Jer 38 | XteSC | STEP | Yeremia, ila nimi deiyo ngebo ati pumbon dinin, wenemna ati tupa dakuramu taruda, er upu tupa peramupa, amutu kurami nesala yuma gekenapu kunmai. Ada, “Allahdi er upu ne damai peipneu ngeda ake,” pepra tupa penmau. Aupu penmauanen, sun yuk neng ton gekepi. Ada nimi si, Matan er mi Sefaca cap, Pasyur er mi Gedalya cap, Selemya er mi Yukal cap, tonda Malkia er mi Pasyur cap, sun yumada Yeremia penmau upu gekepi. Gekepi dinin, sunda, ‘Aupu nun songe,’ tenepidi, mali kange doupi.

Jeremiah 38

Yuk nengdi Yeremia tep, yu kupupa, er doupra bunkun paliamya pumbon dokotepi upu

1 Yeremia, ila nimi deiyo ngebo ati pumbon dinin, wenemna ati tupa dakuramu taruda, er upu tupa peramupa, amutu kurami nesala yuma gekenapu kunmai. Ada, “Allahdi er upu ne damai peipneu ngeda ake,” pepra tupa penmau. Aupu penmauanen, sun yuk neng ton gekepi. Ada nimi si, Matan er mi Sefaca cap, Pasyur er mi Gedalya cap, Selemya er mi Yukal cap, tonda Malkia er mi Pasyur cap, sun yumada Yeremia penmau upu gekepi. Gekepi dinin, sunda, ‘Aupu nun songe,’ tenepidi, mali kange doupi.

2 Yeremiadi aupu penmau. “Allah er si Yahwehdi peipneu upuda pepsene. Ada, amutu kurum nesalada, Babel mutu yu jen talen nengdi, sun yan popbisipkamsenge. Ukupkamsenga cadi, amutu ati arum neitamaipu, tupa kunkunge nesala yumada, Babel mutu nengdi mar podankamaseng taru, parang ya di poptapkamsenge. Tonda, sun amutupu tupa kurumupane, sun jen keca yuma gum kupsere pangeda, jen putana deiki di depkamrume. Tonda, ila kange mun pu jerepa, adeiki di ton nimi weik depkamenge.

Dinino, ware nesala do yuma, ‘Babel neng podankupe,’ tenena gum di, amutu neitamai di tapra, Babel mutu neng tara kepkamre ngeboda, ateng koupmengedi, sun pe mutu tamupra dubenkamsenge. Ikin keca dopropkamrum dinin, men poptapkamsenge. Babel mutu nengdi, konum poryanmasenga cadi, ‘Podankupe,’ teneprum nesalada, poptapkamseng dinin, ‘Ateng koupsengedi, dubenkamsengada, telepe pua,’ teneprum nesalada, gam kunkamrume. Anesalada men depkamenge.

3 Angeda, tali tep men pepsene. Allah er si Yahwehdi tek sisi upepsere. ‘Nedi go karepnepa, sun Babel mutu jen talen nengdi, amutu kunung nesala yuma bisbisa kapkamenge. Ukupmengedi, amutu kunung nesala cap, amutu kure keca yuma capda, dalupra dopropmengedi, sun ila nimi deiyo ngebo tep, karepkamenge.’ Allahdi peipneutopu pepsene,” Yeremiadi anesala yuma tep lap pepu.

4 Aupu lap pepupa, sun amutu neitamai deiyo yuk-yuk talepra, mambul pel dorami neng gekepidi, sun nimi deiyo ngebo Raja damai perbei. “Gume naio. Kandi peiptumpa, aupu penmar ngeboda, popnapu kupkamenge. Ada mesum tep men pepmepe. Er upu deiki di, amutu kalengna tep kunung jen talen neng cap, amutu kunung nesala cap, aupu gekepmengedi, kware kuprepa, sun puto gum kupbarure. Sun puto pio boun kurura tep, yan pepkepe. Ada tek sisi angebo Yeremiadi, tali mok upu peptaprepa, amutu kunung nesala yuma gekepmengedi, pio mali kange doununge. Er putapre kecapu tenerure. ‘Amutu nesala telep kupkameng’ tenen, putaprepa, men peserure. Amutu nesala ikin kuptua peda, telepe pua, teneredi peserure,” pepi. 5 Upepipa, amutu ila nimi deiyo ngebo Raja Sedekia gekepudi, “Telepe sun tenepmarumtopu dakupso. Nedi er dopra sun buru neitamai deipsene. Sun tenepmarum ngeda, nedi, ‘Tapso,’ pepra, upu men sekamsene,” pepu.

6 Upepupa, sun anengdi Yeremia dopra, nimi deiyo ngebo er mi Malkia paliamu bunkun pumbon, tapu gerekdongopra abon dokotepi. Abunkon paliamngaida, nimi deiyo ngebo Raja, er ati damai paleamu. Ataruda, mo me cepka cadi, alunkunda me mokon ton men deiamu dinin, bentalpu kwamnga cadi, Yeremia atu pumbon dokotepipa, bental pumbon wekmanto kupu.

Sudan mutu ngebodi Yeremia tep, melipra lyepropu upu

7 Ataruda, nimi tenpu er sida, Ebet-Melek Etiopia mutu ngebo, erda nimi deiyo ngebo Raja er ati melimna pel doramu. Ukuramnga cadi, gekenmaupa yuk nengdi, “Yeremiada bunkun paliamya pumbon konum dokotepmange,” pepipa gekepudi, er adipapu nimi deiyo ngebo kunmauai perbeu. Nimi deiyo ngebo Rajada, Benyamin yala nengdi buplan potokeipinge peami buplan damai bena bukmaupa, angebodi Raja tep perbeu. 8 Ebet-Melekda adipapu Raja er ati taprapudi, Benyamin buplan damai beudi, amutu taleamu nimi deiyo ngebo Raja tep bena pepu.

9 “Ne deiyo ngebo Raja, kan tep pepkene. Kan amutara pel dona deiyo nengdi, Allah er upu peiprepa lap pena ngebo, nabi Yeremia dopra, bunkun dokotepmange ngeda, pio mali kupmange. Anengdi, ‘E, Yeremia abunkon dongopmepepa, tek sisi kange mun di depkamre. Tonda nun mutu neitamaida, jen keca putana li konum kepka tep, jen keca gum kupbanmasera cadi, atu pumbon kunkamre taruda, jen keca men jepyopda, depkamre,’ tenepi. Utenepidi, Yeremia dopra atu pumbon dongopi,” pepu.

10 Upepupa, nimi deiyo ngebo Raja aupu gekepudi, Ebet-Melek tep pepu. “Gume, nimi weneri neng ton pepmempa, kan melipkengepa, sun ton pu bemumdi Yeremia kapul men deapre taru di, atu pumbon di doropkurume,” peipu. 11 Upeputopu, Ebet-Melekdi weneri neng pepupa, sun tonpa nimi deiyo ngebo er ati dam bei. Konum bei dingeda, opkal pun deamupa tamaminge ton dopropidi, ‘Nun kabo nabi Yeremiadi, aopkal talepra welepkur’ tenen, aopkal tapu gerekdongoprapidi, Yeremia kunmauai dokotepi.

12 Ebet-Melekdi opkal tapu gerekdongopra dokotepudi, Yeremia tep upepu. “Aopkal sekropada, kan tapu gerekamakep kekol salong deipkamarume. Ada tapu gerekra gipropkepe taruda, ‘Pu jepkerur’ tenen, pepkene.” Upepupa, angebo peiputopu, Yeremiadi apumun opkal, er kekol salong deipudi keteneipu. 13 Ukupu pangeda, sun aweneri nengdi tapu talepra gipdaro duwelepra, Yeremia yan deipi. Konum dopra deipmemei pangeda, nimi deiyo ngebo Raja, er jen talena neng sun ati damaipu, deipmaipa kunmaue.”

Nimi deiyo ngebo Sedekiadi Yeremia tep, “Kandi pepnememnge gekepnedi kunkamne,” pepra, yan moropu upu

14 Yuk taru ton, amutu ila nimi deiyo ngebo Raja Sedekiadi, er nyapu doproipupa, Yeremia doupra er damai duyai. Ada, Allah er si eremna ati buplan wengbana weneringe damai dubei. Upupipa, Rajadi nabi Yeremia tep pepu. “Ne asipetepkuken ngeda, kan adipapu lap pepkunerume. Inimtamna gume,” pepu. 15 Upepupane, Yeremiadi tamupra nimi deiyo ngebo Raja tep upepu. “Gume naio, Allahdi kan tep, ‘Angeboda, ikin keca er nong deiki deipkamemenge,’ peipkeunge lap pepkene pangeda, tek sisi ne wenepra popkamanereme. Tonda, Allahdi kan tep wenemna upu peipkeunge, lap pepketenya peda, kandi ne upu men gekepkunerume, tenepne,” Yeremiadi Raja Sedekia tep pepu.

16 Aupu pepu pangeda, Raja Sedekia gekepudi, mur-murumna upu di Yeremia tep upepu. “Gume, ne tek sisi pepkene. Nun nai bo Allah gam kuna deiyo ngebodi, nun butene gam kuna deiyo keca cap, isina cap kareramseupa, gam kuneme. Erda, pio gam kunkamra tep, er si deiki di pepkene. Allahdi kan tep peipkeu upu lap pepnememnyopda, nedi kan tep men popkamkene. Tonda nedi, ‘Yuk nengdi angebo wenepra poptenge’ tenen, men pepkamne. Nedi kan tep yuk neng men karepkamne,” pepu.

17 Upepka tep, Yeremiadi nimi deiyo ngebo Raja Sedekia tep, Allahdi peipmaunge, er damai lap pepu. Yeremiadi pepu upuda ake. “Allah er si Yahwehda, Israel nesala yala-yala yuma kalekra melimrure. Tonda, Allah Yahweh ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} erda akeca-keca yuma cap, im deiki jen talen malaikat cap yuma talepra, sun ila deiyo ngebo kurure.

Erdi upeipkeue. ‘Nimi deiyo ngebo Raja, kanda Babel mutu talepra kunung deiyo neng tep, ‘Sundi neda telep dipapu datomopneso,’ pepmempa tomopkengopda, kan wenepra men poptapkamkenge. Tonda, amutu neitamai dorami ati arum yuma uruptapra, uku dongopra gawal men dangkamenge. Babel nengdi kan tep tomopra ateng koupkengopda, ange yuma kupkamkenge. Ukupkengedi tapungepa, kan pe cap, kan nerapu cap, kan nyapu cap, kan ati kikiman kunge nesala yuma capda, gam kurumudi teleppu kunkamrume.’ Allahdi kan tep upepra deipkeue,” pepu.

18 Upepudi aupu ton dukdongopra pepu. “Dinino, kandi sun Babel mutu deiyo neng tep, ‘Neda datomopneso,’ men pepmem pangeda, tek sisi pepkene. Kan cap, kan nyapsilip yuma cap, amutu cap yumada, sun Babel mutu jen talen nengdi popra gawal dakamenge. Tonda, akati arum domi ngeda, uku deipkamenge. Tonda, kan peda, men sepdaro benmanto kupmempa, kan tomopra poptapkamkenge. Allahdi ukupra peipmaker upuda, konum pepkene,” Yeremiadi, Raja Sedekia tep pepu. 19 Upepupa, Sedekia aupu gekepudi, Yeremia tep ka di tamupra pepu. “Ne kwar kupnere ngeda ake. Nun pe mutu neng, Yehudi tara neng dinin, Babel mutu neng tara konum kepropidi, wengbei nengda, anengdi ne douprapnengedi, ‘Ila di wenepra popnenung’ tenen, ne kware kupnere,” pepu.

20 Upepupane, Yeremiadi tamupra Raja Sedekia tep pepu. “Gume, ne deiyo ngebo apeprem ngeda, sundi men kupkamkenge. Kan doupra Babel mutu neng damai bena men wenepra popkamkenge. Tek sisi Allah er si Yahwehdi peipneu upupu konum pepkene. Apepmakentopu, Allahdi peipkeu upu gekepmemdi, angepu kupmemnyopda, ange yumada teleppu kupkamkere. Tonda kan men popkamkenge. 21 Dinino, ne deiyo ngebo, kandi sun aneng tep, ‘Datomopneso,’ men pepmemdi, kika deipra kupmem pangeda, kan popkamkenge. Apepmaken upu yumada, Allah Yahwehdi dortaru kupkamre ngeda, ken mapsa deiki di, konum yan jenek kupra deipneupa epsinge tep, lap pepkukene.”

22 “Ken mapsitopu kupmasidi, dinmasipa, jenek kupu ngeda, ake. Ada, amenda taruda, kan nerapu cap, kan ila telep ati tupa gam kunkameng nerapu cap, kan Raja Sedekiadi taleamum Yehuda mutu neitamai gawal tupa akunkameng nerapu yumada, Babel mutu talepra kunge nengdi, anerapu yuma tomopmengedi, dubankamenge. Ada, sun Babel mutu jen talena neng tep karepkamenge. Karepmengepa, dubenkameng taruda, anerapu yumadi bisi bankameng taru di, kan tep nyek-nyek pepra upepbankamenge.

Nun deiyo ngebo Raja, kan kayapu neng tep, ‘Sunda telep neng cadi, sundi penenung upu teka teneptene,’ teneramum dinin, kan amutara deiyo neng dipapu, telep upu kan damai peamkei dinin, mok upupu peramipa gekeramume. Atep nengeda, ukupmanto upu pepkepe. Ukunmakenga deiki di, ukutaruda kan yanda bental neitamai yaniprempa, bental di jepkerepa, lyepra men benmanto kupkere. Ukupkerepa, kan kayapu neng yuma ange epkengedi, kware tep konum bendopmakenge.

Anerapu yumadi, kan Raja ngebo tep, nyek-nyek pepra mali penkamkenge, pepkene.”

23 “Atep nengeda, ne Yeremiadi ton cap tamupra pepkene. Ne deiyo ngebo Raja Sedekia, kan cap, kan nerapu cap, kan nyapu cap, sun yumada, Babel mutu neng yangedi bisbisa kapsengedi, sun yuma tomopra dubenkamsenge. Angeda tek sisi pepkene. Babel mutu ila deiyo ngebodi, kan tep men tapkamkere. Er jen talen nengdi kan doupra dubenkamkenge. Ukupmengedi, kan kumem ati arum yuma, uku dongopmengepa, jepra gawal dakamre pepkene.” Yeremiadi Sedekia tep pepu. 24 Upepu pangeda, nimi deiyo ngebo Sedekiadi tamupra pepu. “Apepnerem upuda, gekepmaken dinin, kandi yuk neng gekenmangai ton lap pena pio gume. Aupu pepmempa yuk neng gekepmengopda, kan popkenunga tep, pepkene.

25 Tonda ukupmanto, nun butene sisingmanem upu yuma, sun yuk neng gekenmangea pepmem pangeda, sun anengdi upu doupra, ne amutara pel dona tep ila deiyo neng ton, sun damai pepmengepa gekepmengedi, kan damai yangedi, ‘Kan cap amutu nimi deiyo ngebo cap sisingmarerum upuda, nun damai lap pepseo. Aupu men lap pepsemempa, nundi kan tep poptapkamkepe,’ pepkamakenga tep pepkene.” 26 Upepra yan asipetepkenge pangeda, upepkamarume. “Gume neda nimi deiyo ngebo damai benudi, upepsi. ‘Uo naio, neda, kange di doupra wenemna atipu bungbeo,’ pepra, men doproipkamanerume. ‘Awenemna atipu benyopda, ne depnune,’ pepra mororbenmanue.” Angepu pepkamarume. Raja Sedekiadi, Yeremia tep pepu.

27 Upepupa, Yeremiadi aupu gekepra dabenkunmaupane, nimi deiyo ngebo Raja Sedekia, er amutara pel deiyo yuk-yuk talepra pel dorami neng yuma, erdi Yeremia tep pepmautopu, sun adipapu Yeremia damai yaidi yan asipetepi. “Nun mutu taleredi, ila nimi deiyo ngebo Rajada, ware keca deiyo tep, kan upupkeupa, er damai bemum do?” pepra asipetepi. Dinino, sun aneng er damai yan asipi ngeda, Yeremiadi men lap pepu. Ada, nimi deiyo ngebo Rajadi peipmautopu, aupupu sun aneng damai pepu. Upepupa, aneng Yeremia, damai tapra bendopi. Er cap, Raja cap upu sisikrei ngeda, tek sisinge men kael kepi. Tonda, Yeremia cap nimi deiyo ngebo Raja Sedekia cap, sisikmarei upuda, yuk neng ton men gekepiya tep, sun men kael kepi.

28 Atep nengeda, Raja amutara pel deiyo yuk-yuk talepra kurami nengdi, er Yeremia tep tapipa, erda nimi deiyo ngebo Raja Sedekia, er ati damai dinin, wenemna ati pumbonpu kuramupane, amenda taruda, Allahdi peiputopu, sun Babel mutu jen talena neng yaidi, Yerusalem mutu kurami nesala cap podanmaiyane, bisbisa kapidi, amutu tupa gam kurami nesala yuma tomopra, sun pe mutu Babel mutu tamupra dubei. Yeremiadi aupu yuma sekra deipu.