Jer 24 | XteSC | STEP | Allahdi ne Yeremia tep, ken mapsi deiki di epsi ngeda, ake. Ada, kwarang co du kin keca butene di kipra, Allah si eremna ati urasin tara damai deipmaunge, ‘Epkur’ tenen, peterepneupa epsi. Aepsi ngeda, Babel mutu taleamu ngebo Raja Nebukadnezardi, Yehuda tara taleamu deiyo ngebo, Yoyakhim, er punupu ngebo, er mi Raja Yekonyadi Yerusalem mutu yuma taleamu taru, Babel mutu nengdi, popidi, Yerusalem mutu kurami neng tomopra, sun pe mutu tamupra derirbenami taru, akeca kupupa epsi. Babel mutu nengdi, Yehuda mutu pemerintah talepra kurami neng cap, pel deiyo yuk-yuk talepra kurami neng cap, tonda besi keca dona kael neng cap, yuk-yuk urasin telep keca yuma dona kael neng cap, yumada konum tomopra, Babel mutu dubenaminge, ken deiki di akeca epsi.

Jeremiah 24

Ken deiki di dinmaupa, kwarang co du kin keca butene di kipra deipmai upu

1 Allahdi ne Yeremia tep, ken mapsi deiki di epsi ngeda, ake. Ada, kwarang co du kin keca butene di kipra, Allah si eremna ati urasin tara damai deipmaunge, ‘Epkur’ tenen, peterepneupa epsi. Aepsi ngeda, Babel mutu taleamu ngebo Raja Nebukadnezardi, Yehuda tara taleamu deiyo ngebo, Yoyakhim, er punupu ngebo, er mi Raja Yekonyadi Yerusalem mutu yuma taleamu taru, Babel mutu nengdi, popidi, Yerusalem mutu kurami neng tomopra, sun pe mutu tamupra derirbenami taru, akeca kupupa epsi. Babel mutu nengdi, Yehuda mutu pemerintah talepra kurami neng cap, pel deiyo yuk-yuk talepra kurami neng cap, tonda besi keca dona kael neng cap, yuk-yuk urasin telep keca yuma dona kael neng cap, yumada konum tomopra, Babel mutu dubenaminge, ken deiki di akeca epsi.

2 Kwarang co du kin keca tenpu ngeda, weninge du, pio telep ngepu wepra kipmau. Ton tenpu ngeda, kwarang co du malinge, men jepmanto ngepu wepra kipmaua deipkaida epsi. 3 Epmasinge tep nengeda, Allah Yahwehdi ne damai yana asipetepneu. “Yeremia, kanda ware keca epmarem do?” pepra asipetepneu. Asipneupa, nedi tamupra pepsi. “Naio, nedi kwarang co du pio telepnge cap, tonda pio malinge, nimi men jepmantonge ton, akwapmarpa epmane,” pepsi. 4 Atep nengeda, Allahdi aupu ton pepneu.

5 “Yeremiao, neda Allah Yahweh kunune. Sun Israel yala nesala yumadi, ne tepapu, ne si eremnenung Allah kunune. Kandi epmarem kecada, lap pepkukene. Ada, kan epmarem kwarang co du, pio telepnge ton kipra deipmangupa, epmaremada, ada ukupmantonge kurure. Deiyoda, ake. Kandi, akwarang co du kipra deipmainge, telep ngeda epmareme. Ange utopu, nedi go karepsipa, sun Babel mutu nengdi yana, Yehuda tara nesala weika di tomopra, sun pe mutu konum tamupra dubenami. Nedi kaukeptapsipa, adubenami nesala tep, kange deipnedi, ‘Sunda tupa telepe pua,’ tenenune.

6 Dinino, nedi sun adubenami nesala tep, amenda taru kange di ton cap, telep kupra derinkamne. Nedi sun tep kalekra dinkamne. Ukuramnyanen, nedi anesala dopra tamupra amutupu duyana deipkamne. Nedi sun tep, pio telep kupra derinkamne. Nedi sun popra tamna tepa guma. Tonda, ukupmantoda, nimidi wa pepra koun keca kouramengedi, telep kupra kalengamengedi, men kwenepra tamamengtopu, nedi sun dubenami Yahuda yala nesala tep, kange di ton cap, telep kweipkamne.

7 Nedi sun tep dipru kange ukupunge karepnepa, sundi ne Allah tep, ‘E, nun nai Allah, erda tek sisi Yahweh, er pua’ tenen, betapra kael kepkamnenge. Ukupnengopda, sunda ne nyapu sisa kunkamenge. Tonda, neda sun nai bo Allah kunkamne. Ukupnepa, sun mali kunung keca yuma tapmengedi, sun kange dipru yumada dopra, ne deikipu deipmengedi, ne sipu eremkamnenge.

8 Dinino, ne Allah Yahwehdi aupu ton pepkukene. Ange ton moupra gekepkurume. Angeda pepkukene. Kandi kwarang co du malinge, nimi men jepmantonge kipra deipmangupa, epmaremada, deiyo ton ake. Ada, nedi Yehuda yala nesala, taleamu ngebo, sun deiyo ngebo Raja Zedekia cap, er amutara deiyo-deiyo neng cap, sundi talepipa Yerusalem mutu tupa ton akunmang nesala cap, tonda Israel yala nesala dinin, Mesir mutu bena kunge nesala cap tep, ila ikin keca sun damai deipkamne ja!

9 Ne Allahdi sun anesala yuma tep, ila kange mun keca karepnepa, yuk mutu ban-ban yuma kunung nesala, epmengedi, kware kuprepa, ‘Uo, uo, sunda pio mali nesala kunmang adano,’ tenepra, kange lonkamre. Nedi sun anesala wenepnyopda, yuk-yuk mutu nesaladi sun tep utenenkamenge. ‘Uo, sundi mali kurami ngeda, telep nimidi men kuptenge! Sunda ali weik dangkamenge! Ukupnepa yuk mutu nesaladi sun tep nalepra autunkamenge. Analepra autunkameng nengdi, sun yakapu yuk neng tep deremenge taruda, sun aupu penkamenge. “Allahdi Israel nesala tep mali kupra wipdongopupa, pio mali weik kungetopu, nedi kan tep, pio wipdongopkene,” pepra pedankamenge. Ada, ne Allahdi, sun Yehuda tara kunge nesala tapnedi, enepra donoknepa, yuk-yuk mutu dabura saka bena kunkamengai yumada, amutu-amutu kunge nesala yumadi, sun Yehuda tara nesala tep upenkamenge.

10 Angepu gum dinin, nedi, sun Yehuda tara kurami nesala, yuk-yuk mutu bena kunkameng mutu neitamai yumada, ne Allahdi nimi podan keca deiyopu karepnepa, yuk neng cap podanapu kunkamenge. Tonda, jen putan keca karepnepa, jen putanapu kunkamre. Tonda, ‘Nimi weika di deptenge’ tenen, wenemna keca sun damai deipne pangeda, sun weika di denkamenge. Ukupnepa, ange konum kupnyopda, yuk-yuk mutu neitamai dinin, sun Yehuda tara kunkameng nesala yumada, depra gawal dakamenge. Ukupmengepa, menop taru, nedi sun co puna nesala tep, ‘Amutu karepkamsene,’ pepra, pedina upu deiki di peramsi mutuda, sun tep karepsisi mutuda, Yehuda yala nesalada, nimi tenpu ngebo peda, tupa amutu ton pio men kunkamenge. Sun yuma gum kupra deipkamne ja!

Allahdi upepupa, ne Yeremiadi gekepsidi acapu sekra deipsi.