Jer 35 | XteSC | STEP | Yehuda tara kuramu ngebo, er si Yosia, erdi deiamu ngebo Yoyakin, erdi Raja kepra Yehuda tara kurami neng talepra, nimi deiyo ngebo kuramu taru neitamaida, Allah Yahwehdi ne Yeremia damai yana, peipneu upuda ake.

Jeremiah 35

Rekhab yala nengdi telep kurami dinin, Yehuda tara nesalada, mali kuraminge tep, pepu upu

1 Yehuda tara kuramu ngebo, er si Yosia, erdi deiamu ngebo Yoyakin, erdi Raja kepra Yehuda tara kurami neng talepra, nimi deiyo ngebo kuramu taru neitamaida, Allah Yahwehdi ne Yeremia damai yana, peipneu upuda ake.

2 Yeremia kanda bememdi, sun Rekhab yala neng damai bena upu pepkurume. Ukupmem dingeda, kandi sun ayala neng dopra, ne Allah si eremna ati neitamai dinin, tenpu ati pumbon neitamai dominge duyamemdi, anggur me ketenepra aneng tep karepetepkurume,” Allahdi pepneu. 3 Upepneupa, ange pepneutopu kupsi. Ada, Rekhab yala neng damai benmasidi, ayala deiyo-deiyo neng ton dopra Allah er si eremna ati pumbon neitamai duyasi. Ada, nimi tenpu ngebo er si Habaziyadi deiamu ngebo Yeremia, erdi deiamu ngebo er si Yaazanya cap, Yaazanyadi deiamu nyapu cap, tonda er weitapsilip cap, er kayapu neng yuma cap, tonda sun aRekhab yala nengdi deiami neng yuma cap, sun dopra tamupra Yerusalem mutu duyasidi, Allah er si eremna ati pumbon wekmepu.

4 Nedi, sun aneng yuma doupra, Allah er si eremna ati neitamai wilipra dominge pumbon, antapra bukmepudi upu talepmepu. Nun tonpa bukmepu ati neitamaida, nimi si nabi Hanan, erdi deiamu nyapu, sun kurami ati pumbon wekra bukmepu. Hanan er nai boda, er si Yikdalya kuramu. Erdi deiamu ngebo, Hanan er nyapu kurami ati neitamai bukmepu. Aneng duyasi ati neitamai meneng damaida, nimi si Salum, erdi deiamu ngebo imam Maaseya, er kuramu ati pumbon, im alau tara kwamupa, aceipu yana wekmepu. Allah er si eremna ati wengbana tep buplan potokaminge kalengna deiyo nengda, sun kurami ati pumbon wilipra domi ngeda, acei damai ton akwamupa yapu. Maaseya erda, Allah er si eremna ati, urasin tara ila buplan potokaminge kalengna deiyo ngebo kuramu. 5 Akati pumbon bepkopda, ne Yeremiadi sun Rekhab yala neng bukmaiya damaida, anggur me gwepra deipmainge cap, ame jena tep, yambul me mau gelas cap, ketenepra dopra yana deipsi. Ange yuma ketenepra deipsidi, Allahdi konum, ‘Ukupkurume,’ peipneutopu, sun Rekhab yala neng tep, ‘Telepe, ukuda sundi anggur me ton jepso,” pepsi.

6 Upepsi dinin, sun aneng yumadi ne tep tamupra pepnei. “Gume naio, anggur meda nun men jenupe. Deiyoda, nun apubo Rekhabdi deiamu ngebo, nun apu bo Yonadabdi, aupu pepra deipseue. “Nun Rekhab yala neng cap, nundi deipmepepa, dadeipdanen bapedi, derinkamep Rekhab nesala yuma peda, anggur me pio men jenkamepe,” pepra, upu konum deipseudi, upu sekamseua cadi, nun ataru kunup Rekhab neng peda, aupu peiamseutopu, uku taru peda, aupupu talepra kunupe. Atep, anggur me men jeptepe,” pepi. 7 Upepi dingeda, aupu ton lap pepnei. “Angepu gum dinin, nun apu bo Yonadabdi, aupu ton pepra deipseue. “Nun Rekhab yala neng gam kunkamep taru yumada, nundi anggur wa ton talepra men penkamepe. Tonda anggur wa ton pepra kouna cap, kunumna cap, pio men kunkamepe. Tonda, yu yal keca yala-yala yuma peda, wa pepra men kounkamepe. Tonda nun kuna gat ati peda, men dopra deipra kunkamepe. Nun ayala neng yumada, pio tep, keana opkal bol tenda atipu, ketenepra deipmepedi, atenda bol atipu pio akunkamepe. Deiyoda, Allahdi nun Rekhab yala nesala yuma tep peipseu. “Nedi, ‘Ukupkurume,’ pepsisitopu, pio tep, kupmumnyopda, gam kuna deiyo keca karepsenepe, pio telep mutu neitamaipu, keteng tamun pio weik deiki di telep kupra kunkamrume. Gum dingeda gume,” peipseu.

8 Uda naio, nun apu bo Rekhabdi deiamu ngebo Yonadabdi, aupu pepra sekseua cadi, erdi peiamseutopu, nun ayala neng yumadi, angepu tupa talepra kunupe. Atep, nun cap, nundi donup nerapu cap, nundi derinup nyapu cap, ner nyapu cap yuma peda, anggur me pio men jenupe. 9 Ange utopu, nun apu bo Yonadabdi peipseutopu, nun kuna ati tep, gat ati ton men dopra deipra kunupe. Tonda anggur wa ton men penupe. Tonda yal keca ton men kounupe, tonda wa tu men kunumnupe. Nun Rekbah yala nesala yumadi, nun gam kunup taru yumada, aupupu moupra talepmepudi kunupe. 10 Atep, nun kuna ati ton dopra deipmepudi, men kunup dinino, nunda keana opkal bol dodin tenda ati neitamaipu kunupe. Tonda, nun apubo Yonadabdi, ‘Angeda kunkamrume, angeda pio men kunkamrume,’ pepra upu sekseutopu, angepu moupra talepmepudi kunupe.

11 Ukunup dinino, men taruda, Babel mutu taleamu deiyo ngebo, Raja Nebukadnezardi, ‘Israel nesala popnedi, sun mutu dalupra dopropkamne’ tenen, nun Israel nesala kunup mutu mar poryanamseu taruda, nundi upepmepu. ‘Gume, sun Babel mutu jen neng cap, Siria mutu jen neng capdi, nun atara kunup nesala yuma portamsenunga cadi, nun kware weik kuserure. Atep, aneng sun damai di bura saka bepedi, ormutu ila ati arum domi mutu ada, Yerusalem mutu bena dakunkamepe,’ tenepmepudi, aceipu yapudi, Yerusalem mutu damaipu kunupe. Ukupmupka cadi, ataru peda acapu tupa akunmape.” Sun Rekbah yala deiyo nengdi, ne Yeremia tep aupu lap pepnei.

12 Ukupra sundi aupu pepnei taruda, dakunmasanen, amenda taru Allah Yahwehdi, ne damai yana upu ton peipneu. 13 Allahdi peipneu upuda, ake.

“Neda sun Israel yala nesaladi, ‘Nun nai bo,’ pepra si eremnerumupa, nedi melipra kalengsenun Allah akunune. Neda Allah Yahweh, ^{▼▼Yahweh – Allah er pe si, tek sisi ngeda, ‘Yahweh’ kurure (Keluaran 3:14). Dinino, Ibrani upu deiki di, akayat neitamaida, ‘Yahweh Sebaot’ ton seki. Aupu ‘Sebaot’ deiyoda, ada ‘Im deiki jen talena malaikat yuma talerurdi, sun deiyo ngebo kurure’ tenena tep, seki. Atep nengeda, sun kael kemna tep, aupu deiyongepu katuai di sekmepu. Indonesia upu Allah upu buku neitamaida, ‘Allah Mahakuasa’ sengnunge. Ange peda telep dinin, aupu tek sisi deiyo akapu ngeda, nundi konum katuai di sekmepu.} im deiki kunge jen talena malaikat yuma, sun deiyo ngebo kununa cadi, ila puto weik ngebo kunune. Kanda Yeremia, adipapu Yehuda tara kunge nesala cap, ila ati arum Yerusalem mutu kunung nesala cap tep, aupu dopra sun damai perbenkurume. Aupuda ake. ‘Sunda dano? Sun tep asipsene. Sun yumada, ware keca deiyo tep sunda, ne peipsisi upu men gekenerum do? Tonda, nedi pepsene upuda, moupra men talerumudi, men dombarume. Sunda, ware keca deiyo tep, men kael kemrum do? Ne Allah Yahwehdi sun tep upepra asipsene,” pepu.

14 Allahdi upepneu dingeda, aupu ton pepu. “Uda, sun ton moupra tenipso! Nimi si Rekhabdi deipu ngebo, Yonadabdi deiamupa, dadeipdanen yakaramyanen, sundi nyapu deiamyanen, deipyakanung nesala yuma tep, ‘Sunda anggur me pio men jenkamrume,’ pepra upu sekamupa, sun Rekbah yala nesala yumadi aupupu moupra taleamidi, kupyakanganen, ataru kunmang nesala peda, tupa aupupu moupra talenunge. Sun apu bodi peipu upu moupra talenunga cadi, ataru peda ayala nengdi anggur meda, pio men jenunge. Ukunung dinino, ne pedi sun Israel yala nesala yuma cap, sun Yehuda tara kurum nesala yuma cap tep, ‘Angeda kunkamrume, angeda pio men kunkamrume,’ pepra, tupa-tupa sun damai pesenun dinin, sundi pio men gekenerume. 15 Tonda, tupa-tupa ne Allahdi, ne amutara pel donung neng, ada ne upu lap pena cap, amenda kupkamre keca lap penung deiyo neng, sun nabi-nabi nengda, sun damai doroipnepa, sun damai yakaramsidi, sun tep uperamsei. ‘Sun mali kumumnge tapra, Allah damai tamupra yarume!’ pepra, upu pesenunge. Tonda, sun mali kumum ngeda tapra, dumsisi kun kecapu talepra teleppu kunkamrume.

Tonda, sun yumada, tali keca tep, ‘Nun nai,’ pepra, isok-isok si eremrum ngeda, adipapu tapkurume! Allahdi pesere upu moupra talepmumnyopda, erdi melipserepa, sun apu yapu cap, sun cap tep, konum kareamseu mutu, telep mutu neitamaida, keteng tamun denge weik deiki di, aceipu telep kupra kunkamrume,’ pesenunge. Dinino, ne Allahdi sun Israel nesala tep peiamsisi upuda, men gekenerumudi, aupu moupra men talerume. Tupa mali kecapu talepra kurume. 16 Uda tenipetepso! Yonadabdi deipupa, deipdanen yakanung nengda, sun co puna ngebo peiamu upuda, moupra gekeramidi, tupa moupra talenunge. Dinino, sun Israel nesala yumada, ne Allahdi peiamsisi upuda, sundi men moupra talerume.” Allahdi ne Yeremia tep upepneu.

17 Upepneu dingeda, aupu ton dukdongopra pepu. “Atep nengeda, neda Allah Yahweh, ^{▼▼Yahweh – Akayat neitamaida, Ibrani upu deiki di, ‘Yahweh Sebaot’ seki. Aupu ‘Sebaot’ deiyoda, sun kael kemna tep, aupu deiyongepu katuai di sekmepu. Ayat 13 ton dikurume.} im deiki jen talena malaikat yuma, sun deiyo ngebo kunune. Neda, sun Israel nesaladi, ‘Nun nai bo,’ pepra, si eremnerumupa, nedi sun tep melipra kalengsenun Allah, nedi pepsene. Nedi sun Yehuda tara kurum nesala cap, ila ati arum domi mutu, Yerusalem mutu neitamai kurum Israel nesala cap, sun wenemna tep, ila kange mun keca, sun mutu dopra deipnepa, yankamare. Ada, sun amutu kurum nesala wenemna tep, akeca konum ketenepra deiamsidi, ‘Sunda sun mali kurumu keca men tapmumnyopda, wenepkamsene,’ peiamsisinge yuma, ukutaru doproipkamsene. Nedi ange kupkamana deiyoda, sun Israel nesaladi, ne pepra deipsisi upu men gekenemumdi, ange moupra men taleruma tepa. Nedi sun tep, ‘Ne damai tamupra yankamrume,’ pepra, kongpemsisi dinin, ange peda men gekeruma tep, ukutaruda sun deiki kange mun keca deipkamsene.” Allahdi ne Yeremia tep, lap peipneu.

18 Upepneu dingeda, Allahdi sun Rekhab yala neng tep peipneupa, ne Yeremiadi sun Rekbah yala neng tep upepsi. Aupuda ake. “Allahdi pepsere. Neda Allah Yahweh, im deiki jen talena malaikat yuma, sun deiyo ngebo kunune. Sun Israel nesaladi, ne tep, ‘Nun nai bo,’ pepra, si eremnerumupa, nedi sun tep melipra kalengsenun Allah, nedi aupu pepsene. Sundi sun co puna ngebo Yonadabdi pepra deipseu upu tupa moupra taleprume. Yonadabdi, ‘Angeda kunkamrume, angeda pio men kunkamrume,’ pepra deipseu upu, sundi angepu moupra taleprumdi, melipra dombarume. 19 Akuruma tep nengeda, neda Allah Yahweh, im deiki jen talena malaikat yuma, sun deiyo ngebo kunune. Sun Israel nesaladi, ne tep, ‘Nun nai bo,’ pepra, si eremnerumupa, nedi sun tep melipra kalengsenun Allah, nedi apedina upu pepra deipsene. Sun co puna ngebo Rekhabdi deiamu ngebo, sun apu bo Yonadabdi deipupa, deipdanen yakarum nimi neitamaida, sun yala neng ton wepra deipnepa, sundi ne pel talepra pio tep donkamnerume. Ne Allahdi pedina upu deiki di konum peipmasena cadi, angeda tek sisi nong kupkamre ja!” Allahdi peipneupa, ne Yeremiadi sun Rekhab nesala deiyo-deiyo neng tep pepsi.