Jer 27 | XteSC | STEP | Raja Yosia, Yehuda tara mutu taleamu ngebo, erdi deiamu ngebo, er si Zedekia, ‘Er nai yo pununa tep, nimi deiyo ngebo Raja kunkamser’ tenen, wepra deipipa, Yehuda mutu kapul talepra kunmau taruda, Allah Yahwehdi, ne nabi Yeremia damai yana, aupu pepra deipneu. Allah Yahwehdi pepra deipneu upuda ake.

Jeremiah 27

Yeremia ikin co dopra koupdongopudi, er kum damai deipra dubeua tep upu

1 Raja Yosia, Yehuda tara mutu taleamu ngebo, erdi deiamu ngebo, er si Zedekia, ‘Er nai yo pununa tep, nimi deiyo ngebo Raja kunkamser’ tenen, wepra deipipa, Yehuda mutu kapul talepra kunmau taruda, Allah Yahwehdi, ne nabi Yeremia damai yana, aupu pepra deipneu. Allah Yahwehdi pepra deipneu upuda ake.

2 Allah Yahwehdi ne tep pepneu.

“Tuai gam kure keca popra, er bol gongokmemdi, tapu ketenepra deipkurume. Tonda, kan kum damai derina tep, ikin co ^{▼▼ikin co – Aupu deiyoda, ake. Pumun taruda, sun Israel nesaladi, ‘Nun sapi bisamdi tapu gerekmepedi, ikin co sun kum damai deipmepepa, asapi bisamdi wa tu palina keca, er si bajak, tonda tenggala tapu di gipra barepa, nun wa tu palinkamser’ tenen, aikin co, er si gandar, sapi kum damai derirami. Akayat neitamaida, ada domon upu utopu kupu dinin, deiyoda, ‘Allahdi ila kange mun keca karenkamser,’ tenepmengedi, ‘Kael kepkameng’ tenen, kupu. Gambar dina tep, Yeremia 51:33.} dopra koudongona keca ton betapmemdi, ketenepra kan kum damai di deipkurume. Angeda, ne Yeremia kum damai koudongona tep, pepneu. 3 Tonda, Allahdi aupu ton pepneu. “Nimi deiyo neng sun damai bena, lap pepkurume. Ada, Edom mutu talepra kure Raja ngebo cap, Moab mutu talepra kure Raja ngebo cap, Amon mutu talepra kure Raja ngebo cap, Tirus mutu talepra kure Raja ngebo cap, Sidon mutu talepra kure Raja ngebo cap tep, sun animi deiyo-deiyo neng tep upu doproipkurume. Ada, sun animi deiyo nengdi, sun amutara pel donge nyapu yuk-yuk dopra deipipa, Yerusalem mutu, nimi deiyo ngebo, Raja Zedekia talepra kuramngai, upu peryai neng damaipu, pepmempa, anengdi aupu dopra lap perbenkamenge,” pepra, Allahdi upeipneu.

4 Upepu dingeda, aupu ton pepu. “Kanda Yeremiadi, adipapu sun adeiyo neng damai lap pepmem pangeda, anengdi sun deiyo-deiyo neng yuk-yuk dinin, sun damai lap perbenkamenge. Aupuda ake. “Neda Allah Yahweh, ^{▼▼Yahweh – Allah er pe si, tek sisi ngeda, ‘Yahweh’ kurure (Keluaran 3:14). Dinino, Ibrani upu deiki di, akayat neitamaida, ‘Yahweh Sebaot’ pepra seki. Aupu ‘Sebaot’ penga deiyoda, ada ‘Im deiki jen talena malaikat yuma taleredi, sun deiyo ngebo kurura cadi, er putoda pio weik kurure’ tenena tep, asi seki. Atep nengeda, sun kael kemna tep, aupu deiyongepu katuai di sekmepu. Indonesia upu deiki di, Allah upu buku seki neitamaida, ‘TUHAN’ sengnunge, tonda, ‘Allah yang Mahakuasa’ ton sengnunge. Ange peda telep dinin, aupu tek sisi deiyo akapu ngeda, ‘Ketengban nesala yumadi, jenek kupra kael kepkameng’ tenen, nundi aupu deiyonge konum katuai di sekmepu.} im deiki jen talena malaikat yumada, sun ila deiyo ngebo kunune. Neda, sun Israel yala nesala yumadi, ne sipu eremnenunge. Sun mutu talepra kunge nimi deiyo neng tep, ‘Allah Yahwehdi sun tep, upepmasere,’ pepra, lap perbenkamrum upuda adano.” Allahdi pepseu. Upepu dingeda, aupu ton pepu.

5 “Yuk ngebodi gume. Ne Allah dipapu, ne ila puto weik talepra kunenge cap, tonda ne ila puto weik kunere buru cap deiki di, tuai mutu kapu keca yuma ketekepra deiamsi. Tonda, tuai mutu ban-ban yuma kunge nesala cap, tonda tuai mutu neitamai gam kure keca yala-yala yuma capda, ne puto dipapu ketekepra deiamsi. Aketekepra deipsi keca yumada, ne pe kange dipapu, ware ngebo tep do, ‘Angebo tep, puto deiyo keca karepkun,’ tenepne ngeboda, nedi atenepnetopu, ne puto dopra, angebo tep karenune. 6 Atep, ukutaruda, ne Allahdi, sundi kumum tuai mutu ban-ban yuma cap, amutu neitamai kunge nimi yala-yala yuma cap, tuai gam kure keca yuma capda, ange yuma dopra, nedi konum tenemsi ngebo tep, konum karepsi. Ada, nedi, ‘Angebo ne amutara apel dopkamnere,’ tenemsi ngebo, Babel mutu yuma talerur nimi deiyo ngebo, Raja Nebukadnezardi talepra kuryaipu, ne puto ton dopra karepsipa, apepmanu keca yuma talenkamre.

7 Atep, amutu neitamai ban-ban yuma kunge nesala, yala-yala yumada, Babel mutu talepra kurur deiyo ngebo, Raja Nebukadnezar, er amutarapu kungedi, er pel melipra donkamenge. Tonda, erdi deipkamre nyapu cap, er nyapudi deipmengepa, dadeipdanen bankameng nyapu cap, sundi talepmengepa, kuramengepanen, amutu-amutu kunge nengdi Babel mutu talenge deiyo neng tep, sun pel melipra donkamenge. Ukupra dakuramengepanen, ne tenemsi taru konum kupyopda, akonuma. Ataruda, yuk mutu neng tep, go karepnepa, anengdi Babel mutu nesala popra, sun keca yuma dalupra dopropkamenge. Ataruda, sun yuk-yuk mutu nengdi, Babel mutu nesala yuma tep, popra bisbisa kapmengepa, sun Babel mutu kurumu nesala yumadi, sun yuk mutu nesala amutarapu kunkamrume. Ada, sun Babel mutu kurumu nesala yumada, yuk ila-ila Raja nimi deiyo nengdi, ateng koupsengedi, ikin pel karepsengepa, sun amutarapu ukurumdi, apelda talipu donkamrume.

8 Dinino, ukupmantoda, nimidi ila ikin co dopra, sapi bisam kum dam gerekmengepa, tapu gipra, ikin pel doramretopu, ukutaruda ukupkamsene. Ada, ware mutu nesala do yuma, tuai mutu ban-ban yuma kunge nesala yuma cap, sun talepra kunge nimi deiyo neng yuma cap, sundi, Raja Nebukadnezar yana popsengedi, ‘Apel tali dopneso!’ pepra, ikin pel dimamrenge karepserepa, sundi er upu gekena gum di, ‘Er pel men donkamepe,’ tenenkameng nesala yumada, ne Allah dipapu, sun wenemna tep, popnedi gum kupra deipkamsene. Ada, nedi sun damai ikin weik keca deipkamsenada, mar pona tep neng dopra derina cap, jen putana deiyo keca karena cap, ila pu jeramredi, nimi weika di denkamenga deiyonge cap, karepne pangeda, ange yuma deiki di amutu nesala yuma depmengepa, gum kupra deipkamne. Ukupnepanen, sun kael kepmengedi, sundi Nebukadnezar er amutarapu kunkamenge. Gum dingeda, nedi go karepnepa, Raja Nebukadnezardi, amutu nesala yuma popra gawal dakamre ja.

9 Ne Allahdi ukupkamna tep nengeda, ware neng do yuma, sun damai yangedi, ‘Gume, Babel mutu nimi deiyo kepra talepu ngebo tep, er upu gekena gume,’ pepra, penkamseng neng yumada, sundi aupu pepsenga peda, sundi aneng penge upu pio men gekenkamrume. Ada, nabi-nabi neng do, tonda ware neng ton do, amutu deiyo talepra kunkameng neng do, amenda kupkamre keca kapul kupre taru, lap pena deiyo neng, nabi nengdi do, ken deiki di epmengedi, lap penge neng do, asuru kwa nengdi do, sundi, “Nunda ken deiki di peipmasere,” penung neng do, tonda, “Peten kemna keca deiki di kael kepmap ngeda ake,” penkameng upu cap, tuai sambala pel dorenge cap, tonda isok puto deiki di pel donange cap, adeiki di pepkameng upu yumada, pio men gekenkamrume.

10 Angeda, tali tep men pepsene. Deiyoda, ake. Tek sisi pepsene. Sun aneng-aneng yumadi tali upu deiki dipapu penkamseng dinin, sun amutu kurum nesaladi, sun penkamseng upu ‘Teka’ tenepra dombankamrume. Upepmengepa, gekenkamruma deiki di, sun mutu neitamai di, enepra donokamsene. Ne Allahdi sun mutu neitamai di enepra donoksenepa, sun nong peda, amutu neitamaipu depmumpa, gum kupra deipkamsene.

11 Dinino, ware mutu nesala do yuma, sundi, Babel mutu talepra kurur nimi deiyo ngebo Raja, er upu gekepmumdi, er amutara kumumnyopda, ne Allahdi melipkamsena deiki di, sun pe mutu sisapu pio kunkamrume. Babel mutu ila nimi deiyo ngebo, er amutarapu kumumdi, erdi dimkamser pel dopmumnyopda, sun pe mutu neitamai di, nedi men enepra donokamsene. Sun pe mutupu kumumdi, wa pepra, yal keca koupra, teleppu kunkamrume. Tek sisi aupu yumada, ne Allah Yahwehdi pepra deipsena cadi, ange yumada, nong tek sisi kupkamre ja.

12 Ne Allahdi, nabi Yeremia tep peipsipa, erdi, Yehuda mutu nimi deiyo kepra, talepu ngebo, Raja Zedekia, er damai peda, aupupu lap pepu. Ada nedi aupu peipsipa, nabi Yeremiadi pepu. “Uda, nimidi ikin co ketenepmengedi, sapi bisam kum damai deipmengepa, ikin pel doramretopu, kanda Raja Zedekia cap, kan talerum nesala cap, Babel mutu nimi deiyo ngebo, er amutarapu kunkamrume. Er pepre upu gekepra kuna cap, erdi talerur nesala, sun amutarapu kumumdi, sundi pesenge upu cap gekepmumdi, apelpu dopmumnyopda, tek sisi nedi go karepsenepa, sun tupa gam kunkamrume. Dinino, nedi sun tep, ‘Ukunkamrume,’ pepra, pesene upu men gekepra kupmumnyopda, tek sisi depkamrume.

13 Sun moupra tenipetepso! Ware keca deiyo tep, ne pesene upu yanirumupa, wenepra popsenyopda, tali dadepkamrum do? Gume, ne Allah Yahwehdi, aupu pepra deipmasene. Ada, “Ware mutu nesala do yumadi, Babel mutu nimi deiyo ngebo Raja, er upu yanipmenge nesalada, ne Allahdi karepnepa, mar podana cap, jen putana deiki cap, nimi dena tep, ila kange mun pu weika di jenkamrenge cap, ange-ange yuma deiki di depropkamenge. Atep, kanda Raja Zedekia cap, kan talerum nesala cap, sun Yehuda tara kumum nesala peda, ware keca deiyo tep, sun damai akange mun keca karepnepa, sun damai yarepa, depropkamrum do?

14 Ange tep nengeda, Zedekia kan cap, kan talerum nesala capda, sun mutu neitamai kunge nabi-nabi nengdi, ‘Babel mutu talepra kure nimi deiyo ngebo, Raja Nebukadnezardi pesere upuda, gekena gume,’ pepsenga peda, anabi-nabi neng, sun upu men gekenkamrume. Anengda, Zedekia kan tep, ‘Tali upu peptapkup’ tenen, aupu pepkamkenga cadi, aupu pio men gekenkamrume. 15 Ne Allah Yahwehdi tek sisi pepkene. Sun anengdi penkameng upuda, ‘Nunda, Allahdi pepra deipmaser upu lap pepmepe,’ pepra, pertamkamsenge. Dinino, tali mok upu deiki penkamenge. Ne Allah Yahwehdi, aupu pio men peipsi. Tonda, tek sisi anengda, nedi men wepra deipsi neng kununge. Ange tep nengeda, sun amutu nesaladi, sun mok upu penung nabi-nabi nengdi penkameng mok upu gekepmumdi, teka tenepmunyopda, ne Allahdi sun amutu nesala yuma enepra donokamsene. Ukupne pangeda, Raja Zedekia kan cap, kan damai yana, mok upu penkameng nabi-nabi neng cap, sun yumada, ne Allahdi gum kupra deipkamsene. Allah Yahwehdi pepupa, Yeremiadi aupu lap pepu.

16 Upepu dingeda, nabi Yeremiadi aupu ton cap dukdongopra pepu. Ada, ne Yeremiadi, Yudea tara imam-imam neng cap, amutu neitamai kunge nesala cap tep, ‘Allah Yahwehdi pepra deipmaser upu pepkusene,’ pepsi. Ada ake.

“Sun mutu nabi-nabi nengdi, penmaseng mok upuda, pio men gekenkamrume. Sun tali upu deiki penmaseng upuda ake.

Sundi, ‘Gume, Allah er si eremna ati neitamai deiami keca, sun Babel mutu nengdi, akeca dalupra dopra dubenami ngeda, adipapu tamupra duyankamsenge. Akecada, sika di men duyankamenge. Babel mutu di tamupra, doupra yankamenge,’ penmasenge. Dinino, aupuda, mok upu deiki di penmasenga cadi, sundi ange pepsenga peda, aupuda pio men gekenkamrume.

17 Amok upu penge nabi-nabi nengdi penge upuda, men gekenkamrume! Ange gum dinin, Babel mutu neitamai, nimi deiyo kepra talerur ngebo Raja, er upupu gekepra, er amutarapu kumumdi, er pel melipra donkamrume. Ukupmumnyopda, Allahdi melipra kalekserepa, adeiki di, sun tupa gam kunkamrume. Tonda, sun kumum mutu peda, mali kupra men deipkamsere. Moupra tenipetepso! Ware keca deiyo tep, Allahdi pepmasertopu, men kupmum pangeda, Allahdi sun ila ati arum kumumyai popra, sikke buktapkamser do?

18 Ange ton moupra tenipetepso! Sun anengda, tek sisi nabi pel doramtengedi, Allahdi er upu sun damai lap pepra deriramtuopda, tek sisi sundi, Allah Yahweh, im deiki tara jen talena malaikat, sun deiyo ngebo kurura tep, er ila puto weik kura cadi, sundi er damai moroptengepa, gekeptudi, melipsetupa, er si eremne ati pumbon neitamai cap, Yerusalem mutu neitamai cap, Yudea tara nimi deiyo kepra talepu ngebo Raja, er ila ati istana pumbon neitamai deiami keca cap, yambulanun tupa akapunge yumada, Babel mutu nengdi akeca dopra, men dubenkamenge. Anabi nengda, Allah er pel dopmanto neng kuptengopda, sundi Allah tep moroptengopda, melipsetupa, Babel mutu nengdi nun tara keca upula men dopropsetenge.

19 – 20 Angeda, ne Allah Yahweh, ^{▼▼Allah – Ibrani upu deiki di, akayat neitamaida, Allah er si tep, ‘Yahweh Sebaot’ pepra seki. Sun kael kemna tep, aupu ‘Sebaot’ deiyongepu, katuai di sekmepu.} im deiki jen talena malaikat yumada, sun deiyo ngebo kununa cadi, neda ila puto weik ngebodi pepsene. Men taruda, Babel mutu Raja nimi deiyo keamu ngebo, Nebukadnezardi Yehuda mutu popra bisbisa kapudi, amutu taleami deiyo neng dubenamu. Ada, amutu deiyo ngebo, Raja Yoyakim erdi deipu ngebo, er pununa ngebo Yoyakin cap, Yehuda mutu yuma cap, ila ati arum dominge Yerusalem mutu cap taleamidi, nimi deiyo kepra, kurami deiyo-deiyo neng cap yumada, Nebukadnezardi ateng koupra douprapudi benamu taruda, amutu mambul keca weika di dalupra doupra dubenamu. Dinino, akeca kankan neitamai di, ton ngeda men dubenamu. Atep, aceida Yerusalem mutu tupa akapmar ngeda, Allah er si eremna ati urasin tara ila ayumnya ingami lyom co cap, ila pala me mau dopra deipinge cap, ame mokon gwepra dubana tep, keteneipi yambul me mau, sepuluh cap, tonda ne Allah si eremna ati neitamai yuk-yuk keca deiaminge yambulanun capda, tupa akapmare. Men taruda, ange yuma dalupra, Babel mutu pumun taruda men dubenami.

21 – 22 Dinino, ne Allah Yahweh, im deiki jen talena malaikat yumada, sun deiyo ngebo kununa cadi, sun Israel yala nesaladi ne sipu eremnenunge, neda sun nai bo Allah kunune. Nedi tek sisi pepsene. Ne Allahdi, ‘Amenda taru, angeda ukupkameng’ tenen, tenemsitopu, Yerusalem mutu ila ati arum dominge neitamai cap, ne si eremna ati neitamai cap, Yudea tara taleamu ngebo, Raja ati pum deiaminge cap, tupa kwamu keca yumada, amenda taru sun Babel mutu nengdi, akeca doupra, Babel mutu dubenkamenge,’ tenepsi. Akeca yumada, Babel mutu dubena deipmengepa, amutu neitamaipu akwamrepane, akeca kalekra talenkamenge. Dinino, ukupra taleamenganen, nedi tenemsi taru konum damai kepyopda, Yerusalem mutupu tamupra duyankamne. Ada, ne Allah si eremna ati neitamai tupa kamo kecada, Babel mutu nengdi keana taru tep dubenkameng dinin, amenda taruda, nedi akeca yuma kange di dopropnedi, tamupra Yerusalem mutupu duyana deipkamne ja.