Jer 39 | XteSC | STEP | Raja Zedekiadi Yehuda tara kurami nesala talepra kuramupane, keteng tamun sembilan (9) tahun kepu taru warda, morokyo baringe kembeu. Akepu taruda, Babel mutu Raja kepra kuramu ngebo, er si Raja Nebukadnezar cap, er jen talena neng yuma cap yaidi, Yerusalem mutu yana warekra ongopdongopi.

Jeremiah 39

Babel jen talena nengdi, Yerusalem mutu popra dopropya tep, pepu upu

1 Raja Zedekiadi Yehuda tara kurami nesala talepra kuramupane, keteng tamun sembilan (9) tahun kepu taru warda, morokyo baringe kembeu. Akepu taruda, Babel mutu Raja kepra kuramu ngebo, er si Raja Nebukadnezar cap, er jen talena neng yuma cap yaidi, Yerusalem mutu yana warekra ongopdongopi. 2 Warekra ongopdongopra kuramipanen, ukuramipapu, Raja Zedekiadi, amutu kuramu nesala talepra kuramupane, sebelas (11) tahun kepudi wareda dumbaringe, tanggalda topnebaringe (9) kepu tumida, Yerusalem ati arum domidi, ila lyom gel beilya wipra ongopdongominge neitamaida, sun Babel jen nengdi agel dakra uruptapidi, bon tenpu potokidi, Yerusalem ati arum sisa wekidi, amutu dalupra dopropi.

3 Babel nengdi, gel beilya dakra uruptapidi, bon potokrapidi, Yerusalem mutu neitamai yana arapropi. Ukupi taruda, Babel mutu neitamai pel yala yuk-yuk deiyo kepra amutu taleami neng yumada, Yerusalem mutu neitamai weki. Ada, Yerusalem mutu kurami nesala gel beilya wiamiadi, abeilya neitamai potokra deiami buplanai, er si Pintu Gerbang Tengah, acei damaipu yai. Ayai neng sun sida ake. Ada, Nergar-Sarezer cap, Samgar-Nebo cap, Raja Babel er ati pumbon neitamai deiyo kepra kuramu ngebo, er si Sarsekim cap, Nergal-Sarezer ramak ngebo cap, tonda Babel mutu ila deiyo ngebo, Raja Nebukadnezar, er amutara pel don neng, sun deiyo-deiyo neng ton, Yerusalem mutu neitamai wekidi, bulupra yai. 4 Babel nengdi Yerusalem mutu wekipa, Raja Zedekia cap, er jen talena neng yuma capdi, akupinge yuma epidi, kware kupka cadi, alukunda dipapu, sun yuma bura saka sepdaro, Yordan me duman tara bei. Ada, gel beilya dana-dana di wipra deiamya neitamai bisi di, Raja Zedekia er ati dam tara, wa pepra deiamidi, beilya potokra deiami buplan bisi di, saka bei.

5 Saka sepdaro benmai dinino, sun Babel mutu jen talena nengdi, aneng benmainge epidi, ‘Aneng tomopra popkup’ tenen, sepdaro dombenmaianen, Raja Zedekiada, Yeriko mutu damai dinin, ila banai neitamai di bena tomopi. Tomopyopda, ajen nengdi Raja Zedekia doupra, Babel mutu Raja Nebukadnezar kunmauai, Amat mutu tara neitamai dinin, mutu si Ripla mutupu duyana deipi. Raja Zedekia duyana deipipa, Raja Babeldi, ‘Uda anengda, sun menenga tep, ukupra popra wenepkusene,’ pepra deipu.

6 Raja Babel ngebodi, ‘Ukupso!’ peputopu, er pel don nengdi sun Yehuda tara neng tep wenepra popi. Ada, Ripla mutu dipapu, ataruda Raja Zedekia dinmauaia di, er nyapu sisa cap, tonda Raja Zedekia, er amutara pel dorami neng, sun Yehuda tara deiyo-deiyo neng yuma cap, Babel mutu nengdi poptapipa depi. 7 Aneng yuma konum popipa, Raja Zedekiadi konum epu pangeda, anengdi Zekedia er asuruda, palipra lukropi. Konum lukropyopda, besi tapu, er si rantai dopropidi, er buru ateng kouprapidi, ‘Angeboda nun pe karen mutu, Babel mutu dubenkamepe’ tenen, keteneipi.

8 Ukupi taru dipapu, sun Babel mutu jen talena nengdi, Raja Zedekia er pe ati cap, erdi taleamupa amutu kurami nesala, sun ati-ati yuma capda, uku dongopi. Ayuma uku dongopipa, jepropu pangeda, Yerusalem mutu ati arum dopra kuramidi, menop taru ila lyom gel beilya wipra, amutu dana-dana tara yuma ongopdongominge yumada, agel beilya urupra dakra tapi. 9 Ukupi pangeda, Yerusalem mutu tupa gam kunmai nesala cap, Babel neng tara men di konum kepropmai nesala cap yumada, Babel mutu jen neng gung yuma, sun deiyo ngebo, er si Nebuzarad, erdi, anesala yuma doupra, Babel mutupu tamupra dubeu.

10 Sun Babel mutu jen neng, sun deiyo ngebo Nebuzaradandi, ange yuma konum kupkopda, Yehuda tara dinin, Yerusalem mutu neitamai pio kan-kan neng cap, akeca-keca yuma talena gum, tali kurami neng cap yumada, Yehuda mutu neitamaipu tupa tapupa dakurami. Tonda, sun anesala tep nengeda, angebo Nebusaradandi, sun tep, “Uda, sunda wa pepra kouna cap, tonda anggur wa pena cap kunkamrume,” pepra, tupa Yudea mutu neitamaipu tapu.

Nabi Yeremia tomopra deiamuanen, loptapya tep, pepu upu

11 Babel mutu nimi deiyo ngebo, Raja Nebukadnezardi, er jen talena neng gung yuma, sun deiyo ngebo er si Nebusaradan tep, “Angeda kupkurume,” pepra deipu. Apepu upuda ake. 12 “Kanda, er nabi Yeremia tep, erbenkurume! Moupra epmemnyopda, er tep betapra kalekmemdi, er putan keca yumada, karenkamrume. Tonda, kandi er deikida, ikin keca ton men deipkurume. Er nabi Yeremiadi, kan tep upu pepra moropkamker kecada, kandi apepkeretopu kupkamrume,” pepu.

13 Upepupa, Babel mutu jen neng, sun deiyo ngebo Nebusaradan cap, er amutara pel don neng butene, sun sida, Nebusyasban-Rabaris cap, tonda Nergal-Sarezer rabmak ngebo cap, tonda Babel mutu deiyo ngebo, Raja Nebukadnezar, er amutara deiyo-deiyo kepra, pel dorami neng cap yumadi, upu peipipa, nabi Yeremia damai bena dopropi. Nebusyasban-Rabarisda, Raja Nebukadnezar, er ila ati pumbon neitamai kalengna deiyo ngebo kuramu. 14 Adeiyo-deiyo nengdi, sun jen talena neng kunmai ati beidi, ne nabi Yeremia akati kunmasipa bena doropnei. Doropneiyopda, ne dopra, nimi si Safan, erdi deipu ngebo, er si Ahikam, tonda angebodi deipu ngebo, er si Gedalya damai dubeneidi, er tep karepneipa, Gedalyadi ne tep adipapu telep kupra dubeneudi, ne pe mutu neitamai, ne yala neng sun damaipu dopra deipneupa, acapu dakuramsi.

Allahdi, “Sudan mutu ngebo, er si Ebet-Melek deiki ukupkamne,” peipu upu

15 Ne nabi Yeremiada, Raja Zedekia, er jen talen neng ati neitamai tupa ateng koupra deipneipa, dakuramsi taruda, Allah Yahwehdi ne tep, upu ton peipneu. Aupuda ake. 16 Allahdi, ne tep, pepneu. “Neda sun Israel yala nesaladi, ‘Nun nai bo,’ pepra, si eremnerumupa, nedi melipra kalengsenun Allah akunune. Neda, Allah Yahwehdi, ^{▼▼Allah – Ibrani upu deiki di, akayat neitamaida, Allah er si tep, ‘Yahweh Sebaot’ pepra seki. Sun kael kemna tep, aupu ‘Sebaot’ deiyonge ton katuai di sekmepu.} im deiki kunge jen talena malaikat yuma, sun deiyo ngebo kununa cadi, ila puto weik ngebo kunune. Akunedi pepkene. Amenda taru, kan Yeremiadi, Sudan mutu ngebo er si Ebet-Melek, er damai bememdi, aupu pepkamamerume. Ada, menop taru, nedi, ‘Amutu nesala wenemna tep, kupkamne kecada, ada telep kunange guma dinin, tek sisi ila kange mun kunange doproipnepa, amutu nesala sun deiki yankamre. Ada, nedi, ‘Ataru ake, atumi deiki ake,’ tenemsi tarupu, amutu nesala wenepra popkamne. Ange ukupkamne taruda, apeiamsi ikin kecada, karepnepa kupkamre ngeda, kan Yeremiadi epkamreme,” Allahdi upepmaneue.

17 Dinino, ataruda nedi kan tep melipkenedi, lyepropkamken ja. Ukupkenyopda, yu nengdi, kan dopra, mali neng tep men karepkamkenge. Ada, kandi, ‘Uo’ tenen, kware kukerur neng damai, yuk nengdi kan dopra, aneng deiki men deipkamkenge. 18 Angeda, tali tep men pepkene. Tek sisi pepkene. Nedi kanda lyepropkamkena cadi, kan nongda, men poptapkamkenge. Yu nengdi nimi pona parang ya di dopra, kanda men popkamkenge. Ange gume dinin, kandi ne Allah tep, pio teka tenenememdi, ne damaipu kumemnya tep nengeda, tek sisi gampu kunkamrume. Aupuda, ne Allah Yahwehdi peipkene.” Allahdi upepupa, ne Yeremiadi aupu dopra Ebet-Melek tep, er damai bena pepkamne ja.