, anesala weika di talipu portamrume. Ukupmantoda, me gwepmengedi, ila me mau pumbon dikdongopmengepa, me dinikredi embaramretopu, ne mawa mutu neitamaida, nimi weik poramipa, yapi pio weik sangamnga tep, akurure.

5 Tonda, sundi isok Bahal isok, er si eremna tep, sun pe nyapu dopra, gel taplakra yakra ketenepra deipmengedi, sun nyapu popra duyakarume. Sun pe nyapu dopra, isok Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupka deiyoda, ‘Baal sekmepepa, bal sisa tenepnung’ tenen, nundi Bahal sekmupke. Si yuk sekmepu dinino er tenpua.} er gispal dona tep, uku dongomyakarume. Akurum ngeda, nedi ton sun tep, “Ange kunkamrume,” men pepra deiamsisi. Tonda, ‘Ange kunkamenge,’ men teneamsi dinin, sun kange dipapu tenepra, akeca kuruma deiki di, ila mali kurume.

6 Atep nengeda, ne tek sisi pepsene. Sun tep ila di wenepkamsene. Ada, ne Allah Yahwehdi tek sisi pepsene. Ukutaruda, amutu si tep Tofet mutu perume. Tonda, Hinomdi deipu mi, er ila banai mutu si tep, Ben-Hinom pepra si perume. Uperumu dinino, ne tenepsi taru konum kupre pangeda, aperum ngeda, taprumudi, nimi weik poramyaipu penkamrume. Amutu si tep, “Nimi pon mutu banai pepsei,” pepra, amutu si penkamrume. Ada mesum tep gum dinin, nedi go karepnepa, yu nesaladi, sun amutu kurum nesala pio weika di poptapkamsenga tep pepsene.

7 Angepu gume. Yehuda yala nesala cap, Yerusalem mutu kurum nesala cap, sun yumadi, ‘Amutu neitamaida, ukupkamepe,’ tenerumnge yumada, gum kupra deipkamne. Ada nedi sun yuk mutu kunung neng puto karepnepa, sun Yehuda tara neitamai kurum nesala cap, Yerusalem mutu kurum nesala cap yumada, popra gawal dakamenge. Ataruda, nedi sun tep men lyepropkamne. Kaukepkamsene. Ukupnepa, sun podan nesaladi, ya dopra sun tep popsenge taruda epkamenge. Sun tep, ‘Nun songe,’ tenenge nesaladi, sun Israel yala nesala depkamrum taru dinkamsenge. Sun poptapsengopda, yuk nengdi sun nong yumada, men peinkamenge. Gume, poptapsengepa, tali bura kunung keca cap, tali ma cap yangedi yan jepropkamsenge.

8 Nedi ila kange mun kun keca doprapnedi, amutu kurum nesala, sun deiki deipkamne. Ukupnepa, amutu bisi embankameng nesala yumada, ange epmengedi, “Uo, uo, angeda ila mambule cadi, angeda ton cap men eptepe, nun pio kwar kunmasere,” penkamenge. Nedi sun wenemna tep, ila ikin keca karepsene pangeda, yuk mutu nesala yumadi abisi embangedi, ange kael kepmengedi, “Uo, uo,” pepra tupa penkamenge.

9 Tonda, sun podan nesaladi, ‘Amutu kunung nesala yuma popra gawal daktepe’ tenen, puto di yan warekamenge. Ayan warekameng ngeda, pio ila kange mun kupkamsera cadi, sun amutu neitamaipu kunkamrume. Sun wa pena cap, kina cap, jen erbana cap, me gwerbana capda, pio men kupmanto kusere taruda, jen pio putanapu kuserepa, ‘Uo, ware kuptepe do?’ tenen, amutu kunkamrum nesala yumada, kange mun keca pio weik kupserepa, nimidi er pe nyapu sal nyapu cap, ner nyapu capda, popra jepkamre.

Tonda wisi nengdi sun kayapu neng cap, sun ati meneng damai kunge neng cap popmengedi, anesala sun meneng nongpu, galepra jendankamenge. Ada, sun podan nesaladi, ila kange mun weik keca, sun nong deiki deipmenge pangeda, ikin pio weik kunkamsera tep, ila mali kecapu pio weika di kunkamrume. Ne Allahdi tek sisi pepsenetopu nong kupkamre. Allahdi ne Yeremia tep, “Aupu perbenkurume,” pepra deipneu.

10 Allahdi ne Yeremia tep upepneudi, aupu ton cap dukdongopra pepneu. “Kerah tu dopra, ketenepra deiami me mau dopra, ketenepkamrem ngeda, kandi dopropmemdi, kan melipmakenge neng, sun imam neng cap, nabi neng cap, sun wisi neng cap, sun dinmangai di oloktapkurume. 11 Ame mau oloktapmem taruda, upepkurume.

Allah Yahwehdi, akeca-keca yuma cap, im deiki jen talen malaikat yuma cap talepra, sun ila deiyo ngebodi upepsere. Ne Yeremiadi, akerah tu betaipinge dopra olokra tapmantopu, Allahdi, amutu kumum nesala yuma cap, amutu yuma capda, kerah tu di dopra ketkemameng me mau oloktapmantopu, sun amutu kumum nesala yuma poptapseredi, gum kupra deipkamsere.

Ukupkamre ngeda, yuk nengdi ton, tamupra telep kupra men deipkamenge. Ada men kupmanto tepa. Sun apopkamre nengda, Tofet mutu damaipu, depmange. Adepmange neng sun nongda, yuk nengdi dopra peinkamenge. Apeinkameng dipapu, tu palinai yuma eleprongepa, yuk neng peipmantoai yuma go ton gum kupkamre.” Allahdi peipneu.

12 Yeremiadi pepu. “Ada mesum tep men pepsere. Allah er si Yahwehdi, aupu tek sisi pepmasera cadi, nong kupkamre. Sun amutu kurum nesaladi, Tofet mutu kurum nesala yuma mali kudiramrumtopu, Allah Yahwehdi, ‘Amutu cap, Yudea tara cap, Yerusalem mutu cap, amutu kunge nesala yuma cap, mali kudinkamne. Amutu kunung nesala yumada, Tofet mutu pio mali kuretopu kupra deipkamsene,’ peipneupa tep pepsene.”

13 Tonda, Allahdi upeipneupa pepsene. “Yehuda tara nesala, sun deiyo-deiyo neng, sun ila ati cap, Yerusalem mutu ati dopra kunung nesaladi domi ati cap, Tofet mutu pio mali kuretopu kupra deipkamsene. Ada, sun yumadi amutu neitamai isok si eremna tep, siltong telep keca cap, gam keca cap, popra karerbaramrumnge cap, sun pe ati arum deiki, gel yakra taplakra deipmumdi, uku dongorumnge cap, ange yuma kuruma deiki di, Tofet mutu yuma mali kudiramrume.

Tonda, sun ati arum deiki tara di, ‘Siltong telep keca uku dongopmepepa, im deiki tara kunung isok-isokdi, kuru talenge isok, yuk isok yala-yala yuma cap, gekenkamsenge’ tenen, uku dongomrume. Ange utopu, anggur me telepnge gwepra, ubo keca isok gispal dona tep, ‘Nun deiyo ngebo,’ pepra bena karebarumudi, si eremrume. Ange yuma kuruma deiki di, sun pe mutu mali kudidamum topu, amenda taruda, ne Allahdi sun tep wenepsenedi, popra mali kupra deipkamsene. Nedi sun tep popra wenepkamne. Allahdi peipneupa, pepsene.” Yeremiadi pepu.

14 Allahdi Yeremia tep, ‘Tofet mutu bememdi, ne peipkene upu lap perberume,’ peiputopu, Yeremia konum lap pepu dingeda, Tofet mutu tapra, ka di tamupra Yerusalem mutupu yau. Konum yau dingeda, Allah er si eremna cap, er tep karena cap tep domi ati damai tekudi, akati dam bulupra wekmai nesala tep, upepu.

15 “Allah er si Yahwehda, akeca-keca yuma taleredi, im deiki jen talen malaikat yuma, sun ila deiyo ngebo kurure. Allahdi, nun Israel nesala tep, pio kalekra melimserur ngebodi, aupu peserure. Ne Allah Yahwehdi, Yerusalem mutu cap, amutu neitamai kurum nesala yuma cap tep, ‘Sun mali kurumu keca kunumna tep, ila di wenepkamsene,’ pepra peamsisi upuda, ukutaru, tek sisi kupkamasene. Ada mesum tep gume. Sundi, ne pesene upu men gekemumdi, pio kika deipra, tamnerume. Tapmumdi, sun mali kun kecapu kumumya tep, ne Allahdi sun damai ila ikin keca karepkamsene. Ada, sun kumum mutu neitamaida, ila kange mun keca karepkamasene. Ne Allah Yahwehdi konum pepsena tep, nong kupkamare.”

“Allahdi pepsere,” pepra, Yeremiadi agekenmai nesala tep pepu.