Jeremiah 22

Yeremiadi Raja Yehuda er nyapsilip yuma tep, wenemu upu

1Allah Yahwehdi ne Yeremia tep yana pepneu.

Kanda, Yehuda yala neng tep, Raja kepra talerur ngebo cap, er nyasilip yuma cap, sun damai bememdi, ne Allahdi pepkuken upu dopra, sun yuma tep, lap perbenkurume. Aupuda ake. 2Allah Yahwehdi upepsere. Kanda Yehuda yala nesala kunungai talepra, Raja kepra, nimi deiyo kurum ngeboda, nedi pepkuken upu moupra gekepkurume. Kanda, kan apu bo Dauddi, nimi deiyo ngebo kemna tep, ila bungna keca, er si tahkta deiki bungamutopu, ukutaruda kan ton akeca deiki bungrumudi, amutu nesala yuma talerume. Atep, kan cap, kan amutara pel donge deiyo-deiyo neng cap, kandi talerum nesala yuma capda, moupra gekepkurume.

3Ne Allah Yahwehdi sun yuma tep pepsene. Sundi yuk nesala sun damaida, dumsisi telep pelpu donkamrume. Ada, nedi, ‘Ukunkamrume, angeda pio men kunkamrume,’ pepra deipsisi upu peretopu kupra, pio dumsisipu kunkamrume. Tonda, nimi upu bongdina taru tep nengeda, tek sisi sun kungetopu, tenepmumdi, telep kupra upu bokra deipmumdi, wenepkamrume.

Tali-tali kuna gume. Puto kunge nengdi, sun amutara kan-kanpu kunge neng tep, ikin keca sun nong deiki deipmengopda, sun deiyo nengdi, aikin kunge nesala tep, loptapra melipra lyemdorbenkamrume. ‘Telep mutu neitamaipu kutepe’ tenen, yuk mutu di sun mutu yana, tengyakan neng cap, tonda lyan nesala cap, solu nerapu cap tep, ‘Sun keca dalupra doproptepe’ tenen, pio moronapu men kunkamrume. Tonda, ‘Aneng tep yanipdongopra poptepe’ tenen, sun damai ikin keca men derinkamrume. Tonda, ware nesala do yuma, sundi mali ton men kupmangepa, deiyo men kwapmarepapu, sun deiyo nengdi, aneng tep, tali lupra men popkamrume. Sunda mali men kunung nesala cadi, amutu neitamai di, nimi men ponkamrume.

4Deiyoda ake. Nedi, ‘Angepu kunkamrume,’ pepra, atumi di peipmasen upu gekepra, tek sisi dukdongopra kunkamrume. Ukupmumnyopda, nedi apedina upu deiki di pepsene. Ataru di dipra doryankamre taru peda, Yerusalem mutu neitamaida, nimi deiyo-deiyo neng kepra, Raja kepmengedi, amutu pio talenkamenge. Nimi deiyo Raja nengdi, sun apu bo Raja Dauddi amutu yuma talepra, ila nimi deiyo bungna keca, er si tahkta deiki bungamutopu, sun peda acapu bukmengedi, amutuda pio tep talenkamenge.

Ada Raja Dauddi deiamupa, dadeipdanen yakaramyanen, deipipa kunkameng nesala kankan, Daud er yala nengdi, amutu pio talenkamenge. Sundi Raja Daud kuramutopu kunkamenge. Tonda, nimi deiyo-deiyo neng kepra kunkameng neng cap, sun amutara pel dona neng cap, sun adeiyo-deiyo nengdi talepmengepa, kunkameng nesala yuma capda, istana Raja wengna tep, buplan potokeipyai di, wekra yakankamenge. Ukupkameng taruda, kuda bisam di gipra tu deiki embaramre keca, er si kereta perang deiki cap, tonda kuda bisam bali deiki bukra yakana cap, bukmengedi, Yerusalem mutu wengyakankamenga cadi, anengda pio teleppu kunkamnunge.

5Dinino, moupra gekepneso! Ne Allahdi, atumi deiki sun tep, ‘Ange-angepu talepra kunkamrume,’ pepra, deipmasen upu gekepra, aupu utopu men kuramumnyopda, tek sisi pepsene. Nedi go karepnepa, yuk mutu yu nengdi, amutu nimi deiyo ngebo Raja kure ati, er si istana Raja yumada, uruptapra sikke buktapmengepa, gum kupkamre. Aupuda ne Allah Yahwehdi konum peipmasena cadi, nong tek sisi kupkamre ja, pepsene.

6Ne Allah Yahwehdi pepsene. Amutu talerur deiyo ngebo, Raja Yehuda, er kunai tep nengeda, pio urasin telep ati, istana kurenge tep, ne pio telep kange derinune. Ada, urasin pio telep mutu, Gilead mutu cap, Libanon mutu dupai cap, ‘Urasin pio telep kurure,’ tenenetopu, amutu istana Raja tep angepu tenenune. Dinino, sundi ne peipmasen upu moupra men taleprumudi, mali-malipu kuprumnyopda, ne pedina upu deiki di pepsene. Tek sisi amutuda tamupra mali kupra deipkamne. Ukupmantoda, mutu katawai utopu kupra deipnepa, nimi ton men kuramengaitopu kupkamre. Amutu yumada, walangyopu kupra deipkamne.

7Ne peipmasen upu yaniptapmumnyopda, ne Allahdi sun pona tep neng ketenepra doproipnepa, sundi amutu yana sikke buktapkamenge. Akeca-keca yuma damai pio telepaida, yana dakra tapkamenge. Ada, kapak ya duyangedi, Libanon mutu neitamai di, pio urasin telep gat wapum co kweptapmengedi, uku dongonkamenge. Men di sunda, ‘Gume apio telep co doupra yapedi, ‘Urasin pio telep ati dopra deipkamepe,’ tenerumnge yumada, kwepmengedi, ukai donokamenge.

8Ange konum kupmenge taruda, nimi yuk-yuk mutu neng weikanun abisi yakangedi, akupmange keca epra, kael kepmenge dingeda, “Uo, angeda ware keca deiyo tep Allahdi amutu mali kupra deipu do? Menop taruda ila ati arum, pio telep kota kwamu dinin, Allah Yahwehdi amutu yuma konum sikke buktapupa, malipu kurure. Deiyoda warya tep do?” pepra, sun pe tepapu asipdankamenge. 9Upepmenge pangeda, yuk nengdi tamupra upenkamenge. “Gume, deiyoda ake. Allahdi sun amutu kurami nesala tep, “Sunda ukunkamrume, angeda pio men kunkamrume,” pepra, deiamu upu yumada, men gekeramidi, aupu yaniptamamya tepa. Sun si eremami Allah, er si Yahwehdi, sun makuna tep, ‘Ukupkamrume, angeda pio men kunkamrume,’ pepra pedina upu deiki di peprapudi, deipu, dinin, sundi aupu yuma yaniptamami. Tonda, tali keca tep, ‘Nun deiyo ngebo ake. Nun nai ake,’ pepra, isok si eremamidi, aisok-isok tep pel dorami. Ukuramya deiki di, sun nai bo Allah Yahweh konum tamya tep, kupke,” penkamenge.

10Atep, ne Allahdi pepsene. Sun Yehuda yala nesalao, nimi konum depmenge neng tep, tenepmumdi pio engena gume. Tonda, sun kabo Raja Yosia, ‘Pio depka’ tenen, engena gume. Telep ngeda, Raja Yosia punupu ngebo, er mi Raja Yoahas tep, ‘Uo,’ tenepmumdi engenkamrume. Deiyoda, yu nengdi, er konum tomopra, karen mutu dubenamya tep, amenda taru peda, erda amutu men tamupra yankamre. Er apu yapudi deipmemei mutuda, ton cap pio men tamupra dinkamre. Yuk karen mutu dabena depkamre ja. Atep, er tep tenepmumdi, ‘Uo, er pe mutu men tamupra diryankamre’ tenen, er tep engepkurume.

Allah malaikatdi Yeremia tep melipupa, Raja Salum tep, bena bisbisa kapu upu

11Ne Allahdi, ‘Sunda Raja Yoahas tep, tenepmumdi engenkamrume,’ pepmasenada, tali tep gume. Deiyoda, Raja Yosia depupa, er punupu ngebo, er mi Yoahas tep nengeda, ne Allah Yahwehdi aupu pepra deipsene. Er nai bo depupa, yo punupra, Yehuda mutu Raja kepmanto kupu ngeboda, sun podan nengdi angebo doupra, yuk mutu dadubena tapipa, kurur dinin, acapu dadepkamra cadi, amutu Yudea tara mutu tamupra men yatue. 12Ange gum dinin, Yoahas erda, ne Allahdi angebo tapsidi, go karepsipa, er podan nengdi, amutu di konum dopra dubenamya cadi, amutupu dabena kuramreyanen, dadepkamre. Ange tep nengeda, erda tamupra amutu men yana epkamre. Angeda konum pepmasene. Allahdi pepu.

Nabi Yeremiadi Yoyakim wenemna tep, pepu upu

13Raja Yoahas er weit bo Raja Yoyakhim, er peda mali weik kupu. Atep, angeboda bicaue. Ikin keca er damai yankamre ja! Yoyakhim er atida, go ton cap tapakra, ati dopu taruda, ila ati pio urasin telep kupra dopu dinin, er dana-dana tara kurami nesala tep, sun pel dona tep karena gum dipapu, aneng tep pio puto di, ikin pel dimamupa, pel dorami. Yoyakhim er alup ati tapakra domunge peda, erdi apel dorami neng sun kunumnada, men karepu. Erdi sun tep, ‘Pel tali dopneso!’ pepra, ikin keca sun deiki deiamupa, er pelda talipu pel doramya tep, Yoyakhimdi ukuramnga deiki di, pio mali kupu. 14Raja Yoyakhim erdi upepu. “Nedi istana Raja, urasin pio telep cap, ati bo pio weiknge cap, alup ati tara ati cap, pio telep kupra dopnedi, ati go weik ketenepra deipkamne,” pepu. Upepudi, akati dopu taruda, Libanon mutu urasin pio telep wapum co di ati dela tara dopra deipu. Ukupudi, bura tara ton dina tep, ati dela doprapudi, jendela bon bisi ton betapra potokra keteneipu. Ajendela ketenepra deipu co deikida, ‘Urasin pio telep kupkamre’ tenen, cat merah di palepra deipu.

15Uo, Raja Yoyakhimo gekepo! Raja kan kunai telep kupra dona tep Libanon mutu pamu wapum co weik douyamumdi, ila telep ati dopmum dinin, adeiki kandi, ‘E, neda Raja telep ngebo kununa,’ tenepmum do? Gume kan ati wapum telep co akaptua peda, adeiki di telep men kweipdatume. Gume, kanda moupra tenipetepkurume! Kan nai bo Yosia peda, telep jen keca cap, me cap, jeramu dinin, er dingeda, yuk nesala tep, telep kuramudi, dumsisipu kuramu. Tonda, Allahdi, ‘Angeda, kunkamrume, angeda pio men kunkamrume,’ pepra deiputopu, angepu talepra kuramu. Ukuramnga cadi, erda teleppu kuramu. Dinin kanda mali Raja kurume. 16Yosiadi, yuk neng tep nengeda, telep kupra deriramudi, er di kange mun kuramu neng cap, kankan neng cap tep, akeca-keca men talerami neng cap tep, telep kupra melimamudi, upu bongdin taruda, sun kankan nesala tep, erdi teleppu kuramu.

Atep nengeda, er kuramu keca yumada nong teleppu kupbaramu. Atep, kan peda moupra tenipetepkurume. Ne Allah tep, teka tenepra, ne tep tek sisi kael kemnenung nesalada, dumsisipu kungedi, yuk ikin kunge neng cap, dakunge nesala yuma cap tep, teleppu kununge. Yuk ton gume.

17Dinino, kanda Raja Yoyakhimo! Kan kumem ngeda pio kamo yuk kurure. Kandi tenememyada, ‘Gume, mok upu peptenya deiki di, akeca-keca yumada, ne pe dipapu bung keca weik doroptenedi, isomka kutene,’ tenerume. Tonda, nimi mali men kupmangepapu, tali potamrume. Ukupra kandi talerum mutu nesala yuma tep, sun deiki ikin keca cap, yu weik keca cap, mali kupra derirume. Yuk dakunge nesala tep, yaninapu kurume!

18Ange tep nengeda, Raja Yosia, er mi Raja Yoyakhim, Yehuda yala nesala yuma tep, Raja kepra talepmum ngebo, kan tep, ne Allahdi aupu pepra deipmakene. Kan depmemnyopda, kan tara nesaladi, telep upu pepra men engenkamkenge. Ada, sundi, “Uo, nun Raja Yoyakhim depre pangeda, er tep men engepkamrume. Tonda, yuk nesaladi ton, “Uo, ne kabo, Uo, ne kanero, nun mutu talepra Raja kemamseu ngeboda depmara tep, bicaue tenepmumdi, engenkamrume,” men penkamenge. Tonda, sundi, “Uo, ne nimi deiyo ngebo depmasere. Nun Rajada pio telep, eremna weik ngebo kuramu dinin, depmara cadi, engenkamepe,” pio men penkamkenge. 19Ange gum dinin, tali Keledai bisam deamredi, tong penmarepa donongameng utopu kupkamkenge. Ada, Yerusalem mutu beilya wipdongopra, kunung mutu neitamai di, Yoyakhim er nongda, yuk nengdi ati bo di doprapmengedi, adipapu dopra bura tara donokmengedi, ‘Dakwapye’ tenen, tapkamenge.

Yerusalem mutu nesala tep wenemamu dinin, sundi men gekeramya tep, pepu upu

20Allahdi pepu. Uo, sun Yerusalem mutu kurum nesalao. Sun podan neng yangedi, sun kayapu neng yumada konum yana popra gawal dakmang adano. Ukupsenge pangeda, sunda Libanon mutu welepmumdi engenkamrume. Tonda, Basan mutu cap, tonda Moab mutu cap damai bemumdi, ila upu di mali pepra, ngolongmumdi engenkamrume. Deiyoda, Allahdi go karepupa, sun pona tep neng yana, sun kayapu neng yuma konum popmangdi, sikke buktapmange! 21Sun tupa pio telepepu kunmarum taru, akeca-keca yuma talepra kange deipra teleppu kunmarum taruda, ne Allahdi, ‘Sunda kange moupso! Mali kuna ngeda, yapkurume,’ pepra, konum yana pepra, wenemna upu pepra deiamsisi dinin, sundi ne upu men gekepnerume. Sun pumun taru di, kupyakarumtopu, ukutaru peda, angepu tupa kurume. Sundi, ‘Allahda tek sisi peserura,’ men tenerume.

22Ange tep nengeda, nedi sun deiyo-deiyo neng yuma tep, wenepra popkamne. Ada, ne Allahdi kum pung pepra yakaramretopu kupra yanedi, sun deiyo kepra talesenung neng yumada, popra gawal dakamne. Tonda, ‘Anesaladi yana melipkamseng’ tenen, teka teneamrum neng, sun kayapu neng cap, sun tara neng cap, yuk tara di meliamsei neng cap yumada, nedi go karepnepa, sun podan neng yangedi, popmengedi, gam tupa kunkameng nesala doupra, pio karen mutu dubena, wenemna ati dongombenkamsenge. Apepmasen nge yuma kupkamre taruda, sun Yerusalem mutu kurum nesala yumada, ali weik kupkamsere. Tonda, sun pedi mali weik kuramrum nge tep nengeda, tenipeteprumudi, ‘Uo, nunda ware keca deiyo tep pio mali-malipu kuramepu do? Ukutarada, ware kupkamser do?’ tenen, tenimtonapu kupserepa, mali pepra ngolongkamrume. Ada, sundi pio mali kuramrum keca tepapu, mali kange doupra engenkamruma tep pepsene.

23Tonda, Uo, sun Libanon mutu neitamai kurum nesala peda, sun nimi deiyo ngebo Rajada, Libanon mutu tengamu wapum co kwemamudi, doupra yakaramudi, pio telep ati domnga pumbonpu kurur dinin, amenda doryankamre taruda, er damai pio ikin keca yakare pangeda, mundu douamenge nerapu mi deiyo jerepa, kange mun weik kuramrepa, engeramretopu kupkamre ja. Angeboda, ila di engepra ngolongkamre ja!

Allahdi Raja Yoyakhim tep, wenemna keca karepkamrenge tep, pepu upu

24Neda Allah Yahwehdi pio gam kununa cadi, ne si deiki di pio tek sisi pedina upupu pepra deipsene. Ada, Yehuda yala neng talepra kuramu ngebo, Raja Yoyakhim, er mi Raja Yoyakhim tep pepne. Petenkemna tep, ne dumsisi buru du deiki cincin dongomsipa, nesala yuma ange epmengedi, ‘E, angeboda tek sisi ila deiyo ngebo Raja kurure,’ tenenunge. Kanda, acincin utopu kepdatumdi, ne buru du deiki kupnetuma peda, ange dopra donokamtene. Deiyoda, kanda ila ngebo Raja kurum dinin, ukutaruda, angeda kan damai di doropnedi, donokamkene. 25Nedi kan doprapkenedi, ‘Angebo poptepe,’ tenekenge neng, kan popmanto neng, sun deiki deipkamkene. Ada, kandi, ‘Uo, anengda ne popkamneng’ tenen, kwar weik kukere neng, kan dopra sun deikipu deipkamkene. Sun anengda ake. Ada, Babel mutu talepra ila deiyo ngebo, er si Raja Nebukadnezar, er jen talena neng cap, er amutara sun Kasdim mutu kunge nesala cap, sun deiki deiptapkamkene. 26Nedi kan cap, kan deipkeu ner, kan nin sisa cap, sunda dopra donoksenepa, sun deipsei mutu guma, sun yuk nesala mutu dabena kunkamrerume. Ukuramrerumnyanen, amutupu dadepkamrerume.

27Kan cap, kan nin sisa cap, kan tara nesala cap, sun yumadi, ‘Uo, uo, nun pe mutupu tamupra betepe’ tenen, mali pepra, engenkamrume. Ukupra tenepkamrum dinin, aYudea mutu neitamai men tamupra yankamrume. 28Atep nengeda, yuk nesala epsengedi, upenkamsenge. “Uo, Raja Yoyakinda, tu di dopra telepmengedi, betamdinung keca, me gamna mauda, apanci er dona deiyo ngebodi, ‘Angeda mali cadi, ne songe,’ tenepyopda, mawa ati deamu dinin, ataru di adipapu amau dopra bongoptapredi, bura tara donongrure. Ange utopu, Raja Yayakhin dopra donokamenge. Nimidi er tep, ‘Nun mawa,’ men tenenkamenge. Atep Yoyakhin er cap, er nyapu yuma capda, ware keca deiyo tep, yuk yu nengdi sun yuma dopra, yuk karen mutu, sun menop taru men kael keami mutu neitamaipu donokipa, dabena kunkameng do?” penkamsenge.

29Atep nengeda, ne Yeremiadi pepsene. “Uo, uo, sun amutu neitamai kurum nesalao! Allah Yahwehdi pepra deipmaser upuda, pio moupra gekenkurume.” 30Tonda, Allah Yahwehdi upepsere. “Amutu taleramu deiyo ngebo, Raja Yoyakhinda, nimidi sun nyapu tenpunge peda men derinung neng utopu kuramu. Tonda, angebo er gam kuramu taru neitamai yumada, er pel dopteramunge yumada, nong men kepu. Talipu kuramu. Deiyoda ake. Er Raja Yoyakhinda, erdi deiamu nyapu yumada, pio gum kupronen baramyanen, tenpu ngebo peda telep men kurami. Sun kankan di, tenpu ngebo peda, sun apu bo Raja Daud, nimi deiyo kepra, amutu taleamutopu, amutu cap, amutu nesala capda, Yoyakhin erdi deiamu nyapudi men talerami. Sun yumada, Yehuda mutu talena tep, nimi deiyo kepra, Raja keamidi, amutu cap, amutu nesala cap, pio men talerami. Sunda, Raja men kurami. Atep, amutu Raja-Raja neng, sun si sengdina buku deiki sekamrum ngeda ake. Yoyakhinda, er nyapu gum ngebo cadi, er Raja kepra taleamu ngeda, nong men kwamu,” pepra sekamrume. Allahdi ne Yeremia tep, akonum upepra deipneu.