Jer 28 | XteSC | STEP | Aketeng tamun neitamaipu, Zedekia nimi deiyo ngebo Raja gonga keprapudi, Yudea tara talepra kunmau taru, war pamubari deiki, keteng tamun dumbaringe kepu taruda, nimi si Azurdi deiamu ngebo, er si Hananya nabi ngebo kuramu. Gibeon mutu neitamaida, nabi Hananya pel talepra doramu ngebodi, ne Yeremia damai yana, Allah er si eremna ati damai di lap pepneu. Ada, sun imam-imam neng cap, amutu neitamai kurami nesala cap, sun gekenmaiya neitamai di lap pepneupa, sun yumadi gekepi. Erdi pepneu upuda ake.

Jeremiah 28

Yeremia cap, nabi Hananya cap tep, pepu upu

1 Aketeng tamun neitamaipu, Zedekia nimi deiyo ngebo Raja gonga keprapudi, Yudea tara talepra kunmau taru, war pamubari deiki, keteng tamun dumbaringe kepu taruda, nimi si Azurdi deiamu ngebo, er si Hananya nabi ngebo kuramu. Gibeon mutu neitamaida, nabi Hananya pel talepra doramu ngebodi, ne Yeremia damai yana, Allah er si eremna ati damai di lap pepneu. Ada, sun imam-imam neng cap, amutu neitamai kurami nesala cap, sun gekenmaiya neitamai di lap pepneupa, sun yumadi gekepi. Erdi pepneu upuda ake. 2 Ada, Allah Yahweh ila puto ngebo kuredi, im deiki jen talena malaikat yuma, sun deiyo ngebo kurure. Israel yala nesala yuma tep, melipra kalengrurpa, sundi er sipu eremnunge. Israel nesala, sun nai bo Allah, erdi peipmaser upuda ake.

“Babel mutu nimi deiyo kepra taleamu ngebo, er putoda konum gum kupra deipmane. Nimidi, sapi bisamda, nun wa tu palinkamseng’ tenen, ikin co ketenepra sapi bisam kum damai deriramengtopu, Babel mutu nimi deiyo ngebodi, sun Israel nesala tep kange mun pel dimamseu dinin, angeda, konum gum kupra deipmasene. 3 Keteng tamun butene ton kapul men kupyopda, ataru neitamai dipapu, neda Allah Yahweh, ne si eremna ati pumbon neitamai mawa deiami pel don keca, Babel mutu nimi deiyo ngebo, Raja Nebukadnezardi, upula doupra benamu keca yumada, tamupra duyanedi, akati pumbon deipkamne ja!

4 Ukupkamne taruda, ne Allahdi, Yehuda mutu, nimi deiyo kepra taleamu ngebo, Raja Yoyakimdi deiamu ngebo, er si Raja Yoyakhin, amutu tamupra duyankamne. Tonda, Yehuda mutu nesala, Babel mutu nengdi doupra, sun pe karen mutu dubenami nesala cap, lyepropnedi, tamupra amutu duyankamne. Tek sisi ne Allahdi, Babel mutu talerur nimi deiyo ngebo, Raja Babel cap, er mutu kunge nesala yuma capda, sun puto tek sisi gum kupra deipkamne. Ne Allah Yahwehdi tek sisi pepne.” Allahdi pepu. 5 Yeremiadi aupu konum lap pepu dingeda, upu ton dukdongopra pepu. Ada, er Yeremiadi, nabi Hananya tep upu pepupa, sun imam-imam neng cap, amutu kurami nesala yuma cap, Allah er si eremna ati damai wekmaidi tekmai nesala, sun damai di, aupu pepupa, gekenmai. Nabi Yeremiadi pepu upuda ake.

6 “Kanda nabi Hananyadi peipmaserem upuda, ‘Teka, ange yumada, tek sisi kupkamre ja’ tenen, nedi ‘Amin’ pepsene! Tonda, kanda Hananyadi, ‘Amenda taru ange-ange ton ukupkamre,’ pepmaserem ngeda, ‘Allah Yahwehdi ange kuprepa, katawai kupyopda, ange yuma epra, kael kepkamepe’ tenen, moronkamne ja. Ada, Allah Yahwehdi tek sisi, Babel mutu jen talena nengdi, Allah er si eremna ati pumbon, mawa deiami mambul pel don keca cap, tonda, Israel nesala cap, ateng koupra, Babel mutu bena deiamipa, kange mun kange doupra kurami nesala cap, lyepropnedi, tamupra amutupu duyankamre. ‘Ukupkamre’ tenen, Allah tep pio moronkamne! 7 Dinino, nabi Hananya kan cap, amutu neitamai kunge nesala yuma capda, ne Yeremiadi pepkusen upuda, moupra gekepkurume.

8 Menop taruda, kan cap, ne cap kapul men deiamsei taruda, yuk nabi-nabi neng ton uperami. Ada, “Nun kuramep taru gum dinin, amenda dortaruda, ila kange mun mar podana keca ton nun damai yankamser ja! Ange utopu, amenda taru ikin keca yana kupkamrengeda ake,” pepra uperami. “Ada mar podana cap, kange mun jen keca putana cap, nimi dena tep kange mun pu yala weiknge capda, nun tara cap, yuk-yuk dakunge nesala weik, sun kungai cap, nimi deiyo kepra, taleami ila mutu yuma cap, ila kange mun keca doropkamepe,” perami.

9 Dinino, uperamitopu, ikin keca weik yakaramupa, tupa akurur dinino, tek sisi pepsene. Ware ngebo do, nabi ngebo tenpu di, ‘Amenda kupkamrenge tep, ortaruda, ikin keca yuma gum kuprepa, kange di ton cap pio teleppu kunkamepe. Podana gum dipapu, kange deipra teleppu kunkamepe,’ peprepa, amenda kupkamrenge lap pepre ngeboda, ila mambule. Angebodi aupu pepretopu, konum er peprenge konum nong katuai kupre pangeda, nimi yumadi, anabi ngebo tep nengeda, ‘Uo, tek sisi Allahda, Yahwehdi angebo wepra deipupa, ila mambul tenenange pepsere ngeboda, akonuma’ tenen, kael kemkamepe. Nabi Yeremiadi pepu.

10 Upepu pangeda, ataru dipapu, nabi Hananyadi, Yeremia er kum damai, ikin co koupdongopra deiamu ngeda, doroprapudi aikin kecada, copra tapudi, donoku. Ada, nimidi ‘Sapi bisam di aikin keca er kum damai deipmepepa, akeca gipra baredi, nun wa tu palipkamser’ tenen, ketenemenge keca utopunge copra tapudi donoku. 11 Hananyadi ange konum kupu dingeda, anesala wekmaiya, sun damai di aupu pepu. “Allah Yahwehdi pepmaserada, ange ikin co dopra copra donokmana utopu, amenda taruda, Babel mutu talerur Raja Nebukadnezardi, ikin keca sun nong deiki deipseunge yumada, ne Allah Yahwehdi, doropra gum kupra deipkamne. Nedi sun cap, yuk-yuk mutu nesala cap, lyepra loptapkamsene. Tonda angeda sika di men kupkamne. Ada, keteng tamun butene ton, kapul men gum kupre taru neitamai di, sun tep lyepra loptapkamsene. Babel mutu talerur deiyo ngebo, er puto gum kupra deipkamne ja!” Allahdi pepu upuda, konum lap pepmasene, nabi Yeremiadi lap peipu. Ange konum peipkopda, er nabi Yeremiada, tamupra beu.

12 Nabi Hananyada, nabi Yeremiadi er kum damai deipu gat co konum copra donoku pangeda, ange yuma konum kupupa, sun yuma dakunmaiyanen, amenda taru neitamaida, Allah Yahwehdi, nabi Yeremia damai yana, “Ange kupkurume,” pepu. 13 “Ada ake. Yeremia kanda, Hananya damai bememdi, aupu pepkurume. “Allah Yahwehdi, pepmakerada ake. Ada, ‘Kandi co kumdam koupdongopu ngeda, konum coptapmum dinin, Allahdi tek sisi gat keca, besi keca di punupra deipkamare.’

14 Ada tali tep men pepkene. Deiyoda, Allah Yahweh ila puto weik kuredi, im deiki jen talena malaikat, sun deiyo ngebo ^{▼▼deiyo ngebo – Allah er pe si, tek sisi ngeda, ‘Yahweh’ kurure (Keluaran 3:14). Ibrani upu deiki di, asi er deiyoda, akeca-keca yuma kapul men ketekeipra deiamu taruda, Allah konum akuramu. Ibrani upu deiki di, akayat neitamaida, ‘Yahweh Sebaot’ ton seki. Aupu ‘Sebaot’ deiyoda, ada ‘Im deiki jen talena malaikat yuma talerurdi, sun deiyo ngebo kurure’ tenena tep, seki. Atep nengeda, sun kael kemna tep, aupu deiyongepu katuai di sekmepu. Indonesia upu Allah upu buku neitamaida, ‘TUHAN Semesta’ sengnunge, tonda, ‘Allah yang Mahakuasa’ ton sengnunge. Ange peda telep dinin, aupu tek sisi deiyo akapu ngeda, nundi konum katuai di sekmepu.} kurure. Sun Israel nesala yumadi, er sipu eremrume. Ne Allahda, nedi pepmasenada konuma. ‘Israel yala neng yuma, sun damaida, ikin keca dinin, gat weiknge besi keca di konum ketenepra sun deiki deipmasene. Ukupkamna deiyoda ake. Ukupnepa, sun Israel nesala cap, yuk-yuk mutu kunge nesala capda, Babel mutu nimi deiyo kepra taleamu ngebo, Raja Nebukadnezar, er amutarapu kurumudi, er ikin pel dopra talipu donkamrume. Angepu gum dinin, tonda, tuai gam kure keca, bura tara tali dakuramrenge yuma peda, ange yuma dopra, Raja Nebukadnezar er damaipu konum karepra deipmane. Er dipapu akeca yuma talenkamre,’ pepra, ne Allahdi konum pepsene,’ pepu. Nabi Yeremiadi, Allahdi peipu upu lap pepu.

15 Aupu yuma lap pepu dingeda, nabi Yeremiadi, er nabi Hananya damai, pepu. Upepu dingeda, nabi Yeremiadi nabi Hananya tep, aupu ton dukdongopra pepu.

“Uo, Hananya kanda gekepkurume! Allah Yahwehdi, kan men wepra deipkeudi, nun Israel nesala damai ton men doproipkeue. Atep, kan pe kange deiki dipapu pepsemem upu yumada, mok upupu peserume. Upepmamuma tep, sun amutu Israel nesaladi amok upu tep, konum teka tenekenunge. 16 Ange tep nengeda, Allah Yahweh, erdi kan tep pepmakerada, ake.

“Hananya kan nongda, atuai mutu neitamai di, ne Allahdi gum kupra deipkamakene. Aketeng tamun neitamai dipapu kanda tek sisi depkamareme. Ange kupkamkera deiyoda ake. Ada, kandi amutu nesala tep, ‘Allah Yahweh er upu yanipra bisbisa kaprume. Nedi pepsen upupu gekepra kunkamrume,’ peramumpa, sundi ne Allah tep yaniramneiya tep, aupu pepkene.” Allahdi, kan Hananya tep upepmakere.” Nabi Yeremiadi pepu. 17 Atep Yeremiadi lap peiputopu, aketeng tamun neitamaipu dinin, yoneitam war neitamaida, Hananya depu.