Jer 21 | XteSC | STEP | Yehuda mutu talepra kuramu ngebo, Raja Zedekiadi butene neng wepra nabi Yeremia damai dokotepu. Aneng sun sida ake. Ada, Allah er si eremna ati pumbon pel doramu ngebo, imam Zefanya cap, tonda nimi si Malkia, erdi deiamu ngebo Pasyur cap dokotepu. Imam Zefanya, er nai bo sida, Maseya kuramu. Pasyur er nai bo sida, Malkia kuramu. Raja Zedekiadi, aneng butene wepra, “Nabi Yeremia damai bena asipetepkurume,” pepra deipupa, sundi ne Yeremia damai upu peryanerei. Raja Zedekiadi, sun aneng butene tep, pepra deipupa, ne damai mororyanerei upuda ake.

Jeremiah 21

Babel mutu nengdi, Yerusalem mutu nesala popkamenge tep, pepu upu

1 Yehuda mutu talepra kuramu ngebo, Raja Zedekiadi butene neng wepra nabi Yeremia damai dokotepu. Aneng sun sida ake. Ada, Allah er si eremna ati pumbon pel doramu ngebo, imam Zefanya cap, tonda nimi si Malkia, erdi deiamu ngebo Pasyur cap dokotepu. Imam Zefanya, er nai bo sida, Maseya kuramu. Pasyur er nai bo sida, Malkia kuramu. Raja Zedekiadi, aneng butene wepra, “Nabi Yeremia damai bena asipetepkurume,” pepra deipupa, sundi ne Yeremia damai upu peryanerei. Raja Zedekiadi, sun aneng butene tep, pepra deipupa, ne damai mororyanerei upuda ake. 2 “Yeremiao, ‘Kandi Allah Yahweh tep asipeteptume’ tenen, moropkepe. Ada, nun Yerusalem mutu kunup nengda, ware kupkamep do? Deiyoda, Babel tara mutu talepra kurur ila nimi deiyo ngebo, er si Nebukadnezar, er cap, er jen talena neng cap, yanmangdi, ‘Yerusalem mutu nesala popkamep’ tenen, nun kunup mutu damai yana warengmasenge.

Atep, ‘Allah Yahwehdi nun melipra lyemna tep, nun deiki kunupsekpen pel dopsetu deiki di, Raja Nebukadnezar cap, er jen talena neng capda, eneprorepa, tapsetengedi, sun pe mutu tamupra betenge,’ tenena tep moropmepe. Allah Yahwehdi, menop taru neitamai, ware kuprap taru ton, kunupsekpen pel doamseu deiki di lyepropseua tep, ‘Angeda kange di ton cap kupsetu’ tenen, moropmepe. Atep, kanda Yeremiadi nun melimna tep, Allah damai moropkuserure.”

Yehuda tara nimi deiyo ngebo Zedekiadi, aupu peipupa, erdi doproipu butene nengdi, nabi Yeremia damai peryarei. 3 Ataruda, abutene nengdi, Yeremia damai yana, aupu pepra asipetepreipa, nabi Yeremiadi, ayanmarei neng tep tamupra pepu.

4 “Sundi Raja Zedekia tep bena pepkurerume. Ada ake. Nun Israel nesaladi si eremnup Allah, er si Yahwehdi, aupu konum pepra deipmasere. ‘Raja Zedekiao, kan jen talena neng yumadi, ‘Raja Babel cap, er jen talen neng cap tep, popkamep’ tenen, dopmange nimi pon keca yumada, nedi pel dopnepa, kan tara jen nengdi doupmange jen cap, nimi pon keca yuknge yuma capda, tamupra Yerusalem mutu ila ati arum neitamaipu yamupra tapra deipkamenge. Ada, sun Kasdim ^{▼▼Kasdim mutu – Amutu sida, Babel mutu tep perami. Mutu si butene perami dinin, atara mutu yumada tenpua. Yeremiadi seku buku neitamaida, Babel mutu pepra seku. Yuk-yukaida, Kasdim mutu pepra seku dinin, amutuda tenpu pua.} mutu jen talena nengdi, ‘Yerusalem mutu neitamai wekmepedi, amutu nesala yawa poptapkamep’ tenen, sun Yerusalem mutu ila ati arum dana-dana tara ongopdongopra wiamrum lyom gel beilya bura tara warengmasengpa, sun Yerusalem nengdi, popetepmarum dinin, nedi pel dopnyopda, ange tapmumdi, sundi dopmarum nimi pon keca yuma dopra, Yerusalem ati arum neitamaipu deiptapkamrume.

5 Tek sisi pepsene. Neda Allah, ne pedi, sun Yerusalem mut kurum nesala tep, popkamne ja! Ada, ne ila puto buru deiki dipapu, sunda yana popkamsene. Tonda, tupa-tupa nedi sun tep yu weik kunerur ngeda, pio weika di me diniselangamre utopu kunerure. Nedi sun tep tulum weik kunerura cadi, derepsenedi, wenepra poptapkamsene. 6 Nedi sun tep yu weik kunerura cadi, amutu neitamai ila ati arum dopra kurum nesala yumada, popra gawal dakamsene. Ada, menmena taruda, ne dipapu karepnepa, ila kange mu pu, sakdanen embana pu jena ila deiyonge, sun damai yaryopda, sun amutu kurumu nesala yuma cap, tonda sundi peirumu tali gam kun keca cap pio weika di depkamenge.

7 Nedi, sun Yerusalem nesala yuma tep tapsenepa, sun podan nengdi yana, sun amutu nesala weik tara ngeda, poptapkamsenge. Tonda, nedi sun wenemna tep karepnepa, ila jen putana deiki di, nimi weik depkamenge. Tonda, nedi karepnepa, ila kange mun pu jenkamra deiki di, nesala weikanun ton depkamenge.

Dinino, akange mun keca yuma deiki di men depkameng nesala cap, mar podanai di popmenge dinin, men depkameng neng cap, Yehuda tara talerur Raja Zekekia cap, er amutara pel donung deiyo-deiyo neng cap yumada, Babel mutu nimi deiyo ngebo Raja Nebukadnezardi, yana tomopkamsere. Erdi tomopkamre nesala yuma tep nengeda, erdi sun tep, bicau men tenenkamra cadi, erdi, ‘Anengda ikin weik kununga tep, konuma dakaukepkamne,’ pio men tenenkamsere. Aupuda, Allah Yahwehdi, ‘Ange yumada, tek sisi kupkamre,’ konum peipsere. Yeremiadi sun butene neng tep pepu.

8 Upepu dingeda, aupu ton dukdongopra pepu. Tonda sun butene nengdi, Yehuda tara kunge nesala yuma tep aupu ton lap perbenkurerume. Ada ake. Allah Yahwehdi sun Israel yala nesala tep upepsere. “Ne nyapu sun Israel nesalada, moupra gekepkunerume. Ada, ataruda, dena bisi banange cap, tonda gam kuna bisi banange cap, katawai di sun damai deipkunsena cadi, dan tara bisi wepkamrum do? Moupra tenipeteprumudi, wepkamrume. 9 Ila ati arum domi mutu, Yerusalam mutu tupa kunkameng nesala yumada, nedi sun wenemna tep karepnepa, ila kange mun keca deiki di depkamrume. Ada, ton nesalada ila jen putana deiki di, nimi weikanun depkamrume. Ton nesalada, ila kange mun pu, benepdanen ban pu jenkamra deiki di, nimi weikanun ton depkamenge. Ange deiki di men depkamrum nesala, tupa gam kunkameng nesalada, mar podana deiki di, nimi weikanun ton depkamrume.

Dinino, sun aila ati arum domumnya, acapu tupa kunung nesala kankan di, Yerusalem mutu ati arum tapra bengedi, sun podan ngebo Raja Babel tep, “Nunda, sun cap men podankamepa cadi, sun dipapu datalepseso. Sun amutarapu kunkamepe!” pepmenge nengda, er jen nengdi popmengepa, men depkamenge. Raja Babeldi tomopkamser dinin, sun tupa gam kunkamrumada, telepe pua. Ukupmantoda, jen nengdi yuk mutu neng popmengedi, gawal dakmengopda, sun atara neng talerami bung keca yuma, dalupra doramengtopu, Babel nengdi men popsengepa, sun tupa gam kunkamrumada, abung keca utopu kupkamsere!

10 Yerusalem mutu ila ati arum dopra kurum nesala, popra yawarapra tapkamseng ngeda, ne Allah Yahwehdi, ‘Ange yumada aneng tep karepkamne’ tenen, konum ketenepra deipsi. Tonda, ‘Amenda taru telep kunkameng’ tenena gum di, ataruda ila kange mun keca karepkamsene,’ konum ketenepra tenepsa cadi, ange yumada tek sisi kupkamser ja. Nedi sun tep bicau men tenepkamsene. Akati arum dopra kurum nesalada, nedi sun doprapsenedi, sun podan ngebo, Babel mutu deiyo ngebo, er deiki deipkamsene. Ukupsenepa, erdi akurumai yumada, uku deipra gawal dakamsere. Allah Yahwehdi, aupuda konum pepra deipka tep, sundi Yehuda tara nesala tep lap perbenkurerume. Nabi Yeremiadi, er damai yanmarei neng tep pepu.

Allahdi, ‘Yehuda tara kunge nesala tep, deiyo kepra talenge deiyo neng wenepkamne,’ pepu upu

11 Nabi Yeremiadi, aupu ton dukdongopra pepu. Allah Yahwehdi ne Yeremia tep, pepneu upu ton ake.

“Kandi ne pepkene upu doupra, Yehuda yala neng tep, nimi deiyo kepra, talenung deiyo neng tep perbenkurume. Ada, Raja Dauddi deipupa, dadeipdanen yakangedi, deiyo kepra talenung deiyo-deiyo neng, sun bung gekenaipu bena pepkurume. Sunda Allah Yahwehdi, ‘Aneng sun wenemna tep kupkamne ngeda ake,’ peipseu upu moupra gekepkurume. 12 Raja Dauddi deipupa, dadeipdanen yakangedi, deiyo kepra talerumdi, sun deiyo neng yumada, dumsisipu telep kunangepu kunkamrume. Ada, tumi-tumi yuma pio pe deipra, telep pelpu donkurume. Puto kungedi, sun amutara talenung nesala, sun keca doropkungia tep, anesala ikin keca deipmengedi doronung ngeda, sun deiyo nengdi, telep kupra upu bokeipmumpa, amali kunungada tapkamenge.

Tumi-tumi yumada, nimi upu dumsisi kupra bokeipkamrume. Ange tupa men kupmumnyopda, sun amali kupmumya deiki di, ne Allahda, sun mali tupa kurumnya tep, ne ila yu kupnerur ngeda, uku bo weik jeramre utopu kuneredi, sun mali kurum nesala tep auku jepropkamsere. Sun tupa mali kumum keca tep, ila yu kupnerepa, uku bu jeramretopu ngeda, men gum kupra deipmanto kupkamre. Pio jena pu kuprepa, sun yuma jepra gawal dangkamsene.

13 Sun yuma moupra gekepneso! Sun mutu buma deiyo tara, ila banai kurum nesala tep, nedi wenepra popkamsene. Ange utopu, sun mutu buma deiki, ila pala gel deiki kurum nesala peda, nedi wenepra popkamsene. Men taruda, sundi, “Gume nunda, pio putoai kunupa cadi, yuk nengdi yana, mar men popsetenge. Tonda, ‘Nun podan neng yana popsenung’ tenen, lyom gel beilya wipmepu ngeda, yuk nengdi yana, men urupra wekra popsetenge,” pepra, salnong-nong kepra peprum dinino, ne Allahdi sun yuma tep, bisbisa kapsenedi, wenepra popkamsene.

14 Ne Allahdi sun mali kumum keca yuma epra kael kepsisa cadi, sun mali kurumu keca weik akure utopu, neda ila di wenepra popkamsene. Ukupmantoda, nimidi konum koloupu co palpal neitamai, uku sekra dongopmengepa, auku di aca damai akapu keca yumada, uku di jepra gawal dakamretopu, ne Allah Yahwehdi sun tep wenepra poptapsenedi, gawal dakamsene. Allahdi pepu.