Jer 31 | XteSC | STEP | Allah Yahwehdi, sun Israel nesala yala-yala yuma tep pepu. “Sun mali weik kuramrum keca kunumna tep, ila di wenepkamsene. Wenepsenedi, go karepnepa, yuk karen mutu nesaladi, yana popbisipsengedi, gam tupa kunkameng nesala yuma, ateng koupra dubenkamsenge. Sun pe mutu tamupra dubesengepa, dakuramrumpane, amenda taruda, ne Allahdi sun tep lyepropkamsene.” Allahdi peipu. Upeipka tep, Israel nesala lyepropkamre taru tep aupu peipu. Allah er si Yahwehdi aupu peipu. “Doryankamre taruda, Israel nesala yala-yala yumada, ne Allahdi sun ila deiyo ngebo kunkamne. Ukupnepa, sunda ne nyapu sisa utopu kupmengedi, ne sipu eremkamnenunge,” peipu.

Jeremiah 31

“Israel nesala tamupra, sun pe mutupu bena kunkamenge,” pepu upu

Allah Yahwehdi, sun Israel nesala yala-yala yuma tep pepu. “Sun mali weik kuramrum keca kunumna tep, ila di wenepkamsene. Wenepsenedi, go karepnepa, yuk karen mutu nesaladi, yana popbisipsengedi, gam tupa kunkameng nesala yuma, ateng koupra dubenkamsenge. Sun pe mutu tamupra dubesengepa, dakuramrumpane, amenda taruda, ne Allahdi sun tep lyepropkamsene.” Allahdi peipu. Upeipka tep, Israel nesala lyepropkamre taru tep aupu peipu.

1 Allah er si Yahwehdi aupu peipu. “Doryankamre taruda, Israel nesala yala-yala yumada, ne Allahdi sun ila deiyo ngebo kunkamne. Ukupnepa, sunda ne nyapu sisa utopu kupmengedi, ne sipu eremkamnenunge,” peipu. 2 Ne Allah Yahwehdi upepsene.

Yuk karen mutu nesala, yu nesaladi, ne nyapu Israel nesala men poptami nengda, nimi men kupmanto mutu, me pio gumai, katuai mutu neitamai dakurami. Dinin, amutu neitamai di depropipa, Israel nesaladi, ‘Nunda dan mutu betepedi teleppu kutepe do?’ tenen, eramidi, ne tep mororamnei nesalada, ne Allahdi sun tep, dipru karepnerepa lyepropnedi, telep kupra deipkamne.

3 Israel nesaladi, ‘Uo, nun telepai kutepe’ tenen, engepra dirami nesalada, mororamipa, ne Allahda, pio ila karenai kuramsi dinin, sun damai jenek kupra yanamsi. Sun tep upepsi.

Ada, uo sun Israel nesala tep, pumun taru di, sun tep pio bicau teneramsisidi, men tapkamsene. Atep, ukutaru di dipdongopra, doryankamre taru yumada, sun tep bicau tenesenedi, pio kalekra tupa melimkamsene. 4 Nedi, amenda taru sun tep melipsenepa, telep kupra kunkamrume. Sunda, nedi pumun taru taleamsesipa, telep kuramrumtopu, amenda taru peda, melimsenepa teleppu kunkamrume. Sun ati arum yuma, kange di ton cap lepsisikra dopmumdi, amutu kunkamrume. Tonda, amenda taruda, sun bung-bung pena, er si rebana doupmumdi, kange deipra mut penkamrume. Sun cap, sun kayapu nesala cap, pingpinga kange deipra mut penkamrume.

5 Ukuprumudi, sun anggur tapu wada, kange di ton cap, Samaria mutu deiki wa pepra kunkamrume. Awa peprumupa, du moupre pangeda, awa pena deiyo neng dipu du dakra, purupmengedi, me gwepra jenkamenge. Yuk nesaladi gume. 6 “Ange yuma ukunkamrume,” pepmasenada, mesum tep men pepsene. Deiyoda, tek sisi ne tenepsi taru konum kupre pangeda, amutu kalengna nesala kan-kan, tenpu ngebodi Efraim mutu neitamai upupkamre. Ada upepkamre. “Sun yuma yakaso. Nun yuma kange di tamupra Sion mutu benkamepe. Ada, nun nai bo Allah, er si Yahweh, er si eremna ati damai bepedi, er si eremkamepe,” pepra upupkamre. 7 Ange yumada, mesum tep men pepsene. Ne Allah Yahwehdi upepsene.

Sun Israel yala nesala yuma cap, yuk mutu nesala yuma capda, sun yuma kange deipra mut penkamrume. Ada, sun Israel nesala tep nengeda, nedi pio telep kupra deipkamsena tep, kange deipra mut penkamrume. Tuai mutu neitamaida, nimi yala-yala weik dakunung dinin, ila mambul yala nesalada, ne nyapu Israel nesala kununge.

Atep, sunda mutu ban-ban yuma dakurumu nesala yumadi, ila upu deiki di, kange deipra upenkamrume. “Nun nai Allah, kanda Yahweh kurume. Kandi, pumun taru di wepra deiamum nesala, ‘Sun Israel nesala yala-yala yuma, tupa gawal gam akunge nengda, lyepropkamrum’ tenen, moropkepe.” Atep upepsene, sun yuk mutu kurumu nesala yumadi, Israel nesala tep, kange deipmumdi mut pepra, sun Israel nesala tep gudinkamrume.

8 Ne Allah Yahwehdi pepne. Mutu sirik utamna dakunung nesala cap, mutu sirik, im sirik dana-dana tara dakunung Israel nesala yuma cap, tamupra duyanedi, sun yuma bupra tenpuaipu deipkamne. Sun Israel nesala dopra yakane taruda, tali nesala cap, yo mali neng cap, asuru puna neng cap, tonda mi kapul deipmange nerapu dinin, mumun douamenge nerapu cap, sun yuma melipra duyakankamne. Kikimanpu yakankamenge. Ukupkameng taruda, amutu neitamai kunkameng nesala, denge pio weik kupbankamenge.

9 Sun bisi yakankameng taruda, pio telep kupra melipnepa, kange deipra engepyankamenge. Pingpinga kange doupra, engepyakankameng taruda, nedi sun tep meliprapnedi, ban telep bisipu doupra yankamne. Ukupnepa, sun yan giso gel men dukamre bisipu yakankamenge. Tonda, pio telep me weik kapuaipu doupra yankamne. Ukupnepa Israel nesalada, telep kupra yakankamenge. Ada mesum tep gume. Neda, sun nai bo Allah kununa cadi, Israel yala nesala tep nengeda, ‘Ne nyapu sisa,’ tenenune. Tonda, Efraim yala nesala tep nengeda, nedi, ‘Sunda, ne menmena taru deipsi mi utopu, ila mambul mi kurume,’ tenesenune. Atep, ne mi du ngebo utopu neng kunkamenge. Allahdi pepu. Upepupa, Yeremiadi pepu.

10 Ban-ban yuma kurum nesala yumada, Allah er si Yahwehdi pesere upu gekepso. Tonda, sundi Allah pere upu douprapmumdi, ila laut mokon goupra, ortara mutu peda lap perbenkamrume. Sun laut mokon pirman kunge nesala yuma peda gekenkamenge. Upenkamrume. “Pumun taruda, sun wenemna tep, Israel nesala yala-yala yuma konum yawaraptamupa, yuk-yuk mutu dabena kurami nesala yuma, ataruda tamupra, sun pe mutupu duyana deipkamre. Ukupmantoda, domba bisam peina deiyo nengdi, sun domba bisam tep, telep kupra kalengamengtopu, Allahdi sun Israel nesala yuma tep, moupra kalengkamsere.” Aupu doupra, lap perbenkamrume. 11 Ada tali tep men penkamrume. “Deiyoda, Allah er nyapu Israel nesalada, yuk karen mutu neng, nimi pio puto weik nengdi taleamipa, men lopdanmanto kuramipane, ukutaruda Allah Yahwehdi konum lyepropmare,” pepra lap penkamrume.

12 Allahdi Israel nesala lyepropre pangeda, sun anesala Sion mutu deiki yangedi, ataruda kange deipra pingpinga di, telep mut pepyakankamenge. Ada, Allahdi sun kun keca telepnge yuma kareprepa, ange deiki kange deipmengedi, kange lon mut penkamenge. Allahdi sun tep karenkamre kecada ake. Jagung utopu keca, er sida gandum cap, anggur tapu du cap, anggur du taikra, anggur jen me gwepkamenge cap, tonda sapi bisam cap, domba bisam cap, kambing bisam cap yuma karepkamre. Ukuprepa, sun mutu cap, sun cap, pio telep kunkamenge.

Ukupmanto ngeda, nimidi koun keca mekinai kweipmengepa, bo telep kuramretopu, sun kunkameng keca yumada, ton pio men gum kunkamre. Teleppu kuredi weik kunkamre. Ukupra kunkamra cadi, ka di ton cap ikin men kunkamenge. Telepe pu kunkamenge. 13 Ataruda, ikin kange douna pio gum dipapu, kaber nerapu yuma, kange deipra mut semkamenge. Ukupmengepa, wisi neng cap, kaber neng cap, sun tonpa kange derinkamenge. Yeremiadi pepu.

Upepudi aupu ton pepu. Allahdi upepsere. “Ne Allahdi sun Israel nesala tep, kange telep kupra deipkamne. Ada, menop taruda, ikin kupupa, malye pepra engerami dinin, ukutaruda, nedi sun melipnepa, kange deipra teleppu kunkamenge. Ataruda, kange mun kange dounung ngeda, nedi tamupra telep kupra deipnepa, kange teleppu kunkamenge. Tonda, mali kange dounun ngeda, nedi tamupra pingping kange keipnepa, teleppu kunkamenge. Ada, nedi sun dipru kwa dipnepa, sun kange deipra kunkamenga tep pepne.

14 Ukupnedi, ne si eremna ati talepra, akati pumbon pel dona deiyo neng, imam-imam neng, sun jen kecada, weika di yamupra karepnepa, sun damai dinipkamre. Tonda, ne nyapu Israel nesalada, sun putapre kecada, yamupra karepnepa, dopra jepmengepa boupkamenge. Kange deipra teleppu kunkamenge. Ada, ne Allah Yahwehdi pepsene,” pepu.

Allah Yahwehdi Israel neng tep bicau tenepredi, lyepropkamra tep, pepu upu

15 Allah er si Yahwehdi pepu. “Menmena taruda, ikin keca weik, sun Israel nesala deiki yankamre. Ukupre pangeda, mutu si, Rama mutu kuramu ner, er si Rahel, er nyapu yuma poptapmengepa, depropmengopda, pio bicau tenen, dipru kareprepa engenapu kunkamre. Pio engeprepa, yuk nengdi, er dipru men kwa dipmanto kupkamenge. Ada, er nyapu yuma poptapmengepa, ‘Uo, ne nyapu yumada, konum poptapra gawal dakmange. Tenpunge peda, gam men kunkamenge,’ tenepredi, engenapu kunkamre.

16 Engenapu kunkamre,” ne Allah Yahwehdi pepkene. “Kan engenmarem ngeda, asim daepropmempa kalapkere. Kan ikin kange doupmarem ngeda tapkurume. Kan nyapuda, sun podan nengdi tomopra wenemna ati deipi ngeda, tapmengepa, amutu tamupra yakankamkeng ja, pepkene. Ne Allah Yahwehdi pepkena cadi, tek sisi nong kupkamre ja. 17 Dorkunkamre taruda, kan nyapu teleppu kunkamenge. Ada, ukutaruda, yuk karen mutu neitamai kunung dinin, ‘Amenda taruda, kan nyapu sun mutupu tamupra yakankameng,’ pepkena cadi, engena yapkurume, pepkene. Ne Allah Yahwehdi pepkene.” Allahdi pepu.

18 Upepudi aupu ton dukdongopra pepu.

Ne nyapu Israel nesala, sun kange mun kuprepa, moronung ngeda gekenune. Ada upenunge. “Uo, nun nai Allah, nun mali kuramepupa, kandi nun wenemna tep, ikin keca weik kareramsemumpa, awenemnange yuma doproamepu. Ukupmantoda, nunda nimidi derina gum keca, bura tali gam kurameng keca utopu kuramepu. Dinino, ukuda kandi, ‘Dumsisi kunangepu kutenge’ tenen, peteremserume. Adeiki nun mali kunup keca tapra, ‘Kan damaipu tamupra yankamep’ tenen, ketenemnupe. Atep nengeda, nun nai bo Allah, kanda Yahweh, kan pedipapu nun doupra kan damai duyaserume,” pepra moropi.

19 Tonda upenunge. “Uo, nundi Allah kan tep, konum amnyo keamkemepu. Dinino, nun amali kuramepu ngeda, ‘War keca deiyo tep nun nai bo Allah tapmepudi, amalinge kuramepu do?’ tenenupe. Ada, nun mali kuramepunge kael kepsemumdi, wenepsemuma tep, Allah kandi wenepsemuma deiki di kael kepmepu. Ukupmepudi, ‘Teka nunda ila mali kuramepu neng’ tenen, kan amutara kunupe. Adeiki di nun kaber taru mali kuramepunge tep, kwar kupserepa ali dangnupe.” Israel nesaladi pengepa gekenune. Allahdi pepu.

20 Upepudi aupu ton pepu. “Israel nesalao, sunda ne tupa bicau tenesenune. Sunda pio ne dipru neng kurume. Sun wenemna tep, ‘Ne damai tamupra yankameng do?’ tenen, ila ikin keca sun nong deiki derisenun dinin, atau peda nedi sun tep, tupa bicau tenesenuna cadi, nedi sun tep pio bicau tenesenune. Sun mali kurum keca tep, tali lupra poptapsetene dinin, sun tep bicau tupa tenesenuna cadi, poptapra gawal men dakamsene.” Ne Allah Yahwehdi pepsene. 21 Upepudi aupu ton pepu. “Sun embaramum bisai yumada, peten kemne keca tep, co ikra deipkurume. Ukupmumdi sun pumun taru yakaramrum bisida, ‘Dan bisi di yanamepu do?’ tenen, moupra tenenkamrume. Ada, ange betapra kael keprumu dingeda, sun Israel nesala yumada, ne dipru ner utopu kuruma cadi, sun pumun kuramrum mutupu, tamupra yana kunkamrume, pepsene.”

22 “Israel nesalao, sun ware kuprap taru ton cap, dakurumudi, ‘Allah er damai tamupra benkamep do, gum do?’ tenen, tupa wang-wang peserur do? Sunda ne peipsesi upu moupra men taleprume. Ukupmantoda, tenpu ngebodi deipu ner mi, er nai bo tep mok upu pepredi, tapra mali mutu baramretopu kurume. Dinino, neda Allah Yahwehdi, tuai mutu neitamaida, ukupu keca ketenepra deipkamne. Ada, kange di ton cap, go ton karepne pangeda, Israel nesala yala-yala yumadi, ka di ton cap, ne damai tamupra yangedi, ne tep kange deipra teleppu kunkamenge. Ne talepra ne sipu eremkamnenge.” Allahdi sun Israel nesala tep pepu.

Doryankamre taru, Israel nesalada teleppu kunkamenga tep, pepu upu

23 Israel nesala, sun nai bo Allah Yahweh, akeca-keca yuma taleredi, im deiki jen talen malaikat yuma, sun ila deiyo ngebo kurur ngebodi aupu pepu. “Neda, Israel nesala tep pio kalekra melimamsisi. Ne nyapu Israel nesala pumun taru taleamsitopu kupra talepkamne. Ukupne pangeda, Yehuda yala nesala kunge mutu neitamai dinin, Yehuda yambul ati arum dopra kunge nesala yumadi, kange di ton cap upenkamenge. ‘Uo, Allah er si Yahwehdi telep kupra deipserepa, nun kun keca yumada pio teleppu kunkamsere. Yerusalem mutuda, mali kun keca men kurepa, pio dumsisi kun kecapu kurure.’ Amutuda, Allahdi, ‘Ne mawa mutu’ tenen, wepra deiamu cadi, ‘Amutuda pio telepe,’ penkamenge.

24 Ne Allahdi anesala cap, sun mutu cap, telep kupra konum deipne pangeda, sun Yehuda yala nesala yumada, amutu neitamai, ati arum dopra pio akunkamenge. Sun yuma cap, tonda wa pena nesala cap, domba bisam cap, kambing bisam cap, sapi bisam cap, akeca yuma peina nesala cap, kikiman amutu neitamai kunkamenge. 25 Sun anesala kan-kan, ware nesala do yuma, sundi, ‘Uo, nun men kuptepe,’ tenen, puto boun kupre nesala yumada, nedi puto kemdinkamne. Tonda jen putaprepa, giso biri-biri penge nesalada, jen keca karepnepa, ka di ton cap puto kunkamenge.” Allahdi peipupa Yeremia gekepu.

26 Yeremiadi aupu gekepudi, adipapu ken mapu dinin, ka di ton bukroudi upepu. “Ne mapmanua ngeda, telep kupra mapsa cadi, telep kupra deipneupa, ne kange deipsi.” Yeremiadi pepu.

27 Allahdi peipupa, Yeremiadi, seku. Allahdi pepu, “Ne Allah Yahwehdi pepne. Ne tenepsi taru konum kupre pangeda, Israel nesala kunge mutu cap, Yehuda nesala kunge mutu cap yumada, nedi karepnepa, anesaladi peirameng keca pio weik kupbankamre. Tonda, nedi puto karepnepa, amutu nesaladi nyapu deipmengedi dadeipdanen, baramenganen, nimi denge pio weik kupbankamenge. Ukupmantoda, nimidi, ‘Koun keca weik kupkamre’ tenen, yal keca weika di kouamengtopu, nedi karepnepa, sun nyapu cap, sun peirameng keca cap weik kupbankamre.

28 Tonda, pumun taru nedi, sun Israel nesala yala-yala yumada, mali weik kuramipane, nedi ila ikin wenemna keca, sun nong deiki deriramsi. Ada, kwenena cap, urumtamna cap, bisbisa kamna cap, pona cap, gawal dangna cap, mali kudina cap, ila kange mun keca weika di kareramsitopu, amenda taruda, pio telep kupra melimkamsene. Ada, nedi Israel nesala tep moupra dinedi, telep kupra melimnepa, sun ati arum lepsisikra donkamenge. Tonda, sundi wa pepra koun keca kounkamenge. Atep ukutaruda, nedi sun melipra talenepa, pumun telep kuramitopu, amenda taru peda, teleppu kunkamenge. Angeda, ne Allah Yahwehdi pepsena cadi, nong tek sisi kupkamre.

29 Ukupkamne taruda, ka di ton cap aupu men penkamenge. ‘Wisi neng sun co du dakra jeamengepa, adeiki di, sun nyapu si engengkunge,’ pepra men penkamenge. ^{▼▼si engengkununge – Aupuda, domon upu deiki di pepu. Aupu deiyoda, sun nai yapudi mali weik kupmengepa, adeiki di amenda taruda, sun nyapu peda, ikin weik kunkamenge. Utenena tep aupu pepu.} 30 Amenda taruda ware ngebo do, yuma, sun co du dakra jepre ngeboda, er pepu si engengkunkamre. Ada tali tep men pepne. Deiyoda, ware ngebo do yuma, er pedi mali kupyopda, er amali kupre ngebopu wenepra popnepa, depkamre.

Allahdi, ‘Pedina upu ukupunge ketenepra deipkamsene,’ pepu upu

31 Ne Allah Yahwehdi pepne. Ne tenepsi taru konum kupre pangeda, nedi sun Israel yala nesala cap, Yehuda mutu nesala cap tep, pedina upu ukupunge sun tep, ‘Ukupkamsene,’ pepra deipkamne. 32 Dinino, nedi pumun taru sun co puna neng, Mesir mutu kuramipa, melipra duyakaramsi taruda, pedina upu peiamsia utopu upu, amenda taru men peipkamsene. Pedina upu ukupunge, sun damai peipkamsen ngeda, er kamo yuk kupkamre. Pumun taruda, sun co puna neng tep, neda sun nenge utopu kuramsidi, ‘Ukunkamrume, angeda men kunkamrume,’ pepra pedina upu peiyakaramsi. Dinino, ataru kurami nesaladi, ne pediramsi upuda men gekeramnei. Sundi ne tep tamnei. Ukupmantoda, nerapu sun akange neng tep, deiyo men kuapmarepapu tamnungtopu, Israel nesaladi, sun nenge utopu ngebo, ne tep tapnei.

33 Dinino, sun mali kuraminge tep wenemna keca konum karepnyopda, amenda taru, nedi ukupu pedina upu, sun Israel nesala damai peipkamne ngeda adano. Pumun taru nedi, ‘Ange kunkamrume, angeda men kunkamrume,’ pepra, upu deiki peiamsi ngeda, amenda taruda aupu moupra tenenange, nimi yuk-yuk sun dipru neitamai deipnepa, moupra tenenkamenge. Menop taruda, gel deiki sekra karepsi dinin, amenda taruda, sun dipru neitamai sekra deipkamne. Ukupnedi neda, sun nai bo Allah kunkamne. Sunda ne nyapu sisa pio akunkamenge.

34 Ataru di dipdongopra doryankamre taruda, ton ngebodi er kabo yuk ngebo tep, ‘Kanda Allah si kael keprume,’ pepra, peteremami utopu tupa men kunkamenge. Ada ila neng peda, yambul neng peda, ne sipu konum kael kepmengedi, ‘Nun nai bo,’ pepra ne damaipu kunkamenge. Ada, mesum tep gum dinin, deiyoda, sun mali kuramenge keca peda, nedi pio gum kupra deipkamne. Ange yumada, daepnedi, gum kupra deipnyopda, kange di ton cap, sun mali kun keca yuma men tenenkamne. Aupuda, ne Allah Yahwehdi konum pepsena tep, tek sisi nong kupkamre,” Allahdi pepu.

35 Upepudi, aupu ton cap pepu. “Allah er si Yahwehdi, ‘Keteng dirine diriprepa, komuni kunkameng’ tenen, keteng ketekepra deipu. Tonda, war cap kuru cap yuma ketekepra deipu ada, ‘Kunukre taru dirine kunkamre’ tenena, tep ketekepu. Tonda, ila laut mokon kuma daromrenge peda, ketekepra depudi er puto ngamna tep nengeda, ‘Me kait weleptue,’ teneprepa weleprepa, ila lelim perure. Ne Allah akeca-keca yuma deiki tara, Ila Eremna Ngebo kunune. Ne Allah Yahweh, akeca-keca yuma talenedi, im deiki jen talen malaikat yuma, sun ila deiyo ngebo kunune,” Allahdi pepu.

36 Ne Allahdi tuai mutu cap, im deiki kure keca cap yuma, ketekepra deipsinge yumada, ‘Ange pio akunkamre,’ tenenune. Ange utopu, Israel nesala yala-yala yumada, ne nyapu sisa pio kunkamenge. Akeca-keca yuma ketekepra deipsinge men gum kupkamretopu, Israel nesala peda, ‘Ne mawa nesala,’ tenen, pio men tapkamne.

37 Ada ukupmantonge pepsene. Nimidi kunumpetena tapu dopra, kunupeteptengedi, ‘Im alau tara cap, im deiki tara capda, er lyomda ake, er palada ake. Tonda, tuai mutu ban-ban yuma, iriamu tara cap, deiyoi capda, er lyom ake, er pala ake. Ange yuma ukupra ketekepu,’ pepra kael keptengedi, lap peptengopda, ne Allahdi, Israel nesala yala-yala yumada, ‘Ne nyapu tupa men kunkamenge,’ tenen, taptene. Dinino, ne ketekepra deipsinge yuma men kunupeteptengetopu, Israel nesala mali kurami dinin, nedi sun tep men taptene. Abutene keca peda, men kupmanto keca tep pepsene. Ne Allah Yahwehdi pepsena tep, pio tek sisi upu pepne. Allahdi pepu.

Amenda taruda, Yerusalem mutu neitamai, ila ati arum lepsisikra dopkamenga tep, pepu upu

38 Allah er si Yahwehdi pepu. “Ne tenepsi taru konum kupre pangeda, doryankamre taru neitamaida, Yerusalem mutu yuma tamupra dopkamenge. Ada, ne gispal dona tep, Yerusalem ila ati arum yuma lepsisikra dopkamenge. Ada, ila lyom domi ati er sida, Menara Hananeel, adinen dipdongopra dopbanmenganen, lyom gel beilya dungdongonai, er si Gerbang Sudut buplan damai, ange yumada lepsisikra wipkamenge. 39 Angepu gum dinin, ‘Ila pala weik dopkamep’ tenen, lyom kunumpetena tapu bepekra deipmengedi, atarada, mutu si Gareb mutu deiki di dipdongopra deipbanmanganen, ortara mutu si, Goa mutu damai bena deipmengedi, dopkamenge.

40 Ukupmengedi, amutu ban yuma dana-dana tara yumada, ne Allah Yahweh tep, lepsisikra dopmengedi, ne gispal dona tep karepkamnenge. Amutu yumada, ‘Ne mawa mutu,’ tenen, pio talenkamne. Ada ukutaruda, uku sikke donongbaramengai cap, depmange nesala sun nong peirbanungai cap, keteneipra deipmengedi, adinen dipdongopra ortara kure katuai mutu cap, ila banai er si Kidron me melmanai cap, tonda keteng yakan tara dipdongopra, lyom gel beilya buplan bon potokeipidi, buplan si Kuda Bisam Buplan pepi buplan damai yumada, lepsisikra dopmengepa, ‘Amutu yumada ne mawange pua,’ pepra talenkamne. Yerusalem mutu ila ati arum yuma konum lepsisikra dopmengopda, pio ton cap men uruptapkamenge. Yuk nesaladi amutu kange di ton cap men bisbisa kapkamenge. Ne dipapu talenepa, pio akunkamre,” Allahdi pepu.