Jer 32 | XteSC | STEP | Zedekiadi Yehuda mutu Raja kepra taleamu keteng tamunda, sepuluh tahun konum kepu. Atarupu, Raja Nebukadnezardi Babel mutu taleamu keteng tamunda delapan belas (18) tahun kepu. Ataru neitamai di, Allah Yahwehdi ne Yeremia damai yana, upu pepra deipneue.

Jeremiah 32

Yeremiadi tu kunupu upu

1 Zedekiadi Yehuda mutu Raja kepra taleamu keteng tamunda, sepuluh tahun konum kepu. Atarupu, Raja Nebukadnezardi Babel mutu taleamu keteng tamunda delapan belas (18) tahun kepu. Ataru neitamai di, Allah Yahwehdi ne Yeremia damai yana, upu pepra deipneue. 2 Tonda atarupuda, Babel mutu jen talena neng, Yerusalem mutu yaidi wareki. Ada, ‘Amutu wekmepedi, anesala popkamep’ tenen, Yerusalem ila ati arum dana-dana tara ongopgenepra wareki. Awareki taru neitamaida, ne nabi Yeremiada, tomopra Yehuda tara yuma talena tep, Raja kepra taleamu ngebo, er si Raja Zedekia, er ila ati damai dinin, akati kalengna tep jen talena neng kunmai ati pumbon neitamai dopra deipneuaipu kunmasi.

3 Ada, Yehuda tara yuma taleamu ngebo, Raja Zedekiadi, ne Yeremia tep pepneu. Ada, “Kandi mali upu konum pepmanemum ngeda, warya deiyo tep do?” pepra wenepneudi, tomopra ateng koupneu dingeda, ajen talena neng ati pumbon dongopneu. Er Raja Zedekiadi, ne tep, “Kanda mali upu pepnemum ngeda, ake. ‘Allah Yahwehdi amenda kupkamre keca tep pepneu upuda ake. “Ada, ne Allahdi Yerusalem mutu cap, Yehuda tara yuma capda, dopra Babel mutu nimi deiyo ngebo tep karepkamne. Ne Allahdi Babel mutu yuma taleamre ngebo dopra deipnepa, amutu yaredi, amutu tu yana dalupra doropredi, sun Israel nesala yuma talepkamsere. 4 Tonda, Nebukadnezardi, Yehuda tara talerur ngebo Raja Zedekia tep, men tapkamkere. Allahdi kan dopra, Babel mutu talerur nimi deiyo ngebo deiki deipkerepa, tomopkamkere. Zedekia kanda tomopkengedi, karen mutu dubena, Raja Babel er damai dubena deipkengepa, angebo cap tonpa upu sisikamrerume. Kanda Zedekia, kan pe asuru di, Babel mutu ila nimi deiyo ngebo epkamrume.

5 Atep, Babel mutu talerur nimi deiyo ngebodi, kanda Raja Zedekia doupra, Babel mutu dubekerepa, dabena kuramempane, amenda taru, ne konum tenemsi taruda, ne Allahdi Raja Babel tep wenepkamne ja. Dinino, ataruda Raja Zedekia kandi, Raja Babel tep popetepkamrema peda, kandi er cap, er tara neng cap tep, men popkamreme. Ne Allah Yahwehdi aupu konum peipmana cadi, ange tek sisi kupkamre ja. Kanda nabi Yeremiadi, ‘Aupuda, Allah Yahwehdi peipneupa, kan gekena tep, yana lap pepkene,’ pepra, pepnemuma deiki di, kandi mali kupra deipnemume. Raja Zedekiadi, nabi Yeremia tep pepu.

6 Amenda taruda, nabi Yeremiadi aupu ton pepu. “Allah Yahwehdi ne Yeremia damai yana, aupu ton peipneu upuda ake.

7 “Yeremiao, kan mam bo Salum, erdi deiamu ngebo, er si Hanameel, kan damai yaredi, yana aupu pepkamker ja. Ada, nedi Anatot mutu neitamai dinin, Benjamin yala neng tara kapu mutu neitamaida, tenpu wa tu ton talenune. Kanda ne yala ngebo, meneng damai ngebo kuneruma cadi, nun mutu neitamai kurameptopu, kan dipapu atu menmena kunupra doproptume. Atep, nedi atu dopra deipkenepa, atuda kandi kunupra dopropkamrume.” Allahdi peipneupa gekepsi. Uda, ne Yeremiada, angebo Salum, er mi sisa utopu ngebo kununa cadi, ne kap Hanameel talerur tu, kunupra dopropmanto ngeboda, ne kununa tepa.

8 Uda, Allahdi ne damai konum pepra deipneutopu, amenda taruda, Hanameelda ne damai yaue. Hanameel peda, Raja Zedekiadi, er jen talena neng kurami ati pumbon tomopra deipneuaipu yau. Hanameel yaudi, erdi ne tep yana pepneu. “Benjamin yala nengdi talenung tara neitamai dinin, Anatot mutu talenun tuda, kandi kunupra dopropkunerume. Deiyoda, kanda ne yala ngebo, meneng damai ngebo kuneruma cadi, nun mutu neitamai kurameptopu, kan dipapu atu menmena kunupra doproptume,” pepra, yana moropneupa, nedi moupra kael kepsi. ‘E, apepmaner upuda, tek sisi Allah Yahweh, er dipapu men taru peipmaneu upuda, angebodi aupu utopu konum pepnere,’ tenepsi. Ukupra tenepsa deiki di, betapra kael kepsi. ‘E, angebodi pepra moropmaner upuda, tek sisi Allah Yahwehdi tenenerurtopu, konum pepnere,’ tenepra kael kepsi.

9 – 10 Utenepsa tep nengeda, nedi Anatot mutu tuda, ne mambo mi, ne kap Hanameeldi taleamu tu, er damai di kunupsi. Amutu tu kunumna tep, Hanameel tep karepsi kunumna kecada, tujuh belas (17) uang perak di kunupsi. Akunupsi taruda, ‘Amutu tuda konum kunupmare, kael kepkuneng’ tenen, nimi ton upupsipa, sun aneng yaidi, yana dineipa, ‘Atuda konum kunupne,’ pepra tu kunumna tep seki surat deiki, ne si sekra tanda tanggan kepsa deiki di, atu kunumna tep sah kepra deipsi. Ukupsopda, atu kunupsi perak gel uangda, kin keca di kipra deipsidi, ‘Er ikinda, ware kupra kupkur do?’ tenen, timbang kepsi.

11 Nedi atu konum kunupsopda, ‘Atu konum kunupre,’ pepra seki suratda, butene ketenepsi. Ton suratda, kin keca pumbon kipra deipsi. Asuratpu dinin, butene ngeda, katawaipu talepsi. Angeda, nedi asuratpu dinin, butenenge konum kopi kepsi ngeda, co pe utopu keca di, men palepra deipsinge doropsi. Asurat buteneda, atu kunumna keca lap pena tep, ‘Atu kunumna tep, ukupra gel uang karepu,’ pena cap, tonda atu kunupunge di kunange cap, tonda ‘Akunupu tu deikida, ange-ange kunkamre,’ lap penange cap yumada, akin keca pumbonpu kipra, deipsidi, akin keca getepdongopyaida, co pe utopu keca di, palepra deipsidi kepdongopsi. 12 Akeca yuma konum ketenepra deipsi dingeda, nedi atu kunumna tep lap pena surat dopra, ne kap er si Baruk tep karepsi. Ada, nimi si Mahseia, erdi deiamu ngebo Neria, erdi deiamu ngebo er si Baruk tep karepsi. Asurat dopra Baruk tep karepsi taruda, ne kap Hanameel cap, atu kunupsidi, nimi si sengna tep, tanda tangan kepmasipa, epmaneidi, sun pe si asurat deiki sekmai neng cap, tonda Raja Zedekia er jen talena neng, sun ati damai bukra kunmai Yudea mutu neng peda, sun yuma cap dinmaiyai di, asurat dopra, Baruk tep karepsipa, epmanei.

13 Sun aneng yuma gekenmaidi, dinmaneiyai di, nedi Baruk tep, aupu pepsi. 14 Israel nesala yumadi, si eremnup Allah, erda Yahweh kurure. Nun nai bo Allah Yahwehda, im deiki jen talena malaikat yuma taleredi, sun deiyo ngebo kurura cadi, ila puto weik ngebo kurure. Atep, nun nai bo Allah Yahwehdi peipmasertopu, nedi aupu pepkene. ‘Kan tu kunumna tep, asurat butene kenteipnei ngeda, co pe palepra deipmasinge cap, co pe men palepra deipmasidi tupa katawaipu talenman nge cap, konum karepmakena cadi, kan Barukdi asurat butene dopra, mawa deipkurume. Ada, asurat butene doropmemnyopda, kandi doupra bememdi, kerah tu di dopra telepmengedi, betamnung mau pum bon bena, kipra deipmempa, pio acapu tupa kapkamrure,” pepsi.

15 Upepsi dingeda, aupu ton dukdongopra pepsi. “Akupkamrem ngeda, tali tep gume. Deiyoda ake. Ada, Israel nesala yumadi, si eremnup Allah, erda Yahweh kurure. Nun nai bo Allah Yahwehda, im deiki jen talena malaikat yuma taleredi, sun deiyo ngebo kurura cadi, ila puto weik ngebo kurure. Allah erdi aupu pepra deipseue. ‘Babel mutu neng popsengedi, sun dubena karen mutu deipkamseng dinin, amenda doryankamre taruda, amutu neitamai kapu tu cap, atu deiki ati arum doprumnge cap, tonda anggur wa peprumnge capda, sun Israel nesaladi tamupra yangedi, kange di ton cap kunupropkamenge,’ pepra konum lap peipmasere,” pepsi.

Yeremiada, ikin kange doupra, Allah tep moropu upu

16 Allahdi peipneu upu konum lap pepsi dingeda, ne Yeremiadi tu kunupsipa sekra karepnei suratda dopra, nimi si Neria, erdi deiamu ngebo Baruk tep karepsidi, Allah Yahweh tep moropsi. Moropsidi, aupu pepsi.

17 Naio, kanda Allah Yahweh, ^{▼▼Yahweh – Ayat 17 neitamaida, Ibrani upu deiki di, Allah er si tep, ‘Yahweh’ seki. Tonda, ‘Adonay’ seki. Allah er pe si, tek sisi ngeda, ‘Yahweh’ kurure (Keluaran 3:14). Ibrani upu deiki di, asi er deiyoda, ‘Ne pio akunune,’ kurure. Ada, akeca-keca yuma kapul men ketekeipra deiamu taruda, Allah konum akuramu. Tonda, ataru di dipra, pio dorkunkamre taru peda, Allah pio akunkamre. Dinino, akayat neitamaida, ‘Adonai Yahweh’ ton seki. Aupu ‘Adonai’ deiyoda, ada ‘Akeca-keca yuma talerurdi, ila puto weik ngebo kurura cadi, er teneretopu kurure’ tenen, seki. Atep nengeda, sun kael kemna tep, aupu deiyongepu katuai di sekmepu. Indonesia upu Allah upu buku neitamaida, ‘TUHAN Mahatinggi’ sengnunge, tonda, ‘Allah yang Mahakuasa’ ton sengnunge. Ange peda telep dinin, aupu tek sisi deiyo akapu ngeda, sun kael kemna tep, nundi konum katuai di sekmepu. ‘Adonay’ seki ngeda, aupu deiyonge konum jenek kupra sekmepu.} akeca-keca yuma talepra, deiki tara erepra, ila puto weik deiyo ngebo kuruma cadi, kan teneremtopu adipapu kurume. Atep, Allah kan ila puto buru deiki di, im neitamai cap, tuai mutu ban-ban yuma cap, ketekepra deipmume. Wareto keca yuma do, tenpu keca peda, kan ikin kupkerepa, men kupmanto keca ton, pio men kukerure. Kanda, ila puto weik kurum ngebo cadi, akeca-keca yumada, kanam dipapu pel dopra kurume. 18 Ne nai Allah, kan dipapu nesala denge pio weik, beribu-ribu men nukmanto kunup nesala yuma tep, tamna gum dipapu, pio bicau tenesememdi, kandi, ‘Ukupra telep kweipkamsene,’ pepra pedina upu deiki peipsemumtopu, tupa pio teleppu kemdiserume. Dinino, wisi nengdi mali kuramenga menengada, sundi deipmenge nyapu deiki, kandi ikin keca dopra, sun nyapu deiki deipra wenemsereme. Kanda tek sisi ila puto weik kuremdi, akeca-keca yuma deiki tara erepra kurume. Allah Yahweh, kanda im deiki jen talena malaikat ^{▼▼malaikat – Ibrani upu deiki di, akayat neitamaida, Allah er si tep, ‘Yahweh Sebaot’ pepra seki. Sun kael kemna tep, aupu ‘Sebaot’ deiyo ngeda, katuai di sekmepu.} yuma talememnya, sun deiyo ngebo kuruma cadi, kandi ila puto ngebo kurume.

19 Tonda naio, kandi sun tep, ‘Angeda, kupkamrume, angeda pio men kupkamrume. Telep kunada ake,’ pepra lap pesemem ngeda, nimi di men tenipmanto pio mambulngepu melipra peserume. Tonda, kandi pel domemnge yumada, nimi di men pel dopmantongepu, ila puto deiki di kan pel dopra kurume. Nesala yumadi pel donung keca yala yumada, kandi disememdi, apel donupa utopupu kunumnada, kareserume. Mali kunange tep, ikin keca doronupe. Dumsisi kunange tep, telep menenga keca doronupe. Moupra epsememdi, nun kurameptopu, menenga keca kareserume.

20 Pumun taru, kan dipapu nimi men dopmanto pel domume. Ada, kan dipapu Mesir mutu neitamai di kunge nesalada, ange epmengedi, ‘Uo tek sisi, Allah er dipapu apel donmasere, tenepkameng’ tenen, nimi men kupmanto pel cap, kunupsek pen pel cap domume. Ukupmum utopu, ataru peda kan dipapu, nun Israel nesala kan-kan cap, tonda atuai mutu ban-ban yuma neitamai kunung nesala kan-kan cap yumada, Kandi tupa pio men kupmanto pel melipra doserume. Ukumemnya deiki di, uku taruda, dan tara mutu kunung nesala do, nun yumadi kan si konum kael kemepedi, pio tupa-tupa kan sipu eremkepedi, ‘Kanda pio telepe,’ pepra, kan tep gisal dokenupe. 21 Allaho, kan ila puto deiki di talepmumdi, kan nyapu sisa, sun Israel nesalada, Mesir mutu neitamai ikin kange pio weik doupra kuramipa, doupra pio telep mutu tamupra duyanamsemume. Tuai nesaladi men kupmanto peten-peten kun keca cap, tonda nimidi men dopmanto pel cap, ila puto kunupsek pen pel cap domumnya deiki di, Israel nesala loptapra lyepropsemume. Kandi, men kupmantonge yumada, kan ila puto buru deiki di pel dopmumpa, sun ataru kurami nesalada, ange yuma diramidi, ‘Uo’ tenen, kange mun kange doupra, kware weik kurami.

22 Tonda, Israel nesala, sun co puna neng tep, kandi, “Amutu cap, atelep tu cap, amutu neitamai pio telep kure keca capda, sun tep karepkamsene,” pepra, konum pedina upu deiki di peiamume. Ange peiamumtopu, nun apu yapudi deiamipa, dadeipdanen yakaramidi, deipi nesala tep, amutuda dopra karepsemumpa, akunupe. Amutuda, ware telep kun keca do yumada, pio weika di akurepa doronupe. 23 Kandi, nun apu yapu tep, atara tu yuma karepmumpa, amutu wekra, talepidi kurami. Dinino, sun anesaladi amutu tu yana dopra, kunung taruda, kandi, sun tep, “Ange-ange yuma talepra kunkamrume. Tonda, “Angeda pio men kunkamrume,” pepra, peiamsemum ngeda, ange yuma men talepra kurami. Tonda, kandi, “Angeda kunkamrume, telep kunada ake,” peiamum ngeda, men talepra kurami. Tenpunge peda, telep kupra men kurami. Sundi mali-mali weik kuramya tep nengeda, kandi sun anesala deiki, ila ikin keca cap, kange mun keca cap, yala-yala yuma doroipmempa, sun deiki yakarepa dorongedi, kange mun kange doupra kununge.

24 Babel mutu jen talen neng yaidi, nun ila ati arum dana-dana tara, gel beilya wipra ongopdongopmepunge damaida, tu weika di palipra deipmanga deiki di, ange deiki welepra, nun mutu neitamai wekmengedi popkamsenge. Apelda konum ketenepra dopi. Atep, sun Babel mutu nengdi, nun mutuda bisbisa kapmengedi, dalupra doropkamenge. Ukutaruda, sundi amutu konum warekdongopmange. Ukupmengepa, jen putana deiki cap, benepdanen embana pu jena deiki cap di, nunda puto bounpu kupmepepa, sun Babel neng buru deiki, amutu ati arum dopropkamenge. Atep ne nai Allah, kandi, ‘Ukupkamne,’ teneamumdi peiamsemum upu yumada, ataru konum jenek kuprepa, epmape. Kan peda konum epra kael kepreme.

25 Dinino, ne nai Allah, neda yambulanun wang-wang pepnere. Deiyoda, kandi ne tep, “Hanameel taleamu tu kunupkurume. Tonda, atu kunupkurem taruda, gel uang karepkumem taru dina tep, nimi ton bulupra deipmempa, epkamkenge,” peipnemumpa, atu konum kunupsipa, nimi yumadi, ‘Konum kunupre’ tenen, epra kael kepi. Ukupra atu konum kunupsipane, Babel mutu neng di, amutu tuda yana dalupra doropkamsenga cadi, neda wang-wang pepnere naio. Uda, ne nai Allaho, ^{▼▼Allah – Ayat 25 neitamaida, Ibrani upu deiki di, ‘Adonay Yahweh’ seki. Ibrani upu deiki di, asi ‘Yahweh’ er deiyoda, ‘Ne pio akunune,’ kurure. Asi ‘Adonay’ deiyoda, ada ‘Akeca-keca yuma taleredi, ila puto weik ngebo kurura cadi, er teneretopu kurure’ tenen, seki. Tonda, ayat 17 neitamai di dinkurume.} kanda Yahweh, akeca-keca yuma talepra, deiki tara erepra, ila puto weik deiyo ngebo kuruma cadi, kan tenerumtopu, adipapu kuruma tep, kandi, ‘Ukupkurume,’ pepnemumtopu konum kupsi. Nabi Yeremiadi Allah tep pepra moropu.

26 Yeremiadi aupu pepra Allah tep moropu pangeda, Allahdi tamupra Yeremia damai yana pepu upuda, ake. 27 Yeremiao, kanda tenipetepmemdi, kael kepkurume. Ne sida, Yahweh kunune. Tonda, tuai mutu ban-ban yuma kunge nesalada, ne dipapu ketekepra deipsidi, sun yuma talepra kunune. Atep nengeda, wareto keca ikin weik kuptupa, nedi kanam dipapu men kuptene do? Gume, ne damaida, men kupmanto keca ton pio men kunerura cadi, ne puto deiki di, ne tenenuntopu kunune.

28 Ange tep nengeda, nedi amutu kaukeptapnepa, Babel mutu talerur nimi deiyo ngebo Raja Nebukadnezar cap, er jen talena neng cap, sundi amutuda bisbisa kapra, dalupra doropkamenge. Tek sisi, sun aneng dipapu, amutu dalupra doropmengedi, talepkamenge. 29 Tonda, Babel mutu nengdi, amutu neitamai wekra warengmange nengdi, akati arum bisbisa kapmengedi dopropkamenge. Ukupmenge dingeda, uku deipmengepa, amutu ati yuma jepropkamre. Deiyoda, amutu neitamai domrum ati-ati yumada, akati dopi gat amnya bo deikida, Bahal isok si eremna tep, siltong telep keca cap, gam keca popnedi uku dongomamidi, Bahal isok si eremamya tepa. Tonda, yuk tali keca, dewa-dewa cap, berhala ^{▼▼berhala – Aupu deiyoda, ada, isok si eremna tep, patung petupra deiamidi, isok si eremami.} keca cap, isok-isok cap tep, amutu nengdi, akeca si eremna tep, anggur me bena dikra deipnedi, si eremamya tep, nedi amutu ati arum dopra kunung nesala tep, pio yu kunerure.

30 Yu weik kunerur ngeda, tali tep gum dinin, sun Israel nesala cap, Yehuda tara kunung neng cap, sun anesala yuma, sun yambul nyapu kurami taru di gonga kepra, tupa gam kurami taru neitamai yumada, pio mali kecapu talepra kuramidi, ataru peda tupa-tupa kununge. Adeiyo tep, nedi sun tep, kange men deiamsidi, sun tep yu weik kunerure. Sun mali-mali weik kuramya deiki di, nedi sun tep, yu tenenune. Sundi pio mali kun kecapu talepra kuramya tep, ne Allah Yahwehda, yu weik kunerura cadi, anesala yuma tep nengeda, wenepkamsen ja. 31 Amutu gonga kepra, ati arum dopra kurami taru di dipra, aneitam taru yumada, amutu kunge nesaladi, mali kecapu talepra kuramipa, ne Allahda sun tep yu kuramneuanen, tupa kunerure. Yu weik kunerura tep, nedi, ‘Sun anesala popra gawal dakamne,’ konum tenepsidi, ataru dipapu kupkuna cadi, amutu ila ati arum dominge cap, anesala capda, men dinkamne.

32 Amutu popra, sikke buktapkamna deiyoda ake. Sun Yehuda tara kunge nesala cap, Yerusalem mutu kunge nesala cap, tonda sun Raja kepra talenung deiyo neng cap, sun amutara pemerintah pel donung neng cap, tonda amutu kunge imam pel dona neng cap, tonda ne upu lap pena deiyo neng, sun nabi-nabi neng cap, sun Yehuda tara neitamai kunge nesala yuma cap, Yerusalem ati arum neitamai kunge nesala yuma capdi, mali kun keca yala-yala yuma talepra kuramipanen, yu weik kunerura tep, amutu yuma gawal dakra, sikke buktapkamne ja!

33 Sun amutu nesala yumadi, ne Allah tep konum tapneidi, sun amnyo karekra yukai dinunge. Telep ngeda, ne damai yanmatengedi, ne urasin tara yana moropmanetenge dinin, sundi ne tep tapnei. Nedi sun tep peterepsidi, ‘Telep kuna ngeda ake, mali ngeda ake. Angeda kunkamrume, angeda pio men kunkamrume,’ pepra peteremamsanen, ukutaru peda tupa peteremsenun dinin, sundi ne upu gekepmengedi, men moupra talenunge. Ne upu pio yaninapu kununge. 34 Angepu gum dinin, tonda, pumun taru sundi, ne Allah tep, “Nun nai bo Allah, er sipu eremkamepe,” pepra, ila telep atida domidi, “Akatida Allah er pe ati pio tep kunkamre,” perami. Dinino, sundi akati pumbonda, isok si eremna keca dopra deipidi, tali isok tep, si eremaminge deiki di, ne si eremna ati konum mali kupra deipipa, ne pio dabal kupra deipnei. Atep, ukutaruda, akati neitamaida, nimi yangedi, ne si ton pio men erepnetenge. ‘Angeda, ne dabale,’ tenenune.

35 Tonda, sun amutu nesala dipapu, Yerusalem damai dinin, Ben-Hinom mutu banai, Bahal isok si eremna tep, gam keca popnedi karerbanai, er si mesba betapra deiamidi karerbarami. Tonda, amesba deiki di, yuk isok er si Molok, er si eremna tep, sun pe nyapu cap, sun pe ner nyapu cap, popra karerbarami. Apio mali weik kuramidi, ukutaru tupa kunge kecada, ne Allahdi sun tep, “Ange kunkamrume,” men pepra deiamsidi, akecada ne kange neitamai di, pio men teneramsi. Ange gum dinin, sun pe kange dipapu tenepra, amali keca kununge. Angeda, ila mali kununga deiki di, sun Yehuda tara neitamai kunge nesala yumada, akeca epmengedi, sun peda angepu talepra, pio mali kununge. Allahdi Yeremia tep pepu.

Allahdi, “Doryankamre taruda, ange ton ukupkamsene,” pepra deipu upu

36 Allahdi aupu konum pepu dingeda, aupu ton dukdongopra pepu.

Sun Israel nesala yumada, pio mali-mali weik kuruma tep nengeda, ne Allahdi aupu pepsene. Neda sun nai bo Allah Yahweh kununa cadi, ne si eremamnerume. Atep, nedi, akati arum Yerusalem mutu tep, aupu pepkune. Yeremiao, kandi Yerusalem mutu ila ati arum tep, upepmanereme. Kandi, “Uo, ne nai Allah. Kandi sun Babel mutu nesala buru deiki konum deipmaserempa, nunda nun mar pona deiki cap, jen putana deiki cap, tonda benepdanen, emban kange mun pu jena deiki cap, adipapu nun amutu ati arum dopra kunup nesala yumada, konum depropmepepa, amutuda Babel neng dipapu talepkamsenge,” pepra, mambul kange doupra, engepra pepmanerume. Angeda, sun wenemna tep, tek sisi kupkamne ja! Dinino, sunda ataru nedi pepkuken upuda, moupra gekepkunerume.

37 Nedi sun amutu neitamai kunung nesala yuma, sun wenemna tep, enepronepa, yuk mutu nesala kunung mutu datengbena, ikin weik dakuramengepanen, amenda dorkunkamre taruda, sun yumada nedi tamupra, sun pe mutupu duyana deipkamsene. Ataruda, ne yu weik kunerepa, tulum tenenuna cadi, nedi sun tep enepra donoknepa, yu nengdi sun tomopra, ateng koupra, karen mutu yuk-yukai dubenkamsene. Dinino, doryankamre taru neitamaida, nedi tamupra yana bupra, acapu deipkamsene. Nedi sun tamupra, sun mutu sisapu, aceipu duyana, telep kupra deipkamsene. Duyanedi sun anesala telep kupra deipnepa, podana gum dipapu, kange deipra, tali dim pepra pio tep amutu kunkamenge.

38 Ataruda, sunda ne nyapu sisa kungepa, neda sun nai bo Allah kunkamne. Ne dipapu sun tep kalekra melipsenedi, telep kudinkamsene. 39 Ataruda, nedi sun tep, kange tenenange cap, dipru cap, deiyo tenpu ngepu karepnepa, telep kun kecapu talepra kunkamenge. Ada tali tep gum dinin, ‘Sundi ne tepapu, kware kuprepa, pio tep gispal donkamnenge. Ne sipu pio eremkamnenge. Ange kunga deiki di, sun kunada, pio teleppu kunkamenge. Pio teleppu kungedi, sundi nyapu deipmengepa, deipdanen bankameng nyapu yuma peda, telep kweipnepa, pio teleppu kupbankamenge.

40 Tonda ataruda, sun damai nedi pio tep pedina telep upu peipkamsene. Nedi sun tep kange di ton cap, pio men tapkamne. Apedina upu deiki penkamne upuda, pio men gum kupmanto dinin, pio tep telep kupra derinkamsene. Nedi, ‘Sunda kange di ton cap tapnenung’ tenen, nedi sun kange tenenange cap, sun dipru cap, tamupra telep kupra deipnepa, sundi ne Allah tep kwar kuprepa, ne tepapu gispal donkamnenge. Sunda, ne si pio eremnengedi, yuk taruda ne damai di tapra, pio karenai men benkamenge. 41 Amenda taru yumada, nedi sun tep, kange deipnedi, telep kupra derinkamne. Tonda, nedi sun tep, tamna pio gum dipapu, ‘Amutu neitamaipu pio tep telep kunkameng’ tenen, ketenepra deipnepa, teleppu kunkamenge. Ange konum upepra deipsena cadi, angeda, pio men tapkamne. Ne pesenetopu, tek sisi pio kunkamsen ja! Ne kange tenenange cap, ne dipru cap deiki di, pedina upu deiki di pepsene. Ange yumada, tek sisi ukupkamsene!

42 Ne Allah Yahwehdi aupu pepsene. Nedi, sun amutu neitamai kurum nesala wenemna tep, sun deiki ila ikin keca deiamsenepa, kange mun kange doupra akuamserepane, ange utopu, amenda taru ne dipapu tamupra telep kweipsenepa, sun yumada, teleppu kunkamrume. Atelep kuna tep nengeda, ne Allahdi sun damai pedina upu deiki di konum upepra deipmasena cadi, ange yumada, tek sisi nong kupkamre ja! 43 Uda, ukutaruda, sundi mali kange doupra, ‘Uo, uo, nun mutuda, pio walangyopu kupmasere! Nun mutuda, Allahdi go karepupa, sun Babel mutu jen talena nengdi yana, popseidi, nun mutu dalupra dopropidi, talepipa, nun mutuda katawai utopu kupu. Atep nesala pe, bura tara tali gam kuramre keca peda, amutu neitamai men kununge! Ataruda, sundi aupu perum dinino, nedi sun tep pepsene. Doryankamre taruda, amutu yumada kange di ton cap, telep kweipkamsene! Ada, wa pepra koupkamrum kecada, telep dipapu kipra kunumdamumdi, jenkamrume.”

44 Nedi amutu konum telep kweipsenyopda, amutu neitamai kunkameng nengdi, amutu tu kunumkamenge. Kunupmengedi, sah kemna cap, petenkemna cap tep, sekeipkameng surat deiki di, sun pe si sekmengedi, tanda tangan kepkamenge. Ukupmengedi, ‘Asurat pio akunkamre’ tenen, co pe di, asurat kin keca palepdongopkamenge. Tonda, ‘Tu konum kunupi,’ pepra, peten keipkamenga tep, kael kemna neng peda, atu kunupkameng taru, epra kael kepmengedi, ‘Akonuma’ tenenkamenge. Ange kunkamengada, Benjamin yala nengdi talenung mutu neitamai di kupkamenge. Tonda, Yerusalem mutu ila ati arum domya neitamai di kupkamenge. Tonda, Yerusalem mutu damai dinin, yambul karenai, yambul ati arum donkamengai cap, tonda Yehuda tara mutu neitamai, yuk ila ati arum donkamengai cap, tonda mutu dam tara ati arum donkamengai cap, Yehuda tara dinin, ortara keteng yakaramre tara, laut mokon damai tara, er si Sepelah tara penungai cap, tonda, amutu di dipra, iknapi tara (arah selatan) katuai mutu kure tara cap, yuk-yuk ati arum donkamenge.

Ukupkamengada, ne Allahdi sun cap, sun kunkameng mutu cap, sun kunkameng keca yuma capda, kange di ton cap telep kupra deipkamna deiki di, pio teleppu kunkamenge. Neda Allah Yahwehdi, apedina upu deiki di, konum pepra deipmasena cadi, ange yumada, tek sisi nong kupkamre ja, pepsene.

Aupu yumada, Allah Yahwehdi, nabi Yeremia tep, lap pepupa, Yeremiadi abuku neitamai sekra deipu.