Jeremiah 30
Allah er nyapu Israel nesala tep telep kupra deipkamne peipu upu
1Allah Yahwehdi nabi Yeremia damai yana peipu upuda ake. 2Sun Israel nesaladi si eremrum Allah, neda sun nai bo Allah Yahwehdi, kan Yeremia tep pepkene. Nedi kan Yeremia damai konum peipkesi upu yumada, sekmemdi buku tenpu ketenepra, ange neitamai di deipkurume. 3Ange pepmakena deiyoda ake. Ada, tek sisi doryankamre taruda, ne nyapu sisa Israel nesala cap, Yehuda yala neng capda, nedi sun tep, kange di ton cap tamupra telep kupra deipkamne. Ada, ukutaru sunda yuk karen mutu neitamai kunung dinin, nedi sun co puna nesala tep kareamsi mutupu, sun ataru gam kunung nesala peda, tamupra duyanedi, amutu neitamaipu deipkamsene. Anesala yuma duyanepa sundi amutu tupu talepra kunkamenge. Aupuda, Ne Allah Yahwehdi konum pepra deipsene.” Allahdi pepu. 4Allahdi Israel tara kunung nesala cap, Yehuda tara kunung neng cap, sun tep aupu yumada, pepra deipu. 5Moropsemrepa, berber pengedi, ngolongnung nesala cap, tonda telep kupra men kungedi, kwar weik kurepa, ‘Ware kuptepe do?’ tenen, mali pepra ngolongnung nesala yuma capda, sun upu yumada pengepa, ne Allahdi konum gekenune. 6Atep sunda mouprapmumdi, tenepra kael kepkurume! Nimida mi ton derinung do? Nimidi mi men derinung dinin, sun mutu neitamaida nimi weika di, mi deiyo jeramre nerapu mumdu talepdongopra kuramengtopu kungepa, nedi dinunada, ware keca deiyo tep do? Tonda, nimi sun aso deikida, ware keca deiyo tep pu jeramrepa, nimi urasin kururamretopu kungepa, dinun do? Warya tep, sun amutu nimi yumada kange mun kange doupra kunung do? 7Uo, sunda bicaue! Tek sisi ila kange mun tumi kepkamre ngeda, ato tumida ton pio men kurure. Atumi neitamaida, ne nyapu sisa, sun Israel ▼▼Israel – Anesalada, sun apubo Yakubdi nyapu 12 deiamupa, sundi dadeipdanen yakarami nesala yuma tep, ‘Israel nesala’ pepi. Ada, menop taru, Allahdi er Yakub tep, ukupu si karepupa, angebo er pe si tep ‘Israel’ ton si siperami. Tonda, amenda taruda, Yakub erdi deiamupa, dadeipdanen yakarami yala nesala yuma tep nengeda, ‘Israel nesala’ perami. Dinino, sun yumada, tenpu yala nesala pua. Dinino, Israel yala nesaladi, ‘Nun songe,’ tenepdarami taruda, bokdanamidi, yuk-yuk bena kurami. Sun arah utara kurami nesala tep, ‘Yehuda tara nesala’ perami. Arah selatan tara kurami nesala tep nengeda, ‘Efraim tara nesala’ perami. Ton Allah upu buku neitamaida, akayat neitamaida, ‘Yakub’ sengnunge, ton bukuda, ‘Israel’ sengnung dinin, tek sisi sun tenpua. Angetopu, ton buku neitamai, ‘Efraim’ tonda ‘Yakub’ sengnungaida, ton buku neitamaida, ‘Israel’ sengnung dinin, sun tenpua.
nesalada, kange mun kange doupra kupkamenga cadi, kwar weik kupkameng dinin, nedi sunda ataru neitamai di lyepropkamne. 8Neda Allah, ila puto ngebo kunedi, im deiki jen talena malaikat yumada, sun deiyo ngebo kununa cadi aupu yumada pepsene. Ne nyapu sun Israel nesala tep, aupu pepra deipsene. Ne tenemsi tumi konum kepyopda, yuk nengdi, ikin keca sun nong deiki deiami ngeda, nedi dopra loptapkamsene. Tonda, gat keca er si besi di, besi rantai tapu di ne nyapu ateng koupdongominge peda, nedi dopra loptapkamne. Ataru di dipra, doryankamre taruda, yuk-yuk mutu nimi bo nengdi, sun deiki ikin keca ton cap men deipmengepa, sun amutarapu pel men donkamenge. 9Sundi ne Allah Yahweh tepapu pel donkamnenge. Tonda Raja Dauddi deipupa, dadeipdanen, yakarami neng kan-kan di, nedi nimi deiyo neng ton wepra deipnepa, aRaja neng dipapu, ne nyapu Israel nesala talepmengepa, sun amutara telep pel dopra kunkamenge. 10Atep nengeda, ne nyapu sisa Israel nesalao, sun kwar kuna gume! Ne amutara pel don ngebo Yakubdi deipupa dadeipdanen yakaramrum nesala peda, sun kwar-kwar kuna gum di, ‘Ware kuptepe do?’ pio men tenenkamrume. Sun cap, sundi deipmumpa deipdanen banung nesala cap, sun nyasilip cap, sun tara nesala yuma capda, ne Allahdi lyepropkamsene. Ada, sun podan nengdi popseidi, doupra pio karenai bena deiamseipa, dakurumai di, nedi lyepropkamsene. Ukupsenepa, sun apu bo Yakubdi deiamupa, dadeipdanen yakaramrum nesalada, melipra lyepropkamsena deiki di, sun tamupra yamumdi, sun tep kareamsisi mutupu yana, pio dim pepra kunkamrume. Amenda taruda, ton cap kwar men dangkamrum dinin, teleppu kunkamrume. Yuk-yuk mutu nesala yuma peda, sun tep mali men kweipkamsenge. 11Angeda tali tep men pepsen dinin, deiyoda, ne dipapu sun tep yana lyepropsenedi, sun cap kikiman kunkamepe. Nedi sun wenemna tep, yuk-yuk mutu neitamai enepra dokotemsisi mutu nesala yumada, wenepra popne dingeda, sikke buktapkamne ja! Dinino, sunda ne nyapu sisa, ne mawa nesala kuruma cadi, kange di ton cap enepra donoknepa, yuk-yuk mutu neitamai pio men bena kunkamrume. Sunda pio tep akunkamrume. Ukupkamsen dinino, sunda menop taru mali-mali weik kuramrum keca tep nengeda, tek sisi wenepsenedi, menenga keca karepkamsene. Tek sisi sun mali kuramrum kecada, tali lupra men kaukepkamne. Amali kuramrum keca tep, ‘Dakwapye,’ men peptene. Ange gum dinin, sun mali kuramrumtopu, sun menenga keca ton, wenepra karepkamsene. Dinino, ukupra wenepsenedi tamupra telep kuipkamsene. Nedi sun Israel nesala tep nengeda, men gum kupra deipkamsene. Aupuda ne Allah Yahwehdi konum peipmasene. 12Neda sun nai bo Allah Yahwehdi ne nyapu tep pepsene. Sun pu pio weiknge jeserura cadi, sun susu jeserurnge tep, kwetepra deipmanto obat ton men kwapmare. Tonda, kwetena deiyo nengdi, sun tep men kwetepsetenge. 13Tenpu ngebo peda, sun damai yasetudi, ‘Sun anesala lyemna tep, melipkune’ tenen, men pel dopsetue. Tonda, sun suse kwetedina tep, obat ton men deipsetue. Atep, ‘Nun kange mun kupsere ngeda, angebodi gum kupra deipredi, tamupra telep kweipkamser ja,’ pio men tenenkamrume. Sun telep kemdina keca cap, nimi capda, pio men kupmara tepa. 14Menop taru, sun tep bicau tenemseidi, ‘Nun dipapu sun melipra lyepropkamsepe,’ pepra, kange deipdanamrum nesala yumada, sunda konum lupropseidi, bendopye. Sun ayuk-yuk mutu nesaladi, sun Israel nesala tep, ton cap tamupra pio men tenimkamsenge. Sundi, ‘Anengda dakwapye,’ konum tenesenunge. Ange peda, tali tep gum dinin, deiyoda sun mali weik kuramrumnge tep, ne Allahdi sun tep yu kupneupa, ‘Ila ikin keca karepkune’ tenepsidi, sun pona tep neng, go karepsipa, puto di popseia deiki di, wenepsisi. Sundi mali kun keca weik kuramruma tep nengeda, walito wenepra popsisi. Ada, sundi pio mali weik kuramrumnge cap, mali-mali keca talepra, pel doramrumnge cap tep, ila ikin wenemna keca karepsisi. 15Ange tep nengeda, sunda, ware keca deiyo tep, sun ikin kuserur keca tep, ‘Uo ware keca deiyo tep, Allahdi kange mun keca karepseupa, ikin weik kunup do?’ pepra ngolongmarum do? Sun pu cap, kange mun kange cap kuserur ngeda, men kaikmanto kurure. Atep, sundi, ‘Uo, kaikropsetue,’ men tenenkamrume. Ada, sundi pio mali weik kuramrumnge cap, mali-mali keca talepra, pel doramrumnge cap tep, ila ikin wenemna keca konum karepsisi. 16Dinino, ukutaruda, sun tep palupronamsei neng yumada, nedi sun tep palupronkamne. Tonda, sun pona tep neng yuma, ‘Israel nesala yuma popra, sikke buktapkamepe’ tenen, poryakaramsei neng yumada, nedi poptapra sikke buktapkamne ja! Ange utopu, nedi go karepnepa, sun pona tep neng yumada, yuk mutu nengdi popmengedi, ateng koupdongopra sun pe karen mutu dubena deipkamenge. Ne dipapu aneng enepra donokamne. Tonda, sun mutu yana popseidi, sun taleramrum bung keca yuma dalupra dopropidi, dubenami neng yumada, yuk mutu nengdi, anesala popmengedi, sun talenung bung keca yuma dalupra dubenkamenge. Ange utopu, ware mutu nesala do yuma, sun Israel nesala tep, ‘Ayala nengda, popkamepe,’ tenemsei nesala yumada, nedi go karepnepa, yuk-yuk mutu nengdi, anesala tep sun damai yana popkamenge. Deiyoda, sun deiki ikin keca derisenung nesala yumada, ne Allahdi sun deiki tamupra ikin keca derinkamne. 17Ange-ange yuma ukupkamna deiyoda ake. Ada, sun tep mar peamsei nesaladi, ‘Gume, sun Israel nesalada, pio mali nesala cadi, yuk-yuk mutu nesala yumadi, sun tep, ‘Aneng cap kikiman men kunkamepe. Sun yuke! Allahdi anesala konum bura mutu donoku! Tonda, sun Sion mutu ▼▼Sion mutu – Ibrani upu neitamaida, ‘Sion mutu’ seki dinin, asekinge deiyoda, tek sisi Yerusalem mutu tep seki. Sion perami ngeda, ada pumun taru amutu si tep perami dinin, ukutaruda, amutu tenpu tep, Yerusalem mutu penunge. Allah upu neitamaida, amutu si tep, si butene penung dinino, amutuda, tenpua. Atep, ‘Sion’ epmumnyopda, ‘E, ada Yerusalem mutu tep seki,’ tenenkamrume.
kunge nesalada, yuk mutu nesala yumadi, ‘Nun songe,’ tenenunga tep, pio moupra men kalengnunge,’ pepra, nyek-nyek peramsei. Upepra mali upu peramsei dinino, ukutaruda, ne Allahdi sun Israel nesala tep, tamupra telep kweipkamsene. Tonda sun ikin kuserur nge cap, sun susu jeserur nge cap yumada, ne dipapu obat deipsena deiki di kwetepsenepa, kaikropkamsere. Allahdi sun Israel nesala tep, pepu. 18Upepu dingeda, Allah Yahwehdi aupu ton cap yana, upu pepra deipu. “Nedi sun Israel nesala tep pio bicau tenesenune. Atep nengeda, nedi sun kunkamrum mutu tuaida, tamupra karepsenedi, telep kweipkamsene. Yerusalem ila ati arum domi ngeda, yu nengdi urupra sikke buktapi dinin, ne pel donkamna deiki di, akatida, ka tamupra er mutu buma deiki deipmengedi, tamupra betaipkamenge. Tonda, amutu Raja ngebo kuramu ila telep atida, er si istana peda, uruptapi dinin, akati peda lepsisikra telep kweipkamenge. Tonda, ‘Akatida, aceipu pio akunkamre,’ tenemsaipu, lepsisikra dopkameng ja. 19Amutu neitamai di kunkameng nesalada, pio kange deipmengedi, ila upu penga deiki di, sundi ne tep, ‘Naio telepe,’ pepra gispal donengedi, kange lon mut penkamenge. Nedi sun telep kupra deipnepa, yuk mutu nesala yumadi sun tep, ‘Uo, sunda tek sisi mambul neng,’ pepmengedi, gispal donkamenge. Tonda, sun Israel nesala tep, ‘Sunda malipu kununga tep, dakwapye,’ pepra, mali upu pio men penkamenge. Tonda, menop taruda, nimi gungda metek kepbarami dinin, amenda taruda nedi sun tep telep kweipnepa, anesala sun gungda, men nukmanto, pio weik kupbankamenge. 20Ataruda, nedi telep kweipsenepa, sun mutu nesalada, pumun taru nesala weik kareamsipa, gung pio weik kuramitopu kupra deipnepa, sun nyapu peda, men di kuramitopu, nyapu weik deipmengepa, dadeipdanen yakankameng nesala pio weik kupbankamenge. Tonda anesala sunda, ‘Ne nyapu sisa pio kunkamnenge’ tenen, puto keipnepa, sunda pio tep, telep kunkamenge. Tonda, ware mutu nesaladi do, sundi Israel nesala deiki ikin keca deriramenge nengda, nedi sun anesala deiki peda, pio ikin keca deipra wenepkamne ja. 21– 22Amenda taru yumada, sun amutu kunkameng nesala talenkameng deiyo nengda, sun pe mutu neng kankan neitamai dipapu, nimi deiyo kepra taleprepa kunkamenge. Er animi deiyo kepra talepkamser ngeboda, ne damai tali lupra yakankamre. Nedi er tep upupne pangeda, adipapu ne damai tali lupra yakankamre. Ne sipu eremkamnere. Sun ton tenepetepso! Ada, nedi go men kareptene teptoda, ware ngebo ton er pe kange dipapu teneptudi, kika deipra ne damai yatu do? Gume, ada men kupmanto. Ataruda, sun Israel nesalada, ne nyapu sisa keipsenepa kunkamrume. Tonda, neda sun nai bo sisa kunkamsene.” Aupuda, ne Allah Yahwehdi konum peipsene.” Allahdi pepu. Aupu gawal dangna tep, pepu upu
23– 24Sun yuma moupra diso! Ukupmantoda, Allah Yahweh er yuda, ila mungna mungamretopu kupra, mali kunung nesala, sun wenemna tep, Allah er ila yu kure ngeda, sun mali kuramenge nesala, sun giso deiki menmena yarepa, doronunge. Tonda Allah er ila yu kuprepa, erdi, ‘Ange kupkamne,’ teneamu ngeda, ateneamretopu kupra, pel dopredi gawal dangkamre. Ukutaruda, akeca tep, yambulanunpu moupra tenerum dinin, amenda doryankamre taru, sirya taru neitamaida, Allah er nyapuda, ange kuprepa epmengedi, tek sisi nong neitamainge moupra kael kepkamenge. Allahdi nabi Yeremia tep upepu.
Copyright information for
XteSC