Jer 29 | XteSC | STEP | Ne Yeremiadi surat sekra, Babel mutu neitamai derirbenamipa, tupa kurami nesala tep asurat sekeipsi. Babel mutu tupa kurami nengda, sun imam neng cap, nabi neng cap, tonda pumun taru Yehuda tara kurami neng cap, sun aneng yuma talepra kurami wisi deiyo neng cap tep, surat sekeipsi. Anesala yumada, Babel mutu deiyo ngebo, Raja Nebukadnezardi, Yerusalem mutu di doupra dubenamupa, Babel mutu neitamaipu tupa kurami.

Jeremiah 29

Yeremiadi Babel mutu tupa kurami Israel yala neng tep, surat sekra doproipu upu

1 Ne Yeremiadi surat sekra, Babel mutu neitamai derirbenamipa, tupa kurami nesala tep asurat sekeipsi. Babel mutu tupa kurami nengda, sun imam neng cap, nabi neng cap, tonda pumun taru Yehuda tara kurami neng cap, sun aneng yuma talepra kurami wisi deiyo neng cap tep, surat sekeipsi. Anesala yumada, Babel mutu deiyo ngebo, Raja Nebukadnezardi, Yerusalem mutu di doupra dubenamupa, Babel mutu neitamaipu tupa kurami. 2 Ne asurat seksi taruda, Yudea tara taleamu nimi deiyo ngebo, Raja Yekonya cap, er ner cap, tonda Raja melipra pel dona deiyo neng cap, Yehuda tara nesala cap, tonda Yerusalem mutu tep, yuk deiyo-deiyo pel talepra dorami neng cap, tonda urasin telep keca dona ila kael keami neng cap, sun yumada, Yerusalem mutu tapra, Babel mutu dubenamipa, dakurami taru asuratda seksi.

3 Nedi asuratda seksipa, Yehuda yala neng sun deiyo ngebo, Raja Zedekiadi Raja Babel damai doupra bana tep, Sapan er mi Elasa cap, tonda Hilkia er mi Gemarya cap, sun damai dopra deipupa, abutene nengdi Babel mutu dubereidi, Raja Nebukadnezar tep kareprei. Akarepi suratda, nedi upepra seksi.
4 Israel nesala, sun nai bo Allah Yahweh, ^{▼▼Allah – Ibrani upu deiki di, akayat neitamaida, Allah er si tep, ‘Yahweh Sebaot’ pepra seki. Sun kael kemna tep, aupu ‘Sebaot’ deiyongepu, katuai di sekmepu.} neda im deiki jen talena malaikat yuma, sun deiyo ngebo kunune. Sun Israel nesala yumadi, ne tep, ‘Nun nai ake,’ pepra, ne sipu eremnerume.
Sun mali kumumnge tep nengeda, nedi sun yuma wenepsidi, tapra donoksisipa, Babel mutu nengdi, sun yuma dopra, Yerusalem mutu kuramrumai di tapra, Babel mutu tamupra bena dubenamseipa, ukutaru peda tupa dakurume. Sun tep aupu pepsene.
5 Ukutaruda, sun akunmarum mutu neitamaipu, ati dopkurume. Tonda sun jena tep, wa moupra pepra deipmumdi, yal keca koupkurume.
Koupmumpa, amenda taru bongopredi, nong konum kupyopda, akeca yuma kipra jenkamrume.
6 Angepu gum dinin, tonda sun nerapu ton moupra dopdamumdi, nyapu cap, ner nyapu cap weika di ton, derirumupa, weik kupbankamserure. Ange utopu, sundi derinkamrum nyapu pe, sundi derinkamrum ner nyapu peda, dopdanen bangedi, nyapu weik ton tamakra deipdanen bankamnunge.
Ukunkamruma deiki di, sun Babel mutu kunkamruma neitamai di, nesala denge pio weik kupbankamserure. Sunda nyapu derina gum di, sun yala nesalada, yambul kupbanada gume.
7 Ange gum dinin, nedi sun dopra donoksisipa, bena kunkamrum mutu neitamai, ila ati arum dominge di, kunkamrum mutu yuma tep nengeda, ‘Akunmap mutuda, telep kunkamre’ tenen, dumsisi telep pelpu moupra donkamruma deiki di, amutu-amutu yuma teleppu kupkamre ja!
Tonda, acapu dakumumdi sundi ne Allah tep, ‘Nun akunmap mutu telep kuptue’ tenen, moropnemum pangeda, nedi sun Babel mutu neitamai dinin, dakunkamrumaida, telep kweipkamsene.
Sun kunkamrumai telep kweipsenepa, sun peda, dumsisipu telep kupra kunkamrume.
8 Israel nesalao, neda Allah Yahweh kunedi, im deiki jen talena malaikat yumada, sun ila nimi deiyo ngebo kunune. Sun Israel nesaladi, sun nai bo Allah Yahweh tep, si eremneruma cadi, tek sisi aupu pepra deipmasene.
Sun kunkamruma kan-kan di, ‘Nunda nabi neng kunupe,’ pepra, ‘Dortaruda, angeda ukupkamre-ukupkamre,’ pepra, lap penkamseng nengda, sundi penkamseng upuda, pio men gekenkamrume.
Tonda, isok puto deiki di, asuru kwa nengdi, ‘Ange-ange kupmarada, ukupkamsere,’ pepra, sun damai lap penkamseng neng cap, sun ken mapmengedi nungkameng upu peda, pio men gekenkamrume. Deiyoda, aupu yumada, mok upu di penkamsenga tep, pepsene.
9 Anengdi penkameng upuda, sundi ‘Tek sisi penmange, tenepkamseng’ tenen, tali minin upu deiki di, ‘Gume, Allah er si deiki di pepsepe,’ penkamsenge.
Dinino, ne Allahdi sun aneng tep, “Ukupra aupu dopra perbenkurume,” pepnepa men yana penkamsenge. Ne Allah Yahwehdi aneng men dokotepsisi. Sunda mok upupu penunge.
10 Ange deiyoda ake. Ada, ne Allahdi sun tep pedina upu di pepsene. “Babel mutu dabena kuramrumada, keteng tamun tujuh puluh (70) tahun mapkamrume,” pepra pedina upu di peipsisitopu kupkamrume.
Dinino, aketeng tamun, tujuh puluh tahun konum kupyopda, nedi sun pe mutu sisa tamupra duyankamsene. Ada, nedi sun tep, ‘Sunda ukuprap taru konum mapmumnyopda, Babel mutu di tamupra, sun pe mutu duyankamsene,’ pepra, pedina upu deiki di pepsisitopu, tek sisi kupkamsen ja!
11 Aupuda, tali tep men peptapsene. Deiyoda, ne Allah Yahwehdi sun telep kupra derina tep, ‘Ange-ange kupkamne,’ tenepsi ngeda, pio men luprotene.
Tonda, nedi sun tep, tenemsisi ngeda, ‘Ukupra-ukupra pio telep kweipsene pangeda, pio teleppu kunkamrume,’ tenemsisi. Nedi, ‘Anesalada, mali kweipnedi taptenepa, pio ikinpu kunkamenge,’ men tenepsisi.
Nedi sun tep tenemsisi ngeda, ‘E, ne mawa nesalada, pio telep kupra deipnepa, pio dumsisi teleppu kunkamenge,’ tenepsisa tep, sun Israel nesaladi, angepu tenepmumnyopda, sundi, ‘E, teka, dorkunkamre taru tep, Allahdi telep kecapu karenkamsere, tenemumdi, ne deikipu, sun kange dipru deipneruma deiki di, tenimtona gum di, kange deipra, teleppu kunkamrume.
12 Sun kange dipru yuma ne deikipu deipnerumdi, ne tep teka tenepnemum dingeda, sundi ne tep, ‘Nun nai Allah, melipseo!’ pepra, moronkamnerume.
Ne tep moropnemum pangeda, nedi tek sisi, sundi moronkamnerum keca gekepsenedi, melimkamsene.
13 Ada, sundi ne tep, teka tenepra, sun dipru kange yuma, ne deikipu deipra moropnerumnyopda, sun moroprum keca tep melimkamsene. Sundi, ne tep, ‘Uo, nun nai bo Allah dan cei kurur do?
Erdi pepkamser upuda, moupra gekepmepedi, kael keptepe’ tenen, pio putaprepa, epetepra embamumnyopda, tek sisi kikiman kunkamepe. Kange dipru tenimtona gum di, tek sisi enerumnyopda epkamnerume. Ne Allah Yahwehdi pepsene.
14 Tek sisi pepsene. Tek sisi enerumnyopda, nedi sun tep, go karepsenepa, ne kune keca epra kael kepkamnerume. Tonda, ukutaruda, sun ikin weik kurum dinin, amenda taruda, nedi sun tamupra pio telep kupra deipkamsene.
Tonda, ukutaruda, sun mali kuramrum keca wenemna tep, konum kaukeptapsidi, donoksisipa, yuk-yuk mutu, dana-dana tara kuramenge yala yuk-yuk nesala kan-kan dabena kuramrumnya peda, amenda taru, nedi sun doupra, sun pe kuramrum mutupu, kange di ton cap tamupra duyana deipkamsene.
Aupuda, ne Allah Yahwehdi konum pepmasena cadi, angeda tek sisi nong kupkamre ja!
15 Dinino, ukutaruda, sun Babel mutu neitamai kunmarum nesala kankan di, ton nengda upenunge. “Gume, nun nai Allah Yahwehdi, Babel mutu kunung nesala kankan di, amenda dorkunkamre taru yankamser keca lap pena tep, nabi-nabi neng ton, konum wepra deipseue.
Sun anengdi penkamseng upupu, gekenkamepe,” pepra penunge. Sunda tali upupu penunge.
16 Ange tep nengeda, ne Allah Yahwehdi, ukutaru Yerusalem mutu nimi deiyo kepra, amutu tupa kunge nesala talenmar nimi deiyo ngebo tep, aupu pepsene.
ARaja ngeboda, sun co puna ngebo, Raja Dauddi, amutu taleamu taru neitamai di, ila bungna keca, er si tahkta deiki bungamunge deiki, ataru bungrur ngebo tep, Allahdi peiprepa, sun damai pepkusen upuda, sun gekepkurume. Tonda, Yerusalem mutu neitamai nimi weik kurum nesala tep aupu pepkusene.
Ada sun cap, sun yala neng cap, kikiman Babel mutu neitamai men donoksipa, amutu tupa kurum nesala tep, pepsene.
17 Ne Allah Yahwehdi, ^{▼▼Allah – Ibrani upu deiki di, akayat neitamaida, Allah er si tep, ‘Yahweh Sebaot’ pepra seki. Sun kael kemna tep, aupu ‘Sebaot’ deiyongepu, katuai di sekmepu.} im deiki kunge jen talena malaikat yumada, sun deiyo ngebo kunedi, sun tep aupu pepkusene.
Tek sisi amutu tupa kurum nesala yuma tep, nimi podan keca cap, jen putan keca cap, tonda pu jena deiyo keca karepnepa, sakdanen beredi dena weik kunkamrume. Tonda, sun Yehuda tara kurum nesala deiki deipkamsene.
Nedi akange mun keca yuma dopra, sun nong deiki deipnepa, sun ikin weik kunkamruma tep nengeda ukupmanto upu pepkusene. Ada, nimidi kwarang co du dakra, ‘Jepkun’ tenen, dakmengedi, deipmengepanen, lyupra tong pio weik peramrepa, men jepmanto kununge.
Ukupmengedi, angebodi adu doramengtopu, ne Allahdi sun tep utopu kupkamsene.”
18 Sun amutu neitamai kurum nesala embankamrumai yumada, ne Allahdi epra embenedi, podan keca cap, jen putan keca cap, tonda pu jeredi sakdanen, bana deiyo pu cap, karepkamsene. Nedi sun amutu kurum nesala deiki, ila kange mun keca deipnepa, yuk-yuk mutu nesala yuma epmengedi, kware pio weik kupkamre.
Tonda, sun wenemna tep mali kupra deipsenepa, yuk mutu nesala ban-ban yuma kunge nesala yumadi, “Uo, anengo, Yerusalem mutuda, malipu kuramipa, Allahdi mali pepra wipdongopu mutu ake,” pepra, mali penkamsenge.
Tonda, epsengedi, ‘Uo, uo, yu nengdi anesala popra sikke buktapmangada, kware kupsere,’ tenepmengedi, lukdangedi, ‘Se,’ pepra, kware dangkamenge.
Tonda, sun mali-mali kuramrumpa, nedi sun kaukepsidi, yuk-yuk karen mutu eneprapsidi, dokotepsisipa, yuk mutu nesala yala-yala yuma cap, kikiman kunkamrumai yuma, anesaladi sun tep autupra nalemsengedi, sun mali kweipkamsen nesala yumada, ali weik dangkamrume.
19 Nedi tupa-tupa sun anesala tep, kange mun keca sun deiki derinkamsen nge deiyoda pepkusene. Ada, nedi, ‘Upepkamrume,’ pepra, nabi-nabi neng damai peipsipa, anengdi sun damai yana lap peramsei upuda, sundi pio men gekeramruma tep, menengada, ikin keca sun deiki yarepa doronkamrume.
Ne Allah Yahwehdi aupu pepmasena cadi, angeda tek sisi nong kupkamre ja! Allahdi peipu.
20 Upepu dingeda, aupu ton dukdongopra pepu. Ne Allahdi Yerusalem mutu neitamai kuramrumpa, dopra Babel mutu konum donokamsisipa, dakuramrum nesala yumada, ne Allahdi pepkusen upu gekenkurume.
21 Ne Allah Yahwehdi, im deiki kunge jen talena malaikat yumada, sun deiyo ngebo kunedi, sun tep aupu pepkusene. Tonda, ne Allah kununa cadi, sun Israel yala nesala yumadi, ne sipu eremnenunge.
Nedi, nimi si Kolaya, erdi deiamu ngebo, Ahab cap, tonda, Mahaseya erdi deiamu ngebo Zedekia cap, sundi tali upu peramserei. Abutene nengdi, “Gume, nun nai Allah si deiki di pepsepe.
Allahdi, dorkunkamre taru yankamre kecada, ake-ake,” peprengedi, mok upupu pesenunge. Sun buteneda, pio mali kurerunga tep, nedi sun aneng dopra, Babel mutu talerur ngebo, Raja Nebukadnezar, er buru deiki deipnepa, sun amutu nesala yuma dinmarumai di, Nebukadnezardi sun abutene neng poptaprepa, epkamrume.
22 Tonda, amenda taruda, Yudea tara neitamai di doupra, Babel mutu benamipa, dakuramidi, nyapu deiamyanen, tupa dakunge nesala yumada, ange gekepra kael kepmengedi, penkamenge.
Yuk neng tep, ‘Wipdongopkupe,’ tenepmengedi, aneng tep upenkamenge. “Gume, sunda mali kuruma cadi, nun nai bo Allah Yahwehdi, Zedekia cap, Ahab cap, sun wenemna tep, ila kange mun keca kareputopu, sun tep nengeda, ‘Allahdi karepkamser’ tenen, Allah tep moronkamepe,” pepra, wipdongopkamenge.
Uda, pumun taruda, Allahdi go kareamupa, Babel mutu neitamai taleamu deiyo ngebo, Raja Nebukadnezardi, abutene neng tomopudi, gam kepman uku dongomupa, uku di aneng jepropu.
Atep, Israel nesala dinin, Babel mutu tupa dakunge nengdi, yuk neng sun wenemna tep, aupu penkamenge.
23 Ne Allah Yahwehdi, nimi tuai mutu kunge nesaladi kunge keca yumada, moupra dinuna cadi, nedi sun wenemna tep, ne dinun keca yuma lap pepnedi, upu bokeipkamsene. Zedekia cap, Ahab capdi, pio mali kecapu talepra kuramreiya tep, sun buteneda, sun menenga tep, ila di wenepkamne. Sun butenedi, sun kayapu nengdi konum domi nerapuda, dalupra nyangamrei.
Tonda, nedi sun tep, pio men pepsi dinino, sundi, “Allah si deiki di pepseneme. Allahdi yana peipseupa, nun butenedi, sun Israel nesala tep lap penume,” pepra, tali upu deikipu pertamamrei. Atep, abutene neng wenepra popkamne,” Allahdi pepu.

Allahdi Yeremia damai yana, nimi si Semaya tep, pepu upu

24 Allahdi ne Yeremia tep yana pepneu.

Nahelam mutu ngebo, er si Semaya tep, kandi aupuda er damai adipapu bena pepkurume. 25 “Neda Allah Yahweh, im deiki kunge jen talena malaikat yuma, sun deiyo ngebo kunune. Sun Israel yala nesaladi, ne tep, ‘Nun nai bo,’ pepra, ne sipu eremnenunge. Nedi kan Semaya tep pepkene. Kandi mali kupmum ngeda, ake. Kan pe kange dipapu, kan si deiki di, sun Yerusalem mutu kurami nesala cap, tonda Maaseya erdi deiamu ngebo Zefanya cap, tonda Allah si eremna ati pumbon pel dona deiyo neng, amutu neitamai kurami imam-imam neng cap tep, surat sekra dokotepmume. Asurat neitamai di aupu peipmume. Aupuda ake.

26 “Kanda Zefanyada, imam Yoyada er pel doramunge yo pununa tep, Allah Yahwehdi konum wepra deipmakere. Atep, ukutaruda kandi imam Yodaya, er pel doramu ngeda punupra donkamreme. Apel donkamrum taruda, kanda Allah er si eremna ati kalengna ngebo kunkamreme. Ukupmem dingeda, ware ngebo do yuma, sundi, ‘Neda nabi kununa,’ pepmenge dinin, sunda mutana neng peramengtopu penge nengda, ‘Sepdara benung’ tenen, kandi gat besi tapu, er si rantai di, angebo er yan cap, buru cap, kum damai capda, atapu di getepra koudongonkamrume.

27 Allahdi, ‘Ukupkamre’ tenen, wepra deipkeu dinino, ware keca deiyo tep, Semaya kandi Anatot mutu ngebo, nabi Yeremia tep nengeda, “Kanda, ‘Allahdi pepra derinerepa, er upu lap pena tep, nedi nabi upu penune,’ ada penerum dinino, kanda ange yapkurume. Ukunada, meme,” pepra er Yeremia tep wenepmatum dinin, kandi ange kapul men kupmume. Atep, angeda warya tep do? 28 Angeda tali tep men pepkene. Deiyoda, Yeremiadi nun Yehuda yala nesala dinin, Babel mutu neitamai tupa kunup neng tep, surat sekra dokotepseue. Aseku surat neitamaida, aupu pepra seku. “Sun Babel mutu kunkamrumada, keteng tamun denge pio weik mapkamruma cadi, amutu neitamaipu, sun kunkamrum atida dopkurume. Tonda, sun jen jepra kunkamruma tep, wa peprumudi, yal keca koupkurume. Ukupra kouamumnyanen, wisiprepa, kin taruda, awa di kinkamrum keca dopra jenkamrume,” upepra surat sekeipseu.’ Angebo Semayadi asurat sekra, imam Zefanya tep karepu.

29 Dinino, asuratda imam Zefanyadi, asurat dopropudi, nabi Yeremia er gekenai nukra deipu. 30 Ukupu pangeda, Allah Yahwehdi Yeremia damai yana, pepra deipu upuda ake. 31 Aupuda, nedi sun wenemna tep, Babel mutu neitamai donokamsipa, tupa dakunung nesala, sun gekena tep, surat ton sekra doropra deipkurume. Ukupmemdi sun anesala tep pepkurume.

Allah Yahwehdi angebo Semaya tep nengeda, ‘Ukupkamre,’ pepra, peipneu upuda, sun damai lap pepkusene. Aupuda ake. “Ne Allah Yahwehdi Nehelam mutu ngebo, er si Semaya tep, men pepra deiamsi upu dinin, er pe kange dipapu tali upu deiki di, ‘Allahdi pepmasera,’ pepra sun tep, tali upu doroipseu. Ukupka cadi, sundi aupu gekepmumdi, adipapu teka teneprum dinin, nedi aupu men peipsi. Sunda tali upu cap, minina upu cap, konum gekepmarume.

32 Ange tep nengeda, ne Allahdi Nehelam mutu ngebo Semayada, tek sisi wenepkamne. Ada, Semaya cap, erdi deipupa, dadeipdanen yakarami nesala, er nyapu sisa yuma peda, wenepkamne. Ukupne pangeda, ne Allahdi, ne nyapu sisa, sun Israel yala kurum nesala tep, amenda taru kange di ton cap, telep kupra deipkamsen ngeda, Semanya cap, er nyapsilip cap yumada, sundi ton men epkamenge. Sun, er cap, er nyapsilip cap yumada, depkamenga tepa.

Atep nengeda, ne Allahdi ne nyapu sisa, sun Israel yala nesala tep, kange di ton cap, telep kupra deipkamsen keca yumada, sundi men epkamenge. Deiyoda, ake. Ada nedi men pepsisi upu dinin, tali upu cap, minina upu cap, Semayadi peramnga deiki di, sun gekeprumdi, sun peda, ne upu yaniptapmanto kuprume. Atep, Semayadi ne upu yaniptapneudi, sunda, mali bisi dombana tep, dubenmanto kupseua tep, er menenga tep, er cap, er nyapsilip yuma cap depkamenge, pepne. Uda, ne Allah Yahwehdi apu yumada konum pepmasena cadi, angeda nong tek sisi kupkamre ja! Allahdi pepu.