Jer 2 | XteSC | STEP | Allah er si Yahwehdi ne Yeremia tep, ‘Ukupkamrume,’ pepra deipneu. Allahdi peipneu upuda ake.

Jeremiah 2

Allahdi Israel nesala tep bicau tenepudi, ‘Sun mali kurum keca yuma taprumudi, ne damai tamupra yarume,’ pepra deipu upu

1 Allah er si Yahwehdi ne Yeremia tep, ‘Ukupkamrume,’ pepra deipneu. Allahdi peipneu upuda ake.

2 “Aupu pepra deipken ngeda, Yeremia kandi Yerusalem mutu kunge nesala, sun gekenai bena pepkurume. Ada upepkurume.

Uo, sun Israel nesala tep, Allah Yahwehdi upepsere. Sunda pumun taru kaber kuramrumu taruda, ‘Nun nai Allah, erda mambule weik cadi, er amutarapu kunkamepe’ tenen, moupra teneramnerumdi, pio ila kange deipra, ne si tep eremamnerum ngeda, tupa tenesenune. Tonda kaber neng ner dopkunge taru, buru dipkamangepa kange deriramengtopu, sundi ne tep, autopu teneramnerume.

Tonda, Mesir mutu tapra, sun katuai mutu bisi embaramrum tarada, ne embaramsi bisipu, sun peda ne tep melipra dombaramnerume. Amutuda, nimidi wa pepra yal keca men koupmanto mutu cadi, nedi meliamsisipa, sun yuma ne menepra baramsi bisipu melipra dombaramnerume. ‘Menop taru ukupra sundi ne tep melimamnerum ngeda, pio tupa tenesenune,’ Allahdi peipmasere,” pepkurume. Allahdi ne Yeremia tep pepneu.

3 Upepudi aupu ton peipneu. “Israel nesala, ‘Sunda ne mawa nesala kunkameng’ tenen, ne pedi wepra deiamsisi. Atep, sunda ne mawa nesala kurume. Nimidi wa pepra koupmengepane, kouamenge keca nong kuprepa, ila di kange deipra kiramengtopu, nedi sun tep menmena wepra deiamsisa tep, nedi sun tep ila di kange deipsisi. Atep nengeda, sunda ne dipru neng tenesenune.

Utenesenuna tep, ware mutu nesala do, yuk mutu nengdi, sun damai ikin keca deipsengedi, popetepseiya peda, nedi anesala tep, kange mun keca weik kareramsipa, kange mun kange doupra kurami. Israel nesala tep, ikin keca deipsei nesalada, nedi sun aneng damai, ikin keca sun nong deiki deipsipa, kange mun kurami. Angeda, tek sisi ne Allah Yahwehdi konum pepsene.” Allahdi pepneu. Yeremiadi upepra seku.

Israel nesala, sun apu yapudi mali kuraminge tep, pepu upu

4 Uo, Yakubdi deiamseupa, dadeipdanen barum nesala cap, tonda sun Israel yala nesala yuma tep, Allahdi peipmaser upuda moupra gekepso. 5 Allah er si Yahwehdi upeipmasere. Sun apu yapudi, ne Allah damai mali kurami ngeda, ware keca deiyo tep do? Tonda, nedi ware keca mali kupsipa, sun apu yapudi ne tapnei do? Ne tapneidi, sun mali kurami ngeda ake. Sundi, ‘Nun nai bo kunkamser’ tenen, kurami kecada, nong kuna gum keca tepapu tali, ‘Nun nai bo kunkamser’ tenen, “Nun deiyo isokda ake,” pepra, er aisok si eremami. Ukuramya deiki di, sun pe nongpu mali kudidarami.

6 Ataruda sundi ne tep, “Uo, nun nai bo Allah Yahwehda dan do?” pepra men asimpeteramnei. Ada, “Nun nai Allahda, Mesir mutu neitamai di nun nong doupra, nimi kuna pio gum katawai mutu bisi melipra duyanamseu. Amutu neitamai doupra, yakaramseu taruda, me ton pio men kwamu. Tonda, amutu neitamaida, ila tu pumbon kwamngaida, nimi kot saka popmantoi kwamu. Ukuamu mutu neitamaida, mo pio men cemrure.

Utopu, lukunda taru neitamai peda, pio kunungnapu kurure. Amutu neitamaida, nesala ton pio men kuramya tep, bisi men embarami. Tonda amutu neitamaida, yuk nesala ton pio men kurami, nunpu embaramepu. Amutu nimi kuna tep, ila ikin weik kuramseu mutu dinin, nun nai bo Allahdi, amutu neitamai doupra duyanamseu ngeboda, ukutaru dan cei kurur do?” pepra, men asimamnei.

7 Ne Allahdi, sun apu yapu bongoramu mutupu doupra yana deiamsisi. Ada, ‘Ukupnepa, amutu kungedi telep kange doupmengedi, yal keca yala-yala yuma koupra jenkamenge’ tenen, telep mutu duyanamsisi. Dinino, amutu neitamaida, mali kecapu talepra kuramipa, nedi karepsisi mutuda, pio malipu kudirami. Ada, ‘Ne mawa nesala karepnepa, pio kunkamenge’ tenen, karepsisi mutu, sun apu yapudi pio mali kecapu talepra kuramya deiki di, amutu mali kudirami.

8 Tonda, ataru neitamaida, ne si eremna ati talepra, pel dona deiyo neng, sun Imamdi, “Allahda dan kurur do?” pepra, men asimpeteramnei. Tonda ne Allahdi, “Ange kunkamrume, angeda men kunkamrume,” pepra deiamsipa, mem upu taleamidi, peteremna deiyo neng peda, sundi tek sisi ne tep, men kael keamnei. Tonda Israel nesala, sun ila nimi deiyo kepra taleramya deiyo nengdi, ne damai mali kecapu kuramidi, ne upu yanirtamamnei. Tonda, dortaru kupkamnenge tep, lap pena deiyo neng, sun nabi-nabi nengda, ne puto karepnepa, adeiki di sun lap pen upu men perami. Sundi, isok si, Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupka deiyoda, ‘Baal sekmepepa, bal sisa tenepnung’ tenen, nundi asisok si tep Bahal sekmupke. Si yuk sekmepu dinino er tenpua.} tepapu si eremamidi, er puto deiki di upu perami. Ukuramidi, deiyo gum keca, tali keca tepapu, ‘Angeda pio putapsere’ tenen, tali keca tepapu dombarami.

9 Sun apu yapudi, pio mali weik kuramya tep, ka di ton cap, “Sunda pio malipu kurume,” pepra wenepsene. Tonda, sun cap, sundi deiprum nyape cap, sun nyapu capdi deipkameng nyapu cap, sun yuma tep wenepsene. Ne Allah Yahwehdi pepsene, pepu. Ukutaru ne nyapu sun Israel nesala yuma, pumun taru kurami neng pe, ukutaru kurumu nesala peda, malipu kuruma cadi, sun yuma tep wenepsene.

Allah er nyapu sisa, Israel nesala tep, “Sunda malipu kurume,” pepra wenepu upu

10 Keteng dangban tara, Siprus mutu dinin, ila laut mokon pirman tara dirbenkurume. Ukupmum dingeda, nimi ton wepra deipmumpa, karen mutu er si Kedar mutu, keteng yakan tara dirbenkurure. Uka bere dingeda, amutu-amutu neitamai yuma moupra dipetepredi, kael kepkurure. Ada, sun Israel nesaladi pio mali kuramruma utopu, yuk mutu nesala peda, utopu mali kunung do? Ware mutu nesaladi, sun mali kuramrumtopu kunung do? Tuai mutu yuma dipetepra erbetum dinin, sun mali kuramrumtopu nesala ton, sundi pio men epkamrume. 11 Ada ware mutu nesaladi, tek sisi ne Allah tep, si eremamnei dinin, ne tapra yuk tali keca cap, isok cap tep, si eremnung do? Ware keca deiyo tep, tek sisi Allah taptengedi, tali isok si tep eremtenge do? Gume, yuk mutu nesala yumadi, ange utopu men kununge. Dinino, nedi wepra deiamsisi nesala, sun Israel nesala dipu, ne Allah tep tamamnerume. Ne tep tamnerumudi, tek sisi sun men melipmanto keca, tali keca cap, isok er si cap tep, “Nun nai bo,” pepra, tali keca si eremrume.

12 Ange tep nengeda, uo, im alau tara kure keca yumada, Israel nesaladi ne tep tamnenungada, gekepmengedi, pio mambul kange doupra kunkamenge. Nimi yo moropsemaretopu kupkamenge. Atep, ‘Israel nesalada, ware keca deiyo tep, apio mali kun keca kunung do?’ tenen, kange mun kange doupra, pio ikin deikipu kunkamrume. Ne Allah Yahwehdi pepsene.

13 Angeda mesum tep men pepsene. Ne nyapu sisa Israel nesaladi, pio mali kun keca butene talepidi, mali weik kununge. Tenpu ngeda, mali kunga deiki di, sunda ne tapnengedi, amnyo kemdongonenunge. Neda nesala yuma tep, gam me bungna utopu ngebo kunune. Dinin, sundi ne tep tamnenunge. Butene ngeda, me mokon paliamengepa, deiamre dinin, tu dikamre bon di, me embaredi sangdoramyane, ame yuma cedorure.

Ange utopu, sun pe kange dipapu tenepra si eremnung kecada, tali kecapu talepra si eremnung dinin, akeca di sun tep men meliptue. Yuk tali keca tep si eremengedi, neda tapramnengedi, si men eremnenunge, Allahdi pepu.

Israel nesaladi Allah peiamu upu moupra men talepya deiki di, ikin keca sun damai yaua tep, pepu upu

14 Israel nesalada, nimidi pel dipmengepa pel dorameng neng utopu gume. Tonda ikin pel diamengepa, apel doramengedi sundi derirameng nyapu utopu neng men kununge. Dinino, warya tep Israel nesalada, sun podan nengdi poptapmengedi, sun keca yuma dalupra doronung do? 15 Israel nesala sun podan nengdi sun tep, ila yu keca, er si singa pus yaredi, bura tara gam kure keca popra jeramretopu, kununge. Ada, yuk karen mutu nesala, yu nesaladi yana, sun portamnunga tep pepne. Tonda Israel nesala kunge mutuda, yuk nengdi uruptapmengedi, mali kupra derinunge. Tonda, sun ati arum dopra kunge mutu yumada, uku dongopmengepa, ukudi jepra gawal dangrepa, amutu neitamaida Israel nesala ton pio men kununge. Gopu kurure.

16 Sun Israel nesalao, nimi deiyo neng, sun giso deiki pio telep keca galupra kenengameng keca, dopra tapmengepa, mali kuramretopu, sun Mesir mutu jen talen nengdi, sun mutu si Memfis mutu cap, Tapanes mutu cap, yangedi sun Israel nesaladi talepra kururumdi, doramrum mutu gel yumada, uruptapmasenge.

17 Akupmaser ngeda, mesum tep men kupsere. Sun kaele. Sun pedi, mali kumumya menenga di, sun damai ikin keca yuma yarpa doropmarume. Deiyoda, ne Allahdi sun bisi embaramrum taruda, melipra dubaramsisi dinin, sundi ne tep amnyo kepnerumdi tapneruma deiki di, ukutaru ikin keca sun damai konum yare. 18 ‘Mesir mutu nengdi melipra lyepsetenge’ tenen, ‘Mesir mutu benkamepe,’ teneprumada, nong telepnge ton dopropkamruma tep benkamrum do? Tonda, ‘Nil me gwepra jenkamepe’ tenen, benkamrum do? Tonda angetopu, ‘Asyur mutu nesala sun damai betepedi, moroptepepa, telepe tenepsetengopda, sun Asyur mutu nesaladi melipra lyepsetenge’ tenen, sun amutu benkamrum do? Asyur mutu neitamai embaramre me, ‘Efrat me gwepra jeptepe’ tenen, sun mutu benkamrum do? Mesir mutu cap, Asyur mutu cap, bena moroptuma peda, ada nong telepnge ton men dopropkamruma tep pepsene. Amutu nesaladi men melipsetenge.

19 Tonda, sun mali kun kecapu talepra kumumya deiki di, sun damai wenemna keca yanmasere. Aikin keca, sun damai yanmaser ngeda, sundi ne Allah tep tapneruma deiki di doropmarume. Atep ukutaruda, ikin doroprumdi kange mun kunmasera deiyoda, ada sundi ne Allah Yahweh tep, men gispal donemumya deiki di, ikin doroprume. Ne kaele, sun Israel nesala yumadi, ne Allah tep, ‘Uo Allahda nun ila deiyo ngebo kurura tep, malipu kupmepyopda, ila di wenepkamsere,’ tenena gum di, ne tep gispal dopra, kware men kurure.

Aupu yuma pepmasen ngeda, ne Allah Yahwehdi, akeca-keca yuma talepra, deiki tara ila puto weik deiyo ngebo kunune. Tonda, ne Allah Yahwehda, akeca-keca yuma talenedi, pio puto weik deiyo ngebo kunedi aupu konum pepsene. Allahdi pepu.

Israel nesaladi, ‘Allah er si eremnada, nun songe,’ tenepya tep, pepu upu

20 Allahdi Israel nesala tep pepu. Pumun taruda, Mesir mutu nesaladi, sun yuma popbisipidi, ateng kouprapidi, sun pe mutu tamupra dubenamseidi, ila ikin pel dimamseipa, kange mun kange doupra kuramrum dinin, ne Allahdi, lyepropsisidi, telep mutu duyanamsisi. Dinino, sundi ne tep, ‘Gume, Allah pesere upu men gekenkamepe. Allah er pelpu dopmepedi, er amutarapu men kunkamepe,’ teneramrumdi, ne tep tamamnerume.

Tonda, dan mutu do yuma, sunda ila di erepra buku mutu dupai yuma cap, tonda ila co dam yuma cap, bemumdi tali isok si erepra bena mororume. Ukupmantoda, ada nimi domenge nerapu, sun nenge yapu anerapu dabal tep tapmengepa, tali neng cap upula nyangdaramengtopu, sunda ne sun nai bo Allah ne tep tamamnerume.

21 Ukupmantoda, nimidi anggur tapu yal pio telepnge kouramengtopu, nedi sun tep telep yala nesala kan-kan di wepra deiamsisi. Ada, ‘Sun telep kunkameng’ tenen, wepra deiamsisi. Tonda nimidi anggur tapu du yal telepnge di wepra, tu telepai bolongamengtopu, nedi sun melimna tep, pio telepai duyanamsisi. Dinino, ukutaruda sun konum tamupmarume.

Ukupmaruma deiki di bura tali paramre keca dopra yan kouramengtopu kupmarume. Sunda tali paramre keca utopu konum kunmarume. Sunda, pio mali kuruma tep pepsene. Sunda nedi pio telep yal keca utopu bolokamsisi dinin, ware kupmaruma deiki di, ukutaruda pio malingepu kunmarum do? Ada nong men kupkamre keca talepra kunmarum do? Ada nong men kupkamre keca talepra kunmaruma tep pepsene.

22 Atep nengeda, sundi, ‘Uo, mali kupmapa cadi, me gekamepe’ tenen, me gengna keca sabun cap, yu keca cap, weika di dopra, me gektuma peda, sun mali kurumu kecada, sun nong deiki tupa palenkamsere. Angeda, gum kupra men deipmanto kupsere. Akeca tupa kusere pangeda, ne tapkamsene. Pio dinkamsene. Neda Allah Yahwehdi pepsene.

23 Sun mali kun keca weik akapserepapu, sun balila di, ‘Gume, nunda mali ton men kuramepu,’ pepra talipu petamrume. Tonda ‘Tupa mali men kunupe. Teleppu kunupe,’ perume. Tonda sundi, ‘Gume, Bahal isok si men eremameputopu, tupa men eremnupe,’ penerume. Upenerum dinino, sun tamupra ila ban mutu neitamai pel doramrum kecada ka di ton cap tenepkurume. Sun mali weik kuramrum ngeda, moupra tenepkurume.

Ukuprumdi sun pe kael kepkamrume. Sunda ukupmanto, unta bisam nerngedi, ‘Gem unta bisam kuramyai tep dan do?’ tenen, wal nerepa, ortara benapna, atara yanapna kuredi, tali lupra embandaramretopu kumumdi, sun peda kange douna gum di, malipu kurume. Sunda moupra men tenerume.

24 Ange utopu bura tara kurur keledai bisam peda, bena yana kemaredi, nimi pio men kunung mutu bena kurure. Akeledai bisam bura mutu bena kuramyane, wal nerepa, ‘Ner keledai bisam dan do?’ tenen, tali mutu yuma lupra embaredi, benapna, yanapna kemamretopu kurume. Keledai bisam ner ngeda, wal nere taruda, men dimpepra kuramretopu, sun peda utopu kurume. Abisam deiyo nengdi, ‘Nun keledai bisam dan do?’ tenen, erbetenge dinin, pio men epkamenge. Keledai bisam gemnge kururaipu, tek sisi tamupra yankamra tep, men erbanung dinin, gemnge damaipu dinunge. Dakuramyane, er konuman wal nepre taruda, er pedi ketenem diramretopu, sun peda mali neng damai sepdara barume.

25 Atep Israel nesalao, sunda sepdara ubo isok si eremnai tep, pio epra embanapu kurumyopda, ikin weik kunkamsere. Ukupmanto, pio sepdara embarameng neng, sun yan pu jerepa ai bungamengtopu, kupkamrume. Tonda me putana pio weik putaramretopu kurume. Ada, tali isok si tupa eremumnyopda, ikin weik kunkamsere. Ukupserepapu, sundi uperume. ‘Gume, aisok tepapu si konum eremnupa cadi, pio tupa kange deipra aisok si eremkamepa tep, men taptepe. Sunpu melipra dombankamepe,’ perume. Allahdi Israel nesala tep upepra wenepu.

Israel nesala sun mali kunge kecada, Allahdi wenepkamra tep, pepu upu

26 Allahdi Israel nesala tep pepu. Ukupmantoda, upula donmare ngebo epmengedi, tomopmengepa ali dangamretopu, sun Israel nesala yala-yala yuma peda, ali dangkamrume. Ada tali dakunge nesala cap, sun deiyo kepra talesenung neng cap, sun upu bongdina deiyo neng cap, tonda ne si eremna ati pumbon pel dona deiyo neng imam-imam neng cap, ne upu peipnepa lap pena deiyo neng, sun nabi-nabi neng cap yumada, sun kunge keca jenek kupra deipsene pangeda, ali kupkamsere.

27 Ada sun yumadi co dopra petupra deipmumdi, akeca tep, ‘Nun nai bo,’ pepra si eremrume. Ange utopu, tali urasin telep gel dopra deiprumudi, ‘Nun ninda ake. Erdi nun deipseue,’ pepra si eremrume. Adeiki di sun pepu ali dakamrume. Ada mesum tep men pepsene. Sundi ne tep amnyo karekraprumudi, ne tep tamnerume. Ne damai men yakarume. Neda, sun amnyo tara utopu konum deipmanerumdi, ne tapra banerum dinin, sun urasinda ne tara utopu tupa dinerume.

Deiyoda, ne pesene upu yuma tamnerumudi, ne si men eremnerum dinin, ikin keca sun damai yasere taru yumada, kange mun kange dourumu dingeda, ne tepapu, ‘Uo naio, kandi melipra lyepseo,’ pepra tupa moronerume. Ukunerumupa sun moropmanerumtopu kupra lyemsenune.

28 Sun pedi betapra deiprumudi si eremrum isok-isokda dan kunung do? Ikin keca sun damai yarepa, kange mun kange dourum taruda, sun pedi petupra deiamrumu kecapu, sun tep, ‘Uo yana lyepseo,’ pepra moropkamrume. Atali keca di sun tep tek sisi lyepsetenge teptoda, sun isok si eremrum keca dipapu, sun ikin keca kupsere taruda, akeca di lyepkamsetenge, nedi gume. Angeda mesum tep men pepsene. Uo sun Israel yala nesalao, sun ati arum dorumu mutu, weika di dorumtopu, sundi tali isok sipu weika di eremrum ngeda, men nukmanto. Atep, sun Yehuda yala nesala kunge mutu neitamai kurum nesala yumada, isok si weika di eremruma tep, wenepkamsene.

29 Sunda war keca deiyo tep, ne men kange deipnerumdi, ne tep mali upu pepra, malya penerumudi, ‘Nun nai Allah warya tep wenepkamser do?’ pepra balila kurum do? Ne Allah Yahwehdi pepsene. 30 Sun cap, sundi deiamrum nyapu cap tep, ‘Ne upu gekepkameng’ tenen, sun wenemna tep sun damai ikin keca derisene ngeda, sun men kael kemrume. Atep, sun wenemsisi ngeda, tali tepapu wenemamsisi do? Sundi, ‘Uo, nun mali kunupa tep wenepmasere,’ men tenerume. Ada ukupmantoda, bura kuramre yu pus, er si singa pus, ila yu pusdi yu peramredi, tali dakuramre gam keca popra jeramretopu kurume. Ada, ne upu peipnepa lap pena deiyo neng nabi-nabi neng doproipsisipa, sundi anabi neng yuma portamamrume.

31 Uo ukutaru kurum Israel nesalao, sundi ne apepsen upu moupra gekepneso. Nedi sun tep nengeda, katawai mutu utopu kupra, ikin kecapu depsisa tep, tapnerum do? Agum dingeda, sun kurumaida kunukmeteng peramre utopu, dirine cap, kael kemna deiyo keca cap, men kareramsisa tep, tapnerum do? Ange men kupsisa tep do? Sun tep nedi telep kupra kalekra meliamsisi. Dinino, sundi upenerume. ‘Gume, nunda talipu kupedi, nun tenepmepe kecapu kunkamepe. Allah er amutara bukra men kunkamepe. Er pesere upuda pio men gekenkamepe. Tonda er damaida, tamupra men bankamepe,’ penerume. Angeda ware keca deiyo tep do?

32 Ukupmantoda kaber ner, er kwerya kepmarya lumdonongrur do? Autopu buru dipkamange nerapu kemameng telep opkal cap, kwerya keca cap, buru dipkunge taru luproredi men kenengrur do? Gume, ada men kupmanto. Dinino, ‘Sunda ne mawa nesala’ tenen, wepra deiamsisi nesaladi ne Allah tep, pio konum lupronerum taru yumada keteng tamun men nukmanto, pio weik kupu.

33 Teka sunda, ‘Tali nyangdange nerapu, telep neng tenepkamseng’ tenen, sun nerapu kange telep deipmanto keca moupra teneprumudi, ketenepra derina ngeda ila kael kemrume. Ukupra keteneiprumu ngeda, yuk tali nyangdana nerapu peda, ange epmengedi, ‘Sun akupmange ngeda, nun ton kael kepkamepe’ tenen, moupra sun kunmarumunge dinunge. Ada, sun Israel nesalada, mali kun keca weika di kael kepruma tep pepsene.

34 Angepu gume. Tonda sun kenengrum opkalda, akeca yuma talena gum di, tali kankan kunge nesala sun yapi cap, mali men kuramenge neng, sun yapi capdi, sun opkal paleserure. Sun opkal deiki nimi yapi paleserur ngeda, upula don neng tomopra popmum neng yapi men paleserure. Deiyo men kwapupapu, tali neng poptaprumpa, sun yapi paleserure. Sun mali kurumu ngeda, men nukmanto.

35 Mali kurum keca, men nukmanto kuserepapu, sundi upenerume. ‘Gume, nunda mali men kunup nenge. Nunda teleppu kunupe. Atep Allahdi men wenepra popkamsere,’ pedarume. Dinin, ne Allahdi tek sisi pepsene. Nedi sun mali weik kuruma tep nengeda, wenepra popkamsene. Ada sun mali kurumu dipapu, ‘Gume, nunda mali men kunup nenge, teleppu kunupe,’ peruma deiki di upu bokeipsenedi, wenepra popkamsene. Ne Allahdi pepsene.

36 Malipu kuprum dinin, sun adipapu, ‘Gume, nun mali kuramepunge yumada, tek sisi tapkamepe,’ perum dinin, tali sipyal deiki dipu aupu pertamrume. Kanam dipu mok upu pertamrume. Atep nengeda, sun pumun taru Asyur mutu nengdi sun Israel yala nesala poramseitopu, amenda taruda, sun Mesir mutu kunge nesaladi, sun wenemna tep bisbisa kapsengedi, popkamsenge.

37 Mesir mutu nengdi sun tep, popbisipsengedi, ateng koupra dubenkamseng taruda, sun Israel nesaladi, ‘Uo, war keca deiyo tep kupmaseng do?’ tenen, kange mun kange doupra kunkamrume. Ikin kange douprumudi, sun buru sun pe giso deiki deiprumupa, Mesir mutu nengdi, sun pe mutu tamupra dubenkamsenge. Sun mutu benkamrum taruda, ali kuna cap, kware kuna cap, pio weik kupkamsere. Mesir nengdi ukupkamsengada, mesum tep gume.

Deiyoda, ne Allah Yahwehdi, sun kange derirum keca yuma gum kupra deipkamna tepa. Ada, sundi, ‘Isokdi do, Mesir mutu puto nengdi do, sun dipu melimkamsenge,’ tenerum ngeda, ne Allah Yahwehdi akeca yuma gum kupra deipkamne. Atep nengeda, isok-isok pe, Mesir mutu nesala pe, sun yumadi, sun Israel nesala tep, melimsengepa, telep kupra men kunkamrume. Ada men kupmanto tepa. Sundi, ‘Mambul keca ake,’ tenerumnge yumada, ne dabal kunerya tep pepsene. Allahdi Israel nesala tep pepu.