Jer 36 | XteSC | STEP | Yehuda mutu cap, Yehuda yala nesala cap, ila nimi deiyo kupra taleamu ngeboda, er si Raja Yoyakimdi, keteng tamun dumbari deiki di, amutu yuma taleamu. Yoyakimda er nai bo sida, Yosia. Ataru neitamaida, Allah er si Yahwehdi Yeremia damai yana aupu pepra deipu.

Jeremiah 36

Allah peiamupa, Yeremiadi sekamu upu yumada, tenpu ngebo er si Barukdi, Allah er si eremna ati bena nuku upu

1 Yehuda mutu cap, Yehuda yala nesala cap, ila nimi deiyo kupra taleamu ngeboda, er si Raja Yoyakimdi, keteng tamun dumbari deiki di, amutu yuma taleamu. Yoyakimda er nai bo sida, Yosia. Ataru neitamaida, Allah er si Yahwehdi Yeremia damai yana aupu pepra deipu. 2 Allahdi pepu. “Yeremia kandi getedongomameng buku, er sida galungan ^{▼▼gulungan – Pumun taruda, surat cap, buku cap sengami ngeda, ataru sengnup buku kamo utopu gume. Gambar dinkurume.} ton doprapmemdi, abuku neitamaida, nedi kan damai Israel yala nesala cap, Yehuda yala nesala cap, tonda nimi yuk mutu nesala yuma cap, sun mali kunge keca wenemna tep, ‘Ukupra ikin keca sun nong deiki deipkamne,’ pepra, lap peiamkesi upuda sekurume. Ada, pumun taru Raja Yosiadi nimi deiyo ngebo kuramu taru di menmena peiamkesi upu di dipdongopra, atumi pepken upu yuma tep sekurume pepkene.”

3 “Ukupmempa, aupu katuai di pepmengepa, Yehuda yala nesala gekepmengedi, sun malinge tapmengedi, ‘Ne damai tamupra yankameng do, gum do?’ tenen, dinkamne. Ada sundi, ‘Uo, nun pe mali kunupa menengada, Allahdi kange mun keca, nun damai deipkamsera tep peipseua,’ tenepmengedi, mambul kange doupmengedi, sun mali kunung keca tapra, ne damaipu tamupra yatengopda, nedi, ‘Ikin keca sun damai deipkamne,’ tenepsi ngeda taptene. Gum dingeda, gume.” Allahdi Yeremia tep, upepra lap peipu.

4 Allahdi aupu peipneua tep nengeda, ne Yeremiadi nimi si Neria, er mi Baruk upupsipa ne damai yau. Barukdi Yeremia damai yaupa, Yeremiada Allah Yahwehdi er tep peiamu upu yuma lap pepupa, Barukdi getedongomameng buku neitamai seku. 5 Barukdi aupu yuma konum seku pangeda, Yeremiadi Baruk tep pepu. “Kan kaele, ukutaruda, wenemna ati dongopneipa, apio kununa cadi, Allah er si eremna ati bena men wektene. Atep nedi kan tep moropkeng ngeda, Allah er si eremna ati neitamai bena aupu pepkamrume,” pepra moropu.

6 Upepudi aupu ton dukdongopra pepu. “Ada tali tumi deiki men benkurum dinin, Israel nesaladi, Allah er gispal dona tep, jen keca jepne gum, akati bulupra wekmengedi Allah moronge tumipu, kan adipapu sun damai benkurume. Sun damai bememdi, ila upu deiki di aupu nukamrume. Ada apeipmakenpa, ukupu sekamrem upu yuma, ‘Nimi yuma gekekamengai, aupu katuai di pepkamruma’ tenen, pepkene. Ukupmem dingeda, tonda Yehuda yala nesala, sun pe mutu yuk-yuk dopra kunungai di, yakankameng nesala yuma cap, bulupra wekmangaipu nukmempa gekepkamenge.

7 Ne walwal dinin, aupu pepkamrem tumida, gekepmengedi, ‘Uo, nun tek sisi mali kunupe’ tenen, sun anesala mali kunung keca yuma taptengedi, Allah tep moropkameng do, gum do? Ada, sun anesala yumadi, ‘Uo nun nai Allah, nun mali kunup keca tapmepedi, kan damaipu tamupra yankamepe. Kandi nun malinge daepsetumdi, lyepropsetum tenen, moropkepe,’ pepra, Allah tep moropkameng do, gum do? Nun walwal dinin, dinapu kunkamneme.

Ada mesum tep men pepkene. Sun Israel nesala cap, Yehuda yala nesala capdi, pio mali weik kuraminge tep, Allah er yu weik kuprepa, ‘Sun wenemna tep ila ikin keca, sun nong deiki deipnedi, sun tep poptapkamne,’ pepra deipu ngeda, metek gume. Ila wenemna keca keteneipmara tep pepkene. Atep nengeda, Allahdi peipneupa, lap pepmakenpa, kandi sekmamem upu dopra, Allah er si eremna ati bena nukamrume, pepkene,” Yeremiadi Baruk tep pepu.

8 Yeremiadi upepupa, Neria er mi Barukda, Yeremiadi, ‘Ukupkurume,’ peipmemeutopu kupu. Ada, Allah er si eremna ati beudi, aupu nuku. Ada, Allahdi, ‘Israel nesala wenepkamne,’ pepra lap peiamupa, nabi Yeremia gekeramudi, lap peipu upu yumada, Barukdi sekra keteneipmauadi, bena nuku.

9 Sun yuma dakunmaiyane, Raja Yosia er mi, Yoyakim amutu ila nimi deiyo kepra taleamupa, keteng tamun pamu bari neitamai, war sembilan ^{▼▼war 9 – Sun Ibrani nesaladi pumun taru war nungami ngeda, yuke. Sundi war 9 perami dinin, nun ukutaru kunup nengdi, war 11 November, tonda war 12 Desember penupe.} konum kupupa, amutu neitamai kurami nesaladi upepi. “Gume, nun nai bo Allah er gispal dona tep, jen keca jepne gum dipapu, jen bulungnapu kupedi, Yerusalem mutu bena bulupmepyopda, Allah er si eremkamepe,” pepi. Upepya tep, sun Yerusalem mutu ati arum neitamai kurami nesala cap, Yehuda mutu neitamai ati arum yuk-yuk dopra kurami nesala cap, sun yuma bupra yai. Ada, Yerusalem mutu neitamai dinin, Allah er si eremna ati damai bulupra yai.

10 Yai pangeda, Barukdi, Yeremia lap peipmemeu upu, getedongon buku neitamai seku ngeda, anesala bulupra wekmaidi gekenmaiyaipu aupu nuku. Akatida, Allah er si eremna ati damai dinin, ada nimi si Safan, er mi Gemaryadi pel doamu ati dam nuku. Safanda, ada Sekretaris Negara pel talepra doramu ngebo tep pepne. Gemaryadi domu atida, Allah tep karen ati bo damai dinin, yambul deiki tara, ‘Allah moropkup’ tenen, wengbaramyai kupu. Tonda, akatida, Allah Yahweh, er karena tep domi ati wengbana tep potoki buplan er sida, Ukupu Buplan damai kupu. Akatida akupka tep, akati damai Barukdi aupu yuma nuku.

Yehuda mutu ila nimi deiyo ngebo Raja Yoyakin, er kuramu ati pumbon, Barukdi aupu nukua tep upu

11 Nimi si Safandi deiamu mi, er si Gemarya dinin, angebodi deipu mi, er si Mikaya kuramu. Allahdi Yeremia damai peiamu upuda, Barukdi nuku taruda, Mikaya ton akati dam akunmaua di gekepu. Ada, Allah Yahwehdi, Yeremia tep peiamupa, Yeremiadi Baruk tep lap peipupa seku upu gekepu. 12 Barukdi nuku upu konum gekepu dingeda, amutu taleamu nimi deiyo ngebo Raja er ati beu. Akati beu dinin, ton yambul ati wilipra domi ngeda, amutu kuramu keca yuma, sengna deiyo ngebo er tep domi ati bena weku. Akatida, Sekretaris Negara er ati pumbonda, amutu talepra kurami ila-ila neng yuma bupra wekmaiya bukmaipa epu. Akati bukmai neng, sun sida ake. Semaya er mi Delaya cap, Akbor er mi Elnatan cap, Safan er mi Gemarya cap, Hananya er mi Sedekia cap, tonda sun upu pepmengepa sengna deiyo ngebo, er si Elisama cap, tonda amutu deiyo yuk-yuk pel talepra kurami ila neng cap, sun yuma akati wekmaiya bukipa epu.

13 Mikayadi akati wekudi, akati kunmai neng tep pepu. “Gume, Allahdi nabi Yeremia damai peiamupa sekamu upu yumada, tenpu ngebo er si Barukdi amutu nesala gekenmangai nukmaupa, ne ton gekepmanuada ake, ake,” pepra lap pepu. 14 Aupu lap pepupa, sun awekmai neng gekepidi, sundi tamupra tenpu ngebo, er si Yehudi doproipidi er tep upepi. “Baruk er damai bememdi, er tep upepkurume. ‘Nimi yuma gekenmanguai di nukmarem bukuda, dopra nun damai adipapu duyankurume,’ pepra deipkurume,” pepipa angebo Yehudi gekepu.

Uda, angeboda Netanya er mi kuramu. Netanya er nai boda, Selemya. Selemya er apu boda, Kusi kuramu. Atep, Netanya er mi Yehudi doproipidi, “Baruk damai bememdi pepmempa, yankurure,” peipipa perbeu. Bena pepupa, Neria er mi Baruk gekepudi adipapu, Allahdi peiamu upu getedongon buku neitamai seku ngeda dopra, sun damai tamupra yau. 15 Akati yau pangeda, sun akati wekmai nengdi, pepi. “Aca yana bukmemdi, adoupmarem bukuda, nun damai ton nuksemempa gekepkupa tep, abukuda nukseo,” pepipa, Barukdi abuku dopra nuku.

16 Konum nuku pangeda, aupu yuma konum moupra gekepidi, sun aneng yumadi, ‘Uo,’ tenen, kwar kupupa, sun pe aso deikipu dipetepdaidi, Baruk tep pepi. “Apeprem ngeda, ila mambul upu cadi, nun ila nimi deiyo ngebo Raja tep bena pepkupe,” pepi. 17 Upepi dingeda, sun aila-ila deiyo nengdi, aupu ton cap Baruk tep asipetepi. “Kandi lap pepseo. Ware kupra ange yumada sekmamum do? Aupu sekmum ngeda, nabi Yeremiadi lap peipkeupa, angepu sekmamum do? Angeda betapra nun damai ton peipseo,” pepi. 18 Upepra asipetepipa, Barukdi tamupra pepu. “Teka aseksi upu yumada, nabi Yeremiadi peipupa, adipapu er peipungepu seksi. Neda sengne keca cap, sengne me cappu doupra, agetedongon buku deikipu seksi. Adoupmanpa epmarumada, akonuma,” pepu.

19 Upepupa, sun anengdi tamupra pepi. “Gume kao, kandi nukmaserem upuda, ila kange mun upu cadi, ‘Amutu deiyo ngebodi, gekepredi kael kepyopda, aupu tep yu kuprepa, popkerur’ tep, kan cap, nabi Yeremia cap, adipapu inipkurerume. Tonda, jenek kuna pio gume,” pepi.

Yehuda mutu ila nimi deiyo ngebo Rajada, Yeremiadi peipupa Barukdi seku upu gekepua tep, pepu upu

20 Nimi deiyo ngebo Raja, er amutara talepra pel dorami nengdi, Baruk seku getedongon buku, er si gulungan doprapidi, Sekretaris Elisama er bungamu ati pumbonpu deipi. Ukupidi, amutu taleramu deiyo ngebo, Raja Yoyakin er damai bena, Allahdi peiamupa, Yeremia gekepudi, Baruk tep lap pepupa, sekra deipu upu yuma, Raja Yoyakin tep lap perbei. 21 Bena pepi pangeda, nimi deiyo ngebo, Raja Yoyakin tamupra Yehudi tep pepu. “Kan adipapu bememdi, agetedongon buku, er sida gulungan bena doupra yayo,” pepu. Upepupa, Elisama ati deipmaiya bena doupra yau. Konum doupra yau dingeda, Yehudidi nukupa, amutu Raja cap, er amutara pel dorami ila-ila neng yuma cap er damai tekra gekepi.

22 Awarda, topnebari war neitamai di nukua tep, amutu bul li kwamupa bul weik kupu. Yehudi abuku nungmau taruda, nimi deiyo ngebo Rajada, bari bukmaua cadi, uku sekmanguai damai bukmaudi, uku peingmau. Ataruda, bul li keamnga tep kupmau. 23 Yehu abuku konum nukra pepbanmaupane, aupu metekanun ton pepu pangeda, amutu ila nimi deiyo ngebo Rajadi, ‘Aupu ne song cadi, ton cap men gekenkamepe,’ tenen, er tema doprapudi, abuku bu neitamai di nyupra tapu. Ukupudi abuku bu dopra, uku dongopupa, ukudi jepropu. Ataru dipapu ange yuma gawal dakra uku dongopupa, jepra gawal dakropu.

24 Uku dongomau taruda, animi deiyo ngebo Raja cap, er amutara pel deiyo kepra dorami neng cap, sun yumadi, ‘Abuku neitamai sekamardi, uku dongonmarada, mali weik kunmare,’ tenen, kwar men kupra tep sun amutu nesala kuramitopu, sun opkal men gwelepropi. Ange gum dinin, Raja ngebodi aupu dopra uku dongopupa, sun yumada tali dimpeprappu kunmai.

25 Ukunmaiyanen, Elnatan cap, Delaya cap, Gemarya capdi pepi. “Uo, nun deiyo ngebo abukuda mambul upu cadi, uku dongona gume,” tupa pepipane, sun upu men gekepu. 26 Nimi deiyo ngebo Raja Yoyakindi, er mi Yerameel cap, tonda Asriel er mi Seraiya cap, Abdel er mi Selemya cap tep pepu. “Sundi nabi Yeremia cap, erdi peipu upu sekmau ngebo Baruk cap, tomopra ateng koupkurerume,” pepra deipu. Upepupa, sun abutene nengdi, ‘Nun tomopkup’ tenen, er peteprei dinin, Allah er si Yahwehdi, Yeremia cap, Baruk cap tep iniamupa, sun abutene nengdi men eprei.

Nabi Yeremiadi, getedongon buku tenpu ton sekua tep, pepu upu

27 Amutu ila nimi deiyo kupra taleamu ngebo, er si Raja Yoyakindi, Allah Yahweh peramupa, Yeremia gekepudi, Baruk tep lap peipupa, Barukdi getena buku neitamai sekeipu upuda, konum uku dongopupa, ukudi jepra gawal daku pangeda, Allah er si Yahwehdi, Yeremia damai yana peipu. 28 “Nedi peiamkesipa gekepmumdi, Baruk damai peipmumpa sekamu buku kwuamu upuda, kange di ton cap tamupra yuk ukupu getena buku neitamai sekamrume. Ada, Yehuda tara talere ngebo, Raja Yoyakimdi uku dongopu ngeda, kange di ton cap tamupra peipmempa, Barukdi sekamarure,” peipu.

29 Tonda, ne Allah Yahwehdi, Yehuda tara talerur nimi deiyo ngebo Raja Yoyakim tep, peipkuken upu peda sekurume. Aupuda ake.

Ne Allah Yahwehdi pepkene. Nedi Yeremia damai mambul upu peiamsipa, erdi Baruk damai peipupa sekamu bukuda, kandi kika deiprapmumdi, konum uku dongopmume. Ada, ‘Abuku dopra uku dongopnyopda, Allahdi derepkamner do, gum do?’ tenena gum dipapu, tali lupra uku dongopmume. Tonda kandi, ‘Ware deiyo keca tep, Allahdi abuku neitamaida, Babel mutu deiyo kepra taleamu ngebo tep, puto karepnepa Yehuda mutu kunung nesala yuma cap, sun peinung keca yala-yala yuma cap, popra gawal dakamenge,’ peipseu do? ‘Angeda ne songe,’ pepmumdi, abuku dopra uku dongopmume.

30 Ange tep nengeda, ne Allah Yahwehdi, kanda Yehuda tara talepra kurem ngebo, Raja Yoyakim tep pepkene.

Uo Raja Yoyakim, kanda ila nimi deiyo ngebo kurum dinin, yuk nengdi kan tep poptapkungyopda, kan kayapu nengdi, kan nong doupra men peipkamenge. Ange gum dinin, kan nonge dopropmengedi, bura tara tali katuai donokmengepa, keteng komuni neitamaida, keteng jeprepa bupu weik kuprepa lyupkamre. Tonda, lukunda neitamaida, bul kan nong deiki paleprepa, bul weik kupkamre. Ukupkamkenga tep nengeda, kandi deipmempa, dadeipdanen bankameng nengda, amutu talena tep, nimi deiyo neng ton men kepkamenge. Kan nyapu kan-kan, tenpu ngebo peda, pumun taru Raja Dauddi bungamu bungna keca deiki, men bukamre. Kan yala ngebodi, amutu pio men talenkamre.

31 Angepu gum dinin, kan cap, kandi deipmempa, dadeipdanen bankameng nyapu cap, tonda kan talepmumpa, kan amutara pel yuk-yuk talepra donung nesala cap, sun yumada mali kurumya cadi, wenepra popkamsene. Ada, sun deiyo kepra amutu taleprum nengdi mali kurumpa, Yerusalem mutu kunung nesala cap, Yehuda mutu neitamai dakunung nesala cap, malipu kununga tep, nedi amutu neitamai ila ikin keca sun nong deiki deipkamsene. Ukupkamne ngeda, ware kuprap taru di, “Sundi tupa malipu kuprumnyopda, sun mali kurumu keca menenga tep, ila kange mun keca karepsenedi, puto di wenepkamsene,” peramsisi, dinin, amutu nesala yumadi, ne peramsi upu men gekeramnei. Atep, aikin keca yumada, tek sisi sun nong deiki deipkamsene. Allahdi peipupa, Yeremiadi gekepu.

32 Yeremiadi aupu yuma konum gekepu dingeda, ukupu getena buku doprapudi, Sekretaris Baruk damai deipudi, “Nedi lap pepkenepa, aupu sekurume,” pepu. Upepmaupa, aupu yuma kange di tamupra, Neria er mi Baruk tep lap pepupa, Barukdi sekmaue. Ada menmena Allahdi peipupa, Yeremia gekepudi, Baruk damai peipupa sekamu dinin, Raja Yoyakimdi uku dongopunge, aupu utopu, kange di ton cap seku. Tonda, Allahdi aupu utopu upu, ton cap tapakra peipupa, Yeremia gekepudi lap pepupa, Barukdi seku. Aupu yumada, nabi Yeremiadi pepu.