Jer 4 | XteSC | STEP | Allahdi er nyapu sisa Israel nesala tep upepu. Sunda, ‘Nun nai Allah damai tamupra yankupe,’ tenepmumnyopda, adipapu yankurume. Ukupra yankumum dingeda, sunda pumun taru di, tali-tali keca tep, “Nun nai Allah,” pepra, si eremamum kecada, ne yu kunerure. Atep, sun adipapu akeca tapmumdi, tamupra yamumnyopda, nepu moupra talepnerumudi, ne sipu eremkamnerume.

Jeremiah 4

Israel nesala tep, ‘Mali-mali keca kurumnge tapra, tamupra ne damai yankurume,’ pepu upu

1 Allahdi er nyapu sisa Israel nesala tep upepu.

Sunda, ‘Nun nai Allah damai tamupra yankupe,’ tenepmumnyopda, adipapu yankurume. Ukupra yankumum dingeda, sunda pumun taru di, tali-tali keca tep, “Nun nai Allah,” pepra, si eremamum kecada, ne yu kunerure. Atep, sun adipapu akeca tapmumdi, tamupra yamumnyopda, nepu moupra talepnerumudi, ne sipu eremkamnerume. 2 Ukumumdi, ne Allah si deiki di, “Tek sisipu kunkamepe,” pepmumdi, “Nun nai bo Allah, pio gam kuretopu, erdi pesere upu yuma peda, pio tek sisipu kurure. Atep nun peda telep dumsisi kuna cap, tonda mok upu pena cap, men kunkamepe,” pepra, angetopu kupmum pangeda, yuk mutu ban-ban yuma kunung nesaladi, sun tep epra kael kepsengopda, sundi ne tep, “Naio, nun ton melipseo,” pepra moropkamenge. Ukupra moropmengopda, ne Allahdi sun ayuk mutu nesala tep, melipra telep kweipkamsene. Ukupnepa, sundi ne tep, ne si pio eremkamnenge. Allahdi pepu.

3 Allahdi Yehuda mutu nesala cap, Yerusalem mutu nesala cap tep pepu.

Sun wa men perumu mutu tuda, wa pepkurume. Sun wa pepra, yal keca bolokurumaida, takke pakra belemre tuaida bolongna meme. 4 Sundi, ne sun nai bo Allah damai, pedina upu peiprumungepu moupra talepkurume. Tonda uo, sun Yehuda yala nesala cap, Yerusalem mutu kurum nesala cap tep, aupu pepsene. Sundi, ‘Neda Allah er ngepu kunune,’ tenenkamrume. Ange men kupmumnyopda, ne yuda, uku bu jeramretopu kunere ngeda, sun deiki deipkamsene. Ukupnepa, auku bu jentopu kunkamre ngeda, nimi yuk nengdi, men tapmanto kupkamenge. Ukupkamnenge yumada, sun pe mali kuna deiki dipapu, ikin keca sun pe damai yankamsere.

‘Yehuda mutu nesala popkup’ tenen, warekdongopi upu

5 Amutu neitamai yumada, pung peramre keca, er si terompet doupra pung pepmumpa, ila lelim pepkurure! Yehuda mutu nesala cap, Yerusalem mutu kunung nesala cap, sun tep, ila lelim pena deiki di lap pepkurume. Ukupmumpa, sun adipapu, sepdaro menmena, ‘Nimi yuk nengdi popsenung’ tenen, kalengna tep, ati arum neitamaipu wekununge. 6 Allah er kunai, Sion mutu deiki bana tep, bisi peterepkurume. Dim pepra kuna gume. Adipapu gopra benkununge. Allah Yahwehdi, amutu neitamaida, ila kange mun kuna deiyo keca dopra deipkure. Ada, amutu pio yawa popra tamna tep, utara tamna di yankure.

7 Yehuda yala nesala, sun pona tep yankameng nengda, ukupmanto, Singa pus inipra kuramyanen, ‘Jena ton popra jeptene’ tenen, eramre utopu, Yehuda nesala, sun tep, yu tenesenung nengda, konum ketenepra yanmange. Ada, Yehuda mutu nesala, ati arum dopra kuramenge mutu yuma, dakra tapmengepa, ati walangyopu kupredi, dimbulung pepkamre. Nimi ton amutu pio men kunkamenge. 8 Ukuprepa, ange sun epmengedi, mali pepra ngolokmengedi, engenkamenge. Sunda, mali opkal kain karung di kepra peten kepmengedi, mali penkamenge. Ada, Allah er yuda, pio uku bu jento kunkamre ngeda, Yehuda mutu neitamaida, men gum kupmanto kunkamre.

9 Allah Yahwehdi pepu. “Ataru kepyopda, Raja nimi deiyo-deiyo neng cap, tonda nimi deiyo-deiyo kepra, amu talepi neng cap yumada, pining kange doupra men kupkamre. Dabal-dabalpu kupkamre. Tonda, Allah er ati pel don neng, sun imam-imam nengda, kware kupredi moropsepkamenge. Tonda, Allah er upu lap pena deiyo neng, sun nabi-nabi nengda, lukdangedi kwar kupkamre. 10 Atep nengeda, ne Yeremiadi aupu pepsi. “Ne nai Allah Yahweh, kanda ila puto weik ngebo kurume. Kandi Yehuda yala neng cap, Yerusalem mutu kunung nesala cap tep, tali minina upu peptamume. Ada, sun tep, ‘Telep kupra deipkamsene,’ pesemum dinin, ukutaru yu nengda, ya di nun konum lukra popropsenge.

11 Ataru konum yaryopda, “Yehuda yala nesala cap, tonda Yerusalem mutu kunung nesala cap tep, mutu katawai kurur bupu weik kumanyada, sun damai tara pung pepyakare,” pepra, lap pepmengepa gekepkamenge. Akumanyada, tali sepmenga keca akapmarepa, yaredi pung pepra doupra baramretopu, kumanya men yankamre. 12 Ada tali kumanya gume. Ila puto kumanyada, Allah er pedi peprepa yaredi, er nyapu, sun Yehuda yala nesala cap, Yerusalem mutu kunge nesala cap, sun wenemna tep, dokotepkamre.

Yehuda yala nesala yana warekra popkamenga tep, pepu upu

13 Dinkununge, sun podan neng yakanada, dua di mutu yuma kepdongop yakaramre utopu kupra yankamenge. Tonda, nimi porbana tep, bali deiki bukra embarameng keca, sun podan neng kereta-kereta kudada, mungna kumanya ila puto di, pung pepra yakaramretopu kupkamenge. Ma pon ma, lakra yakarurada, sika di yakarur dinin, akuda bisam yumada, menmena sepdara yankamenge. Ukupra yangedi, uo, nun yuma yan popra gawal dakamsenge.

14 Yerusalem mutu nesala tep pepu. Sun dipru neitamai di, mali kun kecapu tenerumnge yumada, adipapu tapkurume. Ukupmumpa, nedi sun yumada, lyepropkamsene. Ware kuprap taru di do, sun dipru neitamai di malipu tenemum kangeda, pio derinkamrum do? 15 Dan yala neng kunung mutu tara neitamai cap, tonda mutu dam tara dinin, Efraim yala neng kunung mutu neitamai cap di, wepra deipmengepa, mali upu doupra, sun damai peryankamenge. 16 ‘Sun amutu-amutu neitamai yuma, dakunung yala yuk-yuk nesala yuma gekenkameng’ tenen, upu doupra, penkamrume. Ada, sun Yerusalem mutu kunung nesala cap, tonda sun Yudea tara neitamai kunung nesala yuma cap tep, sun kange moupra kunkurume. Sun podan nengda pio karen mutu di, sun yuma pona tep yakanmang taruda, konum damai kupmar adano!

17 Ukupmengedi, Yerusalem mutu nesala pona tep, nimidi wa pen dam kalengameng utopu kupkamenge. Sun pona tep, ongopra warekdongopkamenge. Ange kupkamenga deiyoda, sun Yehuda mutu kunge nesala cap, Yerusalem ila ati arum neitamai kunge nesala capdi, ne Allah damai pio mali kungedi, ne tep tapnengedi, ne penun upu pio men gekenenunga tep, ne Allahdi wenepkamsene. 18 Uo, Yehuda mutu kurum nesala cap, Yerusalem mutu kurum nesala cap, sun pedipapu mali-mali weik kurumya deiki di, ikin keca dopra, sun damai deipdankamrume. Sun kumumdi pel dorumunge cap, tonda sun pe deikipu ikin keca yaredi, sun diprupu yana lukrepa, pu jenkamsere.

Yeremiadi Allah er nyapu tep tenepetepudi, dipru pu jepka tep, pepu upu

19 Uo, ne kange mun kange doupra kunmane! Neda bouna di dakra men kutenenge tep, ne kange mun kunerepa, pio ikin deikipu kunune. Neda dipru darapdongopra men kutene. Ada podan kunga tep, terompet lelim pepmenge taruda, gekepnedi, ne dipru luk-luk penerure. Ne taram neitamaida, lung-lung penerure. Ange ukuneryada, nimi ponge yu nengdi, terompet deiki lelim ila di upu pepmengepa, ne gekepnedi, dipru pu jenerure. 20 Ila kange mun keca yaryopda, adipapu ka di ton cap, yuk kange mun keca ton yakankamre. Tupa-tupa yakanapu kuredi, amutu yumada, mali kupra derirure. Tonda dato-dato di, ne keana dodina ati urupra tamnenunge. Tonda, ne keana dodin tenda ati dona tep, kambing bol wiamsinge yumada, menmena di gwelepra tamnenunge.

21 Nun podan nengdi, sun nimi porbana tep taruda, ila bendera ikrapmengepa, dinunada, ware kuprap taru ton cap, angepu enkamne do? Danto taru di, ange gum kupsetupa, men epkamne do? Tonda, nimi poryankungedi, bung-bung pena er si terompet, lelim weik perameng ngeda, ware kuprap taru ton cap, angepu gekenkamne do? Dan taru di ange gum kuptupa, tupa men gekenkamne do? Nabi Yeremiadi pepu. 22 Allah Yahwehdi aupu ton pepu. “Ne nyapu sunda, pio walwal neng kununge. Sunda ne tep, men kael kemnenunge. Sunda amol kinin neng utopu kununge. Sunda yambulanun peda, ton moupra men kael kemengedi, mali kun kecapu ila di kael kemnung nesala kununge. Adeiki di telep kupra kuna ngeda, men kael kemengedi, nong men kurure.”

Yeremia ken mapneto kupudi, dinmaupa ila kange mun keca yakanmaupa, epka tep, pepu upu

23 Nabi Yeremiadi pepu. Ken mapneto kupmasidi, tuai mutu tamna dinmasada, urasin ton men ketenepudi, akeca-keca yuma men kupupa, pio gopu kupupa epsi. Tonda, im alau tara erepra dipetepsada, uo, dirine men kupudi, kunuknapu kupupa epsi. 24 Nedi ange yuma dinmasipa, ila mutu gon cap, tonda yambul mutu buma cap yumada, pio ila longna longmaudi, kange mun nge kunmaupa, epsi. 25 Nedi dinmasipa, tuai mutu ban-ban yuma neitamaida, nesala tenpunge peda ton kunmaipa, nimi ton men epsi. Tonda, ma yala-yala yuma peda, amutu ton men kunmaidi, ma yala-yala yuma konum lakra bendopmaipa, epsi. 26 Tuai mutu ban-ban yuma dipetepsipa, Allahdi, er nyapu tep, yu kupupa wenepu ngeda, men taru telep sukun tu kwamu dinin, adinmasipa, tuda gelal sepra, pio katawaipu kupu. Tonda, ila ati-ati arum dopra kurami mutu yumada, akati arum yuma konum dakra tapipa, ati walangyopu kupupa, epsi. Allah Yahweh er damaida, akeca-keca yuma pio mali kupupa, walang yo pu kupu. Ada Allah Yahweh er ila yu di, er nyapu sisa, sun wenemna tep kupu.

27 Ange-ange epsa deiyoda ake. Allah Yahwehdi pepu.

Amutu kapu tu deiki yumada, gelal sepra pio katuaipu kupkamre. Dinino, amutu tu, weik tara yumada, mali kweipkamne dinin, ange yumada, sikke buktapra, men gum kupra deipkamne. 28 Nedi ne nyapu sisa sun wenemna tep, ‘Ukupkamsene,’ pepra deipsi upuda men taptene. Ange tep nengeda, tuai mutu ban-ban yumada, ikin kuprepa kange mun kupre pangeda, nimi yumadi ila di engenkamenge. Im alau tara yumada kunukamre. Ange yuma kupkamra deiyoda, ake. Ne Allahdi, ‘Sun wenemna tep, ataruda ukupkamsene, ukupkamsene,’ pepra, konum deipsisa cadi, nedi tenepra peipsi ngeda, men gum kupra deiptene. Ne kange tenemsi ngeda, punupnedi, men taptene. Apepra deipseu tarupu konum yaryopda, ange yuma tek sisi nong kupkamre ja!

29 Sun podan neng, kuda bisam bali deiki bukra, jen talepra yakangepa, sun amutu ila ati arum dopra kuramenge nesalada, alelim gekepmengedi, amutu tapra, bura saka, sepdaro bendopkamenge. ‘Nun podan nengdi popra gawal daksenung’ tenen, sunda bura mutu cap, gel imir cappu inimbendopkamenge. Ukupmengepa, amutu ila ati arum dominge yumada, dimbulung pepredi, walangyopu kupkamre. Tonda, ange ukupyopda, amutu neitamai yumada, nimi tenpu ton pio men kunkamenge.

30 Atep nengeda, uo, sun Yerusalem mutu cap, Yudea tara neitamai cap kurum nesalao, sunda ware keca deiyo tep, ‘Urasin telep kweidankupe’ tenen, sunda, opkal yapi binge kemrum do? Sun bol deiki kwirip keca emas cap, perak cap, derirumada, ware deiyo tep do? Tonda, sun asuru potong damaida, urasin telep kuna tep keca pulurumada, warya tep do? Sunda, ‘Urasin telep kweipdapkupe’ tenen, kurum ngeda, tali tep kurume. Tek sisi ngeda, sun mun pesenung nengda, ton cap sun tep men tenenkamsenge. ‘Anengda dakwapye’ tenepra, tapkamsenge. Sun anengdi tamupra sun tepapu poptapkamsenge.

31 Ne Yeremia ken mapsa deiki di gekenmasipa, anesalada nerapu mi deipkunga tep, mi deiyo jenmarepa, donmange taru, ngolongameng utopu kunmaidi, engenmaipa gekepsi. Sun ngolongnada ukupu kaber ner kalemna mi deipkamaredi, pu jenmarepa, ngolongamre utopu kunmaidi, engenmaipa gekepsi. Agekepsi keca nongda, ake. Ada, sun Yerusalem mutu kunung nesala yumada, isin welepropnen, puruk-puruk pengedi engenkamenge. Sun amutu kunung nesalada, buru erepra deipmengedi, upenkamenge, “Uo, nun amutu kunup nesalada, ikin kupsere. Ada, nun podan nengdi, popkusenge,” pepra, ila upu di ngolongkamenge. Nabi Yeremiadi pepu.