Jeremiah 20

Yeremia cap, Allah er si eremna ati pumbon pel dona deiyo ngebo, er si Pasyur cap, pepdarei upu

1Tenpu ngebo, er si Imer, er mi Pasyur amutu kuramu. Pasyurda, Allah Yahweh, er si eremna ati pumbon pel dona deiyo ngebo kuramu. Yeremiadi, Allah peipu upu lap penmaupane, Pasyur ton gekenmau. 2Pasyur aupu konum gekepu dingeda, Allah er upu lap pena ngebo, nabi Yeremia tep, er buru di popu. Popudi, nimi yuk neng tep, “Sun adipapu angebo tomopra ateng koupmumdi, Benyamin yala neng, sun Allah pel dopkunga tep, Allah er si eremna ati wengbange ati, bisi buplan damai bena, gerekra deipmumdi wenepkurume,” pepra dipupa, Yeremia tomopidi, ateng koupra wenemna ati dongopi.

3Pasyurdi peipupa, tomopra ateng koupidi, wenemna ati deipra mapmaipa, bereku pangeda, Pasyurdi er kapu neng tep, “Loptapso,” pepupa, konum loptapi taruda, Yeremiadi Pasyur tep pepu. “Allah er si Yahwehdi, kan sida Pasyur pepra, si karepkeupa, nimidi peramkei dinin, ukutaruda kan si Pasyur, tupa men penkamkenge. Ukutaruda, kan sida Magor-Misabib pepkene. Asi pepkena deiyoda, ‘Dan-dana tara yumadi, kware kun keca yakankamkere,’ pepkene.” Yeremiadi Pasyur tep, upepra wenepu.

4Allahdi kan tep, ukupu si karepmakerada, mesum tep gume. Deiyo ake. Allah er si Yahwehdi, kan tep upepkere.

Ne Allahdi, kan damai pio kware kun keca karenkamkene. Tonda, kan kayapu nesala damai, kware kun keca karenkamne. Ila kange mun keca, sun damai deipne pangeda, sun podan nesaladi, parang ya dopra yangedi, kan kayapu nesala yuma tep, popkamenge. Sundi anesala ponge taruda, kandi dinkamreme.

Angepu gum dinin, ataru dipapu, ne Allahdi Babel mutu neng tep, go karepnepa, Babel mutu ila nimi deiyo ngebodi, amutu yaredi yana popbisipkamkere. Ada, Yehuda mutu kunung nesala yuma, ne Allahdi kaukeptapnepa, Babel mutu nesala dipapu, amutu kunge nesala yuma tep, popra bisbisa kapkamenge. Ukupmengedi, sun nong yuma tomopra, Babel mutu neitamai derirbenkamenge. Babel mutu dubengopda, sun Yehuda yala nesala yuma, parang ya di poptapkamenge.

5Nedi sun tep kaukepsenepa, Babel mutu nengdi, Yehuda tara kunung neng yuma tomopmengedi, sun kunumna weik keca cap, ‘Ila mambul keca’ tenen, mawa deriami keca cap, tonda, sun pumun taru ila nimi deiyo neng, Yehuda tara taleami Raja nengdi moupra derirami bung keca yuma cap, ange yuma upula dopropmengedi, Babel mutupu dubenkamenge. Ada, sun co puna nengdi taleami keca cap, sundi talepra kurum keca yuma cap doupra, sun Babel mutu dubenkamenge.

6Ataru dipapu, Pasyur kan cap, kan ati kunge nesala cap, kan yala neng cap yuma, tomopsengedi, Babel mutupu dubenkamsenge. Ukupsenge pangeda, Pasyur kanda, Babel mutu neitamaipu depmempa peipkamkenge. Tonda, kan kayapu nesala yuma peda, Babel mutu neitamai popmengepa peipkamenge. Ada, kan mok upu deiki di, ‘Allahdi peipneu upu pepsene,’ pepra lap peramumpa, teka teneramkei dinin, kandi mok upupu peramumpa, gekenung nesala yumada, utopu popmengepa, Babel mutupu peipkamenge. Allahdi kan tep pepkere. Yeremiadi Pasyur tep pepu.

Yeremia ikin kange dopudi, ‘Uo,’ tenen, mali pepra engena deiki di, pepu upu

7Allah Yahweh kandi ne tep, “Kange bongtona gum dipapu, nedi peipkamken upupu penkamrume,” pepra, puto di peipnemuma tep, kan penerem upupu penune. Kanda, pio ila puto ngebo kurum dinin, neda puto gum ngebo cadi, kandi pepra derinemempa, angepu penune. Aupu dopra, yuk neng tep bena pepnya peda, men gekepmengedi ne tepapu mali pepra nyek-nyek penenunge. Ada, tumi-tumi yuma yuk nesala yumadi, ne tep, “Erda pio walwal dipu perur ngebo,” penenunge.

8Kandi peipnemumtopu, “Amenda taruda, ila kange mun keca amutu yankamre. Amutu kure keca yuma, yu nengdi uruptapmengedi, gum kupra deipkamsenge. Ikin weik kunkamsere,” penune. Tumi-tumi yuma, ila upu di aupu penun dinin, amutu nesaladi men gekenenunge. Ukungedi ne penmanenge tep, yu kuprepa ikin keca pio weik, ne nong deiki derinenunge. Ukupra tupa-tupa nalepra mali penenunge. Ne nai Allah, Yahweh kandi, “Aupu pepkamarume,” peipnemum upu penuna tep nengeda, ne tep mali penengedi, autunenunge.

9Ukupmenge pangeda, ne nai Allah kandi ne damai peipmanemem upu tep nengeda, ‘Konuma, Allah er si deiki upu ton, yuk neng damai men penkamne. Er si ton katuai men sipenkamne’ tenen, dipru neitamaipu tenenune. Ukupra tenenun dinin, ila uku bu jeramre utopu, ‘Kandi pedinemem upu inipkune’ tenen, men lap pepnyopda, ne dipru neitamai ila pu jenerure. Ne kange dipru neitamai ikin weik kunerepa, puto gum kunere pangeda, ‘Pio dimpepnapu men kuptene’ tenen, mali kange dounune. Atep, ‘Kandi penemem upuda, men iniptene,’ tenenune.

10Tonda, amutu nesala yumadi ne tepapu, mur-mur pena deiki di upu sisingmangepa gekenune. Sundi ne teppu penunge. “Angeboda, ‘Ikin kecapu yankamsere,’ tupa teneredi kurure. Erda nun dabal cadi, tomoprapmepedi, nun mutu ila deiyo neng damai dubepedi, ‘Angebo mali upu perure,’ pepmepepa, sundi wenepkamenge,” penenunge. Tonda, ne kayapu neng peda, ‘Mali kupkur do?’ tenen, pio kalekra dininunge. Tonda, ‘Mali kuptupa, eptepedi, ateng koupmepedi, wenepra poptepe,’ tenenenunge. Ada yuk neng dipu, ange men tenenenung dinin, pio ne tara neng sisa peda, aupu penenunge. “Ukupmepya deiki di, ‘Er tep popbisipkamepe,’ tenenup ngeda, konum kupkamepe,” penenunge.

11Upenenung dinino, ne nai Allah Yahweh, ila puto ngebo kuredi, ne tep kalekra melimnerure. Ukupmantoda, Allah erda ila puto jen talen ngebo utopu kurura tep, nimi yumadi er tep, kware dangnunge. Ange tep nengeda, ne tep, ‘Ikin keca er nong deiki derinkamepe,’ tenenung nesala, sun yumada, puto boun kuiprepa, ne tep men bisbisa kapkamnenge. Atep sun anesaladi, ‘Ukupkamepe,’ tenenung ngeda, gum kuprepa, ange epmengedi, tupa tamupra tenengedi, pio ali kunkamre. Tonda, sun ali kunkamre ngeda, pio akapkamre. Men gum kupkamra tep, nimi yumadi men lupropkamenge. Tupa tenenapu kunkamenge.

12Allah Yahweh, kanda ila puto ngebo kurume. Kanda akeca-keca cap, im deiki jen talen malaikat yuma cap, sun ila deiyo ngebo kuruma cadi, kandi dumsisi kupra kunge nesala tep nengeda, ‘Tek sisi telep kunung do, gum do?’ tenen, kurpeterume. Ada Allah kandi, nimi yuma sun dipru neitamai kure keca cap, sun kange neitamai tenenung keca yuma capda, kandi moupra kael kemserume. Atep, ne yu tenenenung nesalada, kandi wenemna keca karepmempa, ‘Ne ton eptene’ tenen, moropkene. Atep nengeda, ne kunun keca cap, ne gam kuna cap yumada, ‘Ne nai Allah, er dipapu kalekra melimkamner’ tenen, kan deikipu lopra deipkene.

13Nimi yumadi, Allah er si Yahweh tepapu, mut pepra gudinapu kupedi, er si eremkamepe. Allah Yahweh tepapu, ‘Kanda pio telepe kurum ngebo,’ pepra, er sipu eremkamepe. Ukunkamepada, mesum tep gume. Deiyoda, mali kuna nesaladi, ‘Sun kankan kunge nesala cap, akeca yuma men talenge nesala cap, nundi poptepe,’ tenesenung nengda, Allahdi lyemdoserya tep, pepne. Yeremiadi pepu.

Yeremiadi mambul kange doupudi, mali pepra engepudi, pepu upu

14Yeremiadi mali kange doupra, engepudi pepu. “Uo, neda ikin weik kunerura tep, ukupra tenenune. Nanindi deipneu tumida, mali kuptudi gum kamnutu ja. Atumi tep, wipdongotenge ja. Nanindi deipneu taru dipapu poptamnetu ja. ‘War keca tep kaukeptamneu do?’ tenenune. Atep, ‘Atumida mali kuptudi, telep men kunkamre,’ tenenune. 15Tonda, nanindi deipneu taru, yuk ngebodi ne nai bo damai beudi, ‘Kan nerdi sal mi deipre,’ pepupa, ne nai bo kange deipu dinin, aupu lap perbenamu ngeboda, tamtu ja. Utopu, aupu kai lap perbeu ngebo tep, mali kupra deiptenge ja. War keca deiyo tep, aupu perbeupa, ne nai bo gekepudi kange deiamu do? Angeda, gum kuptu ja.

16Diman perbeu ngeboda, nesala ati arum doramyai, Allahdi sun aneng tep, bicau tenena gum dipapu, popra gawal dakamotopu kamemetu ja. Ukuptu pangeda, ipna taru cap, keteng dukduk taru capda, yuk nengdi, angebo tep, ‘Kan podan nengdi poryanmakenge,’ pepra peptengepa, gekemtu ja.

17Ada mesum tep men pepne. Ne nabi bo damai yana, ‘Kan nerda sal mi deipkere,’ pepra, kai peryau ngebodi, nanin mundu bo tupa kunmasi taru di poptamnetu ja. Ukupnutupa, ne pedananen, mundu bopu deamtenepa, nanin cap, ne cap tonpa peiamsetengepa dakuramtene ja. Angebodi, nanin cap, ne cap, ware keca tep men popseua men deamnemu do? ‘Erda ikin weik kuptu ja,’ tenenune. 18Uo, ware keca deiyo tep, neda nanindi deiamneu do? Ne deiamneupa, ‘Ikin keca weik dororedi, kange mun kange doupra, ikin kecapu kunkamre’ tenen, deiamneu do? Tonda, ne gam kunun taru yumada, mali kange doupra kunedi, kwadangna deikipu kunkamne do?” Upepra, Yeremiadi, mali kange doupudi, engepra pepu.