Jer 41 | XteSC | STEP | Aketeng tamun neitamai yoneitam (7) war konum kepu pangeda, Elisama erdi deiamu ngebo Netanya, erdi deiamu ngeboda, Ismaeldi Mispa mutu yau. Ismaelda, amutu nimi deiyo ngebo, Raja keamu ngebo er si Zedekia, er amutara pel dona deiyo ngebo kuramu. Ismael cap, yuk neng ton, sepuluh neng cap, nimi si Ahikam, erdi deiamu ngebo Gedalya damai yai. Ada, ‘Gedalya cap antaptepedi, upu talenkamep,’ tenena tep, Mispa mutu yai. Mispa mutu konum yai pangeda, sun yuma tenpu kange doupra, roti cap, yuk jen keca cap kikiman jenmai taruda, kunmai.

Jeremiah 41

Ismaeldi Gedalya popka tep, seku upu

1 Aketeng tamun neitamai yoneitam (7) war konum kepu pangeda, Elisama erdi deiamu ngebo Netanya, erdi deiamu ngeboda, Ismaeldi Mispa mutu yau. Ismaelda, amutu nimi deiyo ngebo, Raja keamu ngebo er si Zedekia, er amutara pel dona deiyo ngebo kuramu. Ismael cap, yuk neng ton, sepuluh neng cap, nimi si Ahikam, erdi deiamu ngebo Gedalya damai yai. Ada, ‘Gedalya cap antaptepedi, upu talenkamep,’ tenena tep, Mispa mutu yai. Mispa mutu konum yai pangeda, sun yuma tenpu kange doupra, roti cap, yuk jen keca cap kikiman jenmai taruda, kunmai. 2 Kikiman jenmai taru neitamaida, Netanya erdi deiamu ngebo Ismael cap, tonda er cap melipra yai neng, sepuluh neng cap, sun yuma dato-dato di kikiman tekroidi, nimi si Safandi deiamu ngebo Ahikam, er di deiamu ngebo Gedalya tep, nimi pon parang ya dopra, poptapi.

Gedalya popya deiyoda ake. Ada, Babel mutu taleamudi, nimi deiyo kepra Raja kuramu ngebo Nebukadnezardi, ‘Mizpa mutu nesala yuma, sun deiyo ngebo Gubenur kepra, anesala talenkamre’ tenen, Gedalya erepra konum deiamnga cadi, ‘Angeboda nun songe’ tenen, Ismael cap, er melimna neng capdi angebo poptapi. 3 Angebopu gum dinin, ange utopu, Ismael cap, er melimna neng capdi, Yehuda mutu neng ton, adipapu poptapi. Ada Gedalya cap, aYehuda mutu neng cap, Mispa mutu kikiman kunmaiya tepa. Tonda, Kasdim ^{▼▼Kasdim – Kasdim mutuda, ada Babel mutu tepa. Sun butene dinin, amutuda, tenpua} mutu di, Mispa mutu konum yana, keana taru tep, akunmai jen neng peda, sun yumada, Ismaeldi popra tapu.

4 Ismaeldi Gedalya popra mapmaua, konum bereku tumida, yuk nengdi ton, Ismaeldi Gedalya popmau ngeda, yuk neng yumadi, kapul men kael kepmai. 5 Atumi dipapu, Sikhem mutu neng cap, Silo mutu neng cap, tonda Samaria mutu neng capda, denge weik delapan puluh (80) nengdi, Mespa mutu yai. Sun aneng yumada, sun ban potong yumada, konum toupnapu kupmaidi, sun kenekmai opkal yumada, konum gwelepra kupu. Sun nong bol deikida, dila-dilapu kupmau. Ukupra kupmaidi, aneng yumadi, ‘Allah er si erepmepedi, er tep telep keca karepkamap’ tenen, Allah er karena tep, jen keca er si gandum cap, tonda nintong telep keca er si kemenyan cap, kipra duyanmaidi, amutu domi Allah Yahweh er si eremna ati damai duyakanmai.

6 Mispa mutu bana tep, bisi tupa yakanmai taruda, Mispa mutu neitamai di, Netanya erdi deiamu ngebo Ismaeldi, ‘Aneng antapkamep’ tenen, aneng Mispa mutu yana tep, bisi neitamai tupa yakanmai taruda, sun damai bena aneng cap antapi. Ismaeldi aneng konum antapu dingeda, engepu dipapu, sun tep tali upu deiki di pepu. “Uo, ne kayapu, Ahikamdi deiamu ngebo, Gedalya, er damai benkurume,” pepu. 7 Upepupa, sun aneng gekepidi, mangkau kange doupra, tali lupra Mispa mutu neitamai banmaiyanen, akati arum doramya neitamai konum bei pangeda, Netanyadi deiamu ngebo Ismael cap, tonda er melipmai jen neng yuma capdi, aneng yuma popra, tu pumbon donoki. Ada, menop taru amutu nengdi, ‘Me mokon deipsetu’ tenen, ila kaurye tu pumbon palipra deipinge pumbon, apopi neng sun gemna dopra dokotepi.

8 Ayanmai neng 80 neitamaida, ton tara neng konum popi dinin, ton tara neng kapul men popmai taru, tupa gam kunmai neng sepuluh nengdi, Ismael tep pepi. “Uo, kandi nun pona gume. Nunda, yuk taruda, telep jen keca dopra, amutu damai dinin, bura tarada, inipra deipmapu. Ada, roti kwaneng dana tep deiyo keca, er si gandum du cap, jelai du cap, tonda minyak cap, mong mokon cap, akeca inipra ketenepra deipmepudi, wa pen mutu neitamai inipra deipmapu ngeda, kandi amutu bena akeca yuma doproptume,” pepi. Upepi pangeda, Ismaeldi aneng cap, tonda sun kayapu yuk neng cap, sun yuma 10 nengda, pona gum dinin tapu.

9 Uda menop taruda, Yudea mutu nimi deiyo ngebo, er si Raja Asadi peipupa, er tara nengdi, ‘Tu pumbon paliptepepa, mo cepre taruda, mokon ton atu pumbon deipkamsere. Mokon akapyopda, amenda taru ame jeptepe’ tenen, ila tu pumbon konum men di palipi. Aila bon palipi taruda, Yudea tara nimi deiyo ngebo Raja Asadi, Israel yala nesala taleamu ngebo, er si Raja Basea tep utenepu. ‘Gume Raja Baseadi, ‘Yudea mutu talerur nimi deiyo ngebo Raja Asa cap, er tara neng cap tep, porbenkamane,’ tenepra keteneptuopda, yana wareksetu dinin, nun jen meda, men gum kupkamsere’ tenepka tep, “Ukupso!” pepupa, er tara nengdi aila bon ketenepra palipi.

Atep, Ismaeldi Mispa mutu neitamai di, aneng denge weik 70 neng konum popmaupa, depmai neng yuma, sun gemna dopra, aila tu pumbon epudi, atujuh puluh neng poprapudi, sun gemna dopra, abon pumbon yana dongopupa, abon diniku. 10 Ukupu dingeda, Mispa mutu tupa gam kunmai nesalada, Ismaeldi sun yuma tomopudi, anesala dopra, ‘Amon yala nengdi kunge mutu neitamai dubenkamne’ tenen, anesala bisi dubenmau. Erdi Amon yala nengdi kunmai mutu dubenmau nesalada, ake. Ada, Babel mutu taleamu nimi deiyo ngebo, er si Nebuzaradandi, ‘Mispa mutu gam tupa dakunkameng nengda, Gedalyadi kalengkamre’ tenen, Nebuzaradan er ner nyapu cap, sun Mispa mutu nesala ataru tupa kunmai nesala cap tep, “Gedalya kandi anesala kalekamrume,” pepra deipmaupa, erdi talepmaupa tupa kunmai nesalada, Netanyadi deiamu ngebo Ismaeldi, sun anesala yumada doupra, ‘Amon yala neng kunge mutu tara benkun’ tenen, Mispa mutu tapra, me goupra ortara beu.

11 Dinino, nimi si Kareah, erdi deiamu ngebo Yohanan cap, er jen talen neng cap, sun deiyo ngebo, cap, ajen neng sun yuk deiyo neng cap, sun yumada, yuk nengdi, ‘Uo, Ismaeldi pio mali keca weik kurure,’ pepra, lap perami ngeda, konum gekerami. 12 Ismaeldi mali kuramu ngeda, anengdi konum gekerami dingeda, sun melimna neng yuma tep, “Sunda adipapu bulupra wekurume,” pepi. Ukupi dingeda, Yohanan cap, er melimna neng capdi, wisipra, ‘Netanyadi deiamu ngebo Ismael porbenkupe’ tenen, bisi banmaianen, Gibeon mutu neitamai dinin, ila me mokon bukuai dam, bena antapi. 13 Ismael cap, kikiman banmai nesala yumadi, dinmaipa, Kareah erdi deipu ngebo Yohanan cap, tonda Yohanan er jen talen neng, sun deiyo-deiyo neng yuma cap, yakanmaipa epidi, kange deipra pining deiki kunmai.

14 Pining kange deipra kunmai dingeda, Ismaeldi, ‘Mispa mutu kurami dinin, ukutaru Amon yala nesala kunge tara dubenkaman’ tenen, dubaramu nesala yumada, tamupra Kareah er mi Yohanan, er tara gopra yaipa, sun kikiman bei. 15 Anesala weik tara ngeda, Yohanan tara kepropidi bei dinino, Ismael melipra banmai neng, nimi banbari nengda, Netanya er mi Ismael melipra banmai. Sepdara banmaiya tep, Ismael cap, abanbari neng cap, sun Amon yala neng kurami mutu bei.

16 Konum bei pangeda, Kareah er mi Yohanan cap, tonda er jen talen neng, sun deiyo-deiyo neng capdi, Mispa mutu gawal tupa kuramipa, Netanya er mi Ismaeldi, ‘Anesala dopra, Amon yala neng kunge mutu dubenkaman’ tenen, dubanmau nesala yuma dopra, tamupra duyaidi, ‘Mesir mutu bena kunkamep’ tenen, bisi bei. Ada, nimi si Ahakimdi deipu ngebo Gedalya, Ismaeldi Gedalya poprapudi, er taleamu nesala dubanmaupane, Yohanandi anesala dopra, tamupra dubenmau. Yohanandi, ‘Mesir mutu bena kunkamep’ tenen, dubenmau nesalada, nimi cap, nerapu cap, nyapu cap, tonda jen talen neng cap, amutu Raja er ati pel dona neng cap, Gibeon mutu di tamupra duyau.

17 Yohanandi, anesala dopra bisi banmaiyanen, Babel mutu neng tep, ‘Derepsengedi, popsenung’ tenen, kware weik kupka cadi, sundi, ‘Mesir mutu bena kunkamep’ tenen, banmaiyanen, bisi neitamai di, mutu si Gerut-Kimham mutu bena, keana taru tep mapmai. Kimham mutuda, ada Betlehem mutu damai kwamu. 18 Sun Yohanan cap bisi banmai nengda, utenepi. ‘Gume, Netanya er mi Ismaeldi, Ahikam er mi Gedalya tep poptapmaua cadi, Babel mutu nimi deiyo ngebo, er si Raja Nebudkadnezardi, ila di derepseredi, popserur’ tenepi. Deiyoda, Nebukadnezardi, ‘Angebo Gedalya, ne amutara dinin, Mispa mutu talepra, Gubenur kupkamre’ tenepka cadi, angebo erepra deiamu dinin, Ismaeldi angebo konum poptapu. Ukupka cadi, Yohanan cap banmai neng yumadi, ‘Babel mutu nimi deiyo ngebodi, nun yuma tep, derepseredi, popserur,’ tenenmaiya tep, kware kupupa, Mesir mutu bisi banmai.