Jer 40 | XteSC | STEP | Yerusalem mutu tupa gam kurami nesala cap, Yehuda tara tupa gam kurami nesala cap, tonda Yeremia cap, sun kikiman ateng koupra, Babel mutu dubana tep, dubanmaiyanen, Rama mutu bena kunmai. Ataruda, Babel mutu jen talena neng gung, sun deiyo ngebo er si Nebuzaradandi, Yeremia buru ateng kouaminge loptapudi, Rama mutu bena deipu. Ataruda, Allah Yahwehdi Yeremia damai yana upu pepra deipu.

Jeremiah 40

Yeremia cap, Gedalya cap tonpa kuramrei upu

1 Yerusalem mutu tupa gam kurami nesala cap, Yehuda tara tupa gam kurami nesala cap, tonda Yeremia cap, sun kikiman ateng koupra, Babel mutu dubana tep, dubanmaiyanen, Rama mutu bena kunmai. Ataruda, Babel mutu jen talena neng gung, sun deiyo ngebo er si Nebuzaradandi, Yeremia buru ateng kouaminge loptapudi, Rama mutu bena deipu. Ataruda, Allah Yahwehdi Yeremia damai yana upu pepra deipu. 2 Ataruda, Babel mutu jen neng gung, sun deiyo ngebo Nebuzaradandi, Yeremia dopra yaudi er tep pepu. “Kan nai Allah Yahwehdi, amutu tep, ‘Ila ikin keca amutu deipnepa, sikke buktapkamre,’ pepka tep, amutu kange mun keca yanmarada, akonum dinmape.

3 Ukutaruda, kan nai bo Allahdi, ‘Sun wenemna tep ukupkamsene,’ peiamutopu, konum kupmasere. Ada, kan mutu nesala, sundi Allah Yahweh sun tep, er upu pepra deiamseu ngeda, sundi men moupra talenunge. Tonda, sundi mali kun kecapu tupa talepra kunga deiki di, Allah erdi ikin keca konum kareprepa, angeda, sun deiki konum yanmarpa, dopropmang adano. 4 Atep ukutaru, kandi moupra tenipetepmemdi, kael kepkurume! Nedi kan buru ateng koupkeinge konum loptapkene. Kandi, ‘Telepe,’ teneptumopda, kan cap, ne cap kikiman orkaren mutu, Babel mutu betenemepa, nedi kan tep pio melipra kalengkamkene. Ukupnyopda, kanda teleppu kunkamrume. Dinino, kan pedi, ‘Gume, Babel mutu men bena kunkamne,’ tenepmemnyopda, ange peda telepe pua. Kandi tenepmem ja. Atep, kanda melipnemempa, nun kikiman Babel mutu benkunem do? Men benkunem do? Kan kange ja. Kanda dinkurume. Amutu yumada, jenek kupra dinmarema cadi, kandi, ‘Amutu banada, telepe. Dumsisi kuna ngeda, amutu ton bena kutene,’ tenepmem mutuda, tali lupra bana pua.” Babel mutu ngebo Nebusaradandi, ne Yeremia tep pepneu.

5 Dinin, er kapul men beu taruda, Nebusaradandi aupu ton pepneu. “Dinino, kan tenena tep, aupu ton pepkene. Kandi, ‘Amutupu kunkamne,’ tenepmemnyopda, nimi si Safandi deipu ngebo, Ahikam, erdi deipu ngebo Gedalya, er damai telep dipapu dabenkurume. Deiyoda, nun Babel mutu ila nimi deiyo ngebo, Raja Nebukadnezardi, ‘Yehuda tara kunge neng, sun mutupu tupa kunmang nesala tep, sundi yambul ati arum dominge talepra, sun deiyo ngebo Gubenur kepra kunkamre’ tenen, Gedalya konum erepra deipmare.

Atep nengeda, Gedalya cap, erdi talerur neng cap, kan cap, tonpa kunkamrume. Agum dingeda kandi, ‘Atara mutu benkun,’ tenepmem mutuda, tali lupra benkamrume. Ange peda telep pua.” Nebusaradandi, aupu konum pepkopda, erdi ne Yeremia tep, jen keca cap, ne tep, ‘Telepe’ pena tep karen keca, hadiah cap karepneudi, ne adipapu loptapneudi, erda beu. Utopu, ne peda adipapu besi.

6 Ne Yeremiada, Safandi Ahikam deiamupa, erdi deipu ngebo Gedalya, Mizpa mutu kuramngaipu besi. Besipa, Gedalya cap, ne Yeremia cap, amutu tupa gam kurami nesala cap, nun kikimanpu kuramepu.

Gedalya Gubernur kepka tep, seku upu

7 Ataru neitamaida, Babel mutu nengdi men popi Yehuda yala neng, Yehuda tara neitamai dinin, bura mutu tali embanapu kunmai nengda, sun deiyo-deiyo neng cap, sun amutara jen talepra kurami neng capda, yuk nengdi penmai upu gekepi. Yuk nesaladi, aneng tep, ‘Gekepso! Pio kankanpu kunup nesala, Babel mutu nengdi tapseipa, amutu tupa akunmap nesala tep, Raja Babeldi, ‘Yehuda tara tupa kunge neng cap, nerapu cap, nyapu cap, amutu kankanpu kunge nesala yuma talepra, deiyo kepra Gubernur kepkamre’ tenen, Ahikamdi deipu ngebo, Gedalya konum erepra deipupa, erdi nun mutu talenkamsere,” pepi. Upepipa, Yehuda mutu tupa kunmai jen neng, sun deiyo kepra taleami neng ton aupu gekepi.

8 Gekepyopda, sun yumadi, Gedalya damai bei. Ada, nimi si Netanya, erdi deipu ngebo Ismael cap, Kareahdi deipu ngebo Yohanan cap, Tanhumetdi deipu ngebo Seraya cap, Efai er nyapsilip dinin, Netofa mutu di yai neng cap, tonda Maakahdi deipu ngebo Yezanya cap, adeiyo neng cap, sun amutara jen talena neng cap, sun yuma kikiman, Mizpa mutu bena, Gedalya kuramngaipu yai. 9 Mizpa mutu yai pangeda, Gedalyadi sun ayai neng tep pepu. “Sunda, Babel neng tep, ‘Uo, sundi talepsengepa, nunda sun amutarapu kupedi, sun pel melipra kunada, nun song’ tenena gume. Sun Babel mutu neng malipra pel dona tep, kwar tenena gume. Sunda, nun mutu acapu kunkamrum dinin, sun yumada, Raja Babel, er amutara pel dona nengpu kunkamrume. Ange kumum pangeda, sun yumada, teleppu kunkamrume.”

10 Sun pedi, ‘Nunda amutupu kunkamepe,’ tenepmum mutupu, bena kunkamrume. Ukumumdi, wa pepra kounkamrum keca cap, anggur du cap, yuk yala co du yuma cap, dakra jenkamrume. Tonda, minyak Zaitun capda, bulupra tenpuai dikdongopra mawa derinkamrume. Sundi konum dalupra doproprum mutu cap, ati arum capda, acapu kange deipra kunkamrume. Dinino, neda Mizpa mutu kunkamne. Aceipu dakuramnyanen, sun Babel mutu nengdi, ‘Sunda ware kunmang do?’ tenen, amutu yange pangeda, amutu neitamai dakunkamrum nesala yuma tep, yo punupsenedi, sun melimna tep, upu pepnepa, sun Babel mutu deiyo-deiyo nengdi, kange deipra aupu gekenkamnenge.” Gedalyadi pepu.

11 Ange yambulanun utopu, ataru neitamaida, yuk Yehuda tara kurami neng dinin, Babel mutu nengdi, Yehuda tara poryai taruda, sundi, ‘Uo, Babel tara nesaladi, ware kupkamseng do?’ tenen, kwar kupupa, bura saka yuk-yuk mutu datengbenami nesala ton aupu gekepi. Ada, Yudea mutu nesala dinin, kwar kupupa, Moab mutu cap, Edom mutu cap, Amon mutu cap, tonda yuk mutu-mutu yuma dabena kurami nesala cap, sun yumadi aupu gekerami. Ada yuk nengdi, “Gume, Raja Babeldi, Yehuda tara tupa gam kunung kan-kan nesala tep, Safandi deipu ngebo Ahikam, erdi deipu ngebo, er si Gedalya, erda sun Gubenur kunkamre’ tenen, konum Gubernur erepra deipipa, talepra kurure,” peramipa, gekerami.

12 Menop taru bura saka dabendopi Yehuda tara neng, yuk-yuk mutu neitamai dakurami dinin, anesala yumada, aupu gekenmai taruda, adipapu tamupra, Yehuda tara mutu neitam dinin, Gedalyada, Mizpa mutu kuramngaipu, tamupra yakarami. Ukuramidi sun yumadi, co du yala yuma cap, anggur du cap bupra kipmandi, tenpuai derirami ngeda, pio weik, men nukmanto kupbaramu.

Gedalya popi upu

13 Sun anesala yumada, teleppu dakurami. Dakuramyanen, tenpu taru ton, Kereah er mi Yonahan cap, tonda Yehuda tara neng dinin, bura mutu tali embanapu kurami jen nengda, sun deiyo-deiyo neng cap, sun amutara jen talepra kurami neng cap, Gedalya kuramngaipu, Mizpa mutu yai. 14 Yaiopda, sundi Gedalya tep pepi. “Naio, kan pona tep, Amon yala nesala, sun nimi deiyo ngebo Raja Bahalisdi, nimi si Netanya, erdi deiamu ngebo Ismael damai, nimi upu pepra deipupa, kan pona tep, konum damai yau ngeda, konum kael kepmum do, gum do? Ange ton kapul men moupra tenepmarem do?” pepra asipetepi. Upepi dinino, sundi ayana lap pepi upuda, Ahikamdi deipu ngebo, Gubenur Gedalyadi, ‘Aupuda tek sisi pepmanga,’ pio men tenepu.

15 Men teka tenepka tep, nimi si Kereah, erdi deipu ngebo, er si Yonahanda, ‘Yuk nengdi gekepnenung’ tenen, inipra dim pepra, Mizpa mutu bena, Gedalya kunmauaipu bena pepu. “Naio, ne moropkene. Kandi, ‘Telepe,’ pepnetumpa, yuk neng kael kemna gum, ne dipapu benedi, Netanya deiamu ngebo Ismaelda popkamane. Deiyoda, ware keca deiyo tep, angebo Ismaeldi kan popkerepa, Yehuda tara kunup nesala, kan damai tupa kunmang nesala yumada, kware kuprepa, bura saka benkameng do? Tonda, Yehuda tara kunge neng, yambulanunpu tupa akunmap dinin, ‘Nun Yehuda nesala gum kupra deipkamseng do?’ tenen, pepkene.” Yonahandi, Gubenur Gedalya tep upepra bena asipu.

16 Aupu yuma konum pepra asipu dinin, Ahikamdi deipu ngebo Gubenur Gedalya gekepu dingeda, Kereahdi deipu ngebo Yonahan tep tamupra pepu. “Kandi atenepmarem ngeda, pio kuna gume. Ne kangeda, kandi, ‘Ismaeldi kan popkamkere,’ pepmanerem ngeda, teka men tenepkene. Aupu pepmarem ngeda, talinge tenepmaremdi, tali upupu yana, pepmanereme. Atep, kandi angeda pio ukuna gume,” pepu.