Jer 23 | XteSC | STEP | Allah er si Yahwehdi, Israel nesala sun deiyo kepra Israel nesala talenung neng tep pepu. “Uo, sunda bicaue. Ne mawa Israel nesalada, mali kudirumpa, bura saka yuk-yuk banunge. Ukupmantoda, domba bisam kware kuprepa, bokra sepdaro yuk-yuk baramengtopu kununge.

Jeremiah 23

Doryankamre taruda, Allahdi er mawa nesala lyepkamra tep, pepu upu

1 Allah er si Yahwehdi, Israel nesala sun deiyo kepra Israel nesala talenung neng tep pepu. “Uo, sunda bicaue. Ne mawa Israel nesalada, mali kudirumpa, bura saka yuk-yuk banunge. Ukupmantoda, domba bisam kware kuprepa, bokra sepdaro yuk-yuk baramengtopu kununge.

2 Ange tep nengeda, ne Allah Yahwehdi, Israel tep pio kalekra melimnune. Israel nesala tep, deiyo talepra kurum neng yuma tep upepsene. Sunda, domba peina deiyo nengdi, sun domba bisam telep kupra peiramengtopu, anengdi, ne mawa Israel nesala tep melipmengedi, ‘Ukunkamrume, ukunkamrume, telep bisi ake,’ pepra, ‘Telep kupra melimkamenge,’ teneramsisi dinin, ange men kurume. Sun deiyo nengdi, ‘Anesala talenupe,’ peprum dinin, ange tali peptapra kalengna gum di, Israel nesala taprumpa, bokra yuk-yuk bisipu bena, tali-tali embandanapu kununge.

Tonda, sundi, ‘Nun damai yakana gume, beso,’ pepra, Israel nesala tep tamrume. Adeiki sunda pio mali weik kurume. Tek sisi ngeda, sundi anesala tep moupra kalengamtumpa, teleppu kuramtenge ja. Dinino, sundi angeda men kurume. Ange tep nengeda, ataru nedi sun mali kurumnya tep, wenepra ikin keca sun nong deiki deipkamsene. Ne Allah Yahwehdi pepsena tep, tek sisi nong kupkamre.

3 Nedi sun deiyo-deiyo neng yuma konum wenepsenyopda, ne dipapu ne nyapu, yuk karen mutu-mutu yuma dakunga neitamai di doupra, ne damai tamupra duyankamsene. Ada, sun mali weik kuramipa, sun wenemna tep, go karepsipa, yu mutu nesaladi bisbisa kapra, ateng koupra dubenamipa, dabentapsipa, yuk-yuk mutu dakununge. Sun Israel nesala yuma tamupra, sun men di kurami mutupu bupra duyanepa, amutu kunkamenge. Ukupne pangeda, amutupu yan kungedi, sun nyapu deipmengedi, dadeipdanen deipbangepa, nimi pio weik kupbankamenge. Ne Allah dipapu anesala bupra deipkamne.

4 Sun mali kuramrum deiyo nengda, Israel nesala tupa men kalengkamrume. Nedi, ukupu neng wepra deipnedi, sun deiyo kepya talepkameng neng deipnepa, sundi Israel nesala talepmengedi kalengkamenge. Ada, domba peina deiyo nengdi, sun domba bisam tep telep kupra peiramengtopu, anengdi Israel nesala tep, telep kupra kalekmengedi melimkamenge. Ataruda, ne nyapu kan-kan, tenpu ngebo peda men yawarapkamre. Tonda, ‘Uo, ware kuptepe do?’ tenen, kwar men kunkamenge. Angeda tek sisi kupkamne. Ne Allah Yahwehdi pepsena cadi, angeda nong kupkamre.” Allahdi pepu.

5 Ne Allah Yahwehdi pepne. “Doryankamre taru neitamaida, Dauddi deipupa dadeipdanen, banung neng kan-kan, ton pio dumsisi teleppu kurur ngebo wepra deipnepa, Israel nesala sun ila nimi deiyo ngebo Raja kuredi, Israel nesala pio talenkamre. ^{▼▼Daud yala ngebo – Pumun taru Ibrani upu deiki seki buku neitamaida, domon upu deiki di Dumsisi Co Teru seki. Dinino, ada amenda taru Daud yala ngebo, Yesus yankamra tenen, sekua tep, nundi katuai dipu sekmepu.} Ukupredi, pio moupra telep dumsisi kunangepu tenepredi, ila kael kemna di, anesala talenkamre. Erdi pio telep kupra anesala taleredi, dumsisi kupra upu bokeipkamre. Ukunkamra deiki di, amutu neitamai yuma, tek sisi kwirye kuna cap, mali kuna gum dipapu, pio telep kuna cap, pio akunkamenge.

6 Nedi wepra deipkamne Dumsisi Kuna Deiyo Ngebodi, amutu talenkamre taruda, Yehuda yala nesala yuma lyepropkamre. Tonda, Israel nesala yala-yala yumada, ‘Nun podan nengdi poryankamseng do?’ tenena pio gum dipapu, tali kange doupra, kange deipmengedi, telep kupra kikiman kunkamenge. Kwardana cap, podana cap, men kunkamenge. Animi deiyo kepkamre ngebo tep nengeda, upenkameng ngeda ake. Ada, ‘Allah Yahwehda, nun Dumsisi Kudiserur Deiyo Ngebo kurure,’ penkamenge.” Allahdi pepu.

7 Ne Allah Yahwehdi pepsene.

Tek sisi, doryankamre taru neitamaida, ne teneramsi taru konum kuprepa, nesala yumadi, sun Israel nesala tep perami ngeda, kange di ton cap men penkamenge. Menop taruda, uperami. “Sun Israel nesalada, Mesir mutu neitamai, ikin pel dimamipa, kange mun deiki doramipane, Allahdi anesala lyeprapudi, duyanamseue. Er pio gam kuna deiyo ngebo kurure,” peramnei.

8 Pumun taruda, aupu perami dinin, amenda taruda, ange tapra ukupu upu penkamnenge. Ada, “Sun Israel nesaladi nyapu deiamipa, dadeipdanen yakarami Israel nesala yumada, yuk karen mutu dakurami dinin, Allah er si Yahwehdi, anesala lyepudi, sun pe mutu tamupra duyaue. Ada, pumun taru mali kuramipa, sun wenemna tep dokotepupa, dana-dana tara karen mutu neitamai cap, utara karen mutu neitamai cap, dakuramipane, Allah lyepudi duyaupa, sun pe mutu neitamaipu telep kupra pio akunkamenge. Allahda, pio gam kuna deiyo ngebo kurure.” Angepu penkamnenge. Kange di ton cap, ‘Allahdi Israel nesala lyepra, Mesir mutu neitamai di duyanamseua,’ tenepra men penkamenge.

Yeremiadi nabi-nabi mok upu peramipa, ikin kange doupra pepu upu

9 Yeremiadi aupu pepu. “Nabi-nabi mok upu pena neng tep, ne Yeremiadi pepsene. Allah Yahwehdi, ‘Amenda taru sun Israel nesala wenemna tep ukupra kupkamna tep, lap perberume,’ penerur upu gekepnedi, kware weik kunerepa, dipru pu jenerure. Tonda, ‘Uo,’ tenen, ne dipru bulungsangnerepa, kwar tep ne nong yuma moropsemnune. Ukupmantoda, anggur me weika di jepmange neng kange yawaramrepa, men benmanto kungetopu, giso biri-biri penerepa, moropsemnune. Ada mesum tep gume. Deiyoda, nun nai Allah er si Yahwehdi, ‘Ukupkamne,’ penerur upu, pio lek upu, mambul weik upu cadi, aupu gekepnyopda, kware weik kunerure.”

10 “Allahdi amutu nesala wenepkamser ngeda, mesum tep gume. Nun kunup mutu neitamaida, Allah tep kwar men kurur nesala weik kununga cadi, Allahdi, ‘Ukunkamrume,’ peipu upu tapra, sun pedi tenepmenge ngepu kununge. Tonda, tali nyangdarameng nesala weik kununge. Tonda, Allah tamengedi, yuk tali keca tepapu si eremnunge.

Ukupmengya deiki, Allahdi sun tep yu tenepredi wipdongoserepa, nun mutu neitamai kure keca yumada, malipu kuserure. Atep nengeda, mo men kareserepa, men cemrepa, nun mutuda mutmuta cap, tali paramre keca cap yumada, gelal sepredi koulorure. Sun mok upu penge nabi nengdi kunge keca yumada, pio malipu kununge. Sunda nun deiyo neng kunung dinin, dumsisipu men kungedi, ‘Malingepu kunkamepe,’ tenengedi, ikin keca weik nun nong deiki derisenunga cadi, nun mutu kunup nesala yumada, kange mun deikipu kunupe.” Yeremiadi pepu.

11 Yeremiadi upepu. Allah Yahwehdi peipseuada ake. “Ne upu lap pena deiyo neng, sun nabi-nabi neng cap, ne si eremna ati pumbon pel dona deiyo neng, sun imam-iman neng cap, sun yumadi ne upu moupra men talengedi, mali-malipu kununge. Tonda, ne si eremna ati pum peda, pio malipu kudingepa dinune. 12 Ukununga tep nengeda, sun banung bisida, kunungnai utopu cap, olapne bisi utopu cap, popmanto bisipu embankamenge. Ada, sun tupa mali kunga deiki, nedi sun tep malyai dokotepnepa, saka popkamenge.

Ukupmantoda, nimidi mali bisi bangepa, sun yan giso dukrepa sangamengtopu, anesala peda wenepnedi popkamne. Ada mesum tep men pepne. Ukupra malipu kungeya tep nengeda, ne teneramsi taru konum kupre pangeda, sun deiki ikin keca weik deipkamne. Ada, ne teneramsi keteng tamun konum yaryopda, sun tep ila wenemna keca karepkamne. Anengda popkamna tepa. Ne Allah Yahwehdi pepsena tep, angeda tek sisi kupkamre.” Allahdi pepu.

13 Upepudi aupu ton pepu. “Samaria mutu kunung nabi-nabi, sun mali kunung kecada konum dinune. Sun mok nabi nengdi, isok er si Bahal, aisok si eremengedi, er puto deiki di, ‘Amenda kupkamre keca ake, ake,’ pepra, mok upu penunge. Ukununga deiki ne nyapu Israel nesaladi, sun mok upu gekepra teka tenepmengedi, mali bisipu dumbanunge. Angeda ne pio songe. 14 Sun Samaria mutu kunge nabi mali kunung dinino, Yerusalem mutu kunung nabi-nabida, pio ila mali kungepa dinune. Ada sundi mok upu deiki penunge. Tonda dopdanamenge nerapu tapmengedi, yuk nerapu tali-tali nyadanunge.

Autopu ton, mali keca kuramenge neng tep, wenemna gum dipapu, aneng tep melipmengepa, amali kunge nesalada, weika di ton cap tapakra malipu kununge. Nabi nengdi, sun pel telep kupra men donunga tep nengeda, amutu mali kunge nesala yumada, sun malinge men tamnunge. Tupa malipu kununge. Ukunga deiki tenpu ngebo peda dumsisi ton men kununge. Ukununga cadi, ne Allahdi tenenunyada, pio mali kununge. Sunda Sodom mutu kurami nesala cap, Gomora mutu kurami nesala cap, pio malipu kurami utopu kununge. Angeda ne pio songe.” Allahdi pepu.

15 Upepudi aupu ton pepu. “Neda Allah Yahweh, akeca-keca yuma talenedi, im deiki jen talen malaikat yuma, sun ila deiyo ngebo kunune. Neda ila puto ngebodi pepsene. Sun mali-mali kupra, mok upu perum nabi-nabi tep nengeda, ila di wenepra poptapkamsene. Ukupmantoda, su peramre keca karepnepa jenkamrume. Tonda, nimi dena deiyo keca cap, me cap tapakmengedi, karepnepa jepmengeap deramengtopu, nimi dena keca karepsenyopda, sun depkamrume. Ukunkamnada, tali tep gume. Ada, sun Yerusalem mutu kunge mok upu penge nabi nengdi, mali weik kununga deiki di, ne nyapu amutu kunung Israel nesala yuma, ange epra gekepmengedi, ne tapra ne si men eremnengedi, pio mali kecapu kununga tep pepsene.” Allahdi pepu. Upepudi aupu ton pepu.

16 “Neda Allah Yahweh, akeca-keca cap, im deiki jen talen malaikat yuma cap, sun ila deiyo ngebo kunune. Neda ila eremna cap, puto weik cap kune ngebodi pepsene. Amutu neitamai kurum Israel nesala yala-yala yuma tep upepsene. Mok upu penge nabi-nabidi, sun deiki nong men kupkamre upu pedisenung ngeda, men gekenkamrume. Sundi, ‘Amenda taruda, ukupkamsere,’ penung dinin, amok upuda gekena pio gume. Sundi pedisenung ngeda, sun pedipapu, ‘Ange pepkamepe’ tenen, ketenepmange ngepu, tali upu petamsenunge. Ada ne Allah Yahwehdi, ‘Upepkamrume,’ peipsi ngeda, men yana pedisenunge. Sun pe kange dipu penunge.”

17 “Ne Allahdi peipsi upu tep nengeda, amok nabi nengdi, ‘Aupuda nun song cadi, aupu pio men gekenkamepe,’ tenenung nengda, sundi upenunge. ‘Gume, sun mali kunmarumupapu, Allahdi tali lyeprapkamsere. Tek sisi ngeda, Israel nesala mali kunung dinin, anabi nengdi, ‘Gume, amutu kupkamser ngeda, teleppu kunkamsere,’ penunge. Tonda, ne upu peipsinge men gekengedi, sun pe dipru neitamai tenenge keca talepra, balila weik kurur nesala tep, upenunge. ‘Gume, mali kuruma peda, Allah men wenepkamsera cadi, sun damaida ikin keca men yankamsere. Teleppu kunkamrume,’ penunge. Aupu penungada, ne Allahdi men peipsisi, mok upupu penunge.” Allahdi pepu.

18 Yeremiadi pepu. “Sun mok upu perum nabi-nabi cap, yuk nesala cap gekepso. Allah er si Yahwehdi, er dipru neitamai cap, er kange neitamai cap tenerur kecada, ware ngebodi kael keptu do? Allahdi perur upuda, ware ngebodi tali lupra gekeptu do? Tonda, Allahdi kure kecada, ware ngebodi tali eptu do? Tonda Allahdi, ‘Angeda kupkamne, angeda men kupkamne,’ teneredi keteneipu ngeda, tali nimidi men gekepra kael keptenge. Tonda, Allahdi tenere ngeda, tali lupra men lap peptenge. 19 Sun yuma moupra diso. Allah Yahwehdi sun mali kunung nesala tep yu tenerur ngeda, mungna embaramre utopu kupra, sun anesala deiki ikin keca yakarure. Sun mali-malipu kurum nesalada, Allah er yu tenen, wenepkamser ngeda, sun nong deiki dato-dato di yana popkamsere.

20 Allah Yahwehda, er yu kupupa, ‘Amalipu kunge nesalada wenepra popkamne’ tenen, keteneipu ngeda, pio men tapkamre. Gume, Allahdi, ‘Ukunkamne,’ teneramutopu, ange yumada, konum kupredi gawal dakre dingeda, tapkamre dinin, ange yuma kapul men kupre taruda, tek sisi men tapkamre. Ukutaruda, betapra men kael kepkamrum dinin, doryankamre taru, sirya taruda, Allah er nyapu yumada, ‘E, deiyo ake’ tenen, pio moupra kael kepkamenge.” Yeremiadi pepu.

21 Allahdi pepu. “Sun mok upu penung nabi-nabi tep, ‘Sunda apel, apel donkamnerume,’ pepra men doproipsi dinin, sun pe kange dipapu amutu-amutu sepdara barami. Tonda, nedi sun mok nabi neng tep, ‘Aupu penkamrume,’ men peiamsi dinin, sun pe kange dipapu, ‘Amenda taruda, ukupkamre, ukupkamre,’ pepra lap perbarami. Nedi, ‘Apel ton dorbenkamrume,’ men peipsi. Sunda, sun pedi tenepra petamsenunge dinin, nedi ton sun aneng deiki men pedinune. 22 Dinino, sun anengdi ne tenenun keca lap peamtenepa, kael keamtenge teptoda, teka sundi ne nyapu Israel nesala damai, ne peipmatene upu yumada lape peramtenge. Tek sisi angepu lap peiamtenge pangeda, Israel nesala aupu gekeramtengedi, sun mali kunung keca yuma tapra, ne damaipu tamupra yakaramtenge dinino, sun amok upu penge nabidi, tali mok upupu lap perbarami.” Allahdi pepu.

Allah Yahwehdi er pe tep, lap pepu upu

23 Allah er si Yahwehdi pepu.

Sun yuma tenipetepso. Ne Allahda, meneng damaipu kunun do? Teka, sun damai kunun dinin, pio karen mutu neitamai peda men kunun do? Meneng damainge cap, karen mutu kurenge cap yumada, moupra men dinun do? Gume, dan mutu do yuma, akure keca yuma moupra dinune. 24 Atep nengeda, ware ngebodi, ‘Gume, ne inipnyopda, Allahdi ne kune keca men dinkamnere,’ tenerur do? Gume, ne Allah Yahwehda, im deiki pe, tuai mutu yuma peda, akununa cadi, akeca-keca yuma dinune. Atep nengeda, tenpu ngebo peda ton, men inipra kuptue. Ayuma dinapu kununa cadi, inipeteptuma peda, moupra disenune. 25 Tonda, mok upu pena nabi-nabi nengdi penung upu yumada, konum gekenune. Ada, sundi upenunge, “Nun ken mapmepua deiki di, Allahdi yana peipmaseupa, sun damai yan pepsepe,” pepra pertamnunge. Tali peptapra mok upu pedinungada, ne ton gekenune. Aneng sun penge upuda, nedi men peipsi dinin, sun mok nabi nengdi tali pertamnunge.

26 Uo, amok upu peteremna nabi-nabi nengda, pio apepbaramenganen, dan taru di tapkameng do? Pio mok upu penapu kunkameng do? Ada, nedi men peipsi dinin, sun pedipapu tenepra, mok upupu lap penung nabi neng tep pepsene. Dan taru di, sun mali kunge keca tapmengedi, sun dipru ne damai tamupra yankameng do? Ware kuprap taru ton, pio mok upupu penkameng do? 27 Sun anengdi tenenung kecada ake. ‘Nun ken mapmapenge doupra, Israel nesala sun damai nukmepepa gekepmengedi, Israel nesalada, Allahdi peipunge lupronkameng’ tenen, pesenunge. Ada, sun co puna neng kurami utopu, ne si luproamneidi, isok si Bahal, aisok er si eremamitopu, ukutaru kunge nesala peda, ‘Ne tapnengedi, yuk tali keca si erepra, pio akunkameng do?’ tenen, pepne.

28 Atep upepsene. Sun mok nabi nengdi, ‘Ken mapsa deiki, Allahdi yana peipmanu upuda ake,’ tenepmengedi, penkameng nengda, dapenkameng ja. Dinino, ton nabida, tek sisi nedi upu pepra deipnepa, lap penkameng nabi-nabi nengda, nedi, “Upenkamrume,” pepra deipmasi topu, men tapkamenga tep, sundi dumsisi upupu peramtenge ja. Ukupmantoda, nimidi jepmanto keca, er si gandumda, tali paramre keca mutmuta utopu men kurure. Akeca butene utopu men kurure. Ange utopu, nedi pesene upu cap, mok nabi nengdi tali pertamnung upu cap, utopu men kurure. Atep, ‘Sundi pesenge upuda, tek sisinge do, moknge do?’ tenen, pio moupra tenenkamrume. Ne Allah Yahwehdi pepsene. Allahdi pepu.

29 Sun kaele, ne Allah Yahwehdi pedisenun upu tep, ukupmanto upu pepsene. Ada, nedi pesene upuda, uku jeramra utopu kurure. Tonda, nedi pesene upuda, gat besi keca, er si palu batu dopra, ila gel kwepmengepa, bokra pouramretopu kurure. Ne penun upuda, tek sisi puto weik kurura tep, pepsene. 30 Atep nengeda, ne Allah Yahwehdi pepsene. Ton mok nabi nengdi sun pe kange dipu, ‘Amenda ukupkamsere,’ pepra pengepa, sun kayapu neng gekepmengedi, aupupu upula dopropmengedi, sun pedi, yuk nesala tep, aupupu sun damai lap perbanunge. Sundi, ‘Allahdi peipseu upuda ake,’ pepra, tali pertamnung dinin, sun kayapu neng dipu pepmaipa, gekepi ngeda, aupupu penunge. Ne Allahda, amok upu tali pertamnung nabi-nabi yumada, ne song cadi, anengda nedi wenepra popbisipkamne.

31 Atep nengeda, sun mok upu penge nabi nengdi, sun pe kayapu neng tep, ‘E, ukuda nundi aupu lap penkamepe, aupu ton lap penkamepe,’ pepra, upu sisikmengedi, sun pe kange dipapu tenenge upupu pedangedi, lap perbanunge. Sundi, ‘Allahdi yana peipmaseupa yan pepsepe,’ pepra penung dinin, tek sisi mok upupu penunge. Ne Allahda, amok upu tali pertamnung nabi-nabi yumada, ne song cadi, wenepra popbisipkamne.

32 Neda Allah Yahwehdi pesenune. Mok upu lap pena nabi-nabidi, “Ken mapmepu taruda, Allahdi yana peipmaseu upuda, ake,” pepra, yuk nesala damai yana pertamnung neng yumada, ne songe. Amok upu penge nengdi, ne nyapu tep, aupu pepmengepa, gekepmengedi, teka tenepmengopda, amali bisipu dombanunge. Sundi mok upu penung dinin, ‘Amenda taruda, ware kupkamser do?’ pio men tenenunge. Tali lupra mok upupu pertamnunge. Nedi ton, sun anabi-nabi neng, sun damai bena men pedinune. Sun pe kange dipapu penunge.

Tonda, “Ne upu dopra lap perbenkamrume,” pepra, nedi aneng tep wepra men deipsi. Sunda tek sisi tali upupu, ne nyapu Israel nesala damai lap penunge. Ukungeya deiki di, ne nyapu tep, telep kupra pio men melimnunge. Malipu kudinunge. Atep, neda Allah Yahwehdi anengda wenepra popkamne, pepne. “Ne Allah Yahwehdi pepsena tep, tek sisi nong kupkamre,” pepu.

Allahdi mok upu penge nabi cap, sundi mok upu penung nge cap tep, pepu upu

33 Allahdi Yeremia tep pepu.

Yeremiao, ne mutu kunung neng tenpu-tenpu neng ton, kan damai yangedi, asipkamkenge. Ada, tenpu-tenpu nengdi do, tonda dortaru kepkamrenge tep, nedi peipnepa lap pena deiyo neng kan-kan, nabi ngebodi do, agum dingeda, ne si eremna ati pumbon pel dona deiyo neng kan-kan, imam ngebodi do, kan damai yangedi asipkamkenge. Ada upepkamkenge, “Kan damai ton, Allah Yahwehdi dortaru ikin keca yana kunkamserenge tep, kan damai yan pedinmaker upuda, wareto upu peiamkeu do?” pepra, sun anengdi yana asipkengopda, kandi tamupra sun aneng tep upepkurume. “Allahdi dortaru ikin keca nun damai yankamrenge tep, ne damai peipneu upuda, yuk upu gume. Ikin keca kupkamsere ngeda, sun mali kurum neng tepapu peipmanere. Atep nengeda, Allah Yahwehdi sun tep weneprapseredi, yukai donokamsere,” pepkamrume.

34 Tonda, Yeremiao, ware ngebodi do yuma, tenpu-tenpu neng ton, amutu kunung nengdi do, dortaru kepkamrenge tep, nedi peipnepa lap pena deiyo neng kan-kan, nabi nengdi do? Agum dingeda, ne si eremna ati pumbon pel dona deiyo neng kan-kan, imam ngebodi do? Kan damai yakengedi, “Allah Yahwehdi, amenda taru kupkamrenge tep, ne damai yana mambul upu pepra deipmanere,” pepkengopda, ne tek sisi pepne. Kandi sun aneng pepkamkenge upu gekena gume. Aupu penge neng cap, sun bung yuma capda, ne Allah Yahwehdi wenepra poptapkamne.

35 Ukutaru di dipra dorkunkamre taruda, sun Israel nesala yumadi, tupa-tupa angepu pedankamrume. Sun yumadi, sun pe nyapsilip yuma cap, sun kayapu neng yuma cap tep, asimdankamrume. “Allah Yahwehdi ware upu penmaser do? Tonda, nundi Allah tep, asipetepmepu ngeda, Allah Yahwehdi upu ton tamupra peipmaser do, gum do?” pepra asimdankamrume.

36 Sun yumadi apepmasen utopu upu penada telepe pua. Dinino, sun Israel nesala yumadi apepkuken upuda, ton cap men penkamrume. Ada, ‘Allah Yahwehdi dortaru kupkamrenge tep, inimna upu deiki di, er upu yan peipmanerpa, pepkusene,’ men penkamrume. Aupu tupa men penkamruma deiyoda ake. Ada, sun Israel nesaladi, sundi penge upu yumada, tek sisi sun pe kange dipru neitamai dipapu tenenmange ngepu, yuk nesala gekenai lap perbanunge. Apenung upuda, ne Allah Yahwehdi tenepra, sun tep men pedinun dinin, sun pedipapu tali pertamnunge.

Ada, yuk neng damai bena, “Allahdi peipmaner upu ake,” pepmepepa, anengdi teka tenepsengedi, ‘Uo, anengda ila mambul neng, tenepkamseng’ tenen, tali-tali upu perbanung dinin, nedi sun tep upu men penune.

Sun pedi tenepmange ngepu penunga deiki di, ne Allahdi penun upuda, tamurtongedi, yanitamnapu kununge. Atep nengeda, tali tep men pepsene, aupu penung neng, sun nong deikida, ila ikin keca deipkamne. Ne Allahdi, pio Gam Kuna Deiyo Ngebodi pepsene. Tonda, neda sun im deiki jen talen malaikat yuma, sun ila deiyo ngebodi pepkene. Ne Allah Yahwehdi, sun Israel nesala yuma talepra deiki tara ila puto cap, ila eremna cap kunun ngebodi, kan Yeremia tep pepkene.

37 Ange tep nengeda, kandi, ne upu peipnepa, lap pena deiyo neng nabi-nabi tep, upenkamrume. “Nundi, Allah tep asipetepmepu ngeda, nun nai bo Allah Yahwehdi nun tep, wareto upu tamupra peiamkeu do?” pepra asimkamrume. Tonda, “Nun nai bo Allahdi sun damaida, wareto upu peiamseu do?” pepra asipetenkamrume. 38 Kandi sun aneng tep apepmakentopu pepra asipetepmempa, sundi tamupra, “Gume, Allah Yahwehdi amenda kupkamrenge tep, aupu konum peipmaser upu ton akapmarpa pepkukepe,” pepra pepkenge pangeda, kandi utenenkamrume. ‘Sun aupu utopu penge nengda, Allahdi peipu upu moupra men talepra kunung nengdi pesenunge,’ tenenkamrume.

Atep, anesala tep tamupra upenkamrume. “Tek sisi nun nai bo Allah Yahwehdi upepkere. Sundi, ‘Allah Yahwehdi doryankamre taru kupkamrenge tep upu peipmasere,’ pepra peptapmanerumada, sun pedi tenepmarum upupu penmaruma cadi, pio mali pepmarume. Allahdi sun tep, ‘Aupu penada meme,’ konum peipseu dinin, ange tenena gum dipapu, sundi aupu tali lupra pepmaruma cadi, Allahdi wenepkamsere.”

39 Allah er si Yahwehdi sun tep upeserure. “Neda Allah Yahweh kunune. Sun tupa malipu peruma cadi, nedi sun tep ton men tenenkamsene. Nedi sun tep ne damai di enepra karen mutu dokotepkamsene. Ne damai ton men yakankamnerume. Tonda, Yerusalem mutu neitamai di dopra, pio karen mutu donokamsene. Ukutaru akunmarum mutuda, menop taru nedi sun co puna neng tep kareramsi dinin, ukutaruda sun mali kurum nesalada, ne damai cap, Yerusalem mutu damai cap men yakankamnerume. Sun tep konum tapsene.

40 Ne Allahdi Yerusalem mutu kunung nesala yuma tep, ila ikin keca karepnepa, yuk-yuk mutu neng yumadi, sun tep nalepra pio autunkamsenge. Ataruda, yuk karen mutu kunge nesala yumadi, sun Israel nesala tep, ‘Uo, anesalada pio mali kecapu talepra kuramipa, sun nai bo Allahdi sun wenemna tep, ila ikin keca karepka cadi, anengda nun songe,’ tenenkamsenge. Ange men lupronkamseng dinin, keteng tamun, keteng tamun yuma, doryankamre taru neitamai yuma, ange pio tenepra penkamsenge.”

Allah Yahwehdi Israel nesala tep, Yeremia damai yana peipupa, aupu sekra deipu.