Jer 37 | XteSC | STEP | Babel mutu nesaladi Yehuda tara nesala bisbisa kapi taruda, Babel mutu taleamu ila deiyo ngebo Nebukadnezardi, Yehuda tara ngebo er si Yosia, er mi Sedekia dopra ereipudi, ‘Angeboda, sun Yehuda tara kurum nesala talepra, sun ila ngebo Raja kunkamre,’ pepra deipu. Ukupka tep, Yehuda yala neng sun mutu nimi deiyo kepra taleamu ngebo Yoyakin punupu. Yoyakin er nai boda, Yoyakim kuramu. Nebukadnezardi ukupupa, Yosia perami ngebo, er mi Sedekia wepra deipupa, Yehuda mutu neitamai talepu.

Jeremiah 37

Raja Sedekiadi Yeremia tep, “Allah moropsetumpa, lyepsetu do?” pepra moropu upu

1 Babel mutu nesaladi Yehuda tara nesala bisbisa kapi taruda, Babel mutu taleamu ila deiyo ngebo Nebukadnezardi, Yehuda tara ngebo er si Yosia, er mi Sedekia dopra ereipudi, ‘Angeboda, sun Yehuda tara kurum nesala talepra, sun ila ngebo Raja kunkamre,’ pepra deipu. Ukupka tep, Yehuda yala neng sun mutu nimi deiyo kepra taleamu ngebo Yoyakin punupu. Yoyakin er nai boda, Yoyakim kuramu. Nebukadnezardi ukupupa, Yosia perami ngebo, er mi Sedekia wepra deipupa, Yehuda mutu neitamai talepu. 2 Dinino, Sedekiadi nimi deiyo ngebo kuramu taruda, er cap, er amutara pel deiyo kepra taleami neng yuma cap, tonda amutu neitamai tali dakurami nesala cap yumada, Allah er si Yahwehdi Yeremia er damai peipupa lap peramu upuda, moupra men gekerami.

3 Allah er upu men gekeramidi, malipu kurami dinin, Yehuda mutu taleamu ngebo Raja Sedekiadi, ‘Yuk mutu nengdi yana popra gawal daksenung’ tenen, ‘Allah bicau tenepsetudi, lyepsetue,’ tenen, butene neng doproipupa, Yeremia er damai berei. Ada, nimi si Maseya, er mi Zefanya cap, tonda Selemya er mi Yukal cap, sun butene doproipupa, nabi Yeremia damai moroberei. Zefanyada, Allah er si eremna ati pumbon pel dona deiyo ngebo imam kuramu. Raja Sedekiadi upepu, “Sun butene di, Yeremia er damai bererumdi, upepkarerume. ‘Allah lyepsetue tenen, moropkaserume,’ pepra moropreso,” pepra deipupa, mororberei.

4 Ataruda, amutu deiyo nengdi, Yeremia tep, kapul men tomopropi. Tonda, Yeremia tep ateng koupra wenemna ati neitamai kapul men dubenmaiya tep, Yeremiada, tupa amutu kurami nesala kan-kan lap perbanapu kunmaue. 5 Ataru peda, sun Babel mutu jen talen nengdi, ‘Yerusalem mutu kunge nesala yuma popra bisbisa kapkamep’ tenen, yan warekmange taruda, yuk nesaladi, aneng tep, ‘Gume sun gekepso. Yuk mutu nesala, Mesir mutu talerur ila ngebo, er jen talen nengdi, Yerusalem mutu nesala pona tep yakanmange,’ pepra lap pepi pangeda, sun Babel mutu jen talen nengdi, kware kupupa, adipapu Yerusalem mutu ati arum dominge tapra, bura tara saka bendopi.

6 Ataru neitamaida, Allah er si Yahwehdi, nabi Yeremia damai yana peipu. 7 “Sedekiadi wepra deipmaupa, kan damai yan moropmakerei neng tep nengeda, aupu pepkurume. Ada, Yehuda yala nesala yuma, sun ila nimi deiyo ngebo kupra anesala talerur ngebo, er damai bererumdi, apeipkusen upu lap perbenkurerume. Ada, Yudea mutu talerur ngebodi, ne Allah tep, ‘Uo, nun tep bicau tenepsetumdi, lyepsetume,’ pepra moropu ngebo tep, aupu peipkamarerume. Sundi pepkamarerum upuda ake. ‘Mesir mutu jen talen neng, sun Yudea tara kunge nesala cap, kan cap, sun makuna tep yakanmangu nengda, bisi neitamai di tamupmengedi, sun pe mutu, Mesir mutupu tamupra benmange,’ pepra peipkamarerume,” Allahdi pepu.

8 Upepudi aupu ton pepu.

Ukupmengepa, sun Babel mutu jen talen nengdi tamupra yanmangdi, amutupu Yerusalem mutu yana warekamasenge. Ukupsengedi, amutu kurum nesala yuma popbisipmengedi, sun ati yuma uku dongopra gawal dakmenge. 9 Ange tep nengeda, ne Allah Yahwehdi sun wenemna tep pepsene. Sun Yudea tara kurum nesaladi, mok upu men pepdankamrume. Ne tek sisi pepsene. Sun pedi, sun pe teppu, aupu men penkamrume. “Gume, sun Babel mutu jen talen nengda, nun damai yanmaseng dinin, nun tep pona gum dipapu, tali tamupra bendopkamenge. Tek sisi men popbisipkamsenge,” pepra, mok upu men pedankamrume. Ne Allahdi tek sisi pepsene. Sun Babel mutu jen talen nengdi, men tapkamsenge. Popnapu kupkamsenge, pepsene. Ada nedi tenepsitopu, sun ajen neng kange di tamupra, yan warekamasenge. Sun wenemna tep popbisipkamasenge.

10 Ukupmantoda, sun Yudea tara kurum nesaladi, Babel mutu jen neng yuma tep pobisiptumdi, gam tupa kutenge nengda, dila-dilapu doptupa, sun tenda ati buktengai pepeda, sun Babel mutu neng dipapu, sun yuma popra gawal daksetenge. Popbisipsetengedi, sun Yudea tara dorum ati yuma, uku dongopra gawal daksetengia. Angeda, tek sisi kupkamsenga tep pepsene. Allahdi Yeremia tep upeipupa, Yeremiadi, er damai yanmareng neng butene tep lap pepu.

Yeremia tomopra wenemna ati dubei upu

11 Babel mutu jen talen nengdi, Yerusalem mutu yana warekmai. Awarekmai taruda, yuk nengdi, ‘Uo, Mesir mutu ila ngebo Firaun cap, er jen talen neng cap yakanmange,’ pepra lap pepipa, sun Babel mutu jen talena neng gekepidi, Babel mutu jen neng, adipapu Yerusalem mutu tapra, bura sakra bendopi.

12 Ataru neitamaida, nabi Yeremia dipapu Yerusalem mutu taprapudi, Benyamin yala neng sun kurami mutu beu. Ada, ‘Ne co puna nengdi taleami mutu tep, sun cap ne cap, nun tu bukropkamep’ tenen, beu. 13 Dinino, Benyamin yala neng kurami ati arum damai, buplan wengbarami bisi damai beupa, abuplan kalengmau jen talena ngebodi, Yeremia tomopudi aupu pepu. “Gume, ne kaele, kanda, ‘Babel neng sun tara kepropkune,’ tenepmumdi, sun mutu banmarem adano,” pepu. Aupu pepu ngeboda, er sida Yeria. Er nai bo, er sida Selemya. Selemya er nai bo sida, Hananya kuramu. Ajen talen ngebo Yeriadi, nabi Yeremia tep asipetepu.

14 Asipetepupa, Yeremiadi tamupra, pepu. “Gume, kandi ne tep, ‘Babel mutu neng tamna kepronkun tenen, banmarem adano,’ pepmanerem ngeda, gume. Neda Yehuda tara nesala tapra, sun Babel tamna men kepkune. Kandi tali pepmanereme,” pepu. Upepupane, Yeriadi Yeremia pepu upu men gekepka tep, Yeriadi adipapu nabi Yeremia tomopra ateng koupudi, Benyamin mutu taleami neng, sun damai dubeu.

15 Tomopra dubeu pangeda, amutu deiyo nengdi Yeremia tep, derepra wenepidi, sun amutara pel don neng tep, “Angeboda popra wenepmumdi, ateng kouprapmum dingeda, nun mutu Sekretaris, er si Yonatan, er ati bo dongopso,” pepi. Upepipa, akati bena dongopmemei. Yonatan er ati bo damaida, amutu mali kunge nesala wenemna tep, er ati damai tu palipidi, tu pumbon nimi wenemna ati palipra doramipa akapu. Atep, Yeremia dopra, Yonatan er ati dam tu paliraminge pumbon dongopi. 16 Yeremia tep ateng koupra, awenemna ati dinin, tu pumbon dongoprapipa, Yeremiada, atu pumbonaipu kunmaue. Ada, ue denge weik tumi deiki di atu pumbonpu kuramu.

17 Ukunmaupane, amenda taruda, Yehuda mutu taleamu ngebo, nimi deiyo ngebo Raja Sedekiadi er nyapu tep, inipra pepu. “‘Yuk nengdi gekepnung’ tenen, katuai di men pepkamrum dinin, nabi Yeremia adipapu doupra, ne damai duyaso,” pepupa, Yeremia douprapidi, Raja Sedekia er damai dubei. Dubeipa, nimi deiyo ngebo Rajadi asipetepu. “Kao, kan tep Allah er si Yahwehdi, kange di ton cap, upu ton yan peipmaker do, gum do?” pepu. Upepupa, Yeremiadi tamupra nimi deiyo ngebo tep, lap pepu. “Teka, Allahdi kan tep nengeda upeipkere. ‘Babel mutu nengdi, kan cap, kan mutu nesala cap tep, yana popbisipkamsenge.’ Allahdi upeipkere,” pepu. 18 Yeremiadi ange konum pepu dingeda, kange di ton erdi tamupra Raja Sedekia tep pepu. “Nedi ware mali keca ton kupsipa, awenemna ati dongopnerum do? Tonda, nedi kan amutara deiyo neng cap, kan talerem nesala cap, tonda kan cap tep nengeda, nedi ware mali keca kupsipa, adeiyo tep, sun wenemna ati pumbon dongopnerum do?” pepra asipetepu.

19 Upepudi aupu ton dukdongopra pepu. “Tonda amutu deiyo ngebo Raja Sedekia, kan mutu mambul upu lap pena cap, amenda kupkamre keca lap pena cap, ila kael keami nengdi, kan tep, ‘Gume naio, sun Babel mutu jen talen nengdi, nun damai men yana popkamsenge,’ pepra, kan damai yana lap peipkei nengda, ukutaru dan cei kunung do? 20 Atep nengeda, Raja Sedekia, ne deiyo ngebo, kan tep moropokene. Ukutaru ne moropkuken ngeda gekepneo. Ada, kandi ne tep, ‘Yonatan ati dam, wenemna ati pumbon tamupra men dongopkunerem’ tenen, moropkene. Ne kaele, kandi kan jen talen neng tep, ‘Angebo dubeso,’ pepmempa, awenemna ati, tu pumbonpu tamupra dubenengyopda, ne depkamne ja. Atep, ‘Ne depnun’ tenen, moropkene,” Yeremiadi Raja Sedekia tep moropu.

21 Moropupa, aupu nimi deiyo ngebo Raja Sedekia gekepudi, Yeremia tep “Angebo doprapmumdi, ne ila telep ati damai dinin, ne jen talena neng, sun ati buplan wengbana damaipu bena deipkurume,” pepu. Upepupa akati bena deipi. Abena deipipa, acapu kuramu. Ukuramu taruda, Raja Sedekiadi apu ton pepu. “Tumi-tumi yuma, jen keca er si roti dapmengepa, tenpunge dopra, angebo tep kareryakankamrume,” pepu. Upepra deiputopu, jen keca amutu tupa akapu taruda, Yeremia tep, roti dopra kareryakarami. Atep, Yeremiada, ila nimi deiyo ngebo, er ila telep ati pumbon dinin, wenemna ati dongopipa, acapu kuramu.