Jeremiah 26

Yeremiadi, Allah er si eremna ati yakarami nesala tep, pepu upu

1Ataruda, Yosia er mi Yoyakimdi, Yehuda tara kurami nesala, sun ila nimi deiyo ngebo kuna tep, gonga kepu keteng tamun neitamaida, Allah er si Yahwehdi Yeremia tep, aupu yana peipu. 2Ne Allah Yahwehdi pepkene.

Ne Allah Yahweh tep, ne si eremna cap, ne gispal dona cap tep, ati dominge bememdi, akati dam tekra aupu pepkamrume. Ada, sun Yudea tara neitamai kunge nesala yumada, ‘Nun nai Allah, er si eremkamep’ tenen, ne si eremna ati yakange nesala tep, nedi, “Ukupra penkamrume,” pepra, deipkuken upu yuma lap pepkamrume. Tenpu upu peda, ‘Uo, aupuda tapkun,’ tenena gume. Tenpu upu peda, men tapkamrum dinin, ne peipmaken upu yumada, anesala gekenai bena lap pepkurume.

3Upepmempa, sun anesala gekepmengedi, ‘Sun mali kunung keca yuma tapra, ne damaipu yankameng do, gum do?’ tenen, dinkamepe. Sun mali kunge keca tapmenge pangeda, nedi, ‘Sun deiki ila kange mun keca karepkamne’ tenen, ketenepsi ngeda tapkamne. Aketenepsi ngeda, ‘Sun mali kununga menengada popkamne’ tenen, keteneipsi dinin, sun mali kunge keca tek sisi tapmengopda, sun wenemna keca taptene. 4Ange tep nengeda, kandi sun Israel nesala tep, sun damai upepkurume. Allah Yahwehdi ne deiki deipneu upuda ake.

Neda Allah Yahweh kunedi, sun tep, “Ange kunkamrume, angeda men kunkamrume,” pepra deiamsisi upu cap, yuk pesene upu cap, men gekemumnyopda, nedi wenepra popkamsene.

5Tonda, ne upu lap pena deiyo neng, sun nabi-nabi damai peiamsipa, sundi sun Israel nesala damai lap peiamsinge peda, men gekeramrume. Ada, ‘Nedi ila wenemna keca karepnepa, ne mawa nesala adipapu depnung’ tenen, nabi neng wepra doproiamsisi pangeda, “Adipapu gekenkamenge,” peiamsisipane, sunda men gekerume. 6Sunda, Allah er upu men gekeprumdi, pio kikapu kupmum pangeda, Allah ila di wenepkamsere. Ada, pumun taru Silo mutu kurami nesala wenepra poptapsitopu, sun ataru kurum Israel yala nesala yuma peda, sun mali kurumnya menenga tep popkamsene. Tonda, sundi akati-akati yuma, Yerusalem mutu doamrum ati yumada, sun wenemna tep mali kupra deipnepa, yuk mutu nesala ban-ban kunge nesala yumadi, “Uo, Yerusalem mutuda, malipu kuramipa, Allahdi mali pepra wipdongopu mutu ake,” pepra penkamsenge. “Allahdi peipmaner upu konum pepsene,” pepra lap pepkamrume. Allahdi Yeremia tep pepu.

7Allahdi upeipupa, Yeremiadi, Allah er si eremna ati damai bena, lap pepu pangeda, sun Allah er upu lap pena deiyo neng, nabi neng cap, Allah er si eremna ati talepra pel dona deiyo neng, imam-imam neng cap, tonda, sun tali dakunmai nesala yuma cap, sun yumadi, Yeremia lap pepu upu gekepi. 8Allahdi Yeremia damai peipmau upu yuma dopra, sun anesala damai konum pepu pangeda, anesala yuma gekepi dingeda, upepi. Ada, sun Allah er upu lap pena deiyo neng, nabi neng cap, Allah er si eremna ati talepra, pel dona deiyo neng, imam-imam neng cap, tonda, sun tali dakunmai nesala yuma cap, sun yumadi, pepi. “Gume kandi penmaserem upuda, nun songe. Atep kanda adipapu depkureme,” peprapidi, Yeremia tep, yana tomopi.

9Anesaladi, Yeremia tomopidi, puto di talepi dingeda, aupu ton pepi. “Kanda ila kika deipmaremdi, Allah er si deiki di, ‘Yerusalem mutu yuma cap, Israel yala nesala yuma cap, Allah er si eremna ati capda, Allahdi mali kudinkamsere. Ada, pumun taru Silo mutu kurami nesala wenepra poptaputopu, sun amutu kurum nesala peda, utopu kupkamsere,’ pepmaserem ngeda, ware keca deiyo tep do? Tonda kandi, ‘Amutu neitamaida, yuk nengdi popra gum kuipsengepa, nesala ton men kunkamenge. Amutu ati yuma walangpu kupkamsere,’ pepmaserem ngeda, warya tep do? Nun kangeda, aupu yumada, tali pepmasereme tenenupe,” pepi. Upepidi, akunmai nesala yumadi yap-yap pepra, malya penmaidi, Yeremia er nong dana-dana tara bulupra yai. Ada, Yeremia kunmauaipu, Allah er si eremna ati damai bulupra yai.

10Ukunmai pangeda, yuk neng epidi, lap perbenmaipa, Yehuda mutu yuk-yuk nimi deiyo kepra taleami neng yuma, sun damai bena pepipa gekepidi, sun amutu yuma, ila nimi deiyo ngebo Raja, er ati dam di tapra, Yerusalem mutu neitamai, Allah er si eremna ati damai yai. Yaidi, akati buplan er sida, Ukupu Bisi Buplan perami buplan damai, deiyo neng bungameng bungna keca deiki yan buki.

11Sun aneng yuma konum bena buki pangeda, sun imam-imam neng cap, nabi-nabi neng capdi, amutu neitamai pel deiyo yuk-yuk talepra, pel dorami neng cap, akati bulupra wekmai nesala, tali nesala cap tep upepi. “Gume, nun kangeda, angebo Yeremiada, er wenemna tep, poptepe. Ada mesum tep gum dinin, erdi, nun kunup mutu Yerusalem mutu tep, ‘Amenda taruda, Allahdi amutu yuma cap, sun amutu kurum nesala cap tep, wenepra popseredi, gawal dakamsere,’ pepra, pio mali upu penmaserdi, yanipmasere. Apenmaser upuda, sun akunmarum nesala pedi gekepmarume. Atep nengeda, adipapu angebo popkupe,” pepi.

12Upepi pangeda, Yeremiadi, sun ila nimi deiyo neng cap, akati bulupra wekmai nesala cap tep, tamupra pepu. “Gume, Allah er si eremna ati cap, Yerusalem mutu cap, amutu kurum nesala cap tep, mali upu pepman ngeda, ne pedipapu tenepra men pepmane. Nun nai Allah, er si Yahwehdi ne tep, ‘Aupu lap perbenkamarume,’ pepra deipneutopu pepnepa, gekepmarume. Nedi tenpu upu peda, ne kange dipapu men pepmasene,” pepu.

13Ange tep nengeda, sun yumadi mali-mali kumumnge cap, sun mali tenerumnge cap yuma taprumudi, tamupra Allah er damai yankurume. Ada, nun nai Allah Yahwehdi, ‘Angepu kunkamrume, angeda men kunkamrume,’ pepra, deiamseu upupu gekepra talepmumdi, moupra kunkamrume. Ukupmumpa, Allahdi sun wenemna tep, ‘Sun deiki ila ikin keca deipkamne,’ tenepseu ngeda, ‘Tapkamser do, gum do?’ tenen, kunkamepe. Sun mali kurum keca taprumnyopda, Allahdi men wenepra popkamsere. Dinino, sun mali kurumu keca men taprumnyopda, wenepkamsere.

14Dinino, ne Yeremia tep nengeda, sundi tomopmanerumpa, sun damai kunmana cadi, sundi ne tep, ‘Ukupkamape, telep ngeda ake,’ tenepmanerum ngeda telepe pua. Sundi tenepmanerumtopu dakupneso. 15Upepmasen dinino, sundi moupra tenepkurume. Ne tek sisi pepsene. Sundi ne mali ton men kupmanpapu popnerum pangeda, sun deiyo neng cap, sun amutu neitamai kurum nesala cap yumada, ikin keca doropkamrume. Ada mali kuna gum ngebo popmumnyopda, ne yapi sun giso deiki kupkamsere. Deiyoda, apepmasen upuda, ne kange dipapu men pepsene. Neda Allah Yahwehdi, ‘Ne upu sun anesala damai lap pepmempa, sun mali kunung keca tapkunung do, gum do?’ tenen, Allahdi peipneutopu sun damai yan pepmanue. Ada sun pe mali kurumya tep peipupa, yan pepmasene. Aupu yumada, Yeremiadi pepu.

16Upepupa, amutu nesala deiyo kepra taleami neng cap, amutu kurami nesala capdi tamupra, sun imam-imam neng cap, nabi-nabi neng cap tep pepi. “Uo, angeboda pona gume. Erda tek sisi nun nai bo Allah Yahweh, er si deiki di aupu tek sisingepu pepmasera tep, er pona gume,” pepi. 17Upepi dingeda, amutu nimi deiyo yuk-yuk talepra kurami neng kan-kan, tenpu ngebo tekroudi, wilipra menmena utengbeudi, akati neitamai bupra wekmai nesala tep pepu.

18Pumun taru, Yehuda yala nesala tep, ila nimi deiyo ngebo kepra taleamseu ngebo, er sida Hiskia, erdi taleamseu taru neitamaida, Allah upu peiprepa lap pena ngebo er si Mika, mutu si Moresyet mutu ngebodi, pepu.

Ataruda, nabi Mikadi, amutu kurami nesala tep upeipseu. “Allah Yahweh, akeca-keca yuma deiki tara, ila erepra kurur ngebodi, er upu pepra deipneupa yan pepsene. Allah Yahwehda, akeca-keca yuma taleredi, im deiki jen talen malaikat yuma, sun ila deiyo ngebo kurure. Allahdi peipneu upuda ake.

‘Sion mutuda, wa pen damai utopu kupkamenge. Tonda, Yerusalem mutu ati dopinge, yu nengdi yana urupropmengepa, ati walangpu kupkamre. Tonda, Allah er si eremna tep domi ati uruptapmengepa, dakuramnganen amenda taruda, amutu dupaida, tali paramre co palpal tekamre. Akati uruptapmengepa, taliyaipu kupkamra tepa.’ Allahdi peipneu upu pepsene,” nabi Mikadi pepu.

19“Pumun taruda, nabi Mikadi aupu pepu dinino, amutu Yudea taleamu ngebo, Raja Hiskia cap, Yehuda mutu neitamai kurami nesala cap, sun yumadi aupu gekepi dinin, Mika tep yu kupra men popi. Gume, Raja Hiskiadi, nabi Mika pepu upu moupra gekepudi, ‘Ada tek penmare. Ne cap, amutu nesala cap, mali kunup keca tep, Allahdi wenepserur tenen, penmasere,’ tenepu. Ukupra tenepudi, ‘Uo, amali kunun ngeda, Allahdi bicau tenepra lyepnetue’ tenen, Allah mororamu.

Utenepra moropu pangeda, Allahdi ataru kurami nesala tep, ‘Wenepra popkamne,’ teneamu ngeda tapu. Atep ataru kunup nesalada, pio moupra tenepkupe. Nun peda, Allahdi nun damai ikin keca deipserura tep, Yeremiada tali lupra pona gume. ‘Nundi nun pe tep, mali kudinup’ tenen, pepsene.” Yehuda mutu wisi ngebo tenpu ngebodi, akati bupra wekmai nesala yuma tep pepu.

20Ange yuma kupu taruda, tenpu ngebo ton, Allahdi peipupa, er upu lap peramu ngebo, er sida Uria kuramu. Ada, nimi si Semayadi deipu ngebo ake. Uriada, er mutu sida Kiriat-Yearim. Uriada, Allahdi peipupa, er upu gekeramudi, lap peramu ngeda, ada Yerusalem mutu cap, Yehuda yala nesala kurami mutu cap tep, ‘Amenda taruda, ikin weik kunkamre,’ pepra lap peramu. Ada nabi Yeremiadi, lap peramu utopu, angebo Uria peda, ‘Allah er si Yahwehdi peipmanerpa, pepsene,’ pepra, Yeremiadi peramu upu utopu peramu.

21Nabi Uriadi, upu yan penmaupa, amutu yuma talepra nimi deiyo ngebo Raja Yoyakin cap, er jen talena deiyo neng cap, er amutara mambul pel dopra kurami neng, ila-ila neng cap, sun yumadi aupu gekepidi, ‘Gume, angebo Uriada popkamape,’ tenepipa, upu sisiki dinin, yuk neng gekepidi, lap pepi pangeda, Uriadi sun tenepmainge, er kael kepudi, ‘Ne popnenung’ tenen, kware kupupa, Mesir mutu benamue.

22Mesir mutu benamu dinin, nimi deiyo ngebo Raja Yoyakimdi, nimi si Akbor er mi Elnatan tep, ‘Uria tomorberume,’ pepudi, Elnatan gonga kemna tep doproipupa, er cap, yuk jen talen neng cap, Mesir mutu beidi, Uria bena tomopra duyanami. 23Anengdi, nabi Uria doupra, kange di tamupra, ila nimi deiyo ngebo, Raja Yoyakim damai duyai pangeda, erdi, ‘Angebo poipso,’ pepupa, parang ya dopra Uria popi. Popi dingeda, tali nimi perbaramyaipu bena donoki. Ada peina gum dipapu, er nong talipu donokidi tapi. 24Ataruda, Uria poptapi dinin, Safan er mi Aikamdi, Yeremia meliamudi, ‘Angebo potamna gume,’ peipupa, amutu deiyo nengdi, ‘Yeremia tomopra, amutu nesaladi angebo poipkamenge,’ pepra men deipipa, Allahdi Yeremia tep lyepropue.