Jer 33 | XteSC | STEP | Babel mutu nimi deiyo ngebo tep, kalengna deiyo neng, sun wenemna ati tupa kuramsi taruda, Allah Yahwehdi, ue butene taru di, yuk upu ton, ne damai yana peipneu. Aupuda ake.

Jeremiah 33

Allahdi, “Yerusalem mutu cap, Yudea tara yuma cap tep, doryankamre taruda, kange di telep kweipkamsene,” pepra pedina upu deiki di peipu upu

1 Babel mutu nimi deiyo ngebo tep, kalengna deiyo neng, sun wenemna ati tupa kuramsi taruda, Allah Yahwehdi, ue butene taru di, yuk upu ton, ne damai yana peipneu. Aupuda ake.

2 Neda Allah Yahwehdi, tuai mutu ban-ban yuma ila puto deiki di ketekepra deipsidi, ‘Ada aceipu pio akunkamre’ tenen, puto di ketenepra deipsi. Atep nedi, aupu pepkene. Kandi sun Yerusalem mutu kunge nesala tep, upepkurume. “Ne sida Yahweh kunune,” pepkurume. 3 Sun amutu neitamai kurum nesaladi ne tep, “Naio amenda taru kupkamre ngeda, lap pepseo,” pepra moropnemumnyopda, nedi sun moropnemumnge utopu gekepra lap penkamsene. Ada, nedi sun men kael keamrum upu, ila mambulnge, menop taru kapul men lap peipsisinge, katuai di lap pepra deipnepa, gekepmumdi, kael kepkamrume.

4 Angeda tali tep men pepsene. Deiyoda, ne Allah Yahwehdi sun tep pepsene. Neda, Israel nesala yuma melipra kalengsenuna tep, sundi ne si eremnerume. Nedi amutu talepra nimi deiyo neng, Yehuda tara Raja-Raja nengdi domi ati yuma cap, tonda amutu Yerusalem ila ati arum domi mutu neitamai, nimi ati capda, akati weika di uruptaprumnge cap tep, aupu ton pepkusene. Ada, sun pona tep nengdi, amutu warekdongopra poryanmangpa, sun amutu neitamai kurum nesaladi, ‘Uo, nun pona tep nengdi popsenunga tep, amutu puto kepra deipkupe,’ teneruma tep, sun pe ati-ati weika di, konum uruprumdi, agel cap, aco cap dopra, sun mutu dana-dana tara ongopgenepra wiamrum gel beilya tep, puto keipmarume.

Ada, sun pona tep neng, sun Babel mutu jen talena nengdi, ‘Yerusalem mutu lyom gel beilya damai, tu palipra deipmapa deiki welepra tekmepedi, abeilya deiki tara kirikra, amutu neitamai wekamep’ tenen, tu palipra, Yerusalem lyom gel beilya damai deipmai. Ukupmaipa, sun Yerusalem mutu kurum nengdi, ‘Gume, nun pona tep nengdi, nimi pon parang ya di popra gawal daksenung’ tenen, sun pe ati cap, Yehuda tara Raja-Raja neng, sun ati cap urupmarumdi, akeca dopra, sun beilya puto kepra deipmarume.

5 Ataru Yerusalem mutu kurum nengdi, ‘Gume, sun Babel mutu nengdi yana popsenung’ tenen, ketenepmarum dinin, amenda taru kupkamre ngeda lap pepkusene. Ada sun ati weika di konum uruptapmarum dinin, yambulanun tupa akapmare ngeda, sun Babel mutu jen talen nengdi, sun mutu nesala pio weika di popmengedi, anesala sun nong gemna dopra, akati-akati pumbon dongopmengepa, akati yuma nimi gemna dipapu dinikamsere. Ada, sun amutu nesala mali tupa kuruma cadi, sun wenemna tep nengeda, ne Allahda yu pio weik kupneua cadi, nedi go karepnepa, sun Babel mutu jen talen nengdi, sun amutu kurum nesala weika di poptapsengepa, sun kurum mutu yumada, popmengepa depkameng nimi gemna dipapu dinikamsere. Ne Allahdi, go karepnepa, Babel mutu nengdi akupkamengada, tali tep gum dinin, deiyoda, sun amutu kurum nesalada, tupa pio mali-mali weik kuruma cadi, sun wenemna tep, nedi, ‘Sun mutu melipra kalengkamne’ tenen, ton cap men dinkamne. Sun amutu kurum nesala tep, tupa men kalekra melimkamsene. Kaupu kepronkamsene.

6 Dinino, nedi konum tenemsi taruda, doryankamre taru neitamaida, ne Allahdi amutu cap, amutu kunkameng nesala capda, kange di ton cap, lepsisikra telep kweipkamne. Nedi sun ikin kupkamsernge cap, sun suse weik kupkamserenge capda, kange di telep kweipnedi, kwetepkamsene. Ne tenemsi taru konum yaryopda, kange di tamupra telep kun keca ton karenkamsene. Tonda, telep kupra melipra kaleksenyopda, amenda taru sun podan nengdi, ton cap men poryakankamsenge. Sunda, tali kange deipra, teleppu kunkamrume. 7 Ataruda, ne Allahdi, sun Yehuda tara kunge nesala cap, sun Israel yala nesala capda, pio telep kupra deipkamsene. Ada, aneitamai taruda, sun pona tep nengdi, yangedi, sun tep popra, sikke buktapkamsenge. Dinino, amenda doryankamre taruda, men di pio telep kupra kuramrumtopu, ne Allahdi kange di ton cap, telep kweipsenepa, amenda taruda pio teleppu kunkamrume.

8 Angepu gum dinin, tonda, sun amutu kurum nesaladi, ne deiki konum mali kudinerumnge yumada, gum kupra deipnedi, kange di ton cap telep kweipkamsene. Tonda sundi, ne tep, “Gume, Allahdi, ‘Angeda kunkamrume, angeda pio men kunkamrume,’ pepra deipseu upuda, nundi pio men gekenkamepe,” pepra, yaniptapnerumdi, mali-mali pio weik kuramrumnge cap, nedi, ‘Anesalada, walito adipapu poptaptene,’ tenemsisinge capda, kau kepnedi, gum kupra deipnyopda, sunda kange di teleppu kupra deipkamsene.

9 Telep kupra deipsenyopda, amutu neitamai ila ati arum dopkamrum ngeda, Yerusalem mutu tep, nedi ‘Akati arumda pio telepe,’ tenepnedi, kange deipkamsene. Ukupnyopda, amutu cap, amutu kunkamrum nesala capda, yala yuk-yuk nesala yuma, tuai mutu ban-ban yuma neitamai kunkameng nesala yuma epmengedi, ‘Uo, amutuda pio telep kurure’ tenen, kwar kuprepa, sun nong moropsepkamenge. Tonda, ne Allah tep, sundi gispal donkamnenge. Deiyoda, amenda taru, sun Yerusalem mutu kunkameng nesalada, nedi telep kupra deipnepa, sun amutu neitamai kunkameng nesaladi donkameng pel yumada, pio telep kupra deipnepa, nong weik kupkamre ja. Nedi sun tep, kange di tamupra, pio telep kupra deipne pangeda, sundi talepra kunkameng keca yumada, pio teleppu kunkamre.

10 Ne Allah Yahwehdi pepsene. Amenda taruda, yuk-yuk mutu kunge nesaladi, amutu yana epmengedi, “Uo, amutuda walang yo mutupu kurure. Nimi cap, nimidi peinung gam kure keca capda, pio gum kupka cadi, gam tupa men kununge. Tonda, Yehuda tara neitamai dorami ati-ati yumada, konum gum kupke. Ange utopu, Yerusalem mutu neitamai bisai-bisai yumada, nesala ton yanipra men embanunga cadi, gopu kurure. Amutu yumada walangyopu kurure,” pepra, mali kange doupra kunkamenge. Ange upenkameng dinino, amenda doryankamre taruda, nedi amutu keca cap, amutu nesala cap yumada, kange di ton cap telep kupra deipkamne.

11 Telep kweipkamsena tep nengeda, amenda doryankamre taruda, amutu neitamai yuma, kange di ton cap telep kweipne pangeda, ila kailya kalepra jenmangedi, kange deipra ila upu di penkamengepa, yuk mutu nengdi gekepkamenge. Tonda, kaber nesaladi, dopdangedi, sun nerapu donkameng neng cap, sun nimi donkameng nerapu capda, kange deipra, pingping kange deiki penkameng upuda, yuk mutu nengdi gekenkamenge. Tonda, yuk neng peda, ne Allah tep, telepe pena tep karen keca, sundi akeca doupra, ne si eremna ati dam duyangedi, kange lon mut penkamenge. Pepmengepa, yuk mutu nengdi gekenkamenge.

Sun amutu kunkameng nesaladi pepkameng upuda ake. “Uo, nun nai bo Allah Yahwehda, ^{▼▼Yahweh – Allah er pe si, tek sisi ngeda, ‘Yahweh’ kurure (Keluaran 33:11). Dinino, Ibrani upu deiki di, akayat neitamaida, ‘Yahweh Sebaot’ pepra seki. Aupu ‘Sebaot’ penga deiyoda, ada ‘Im deiki jen talena malaikat yuma taleredi, sun deiyo ngebo kurura cadi, er putoda pio weik kurure’ tenena tep, asi seki. Atep nengeda, sun kael kemna tep, aupu deiyongepu katuai di sekmepu. Indonesia upu deiki di, Allah upu buku seki neitamaida, ‘Tuhan’ sengnunge, tonda, ‘Allah yang Mahakuasa’ ton sengnunge. Ange peda telep dinin, aupu tek sisi deiyo akapu ngeda, ‘Ketengban nesala yumadi, kael kepkameng’ tenen, nundi aupu deiyonge konum katuai di sekmepu.} pio telep ngebo kurure! Erda, im deiki jen talena malaikat yumada, sun deiyo ngebo kurura cadi, er puto pio weik akurure. Nundi er tep, ‘Kanda pio telep kurume,’ pepra, er sipu eremnupe. Allahda, nun tep, pio bicau teneserura cadi, erdi nun tep, ‘Ukunkamsene,’ pepra, pedina upu deiki peiamseu upu yumada, pio tep melipra karenkamsere. Erdi bicau tenesere ngeda, pio men gum kupkamre!” Amenda taru, amutu kunkameng nengdi, aupu penkamenge. Sundi, ne Allah tep, aupu penkameng ngeda, tali tep gume. Deiyoda, ake. Sun pona tep nengdi, mali weik kweipi dinin, nedi kange di ton cap, pio telep kupra deipnepa, menop taru pio telep kuramutopu kupkamre. Nedi ukupkamsena cadi, ne gispal dona tep, aupu penkamnenge. Ne Allah Yahwehdi aupu konum pepmasena cadi, ange yumada, tek sisi nong kupkamre ja!

12 Ange tep nengeda, ne Allah Yahweh, im deiki jen talena malaikat yuma, sun deiyo ngebo kununa cadi, ne putoda pio weik kunerure. Nedi aupu tek sisi pepsene. Amutu neitamaida, amenda taru walangyopu kuprepa, nimi cap, nimidi peinung gam keca cap, gum kupkamre dinin, amenda taruda, ange yuma ka di ton cap, telep kupra deipkamne. Tonda, amutu neitamai yumada, sun ati arum dorami mutu damaida, sun peirami gam keca jerami mutu, betei paramngai kwamutopu, dorkunkamre taruda, nedi kange di ton cap, karepnepa, weika di ton cap papredi, teleppu kupkamre ja! Ukupyopda, sun domba bisam peina deiyo nengdi, sun domba bisam dopra, abetei wa neitamai dubena deipkamenge. Deipmengopda, adomba bisamdi, betei cap, mutmuta cap, pio weik kuprepa, jepmengopda, kange deipra beipye peikra, acapu mapkamenge. 13 Tonda, ange utopu, mutu buma damai tara ati arum donkamengai cap, Yerusalem mutu dipra, ortara keteng dangban tara, mutu amu tarange cap, Yehuda tara dipra, iknapi tara (arah selatan tara) katuai mutu kururai cap, tonda Benyamin yala neng, sun mutu tara donkamengai cap, Yerusalem mutu yambul ati arum donkamengai cap, tonda Yehuda tara neitamai, nimidi ati arum donkamengai cap yumada, sun domba pein nengdi amutu-amutu peingedi, sun domba nungkamenge. Aupuda, ne Allah Yahwehdi konum peipmasena cadi, tek sisi nong kupkamre ja pepsene.

14 Ne Allah Yahwehdi pepsene. Ne tenemsi taru konum kupyopda, nedi sun Israel yala nesala cap, Yehuda tara kunge nesala cap tep, “Telep kweipkamsene,’ pepra, pedina upu deiki di, sun tep peipsisi ngeda, tek sisi nong kupkamre. Ada ake. 15 Ataru neitamaida, Dauddi deipupa, dadeipdanen yakankameng neng, sun kan-kan neitamai di, nedi tenpu ngebo ton wepra deipkamne. Ada, pio dumsisipu talepra kunkamre ngebo wepnedi, ‘Erda nimi deiyo ngebo, Raja ton kunkamre’ tenen, angebo erepra deipkamne. Animi deiyo ngebo Rajada, erdi pio telep, dumsisi pelpu donkamre. Tonda, nimi upu bongdina taruda, tek sisi upupu pepredi, upu bokeipkamsere. Amutu neitamai dumsisi kupra pel donkamre.

16 Ataru neitamaida, Yehuda tara neitamai kunkameng nesala tep, ‘Nundi aneng poptepe’ tenen, sun pona tep nengda, ne dipapu poptapnepa, atara kunkamrum nesala cap, tonda, Yerusalem mutu ila ati arum neitamai kunkameng nesala capda, lyepropnepa, sun anesala yumada, telep dipapu dim pepra, kange deipra kunkamenge. Sundi, ‘Uo, nun podan nengdi poryasenung’ tenen, tupa men tenenkamenge. Ataruda, amutu nengdi, Yerusalem mutu ila ati arum tep, “Amutu er sida, ‘Allah Yahweh nun tep lyemseredi, pio melipra kalengserure,” pepra, si sipenkamenge.

17 Akupkamneng nge, er deiyoda ake. Ne Allah Yahwehdi, pedina upu deiki di konum pepra deipsene. Ada, “Dauddi deiprepa, dadeipdanen, bankameng neng dipapu, nimi deiyo neng kepra, Israel nesala yuma pio tep talenkamenge. Yuk yala nengdi, Israel nesalada men talenkamenge,” peipsene. 18 Tonda, sun Lewi yala neng dipapu, ne si eremna ati pumbon pel dona tep, tupa-tupa imam pelpu donkamnenge. Sun yala nengda, pio men gum kuprepa, apel peda men tapkamenge. Tonda, sun Lewi yala neng dipapu, Israel nesala sun mali kunange daemna tep, ne karena tep, yapi keca popra, uku dongoryakana cap, gandum du kareryakana cap, tonda ne gispla dona tep, yuk karen keca uku dongona pel dona capda, sun Lewi yala neng dipapu, ne damai yangedi, apel pio doryakankamenge. Yuk yala nengdi, ne damai apel men donkamenge. Allahdi pepu.

Allahdi, “Daud er yala neng tep, pedina upu peipsi ngeda, pio akunkamre,” pepu upu

19 Allah Yahwehdi ne nabi Yeremia damai yana, apu peipneu.

20 Ne Allah Yahwehdi kan tep pepkene. Daud cap, er yala neng cap tep, pedina upu deiki, ‘Ukupkamsene,’ pepra deipsisi ngeda, pio kunkamre. Aupu pepsi ngeda, nimidi upu men seknetenge. Ukupmanto tep upepkene. Nedi pedina upu deiki di, “Keteng komuni pe, lukunda peda, pio donkamrume. Nedi, ‘Ataru ake,’ konum tenemsitopu, keteng pio yaredi tengyakankamre. Tonda, keteng pio dangbarepa, kunukamrure,” pepsi. Apepra deipsi upuda, nimidi men gum kupra deiptenge. Ange yumada, ne tenepsitopu, pio akunkamre.

21 Ange utopu ton, nedi, ne amutara pel doramneu ngebo, Raja Daud tep, pedina upu deiki peipsidi, konum koupdongopsi. Ange peda, nimidi aupu pio men seknetenge. Ada, Raja Dauddi deipupa, dadeipdanen banung nengda, sun kankan neitamai di, tenpu ngebodi tupa, nimi deiyo kepra, Israel nesala pio talenkamre. Yuk yala nengdi, ne mawa nesala men talenkamenge. Tonda, ange utopu, nedi sun Lewi yala neng tep, “Sun dipapu, ne si eremna ati pumbon, imam pelda tupa-tupa donkamrume,” pepra, pedina upu deiki pepsidi, konum koupdongopsi. Nedi apedina upu peipsinge peda, nimidi upu men seknetengepa, ne peipsi upu yuma men gum kuptu. Apepsi upuda pio men gum kupkamra cadi, nedi konum peipsi pedina upu yumada, nimidi pio men kiliptapkamenge. Angeda pio men kupmanto.

22 Ukupmantoda, im neitamai cap, im deiki kuru weik ingamengtopu, im neitamai akwapu keca yuma capda, pio men nukmanto kuretopu, ban mutu ila laut mokon pirman, me wenenga weik kuramrepa, nimidi men nukmanto kuramre utopu, nedi wepra deipkamne pel don neng peda, men nukmanto kunkamenge. Ada, ne amutara pel don ngebo Raja Dauddi deipupa, dadeipdanen bankameng neng cap, Lewi yala nengdi deipmengepa, dadeipdanen bankameng neng cap, ne si eremna ati pel dona deiyo imam neng capda, ne Allahdi tupa tapakra karepnepa, sun dengeda, pio weik kunkamenge. Daud yala neng cap, Lewi yala neng capda, ayala butene nengda, men nukmanto kunkamenge. Sunda men gum kupmanto.

23 Allahdi aupu konum pepu dingeda, aupu ton, ne Yeremia damai yana pepneu. Aupuda ake. 24 Allah Yahwehdi pepu. Kanda Yeremia konum dimemdi, gekerume. Ton nengdi sun damai upenunge. “Gume, sun Israel yala nesala cap, Yehuda tara neitamai kunge nesala capda, Allahdi, ‘Anesalada ne mawa neng kunkameng’ tenen, konum wepra deiamu. Ayala nesala buteneda, Yehuda tara nesala cap, Israel yala nesala capda, menop taru, Allahdi wepra deiamu dinin, er pedi, ‘Ne dabale’ tenen, konum dopra donoku,” penunge. Tonda, tali dakunge nesaladi, ne nyapu sisa sun tep, ‘Gume, sun abutene yala nesalada, tali nesalapu kununge. Tonda sunda, mambul nesala kuramyada, negara khusus, pio telep nesala kurami dinin, angeda tupa men kununge,’ tenengedi, mali upu penunge.

25 Dinino, ne Allah Yahwehdi pepsene. Nedi komuni taru pe, lukunda taru pe yumada, pedina upu sun deiki konum pepra deipsidi, ‘Pio akunkamre’ tenen, konum ateng kouramengtopu kupra deipsi. Tonda, ange utopu, nedi, “Im neitamai cap, im deiki cap, tuai mutu neitamai kure keca yala-yala yuma capda, ‘Ukupra-ukupra kunkamenge’ tenen, pedina upu pepra deipsi ngeda, angeda pio akunkamre. Angeda, pio akunkamra tep, men punupra tapkamne,” pepsi. Aupuda, konum pepra deipsa tep, amenda taru men gum kuptue.

26 Ange utopu, ne nyapu sisa, Yakubdi deiamupa, dadeipdanen bankameng nesala cap, tonda Raja Dauddi deiamupa, dadeipdanen bankameng nesala cap tep, ‘Pio telep kweipkamsene,’ pepra, pedina upu deiki peipsi ngeda, men punupra tapkamne. Aupu peda, pio tep talenkamne. Atep, Raja Dauddi deiamupa, dadeipdanen banung neng kan-kan di, tenpu ngebo, ‘Nimi deiyo ngebo, Raja kepkamre’ tenen, wepra deipnepa, ne nyapu sisa pio talenkamre. Ada, sun ila mambul neng, sun apu yapu, Abraham cap, Isak cap, tonda Yakub cap, sundi deiamipa, dadeipdanen, banung nesala yumada, Daud er tara ngebodi, ne mawa nesala, Israel nesala pio talenkamre. Deiyoda, nedi ne nyapu sisa tep, bicau tupa tenenune. Sun mali kuraminge tep, adipapu wenepra poptaptene dinin, ange gum di, ne kange dipapu, bicau tenepnedi, sun malinge kaukepkamne ja. Ukupnyopda, ne nyapuda, menop taru pio telep kuramitopu, kange di ton cap, teleppu kweipnepa, amenda dorkunkamre taru yumada, teleppu kunkamenge. Sun tep bicau tenepnedi, kange deipra melimnapu kunkamsene. Allahdi pepu.