Jer 25 | XteSC | STEP | Yosia erdi deiamu ngebo, Raja Yoyakimdi Yehuda yala neng sun deiyo ngebo kepra kuramnganen, empat puluh tahun (40) kepu. Ataruda, Allahdi ne Yeremia damai yana, sun Yehuda tara kurami nesala tep, aupu pepra deipneu. Atarupu, Babel mutuda, Nebukadnezardi Raja kepra, Babel mutu yuma gonga kepra, talepmangada, keteng tamun tenpu mapmapu. Ataru dipapu, Allahdi aupu yana pepra deipneu.

Jeremiah 25

Allahdi Yehuda tara nesala Babel mutu donokupa, tujuh puluh (70) tahun bena kunkaminge tep, pepu upu

1 Yosia erdi deiamu ngebo, Raja Yoyakimdi Yehuda yala neng sun deiyo ngebo kepra kuramnganen, empat puluh tahun (40) kepu. Ataruda, Allahdi ne Yeremia damai yana, sun Yehuda tara kurami nesala tep, aupu pepra deipneu. Atarupu, Babel mutuda, Nebukadnezardi Raja kepra, Babel mutu yuma gonga kepra, talepmangada, keteng tamun tenpu mapmapu. Ataru dipapu, Allahdi aupu yana pepra deipneu. 2 Yehuda yala neng cap, tonda Yerusalem mutu kurami nesala yuma cap tep, neda nabi Yeremiadi aupu gekepsidi, sun tep lap pepsi.

3 Uda, sun Yehuda tara kurum nesala yuma tep, Allah Yahwehdi ^{▼▼Yahweh – Allah er pe si, tek sisi ngeda, ‘Yahweh’ kurure. Ibrani upu deiki di, asi er deiyoda, ‘Ne pio akunune,’ kurure. Ada, akeca-keca yuma kapul men ketekeipra deiamu taruda, Allah konum akuramu. Tonda, ataru di dipra, pio dorkunkamre taru peda, Allah pio akunkamrure. Allahdi Musa tep, er si katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Allahdi Musa tep, “Gume, ne sida ‘Yahweh’ kunerure. Atep, asi ‘Yahweh’ kael keprumudi, asipu erepra, ne tep gispal donkamnerume,” pepu. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er pe si sisa, Yahweh kwamngai,’ tenenkamrume. Allah er si Yahweh penada telepe pua. Tonda, lap pena upu nomor 49 dirume.} ne damai yana, upu pepra deipneu ngeda, sun damai gonga kepra pepkusene. Aupu lap pepkusen taruda, nimi si Amon, erdi deipu ngebo, Raja Yosiadi, Yehuda yala neng tep, deiyo kepra taleamnganen, ataru neitamaida, tiga belas tahun di nukra aneitamai yumada, amutu taleamu. Ataru neitamai yumada, keteng tamun denge weik, Allah er upu lap pepyakaramsianen, ukutaruda konum dua puluh tiga (23) tahun konum kepre. Dinino, sundi ayana lap pepyakasenun upu yumada, sundi moupra men gekenerume.

4 Angepu gum dinin, Allah dipapu, tamna gum di, erdi er upu cap, amenda kupkamrenge cap tep lap pena deiyo neng, sun nabi-nabi neng, sun deiki yana peiamupa, sundi amutu kurum nesala, sun gekenai lap peiamupa, tupa-tupa peryakasenunge. Dinino, sun anabi-nabi nengdi pesenge upu peda, gekepmumdi, ‘Angeda, tek pepmasenga cadi, gekenkupe,’ pepra, moupra men talerume. Sunda aupu pio men gekerume. 5 Ada, sun nabi nengdi, sun damai peiamsei ngeda, “Mali keca yuma talepra kurumnge cap, tenerumnge cap yumada, adipapu tapmumnyopda, ne Allah Yahwehdi, go karepsena deiki di, amutu neitamaipu tupa kunkamrume. Ada sun co puna neng tep, ‘Atelep mutu karepkamsene. Karepsenepa, dopropmumnyopda, amutu taleprumdi, pio akunkamrume,’ pepra, pedina upu deiki di peipsinge tep pepne. Ada, amutuda ne Allah Yahwehdi sun co puna neng cap, sun ataru kurum nesala cap tep, konum karepsisi mutu cadi, ‘Amutupu pio talepra kutenge’ tenen, pepsisi.

6 Upepsi dingeda, aupu ton pepra deipsisi. Ada, “Sunda, tali keca tep, ‘Nun nai ake,’ pepra, isok si eremrumdi, sun tep gispal dopra, pel dorumnge peda, adipapu tapkamrume. Tonda, sun pe buru deiki dipapu, nimi urasin utopu keca petupra derirumnge cap, mali pel dorumnge cap, ange kuruma deiki di, neda Allah, ne kange mali kupra derinerume. Dinino, ange yuma, sundi mali-mali kurumu keca yumada, adipapu tapra, nedi sun tep, ‘Ange kunkamrume,’ pepra, deipsisitopu kumum pangeda, ne Allahdi sun tep, men wenepra popkamsene.

7 Dinino, ne Allah Yahwehdi pepsene. Nedi, ‘Angeda kunkamrume, angeda pio men kunkamrume,’ pepra deipsisi upu, tapmumdi, pio men gekenerume. Tonda, tali keca sun pe buru deiki di petupra deiprumdi, ‘Nun nai,’ pepra, isok si eremrumya deiki di, ne Allah tamnerume. Ukuruma deiki di, sundi ne tep, pio tulum kemdinerume. Tonda, sundi sun pe tep, ikin keca deridarumudi, kange mun kange doupra kunkamrume. Adeiki di ne Allahdi sun damai, ila kange mun keca karepsenepa, doropmumdi ikin kupkamsere. 8 Neda, Allah Yahweh, ^{▼▼Yahweh – Allah er pe si, tek sisi ngeda, ‘Yahweh’ kurure (Keluaran 3:14). Dinino, Ibrani upu deiki di, akayat neitamaida, ‘Yahweh Sebaot’ pepra seki. Aupu ‘Sebaot’ penga deiyoda, ada ‘Im deiki jen talena malaikat yuma taleredi, sun deiyo ngebo kurura cadi, er putoda pio weik kurure’ tenena tep, asi seki. Atep nengeda, sun kael kemna tep, aupu deiyongepu katuai di sekmepu. Indonesia upu deiki di, Allah upu buku seki neitamaida, ‘TUHAN’ sengnunge, tonda, ‘Allah yang Mahakuasa’ ton sengnunge. Ange peda telep dinin, aupu tek sisi deiyo akapu ngeda, ‘Ketengban nesala yumadi, jenek kupra kael kepkameng’ tenen, nundi aupu deiyonge konum katuai di sekmepu.} im deiki kunge jen talena malaikat yuma, sun deiyo ngebo kunedi aupu pepsene. Ne Allahdi sun tep, “Angeda kunkamrume, angeda pio men kunkamrume,” peipsisi upuda, pio men gekerume.

9 Ange tep nengeda, nedi dapu tara kunung nesala yala-yala yuma tep, “Yehuda tara nesala poryankurume,” pepra upupkamne. Tonda, ne pel dopkamner ngebo, Babel mutu nesala sun nimi deiyo ngebo, Raja Nebukadnezar tep upupkamne. Upupnepa, sun yuma kikiman yankamenge. Nedi go karepkamna deiki di, poryangedi, Yehuda tara kunge nesala yuma cap, Yerusalem ila ati arum neitamai kurum Israel nesala cap, sun kurumai dana-dana tara dinin, sun damai kunge yuk-yuk yala neng yuma capda, yana popra gawal dakamsenge. Nedi sun yuma tep kaukeptapsenepa, sun podan nengdi yana popsengedi, sikke buktapkamsenge. Ukupmengepa, yuk neng yumadi ange epkamsenge. Epsengedi, ‘Uo, uo, yu nengdi anesala popra, sikke buktapmangada, kware kupsere,’ tenepmengedi, lukdangedi kwar dangkamenge. Ataru di dipra, dorkunkamre taru yumada, yuk nesala yumadi sun tep autupra nalemsengepa, sun apoptapkamsen nesala yumada, ali weik dangkamrume. Angeda, pio men gum kupkamsere. Ne Allah Yahwehdi ange konum pepmasena cadi, ange yumada tek sisi nong kupkamre ja!

10 Tonda, nedi kange mun keca karepsenyopda, ner buru dimna taru kailya kalepra deipra jenmangedi, kange lon mut penmangepa, karye pongedi, upu weik penung ngeda, gum kupra deipkamne. Tonda, nimidi nerapu dopra kange deipdangedi, upu sisingrerung nge peda, gum kupra deipkamsene. Tonda, ikin weik kupseryopda, sun Yehuda yala neng cap, Yerusalem mutu kurum nesala capda, sun kurum ati pumbon weica deiprumpa, dirin kuserur ngeda, gum kupra deipkamsene. Tonda, ‘Roti jen kwaneng keteneipkup’ tenen, gandum du taingrumpa lelim perurnge capda, sun mutu neitamai di, dim peprepa, men lelim penkamsere.

11 Deiyoda ake. Sun kurum mutu yumada, ne Allahdi kaukeptapsene pangeda, sun podan nengdi, yana popsengedi, amutu yuma mali kupra deipsengopda, sikke buktapkamsenge. Ukupsengopda, sun mutu yumada, walangpu kupkamre. Mutu katawaipu, nimi men kuramengai utopu kupkamsere. Ataru neitamaida, sun Yerusalem mutu kurum nesala cap, sun Yehuda tara nesala cap, sun dana-dana tara kunge nesala yuma capda, Raja Nebukadnezardi ateng koupra, er pe mutu, Babel mutu bena deipserepa, kunkamrum taruda, keteng tamun tujuh puluh (70) tahun mapkamrume. Erdi ikin pel dimserepa, er amutara kuprumudi, er pelpu donkamrume.

12 Dinino, ukupra dakumumyanen, ne tenemsi taru, keteng tamun tujuh puluh (70) tahun konum maprumyopda, Babel mutu nesala talerur ngebo cap, erdi talerur nesala, sun Kasdim yala nesala capda, sun pio mali kunung nge tep, ne Allahdi sun tep wenepra popkamne. Ne Allahdi Babel mutu cap, Babel nesala yuma capda, poptapnedi, sikke buktapnyopda, sun mutuda pio tep, walangyopu kupkamre. Ne Allah Yahwehdi aupu konum pepmana cadi, tek sisi nong kupkamre ja! 13 Ada, Babel mutu yuma cap, Babel mutu neitamai kunge nesala cap, yuk-yuk mutu nesala yuma capda, sun wenemna tep, “Nedi ukupkamne, ila ikin keca karepkamsene, ukupra-ukupra popkamsene,” pepra deipsipa, Yeremiadi gekepudi, sun atara mutu-mutu yuma tep, abuku neitamai sekra deipunge yumada, tek sisi sun damai karepkamsene. Ange yuma tek sisi nong kupkamre pepne.

14 Ada, sun Babel mutu kunge nesaladi, Yehuda tara neitamai kunge nesala, yala-yala yuma, sun deiki mali-mali kupra, ila ikin keca deriramsenge nge tep, ne Allahdi sun deiki tamupra, kwang dakamne. Ukupnyopda, Babel mutu nengdi, amali kunkamseng nge tep, go karepnepa, yuk-yuk mutu nengdi, Babel tara kunge nesala yuma, popkamenge. Popmengopda, sun yuk-yuk mutu neng yuma cap, sun talenung ila mambul Raja-Raja neng capdi, Babel tara nesala yuma talepmengedi, sun amutara deipkamsenge. Ukupsengopda, Babel nengdi, sun yuk-yuk mutu neng tep, sun pelpu donkamenge. Ange kupkamra deiyoda ake. Ada ne Allahdi, sun Babel mutu nesaladi, pio mali-mali weik kuramenge wenemna tep, nedi kwang dangkamne ja! Sun pe buru di, mali kun keca kuraminge utopu kupra, nedi ila ikin keca sun nong deiki deipne deiki di, kwang dangkamne. Allahdi pepu.

Allahdi yuk-yuk mutu yuma, dakunge nesala wenepredi, popkamra tep, pepu upu

15 Ne Yeremiada, tenpu taru ton mapmasidi ken deiki dinmasipa, Israel nesala sun si eremnung Allah Yahweh, er buru deiki doupmau me mau pumbonda, anggur me kipdongopra doupmau. Adoupmau anggur meda, Allah er ila yu kunange utopu kupmaupa, er buru deiki doupmau. Ukupmaudi, ne Yeremia tep pepneu. “Yeremiao, anggur me kipra deipman ngeda, ada ne ila yu kunerenge utopu kupre. Atep, ne buru di doupman anggur me mauda, kandi dopropo. Dopropmemyopda, ne Allahdi kan tep, ‘Amutu-amutu nesala yuma, sun damai dubena karerbenkurume,’ peipkene mutuda, anggur me mau doupmemdi karepra embenkurume. Anggur me doupra embememdi, amutu kuramenge nesala yuma tep, kandi ‘Anggur me jepso!’ pepmempa, sundi ange dopra jepkamenge. 16 Anggur me konum jepmengopda, sun kange yawaraprepa, dumsisi kange men doupmengedi, mutana neng kuramengtopu kupkamenga deiyoda, ne Allahdi sun anesala wenepra popkamna tepa. Nedi pepnepa, yu jen talena nengdi, nimi pona tep, parang ya dopra anesala poryankamenge. Allahdi ne Yeremia tep pepneupa gekepsi.

17 Konum gekepsi dingeda, ne Yeremiadi Allah Yahweh er buru deiki me mau di anggur kipra doupmau ngeda, bena dopropsi. Dopropsidi, Allah Yahwehdi, ‘Amutu kunung nesala, sun damai dubememdi karepmempa, akarepmaken anggur me jepkununge,’ peipneutopu, nedi sun damai bena karepsipa, doupra jepi. Ange yumada, ken mapsa deiki di epsi.

18 Uda, Allah er yu tep, anggur me jepmengepa, kange mun kunkameng nesala yumada, ake. Ada, ila ati arum Yerusalam mutu kunge nesala cap, Yehuda yala neng sun mutu kunge nesala yuma cap, Yehuda tara neitamai nimi deiyo kepra kunge neng cap, tonda sun nimi deiyo kepra Raja-Raja amutara pel dona deiyo kepra kunge neng yuma capda, nedi sun tep anggur me karepnyopda, sundi jenkamenge. Anggur me jepmengopda, sun mutu-mutu yumada, walangyopu kupkamre.

Atep nengeda, sun mutu kamo yumada, mutu katawaipu koun keca koupmengepa, men telep kupra bongoramretopu, sun anesala cap, sun mutu yuma capda, pio mali kupkamre. Pio mali kupra deipyopda, yuk mutu nesala yumadi, ange epmengedi, ‘Uo’ tenen, kware kupkamre. Yuk mutu nesala epmengedi, ‘Uo, uo, Allahdi anesala popra sikke buktapmarada, mambule. Allahdi amutu nesala konum wenepudi wipdongopu,’ tenepmengedi, lukdangedi, kware dangkamenge. Ataruda, yuk mutu nesala yumadi, Allah wenepra poptapkamre nesala tep, autupra nalemsengepa, ali weik dangkamenge. Ukutaru aupu pepmasen taru peda, ange konum gonga kepra kunmange.

19 Aken mapmasi taru dipapu, amutu-amutu nesala kuramyai yumada, embanmasidi, Allah er yu tep anggur me pio piripra karepembanmasipa, jenmai. Ada Allah er yu weik, nimi nong deiki deipkamunge tep, anggur me karepsipa jepi nesalada ake. Ada, Mesir mutu talerur deiyo ngebo, Firaun cap, er amutara pel dona deiyo-deiyo kepra kunge neng cap, Mesir mutu neitamai kunge nesala cap, yuk mutu neng dinin, Mesir mutu yana wisipra kurami neng cap,

20 Tonda, Us mutu Raja kepra talenge nimi deiyo neng yuma cap, Filistin mutu neitamai, ila ati arum dopra, kunge nesala tep, talenge nimi deiyo neng Raja yuma, ada Askelon mutu cap, Gasa mutu cap, Ekron mutu cap, tonda Asdod mutu tupa kunge nesala yuma cap, 21 Edom mutu cap, Amon mutu cap, Moab mutu cap, kunung nesala yuma capda, 22 Tonda Tirus mutu cap, Sidon mutu cap, tonda ila laut mokon, er si Laut Tengah, tonda Laut Mediterania penge laut mokon goupra, ortara neitamai kunge nesala cap yumada sun ton anggur me jepi.

23 Tonda, Dedan mutu cap, Tema mutu cap, Bus mutu cap, kunung nesala yuma pe, yuk-yuk mutu neitamai sun amul deiki tara, sun giso potong buma di tounung nesala peda jepi. 24 Tonda, Arab tara talepra kunung nimi deiyo neng, Raja yuma cap, sun amutara kunge nesala cap, mutu katawai tara kunung nesala, yala-yala yuma cap tep, anggur me karepsipa jepi. 25 Tonda, Zimri mutu cap, Elam mutu cap, Madai mutu cap, nimi deiyo kepra talenge nimi deiyo neng yuma cap tep, anggur me karepsipa, jepi. 26 Tonda, dapu tara neitamai, (arah utara) kunge nimi deiyo neng, sun Raja-Raja neng yuma cap, uda tuai mutu ban-ban yuma kunge nimi deiyo neng cap, sun talenung nesala yuma cap tep, Allah er yu anggur me karepsipa jepi. Sirik tara karepsi ngeboda, Babel mutu talerur nimi deiyo ngebo, Raja Babel tep, Allah er yu kunange tep, anggur me karepsipa jepu.

27 Ne ken mapsi taruda, Allahdi ne Yeremia tep pepneu.

“Kandi amutu-amutu nesala yuma tep, upepkurume. Sunda moupra gekepso! Neda, Allah Yahweh, ^{▼▼Allah – Ibrani upu deiki di, akayat neitamaida, Allah er si tep, ‘Yahweh Sebaot’ pepra seki. Sun kael kemna tep, aupu ‘Sebaot’ deiyongepu, katuai di sekmepu.} im deiki kunge jen talena malaikat yuma, sun deiyo ngebo kunune. Sun Israel nesaladi, ‘Nun nai bo,’ pepra ne sipu eremnenunge. Neda ila puto weik ngebodi pepsene. Sun yumada, ne ila yu kunerura tep, anggur me jeprumupa, sun kange yawaraprepa, dukna dukamrume. Sun kange yawarapserepa, tu deiki sakamrum taruda, kange di ton cap men tekamrume. Ada, ne Allahdi sun mutu-mutu neitamai yumada, mar podana keca doproipkamsene. Ukupnepa, yu neng yangedi, sun akurum nesala yuma tep, popmengepa depkamrum ngeda, kange di ton cap, men tamupra gam bukamrume. Pio depnapu kupkamrume.

28 Yeremiao, sun anesaladi kan buru deiki doupmamem anggur me tep, sundi, ‘Gume, nundi akeca men dopra jepkupe,’ tenepmengedi pepkengopda, kandi sun anesala tep aupu pepkurume. ‘Ange anggur meda, tek sisi dopra jepkurume. Deiyoda, Allah Yahweh, im deiki kunge jen talena malaikat yuma, sun deiyo ngebo Allah Yahwehdi, ‘Sun jepso!’ pepmasera tep, anggur me karepmasen ngeda, adipapu jepo,’ pepkurume.” Allahdi pepneu.

29 Upepneu dingeda, aupu ton dukdongopra pepneu. “Sun yuma moupra tenepso! Ila ati arum, er si Yerusalem mutuda, amutu tep, nimidi, ‘Ada Allah er mutu sisa kurure,’ penunge. Ne mawa mutu kunung nesaladi, sun mali kunge keca tep, nedi gonga kepra, wenepkamne. Sun deiki ila kange mun keca karepkamne ja! Atep nengeda, sun yuk-yuk mutu neitamai kurum nesala peda, wenepra poprapsenedi, yawa buktapkamsene.

Atep nengeda, sun amutu kurum nesaladi, ‘Gume, nunda Allahdi men popra wenepmasere,’ tenepmarumada, warya tep, ange tenepmarum do? Gume sun ton tali kange doupra men kunkamrume. Nedi, tuai mutu ban-ban yuma neitamai kunge nesala, sun mali-mali kunge keca kununga tep nengeda, tek sisi wenepra popkamne ja! Ukupkamna tep, nedi upupnyopda, yu nengdi, nimi pon parang ya doupmengedi, sun yuma tep poryakankamsenge. Atep nengeda, sun amutu-amutu kurum nesala yuma peda, ne yu tep anggur me karepmasenada dopra adipapu jepkurume. Sun yuma peda, wenepra popkamsena tepa. Atep nengeda, neda Allah Yahweh, im deiki kunge jen talena malaikat yuma, sun deiyo ngebo kunedi pepmasena cadi, tek sisi ange yuma nong kupkamre ja!” Allahdi pepu.

30 Upepudi aupu ton dukdongopra pepneu. “Yeremiao, kan damai apepmaken upu yumada, sun tuai mutu ban-ban yuma kunge nesala gekenai perbenkurume. Ada, amenda taru kupkamrenge tep, lap perbenkurume. Abena pepembankurum upuda ake. Bura tara gam kuramre keca, er si singa pus, jena putaprepa, yuk tali gam keca popra jepkuredi, ila upu peramretopu, Allahdi nesala yuma popkure taruda, ila upu deiki di pepkamre.

Ada, pio lengnai im deiki tara kururai di, er upuda kulman poramretopu kupredi, er nyapu sisa dinin, mali kunge nesala yuma tep, wenepra popkamre. Tonda, Allah er ila upu di pepkamre taruda, nimidi anggur tapu du dakra deipmengedi, me purunkamenga tep, upu lase paramengtopu kupra, ila upu di pepkamre. Aupu peprepa, mutu ban-ban yuma kunung nesaladi alelim gekepkamenge.

31 Nimi ban-ban yuma kunge nesala yumada alelim gekepkamenge. Pio karen mutu neitamai kunge nesala pe, im sirik mutu sirik kunge nesala peda, alelim gekepkamenge. Allahdi tuai mutu kunung nesala yumadi, mali kunge keca tep nengeda, wenepra popkamsera tep, nimi upu bokeipkamsere. Nimi tuai nesala yumadi kurami keca dipetepredi, sun mali kurami nesala tep nengeda, wenepredi popra gawal dakamre ja. Ukupmantoda, er nimi pon parang ya doroprapredi, nimi tuai mutu kunge nesala dinin, mali-mali kurami nesala tep, wenepra poptaprepa, depkamenge.

32 Ukupkamra tep nengeda, Allah Yahweh, im deiki kunge jen talena malaikat yuma, sun deiyo ngebo kuredi pepsere. “Sun yuma moupra dinkurume. Ila mungna kumanya, tenpuai di pukra yaredi, amutu yuma douptalya embaramretopu, im sirik, mutu sirik di, ila kange mun keca yankamsere. Erdi kareprepa, kange mun keca yumada, ton mutu nesala talepmaryanen, adi ton tara nesala talepmaryanen, ayuma talepdanen embaramryanen, mutu ban-ban yumada, aikin kecapu doropmengedi, kange mun kange doupra kunkamenge.

33 Atumida, Allahdi ban-ban yuma neitamai kungedi, mali kurami nesala poptapkamre nengda, sun nong yumada, tuai mutupu weik kupredi dinipkamre. Ada ortara im sirik, dortara mutu sirik, dana-dana tara cap, daneitamai capda, nimi weik apoprepa depkameng neng, sun nong dinipkamre. Allahdi nesala weika di poptapre pangeda, yuk nengdi adepmange neng tep epmengedi, ‘Uo, sunda bicaue’ tenen, mali kange doupra kungedi men engepkamenge. Tonda, tenpu ngebo peda, apoptapre neng, sun nong doupra men peirbenkamenge. Ange gum dinin, ‘Dakwapye’ tenen, apoptaprepa depkameng neng, sun nong dopra tu pumbon men peipkamenge. Gume, tu deikipu tapmengepa, tali gam kurur keca dei paktaprepa, tu deiki katawai tali kapredi, tong beleramre utopu kupkamre.

34 Ange tep nengeda, uo, sun deiyo-deiyo neng yumada bicaue! Sun yumada, engepmumdi, uku jeproprepa, sikke buktapmengai, tu deiki mapra kunkamrume. Ukupmantoda, Allah er domba bisam utopu nesala talepra peirum nengo, Allah er tenemu tumi konum kepyopda, sun yumada wenepra popkamser ja. Agum dingeda, ton nengda, sun kurumu mutu neitamai di enepra donokserepa, yuk karenaipu saka bendopkamrume. Ukupmantoda, kerah tu di dopra, telepra deipmengepa, urasin pio telep me mau betamengepane, tuai saka dourberedi, olongamre utopu kupra wenepra poptapkamsere. Ange tep nengeda, sun yuma mali pepra, tuai dulengmumdi, ngolokra engenkamrume. 35 Allah er mawa nesala tep, deiyo kepra kurum neng tep, wenepkamser taruda, ‘Wenepra popserur’ tenen, inipra betuma guma. Tonda dan tara sepdaro ini betuma gume. Sun Yehuda tara kunge nesala kalengna cap, peteremna cap deiyo-deiyo neng yumada, wenepra popseryopda, depnapu kupkamrume.

36 Sun yuma moupra dinkurume! Allahdi, sun domba peina deiyo neng utopu kunge nimi deiyo-deiyo neng tep, wenepra popyopda, ila di engenkamenge. Alelimda sun yuma moupra gekepkurume! Ange utopu, sun kurum mutu neitamai, nimi deiyo kunge nesala yuma tep, Allah er yu kupupa, mali kupra deipseupa, sun yuma mali pepra ngolongmenge ngeda, gekepso! Alelim gekenmarum ngeda, tali tep gume! 37 Deiyoda, sun domba peina deiyo neng utopu kurami nimi deiyo neng yumada, Allahdi sun mali kuraminge tep, yu pio weik kuprepa ila di wenepra ponmara tep, sun telep mutmuta pamseupa, men di domba telep kupra peiramyaida, ukutaru konum mali kupra deipmaser adano! Ukupseredi dim bulung pepnapu kupkamre. Ada, Allahdi sun deiyo neng yuma tep wenepra popmasera tepa.

38 Uda, Allah erdi derepseudi, sun kuramrum mutu yumada, mali kupra deipmasere. Ukupserepa, sun mutu yumada, tali gopu kupudi, dim bulung pepnapu kupu. Ada, sun podan neng ya ila putonge di, ya tupra tapsei. Ukupmantoda, bura kuramre singa pus er kuramrai di tapra, ‘Ne jena tep gam keca popra jepkune’ tenen, yukai baramretopu, “Allahda, yu weik kupupa, er kuramre mutu di tapra, tuai mutu yana popseua tepa. Ada er nyapu damai di tapra beua tep pepsene. Yeremiadi sun Yudea tara kurami nesala tep pepu.