Jer 3 | XteSC | STEP | Allah Yahwehdi upepu. “Ukupmanto, nimi tenpu ton, ner konum domre dinin, ‘Aner tapkun,’ tenepredi konum tamrure. Ukupra tapyopda, aner yuk neng doropra dopmengopda, men domre ngebodi, tamupra men doproptue. Ange ukuna dingeda, amutu yumada mali kuptue. Israel kanda, yuk nerapu tep weika di mun perumudi, upula nyangdaramruma tep nengeda, ukutaru ne Allah damai tamupra yatum do? Angeda men kuptume.” Allahdi pepu.

Jeremiah 3

Israel nesala Allah tep moupra men teneramya tep, pepu upu

1 Allah Yahwehdi upepu.

“Ukupmanto, nimi tenpu ton, ner konum domre dinin, ‘Aner tapkun,’ tenepredi konum tamrure. Ukupra tapyopda, aner yuk neng doropra dopmengopda, men domre ngebodi, tamupra men doproptue. Ange ukuna dingeda, amutu yumada mali kuptue. Israel kanda, yuk nerapu tep weika di mun perumudi, upula nyangdaramruma tep nengeda, ukutaru ne Allah damai tamupra yatum do? Angeda men kuptume.” Allahdi pepu. 2 Upepu dingeda, aupu ton dukdongopra pepu. Kan asuruda, mutu gondup tara ton erepra dipetepkurume! Dan tara mutu ton, kan kapul men bemumdi, yuk neng domi nerapu cap, kikiman men mapmum do? Ukupmanto kanda, Arab neng katawai mutu kuramidi dirami utopu, kan peda bisi parep tara bukmemdi, ‘Ware ner ton yarepa, kikiman kunkamnem do?’ tenen, kalekra dirume. Ukumemnya deiki di, amutu yuma tep mali kupra derirume. Apepmanada, sun Israel yala nesala yumadi, amalinge kuruma tep, konum pepmasene.

3 Ange tep nengeda, tu telep kuna tep, im deiki di me dokotemrurnge yumada, men dokotepkamre. Tonda, mo im deiki di, amutu tep mo ton pio men karepkamre. Kanda tali nyangameng nerapu urasin utopu kumem dipapu, ali men kukerura tepa. 4 Kan kange mun kupkere taruda, ne tep, “Kanda ne nai bo,” penerume. Atep nedi kan yambul taru dordi dipdongopra ukutaru pe, kan teppu pio tupa tenekenune.” 5 Kandi ne tep upenerume, “Ataru yuma pio yu tenepra men wenepkamnere,” perume. Aupuda kandi uperume. “Uo, Israelo kandi aupu perume.” Upemem dinin, ukutaruda, pio mali kun keca weik kurume.

Israel nesala cap, Yehuda yala neng cap, sun mali kun keca tapra, adipapu Allah damai yakana tep, pepu upu

6 Yosiadi, amutu nesala, sun nimi deiyo ngebo kepra, taleamu taruda, Allah Yahwehdi, ne damai yana upepneu. “Israel nesalada, sun kunge kecada konum epmum do? Ukupmanto, nimi upu, moupra men gekeramre ner kuramretopu, kuredi pel dorur keca yumada, kan konum dirum do? Er anerda, ne taprap beudi, ila di erepra buku mutu dupai cap, co tekamredi, ila bo douramya damai amutara inipra berepa, tali nyarameng ner utopu kurure. 7 – 8 Ne tenepsada, ‘Apel yuma doramyanen, konum tapyopda, tamupra ne Allah damai yatue,’ tenepsi. Dinin men tamupra yatue, ka di pio tali nyangameng nerapu utopu kurure. Adeiyo tep nengeda, nedi er tep dona gum di tapronedi, er aner tep, “Kanda beyo!” pepra enepronkamne. Ange kupnepa, Israel yala neng, sun kabo Yehuda yala ngebo, er peda, ange epkamre dinin, kwar men kupkamre. Er peda ka di, pio tali nyangameng ner utopu kurure.

9 Tonda, pio tenpu ngeda, ali kun keca ton er damai men kurure. Tali nyangna nerapu utopu kupudi, gel cap, co cap tep, “Ne nai Allah,” pepra, si eremrure. Ukurya deiki di, amutuda mali kupra derirure. 10 Akeca yuma konum kupropkopda, Yehuda yala ngebo, ne peipsi upu, moupra gekena gum ngeboda, tamupra ne damai yau dinin, ‘Ne kuramsinge yumada, konum pio tapne,’ men tenepu dipapu, tali tepapu “Ne tapne,” peptapu. Atep aupuda, ne Allah Yahwehdi pepne.

11 Tonda, upepu dingeda, kange di tamupra, Allah Yahwehdi, ne damai yana upepra deipneu. “Israel nengda, ne tep konum dabal kupupa, amnyo karikroi dinin, Israelda, yambul telepe. Dinino, Yehuda yala ngeboda, pio mambul kange doupra men kurure,” pepneu. 12 Allah Yahwehdi, aupuda ne damai yana pepra deipneu. “Kandi Israel mutu nesala, gekenai bena pepkamrume,” peipneu. Aupuda ake.

Uo, Israel nesalao, pio mambul kange doupra men kurum nesala tep pepsene. Tamupra ne damaipu yankurume. Neda sun tep, pio bicau tenena ngebo kunune. Tonda, sun tep tupa yu pio men tenenkamsene. 13 Kandi moupra, ‘Uo, neda, Allah Yahweh damai mali kuramsi,’ tenepkurume. Tonda, ‘Ne nai bo Allahdi peiamu upu, men gekeramsi,’ tenepmemdi, ne damaipu yankurume. Tonda, kan pedi, ‘Uo, ne nai Allahda, men si eremamsidi tapra, ila co tengamnga amutara baramsidi, yuk mutu nengdi, si eremami isok tep, “Ne deiyo keca,” pepra, atali keca si eremamsidi, ne nai Allah kandi ne tep, “Ange-ange kunkamrume,” peiamnemum ngeda, konum yaniramsi,’ tenepkurume. Aupuda, ne Allah Yahwehdi konum pepra deipne.

Sion mutu damai yankameng nesala tep, pepu upu

14 Allah Yahwehdi upepu.

Uo, ne nyapuo, sun yuma pio mali kurumu nesala, tamupra ne damai yankurume pepsene. Sunda ne mawa nesala kurume. Nedi sunda tamupra duyankamsene. Ada, ila ati arum dopra kunung mutu neitamai di, nimi tenpu ngebo ton dopropkamne. Tonda, tenpu yala neng kuramyai di, nimi butene neng dopropkamne. Ukupnedi tamupra, Sion mutu dupaipu yana dopra deipkamsene. 15 Sun anesalada, nedi tenepne nengpu wepra deipsenepa, sundi ne tep deiyo-deiyo neng kepra kungedi, sundi moupra tenepmengedi, dumsisikra peterepsengepa, moupra kael kepkamrume. 16 Amutu neitamaida, sundi deipmumpa, dadeipdanen bankamrum nesala weik kupbangopda, nedi, “Ange kunkamrume, angeda pio men kunkamrume,” pepra deipsipa, sekra deiami co bekin, er sida Peti Perjanjian ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Aco deiki yumada, emas dopra palepra deipi. Aco peti pumbon neitamaida, ila mambul keca weneri deipi. Ada, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu cap, Harundi taleamu maca cap, Allahdi Israel nesala tep kareamu im deiki kwaning, er si mana metekanun cap dopra, apeti pumbon dongopi. Sun Israel nesalada, ‘APeti Perjanjian damaida, Allah Yahweh, er Sambala cap, er puto cap, er dirine cap, er pio telep kurenge yuma capda, aPeti Perjanjian deiki tara pio akunkamsere,’ tenerami. Akeca tep, ‘Pedina Upu Kina Bekin’ peptepe. Akeca kael kemna tep, Keluaran 25:11 dinkurume.} pum tep, ton cap, men penkamnerume. Sun anesaladi, ton cap pio men tenenkamnenge. Tonda apepra deiamu upuda, yuk ton cap putaprepa, “Doupra deipkupe,” men penkamenge.

17 Ukupmenge taruda, Yerusalem mutu tep, “Amutuda Allah er bungnai,” penkamenge. Upepmengedi, ban-ban yuma kunung nesala, bulupra amutu yangedi, ne si yana eremkamnenge. Ukupmenge taruda, sun pe kange dipru neitamai dipapu tenepra, kika deriramidi, si eremamenge kecada, tapmengedi, ton cap men kunkamenge. 18 Ataruda, Yehuda yala nesala cap, Israel yala nesala cap, antapra kikiman tonpa kunkamenge. Tonda, utara dapu mutu dopra donokam neng peda, tamupra yangepa, kikiman tonpa kunkamenge. Sun anesala yumada, nedi sun apu yapu tep, kareamsi mutupu tamupra yana deipnepa, sundi amutu pio talepra, sun mutu sisa kepra kunkamenge.

Allah er nyapu sisadi, tali-tali nyangdaramya tep, pepu upu

19 Allah Yahwehdi pepu.

“Israelo, kanda nedi kan tep dopra, ne mi sisa konum kepra deipkene. Tonda, pio telep mutu, mutu ban-ban yuma tu akapu dinin, pio telep tuai karepkamsene. Ne tenepsi ngeda, kandi ne tep, “Erda ne nai bo,” penkamnereme. Upepnememnyopda, ne damai di tapra men benkamnereme. 20 Dinino, ukupmanto, kanda nimi domre nerdi, er nenge tep, ‘Bicau’ tenen, kange men deriramretopu, kandi ne Allah tep, ‘Ne nai boda, akurure,’ men tenepnemume. Angeda ne Allah Yahwehdi konum pepne. 21 Gekenmamumpa, Israel nesala sun nyapu, katuai ila mutu gon dup katauai bukmangedi, “Melipseo,” pepra, engepmengadi moronkamenge. Ukunkamenga deiyoda, sun pedi, mali kun keca bisipu epra embanga deiki di, Allah Yahweh er si tep, lupronkamenga deiki di engenkamenge. 22 Uo, sun yuma, Allah damai di konum tapra berum nesalada, ka di tamupra, er damaipu yankurume. Erdi sun telep kupra deipseredi, mali keca yumada, daepropseredi, gum kupra deipserepa, er upupu moupra taleprumudi kunkamrume. Ukuprumnyopda, sundi upenkamrume. “Teka, ukuda nun konum tamupra, Allah Yahweh, er damai yape. Atep, tek sisi erda nun nai bo Allah,” penkamrume.

23 Ila mutu gon dup welepra buknedi, “Nun nai bo Allah kuserure,” pepra, tali nong gum keca tep, pingping kange deipra, tupa-tupa si eremamepu. Israel nesala tep, melimyakaramnga deiyo ngeboda, yuk ngebo ton gume, Allah Yahweh er pua. 24 Bahal ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupkada, ‘Baal pepetepmengepa, ikin kuprepa, ‘Bal sisa tenepnung’ tenen, nundi Bahal sekmupke. Si yuk sekmepu dinino aisokda tenpua.} isok, er si eremamepudi kuramupka deiki di, nun nyapu yuma gum kuna cap, tonda pumun taru nun apu yapudi talepra, peirami sapi bisam cap, domba bisam cap yala yumada, konum gum kupropseua deiki di, ali dangamengtopu konum kupseue. 25 Atep nengeda, adeiki di, nun pepu ali dangdankamepe. Tonda, yuk nesaladi, nun tep, “Ukunung nesala,” penkamsenge. Ada, nun cap, nun co puna neng capdi, nun nai bo Allah, er damai pio mali kunupe. Tonda Allahdi pepra deiamu upu tep, nundi teka men tenepmepudi, moupra men talepmepu.