Jeremiah 34

Yeremiadi Raja Zedekia tep, ‘Ukupkamkere,’ peipu upu

1Raja Babel er si Nebukadnezar, er cap, er jen talena neng cap, sun deiyo neng yuma cap, yuk-yuk nimi yala kurami neng cap, yuk-yuk Raja neng cap, uda Babel tara nimi deiyo ngebo Rajadi taleamupa, er amutara melipra poryakarami nesala yuma capda, sun yumadi, puto kepra deipipa, Yerusalem ila ati arum kurami neng cap, amutu dana-dana tara ati arum doamidi, kurami neng cap tep, ‘Popkupe’ tenen, yana wareki. Ataru neitamaida, Allah Yahwehdi ne nabi Yeremia damai yana, aupu pepra deipneu. Aupuda ake.

2Ne Allah Yahwehdi kan Yeremia tep, pepkene. Nedi sun Israel nesala kalekra melimnepa, sundi ne si eremnenunga cadi, neda sun nai bo Allah kunune. Nedi kan tep aupu pepkene. Kandi Yehuda tara kunge nesala talepu ngebo, Raja Zedekia tep, aupu perbenkurum upuda, ake. “Raja Zedekiao, ne Allah Yahwehdi, sun akumum mutu ada, nedi dopra, Babel mutu talepu ngebo deiki deipnepa, erdi sun damai yana, sun ila ati arum domrum ngeda, uku dongopkamre. 3Tonda, Raja Zedekia kanda, bura saka men benkamrume. Kan peda tamna gum dinin, Babel mutu jen talena nengdi, tomoprapkengedi, Babel mutu Raja ngebo, er damai dubenkengedi, er deiki deipkamkenge. Kan pe dipapu, Babel mutu Raja Nebukadnezar cap antapmemdi, er cap, kan cap, upu talepdankamrume. Ukupkamrema tep, kanda Babel mutu dubena deipkamkenge.

4Tek sisi ukupkamseng dinino, Ne Allah Yahwehdi, kanda Raja Zedekia, Yehuda tara talerum ngebo tep, pepkuken upuda, moupra gekepkurume! Kanda mar podanai di, nimi pon ya di popkengepa, men depkamreme. 5Podanai di popkengepa, mali kange doupra men depkamrume. Amenda taru depkamrum dinin, kanda tali denapu depkamreme. Depmemnyopda, men taru kan co puna neng, nimi deiyo kepra talepyakarami neng deamipa, sun taleami nesaladi, siltong telep keca uku dongopnedi, mali pepra engeramitopu kupra, kan peda depmemnyopda, kan tara nengdi, siltong keca uku dongopmengedi, kan tep engepra peipkamkenge. Sun yumadi kan tep, engepkengedi upepkamkenge. ‘Uo nun nai Allah Yahweh! Nun taleamseu ngeboda, konum gum kupre,” pepkamkenge. Uda, ne Allah Yahwehdi, aupu konum pepra deipmakena cadi, tek sisi nong kupkamre ja. Allahdi nabi Yeremia tep yana lap peipua, gekepu.

6Allahdi apeipu upuda, ne Yeremiadi, Raja Zedekia Yehuda tara taleamu deiyo ngebo, Yerusalem mutu ila ati arum kuramngai besidi, er gekenai bena lap pepsipa gekepu. 7Aupu dopra lap perbesi taruda, Babel mutu taleamu ngebo, er cap, er jen talena neng capdi, ‘Yerusalem mutuda popkupe’ tenen, yana warekmai. Tonda, Babel jen neng sun dipapu, Yehuda tara neitamai, ila ati arum dominge konum popra sikke buktapi dinin, ati arum butene puda, tupa akapu. Akati arumda, Yudea mutu neitamai dinin, ‘Nun podan nengdi poryasenung’ tenen, akati dana-dana tara yuma, ila lyom gel beilya wipdongopra, ongopdongopra deiamidi, kalengami. Akati arum butene sun sida, Lakis mutu cap, Aseka mutu cap, abutenepu tupa akapka cadi, Babel mutu jen nengdi abena warekdongopi. Atarupu, ne nabi Yeremia besidi, Raja Zedekia tep, Allahdi peipneu upu lap pepsi.

Israel nengdi, uang di kunupra, deriryakaramipa, sun pel tali dorami neng, sun deiki mali kudiraminge tep, pepu upu

8Allah Yahwehdi, nabi Yeremia damai yana, aupu peipu. Ataruda, Yehuda tara taleamu ngebo Raja Zedekiadi, er amutara taleamu nesala yuma tep, pedina upu konum peipu. Ada, Raja Zedekiadi, sun Yerusalem mutu ila ati arum kurami nesala tep pepu. Ada, “Ukutaruda, sundi, co bo karepra, yuk nesala kunupmumdi, ‘Ukuda nun ati pel, tali donkamserume,’ pepra, konum doproprumdi, ikin pel dimamrum nesala yumada, nimi pe, nerapu peda, anesala adipapu loptapkamrume,” pepra, Raja Zedekiadi pepu. 9Aupu pepka deiyoda, ake. Ada, sun Israel yala nesala yumadi, Ibrani nesala, nimi cap, nerapu capda, sun ati tali pel melipra dona tep, co bo di kunupra deriryandi, ikin pel dimamipa, tali pel dorami nengda, ‘Loptapkameng’ tenen, aupu peipu. Tonda, ‘Sun pe Israel yala nesaladi, sun meneng damai nesala, yuk Israel yala nengda, co bo deiki di kunupra pio men talenkameng’ tenen, pepu. Uda, aupu pepu taruda, sun Israel neng gekepidi, erdi, ‘Angeda pio men kunkamrume,’ peiputopu kupi.

10Ataruda, Raja Zedekiadi peiputopu, sun Yerusalem mutu kurami nesala yuma cap, tonda sun mutu talepra, deiyo kepra kurami neng yuma capdi, “Ukutaru, nun ati pumbon tali pel dona tep, co bo di kunupra deipmepupa, ikin pel dosenung neng yumada, tek sisi tapmepepa, teleppu kunkamenge,” pepra, sundi konum pedina upu deiki peiamidi, ukurami. 11Upepra, apel don nesala yumada, loptapra tamipa, sun aneng benami dinin, amenda taru, sun kange di tamupra aneng tomopra dopropidi, sun ati pel dimamipa, apel dorami. 12– 13Ukuramya tep nengeda, Israel nesala sun nai bo Allah Yahwehda, sun Israel nesaladi, er si eremnunga cadi, sun nai bo Allah kurure. Erdi, ne nabi Yeremia tep, aupu pepra deipneu. “Kandi akunge nesala, sun damai bena pepkurume. Aupuda ake. ‘Sun co puna neng cap, sun apu yapu capda, Mesir mutu nesaladi, tomopidi, ikin pel dimamipa, kange mun kange doupra kuramyai di, nedi sun loptapra doupra yanamsidi, sun tep pedina upu konum pepra deiamsisi.

14Ne Allahdi pepsisi ngeda ake. “Sun Israel nesalao, keteng tamun, keteng tamun dorkunkamre taru neitamai yumada, keteng tamun nukra, ngangtan bari konum yaryopda, sun tali pel dona tep, kunupra doproprum nesalada, loptapkamrume. Ada, sundi, yuk Ibrani nesala yumada, co bo deiki kunupmumdi, ‘Nun ikin pel tali dipapu pel melipra donkamseng’ tenen, doproprum nesalada, adipapu ngangtan bari keteng tamun gawal dakmare taruda, yoneitam bari keteng tamun ukupu yare taruda, anesala taprumupa, anengdi pel ton men donkamenge.” Ne Allahdi, sun co puna neng tep, upepra pedina upu deiki pepra deipsi dinino, sun apu yapu nengdi, aupu yuma moupra men talepidi, ‘Erdi peipseu upu men gekepkupe,’ tenepya tep, nedi pepsi upuda, men gekepra talepi.

15Uda, sun ataru kurum nesala peda, ange utopu konum kurume. Ue ware kuprap taru, ortaruda, sun mali kuramrum kecada taprumdi, ne Allah, ne kange tenepsingepu kuprume. Ada, sun yumadi, ‘Nun kayapu neng tep, co bo deiki kunupmepudi, pel dipmepupa, tali pel melimna neng utopu kupra donge nesala yumada, lopra tapkamepe,’ peprume. Ada, ne Allah, ne si eremna ati urasin tara buluprumudi, ‘Angeda tek sisi kupkamepe,’ pepra, pedina upu deiki di, pepnerume.

16Upeprum dinino, yambulanun amenda taruda, sun yumadi, ne si tep, mali kweipnerume. Ada, sun pel melipra dona neng, sun aneng sun pe kange di, ‘Ange putapsere,’ teneramitopu, konum taprumpa, benami dinin, aneng yumada, kange di tamupra doroprumdi, pel tamupra diprumpa, tupa aikin pelpu tupa donunge. Ange ukupruma deiki di, ne si mali kupra deipnerume. 17Ange tep nengeda, ne Allah Yahwehdi sun tep upepsene. Nedi sun tep, ‘Sun tali pel don nesala, Ibrani nesala yumada, lopkamrume,’ pepsisitopu, men kuprume. Atep, ukutaruda, ne Allahdi, sun Israel yala nesala tep, loptapkusene. Ada, tali kange doupra, yukai bena, telep men kunkamrum dinin, nedi tapsenyopda, sun podan nengdi, nimi pon ya di popkamsenge. Tonda, kange mun pu weik jeryopda, sun nong dena cap, tonda jen keca gum kuprepa, jen putanange cap deiki di, sun denapu kunkamrume. Akange mun keca konum karepsenepa, ikin weik kuprumnyopda, sun dana-dana tara, yuk-yuk mutu nesala cap, yuk mutu ban-ban yuma kunge nesala cap, epsengedi, ‘Uo, uo, sun Israel nesalada, wareto keca kupupa, pio ikin weik kunung do’ tenen, kware weik kupkamre.

18Tonda, ware nesala do yuma, ne Allahdi, ‘Ukupkamrume, ange pio men kupkamrume. Ange ton konum kupmumnyopda, nedi ukupra melimkamsene,’ pepra pedina upu deiki peipsisipa, sundi, ‘E, teka angepu kupkamepe,’ pepnerum nesala dinin, amenda taru aupu yuma yaniptapra, malipu kuramrum nesalada, ila di wenepkamsene. Anesala tep nengeda, ukupkamsene. Menop taruda, sundi ne tep, ‘Nun naidi peipseu upu, tek sisi moupra talepmepedi, angepu kunkamep’ tenen, sapi bisam poprumdi, nong galemna sekra, butene wilipra, dana-dana tara deiprumdi, daneitamai bisipu benmaruma deiki di, pedina upu utopunge peipnerume. Ukupruma cadi, ukupmantoda, sun pedina deiki peipnerum dinin, kange di tamupra, apedina upu taprum nesalada, sun nong neitamai di sekra, galemna butene, yuk-yuk deipkamsene.

19Ukupkamsena deiyoda ake. Sundi, ne upu yaniptapnerum nesalada, sun pona tep nengdi, sun damai yana, sun popra, sun nong neitamai di sekra, galemna butene wepra, dana-dana tara deiptapkamsenge. Ada, sun Yehuda tara cap, Yerusalem mutu ila ati arum cap, deiyo-deiyo kepra talenung nengda, sun Raja-Raja neng cap, Raja neng sun ati pumbon pel don neng cap, sun imam-imam neng cap, tonda amutu tali dakunung nesala cap, pumun taru sun yumadi, ‘Angeda ukunkamepe,’ pepra, sapi bisam mi poprumdi, nong galemna butene wilipra deiprumdi, asapi bisam nong galemna neitamai bisi yanipra berume. Ukuruma deiki di, pedina upu peipnerum dinin, ange yumada, konum yaniptapnerume.

20Ange tep nengeda, ne Allahdi sun dopra karepnyopda, sun podan nengdi, ‘Uo, anesala poptaptepe’ tenen, ila di putapre nesala tep, sun deiki deipkamsene. Atep sun ali dangna tep, nedi go karepnepa, sun pona tep nengdi, sun mali kuprum nesala poptapmengedi, sun nong dopra tu deiki katuaipu tapmengopda, im neitamai tali lakra embaramre madi, yana sun galemna jepropkamsenge. Tonda, bura tara tali gam kure keca cap yangedi, sun nong yumada, jepropkamsenge.

21Uda, Zedekia Yehuda mutu Raja kepra talepu ngebo cap, er amutara pel dona deiyo-deiyo neng cap yumada, nedi go karepnepa, sun pona tep nengdi, ‘Uo, aneng yuma poptaptepe’ tenen, kalekamseng neng damaipu, nedi dopra karepkamsene. Uda, ataruda, Babel mutu nimi deiyo ngebo cap, er jen talen neng cap, keana taru tep, sun damai tapra benami dinino, amenda tamupra yankameng ja! 22Ada, ne Allah Yahwehdi, ‘Ukupso!’ pepra, upu puto di pepra deipnyopda, sun aneng gekepmengedi, anengda amutupu tamupra yankamenge. Ada, amutu ila ati arum domrumnge, Yerusalem mutu warengna cap, pona cap, dorona cap tep tamupra yankamenge. Tonda, amutu popra dopropmengedi, akati-akati yuma uku dongopkamenge. Angepu gum dinin, ne Allahdi, Yehuda tara neitamai, ila ati arum dopra kunungai yumada, mutu katawai utopu kupra deipnepa, walangyopu kuprepa, nimi men kunungai kupkamre. Ne Allah Yahwehdi aupu konum pepmasena tep, angeda tek sisi nong kepkamre ja, pepsene!