Jer 42 | XteSC | STEP | Yohanan cap, er cap kikiman banmai neng yuma cap, Yehuda tara kurami jen talena deiyo neng yuma capda, bupra ne Yeremia cap antamna tep, ne damai yai. Ada Kareah er mi Yohanan cap, tonda nimi si Hosayadi deiamu ngebo, er si Asarya cap, amutu kurami nesala ila neng pe, yambul neng pe yuma cap, bulupra yaidi, ne Yeremia tep pepnei.

Jeremiah 42

Israel yala nengdi, Yeremia tep, “Kandi nun tep, Allah moropserume,” pepra moropi upu

1 Yohanan cap, er cap kikiman banmai neng yuma cap, Yehuda tara kurami jen talena deiyo neng yuma capda, bupra ne Yeremia cap antamna tep, ne damai yai. Ada Kareah er mi Yohanan cap, tonda nimi si Hosayadi deiamu ngebo, er si Asarya cap, amutu kurami nesala ila neng pe, yambul neng pe yuma cap, bulupra yaidi, ne Yeremia tep pepnei. 2 “Nun naio, kan pe asuru di diserume! Men taruda, nesala pio weik kuramepu dinin, ataruda nun yambula dipapu tupa kunmape. Atep, ukutaru gawal tupa akunmap nesala, nundi kan tep moropkukepe. Atep, nundi pepkusep upuda, nun nai kandi gekepsememdi, kan nai bo Allah Yahweh, kan si eremrem ngebo tep, tenepsememdi, er tep moropseo. 3 Nun putapserpa moropkep ngeda, Allah Yahweh tep moropkuserume. Moropsemempa, erdi nun tep, ‘Sunda amutu benkununge,’ pepseretopu, amutupu benkamepe. Tonda, erdi. “Akecapu kupkununge,” pepseretopu, ange gekepmepedi, angepu kupkamepe,” pepra lap pepi.

4 Upepipa, ne Yeremiadi sun tep upepsi. “Telepe, upepruma tep nengeda, sun peprum upuda, konum gekepne. Tonda, sun moropnerum ngeda, konum doropne. Nedi sun moropmarumnge yumada, nun nai bo Allah Yahweh, er si eremrum Allah tep, moropkamane. Sundi aupu pepmanerumtopu, moropnepa, Allahdi pepkamaser upu yumada, nedi sun damai yana lap pepkamasene. Tenpu upu peda, sun tep men iniptapkamasene. Ayuma sun gekenai yana lap pepkamasene,” pepu.

5 Upepsi pangeda, sun Yehuda yala neng gawal tupa akunmai nesaladi, ne tep pepnei. “Gume, nundi kan tep, ‘Nun nai bo Allah Yahweh tep moropserume!’ pepra, yana moropmakep ngeda, Allahdi nun tep ‘Ukunkamenge,’ pepra, tamupra pepkamaser upuda, aupu moupra talepmepedi, angepu talepra kunkamepe. Atep, nun nai Allah Yahwehdi, nun kunkamep keca yuma dipeteseredi, erdi pepkamsernge, tek sisi men kupmepyopda, erdi wenepra popsetue!

6 Atep, Allah Yahwehdi nun tep, ‘Ukunkamne. Amutu bena kunkamenge,’ pepra, nun damai peipkamser ngeda, telep upu do, ikin upu do, ange yuma gekepmepedi, angepu talepra kunkamepe. Nun kangeda, Allah Yahwehdi, ‘Angeda kunkamrume, angeda pio men kunkamrume,’ pepra peipkamser upu gekepmepedi, ‘Angepu talepra kupmepyopda, nundi kunkamep keca yumada, teleppu kunkamsere,’ tenepmepe. Atep nundi kan tep, ‘Allah moropserume,’ pepra moropkepe deiyoda, ake. Ada, Allah Yahwehdi, pepkamser upu, moupra talepmepedi, amenda taruda, nundi pel donkamepnge cap, kunkamepnge yuma capda, teleppu kunkamser’ tenen, moropkepe. Atep kandi nun tep, ‘Allah moropserume,’ pepra, moropkepe. Sun Yehuda tara nengdi ne Yeremia damai yana upepra moropnei.

Yeremiadi Allah tep moropupa, Allah gekepudi yana pepra deipu upu

7 Yehuda tara nengdi Yeremia damai yana upepra moropidi, dakunmaipanen, ue tumi sepuluh hari konum mapmepu pangeda, Allah Yahwehdi ne Yeremia damai yana, upepra deipneu. 8 Yana peipneu pangeda, ne Yeremiadi Kareahdi deiamu ngebo Yohanan cap, tonda Yehuda tara kurami neng, sun jen deiyo neng cap, tonda sun cap kikiman melipra yanmai nesala yuma, ila mambul neng pe, yambul mambul neng peda, sun yuma cap tep, “Sunda yaso!” pepra kongpepsi. 9 Kongpepsipa, aneng yuma yaiopda, nedi sun gekenai lap pepsi. “Sundi ne tep moropnerum ngeda, ‘Yeremiao, kandi nun Israel yala nesala si eremnup Allah, nun nai bo Allah Yahweh tep, moropkamaserume,’ peipmanerum utopu, aupu dopra, Allah tep, nedi konum moropsi. Moropsipa, Allah Yahweh gekepudi, sun tep aupu peipmasere.

10 Uda, sun Israel yala kurum nesalada, amutupu tupa kurumu pangeda, ne Allahdi sun dopra ereipsenedi, telep kweipkamsene. Ereipsenyopda, kange di tamupra, sun men dopra dokotepkamsene. Ukupmantoda, nedi sun dopra amutu tu neitamai koupkamsene. Koupsenyopda, kange di ton cap, atuai di men kwenepra tapkamsene. Ange gum dinin, teleppu kunkamrume. Ukupkamsena deiyoda, ake. Ada, nedi sun tep pio bicaue tenesenune. Ada, sun mali-mali weik kuramrumpanen, nedi sun wenemna tep, ila ikin keca yala yuma, sun deiki konum dopra deipsisipa, dororumya tep, nedi bicau tenesenune. 11 Atep nengeda, menop taruda, sundi Babel mutu talepra nimi deiyo kuramu ngebo tep, ila kwar dangamrum ngeda, tupa men kunkamrume. Angebo tep, sundi er tep kwar dangna gume. Kwar men dangkamruma deiyoda, ake. Ada, ne Allah, sun kankan kunedi, tupa melipra kalengkamsene. Nedi melipra kaleksenepa, Babel mutu ila nimi deiyo ngebodi, sun tep ‘Popredi, talenkamser’ tenen, pio tep lyemdonkamsene. Ukupsenyopda, sunda teleppu kunkamrume.

12 Sun menop taru di mali kuramrum keca tep, nedi adipapu wenepra poptapsetene, dinin, ange gum di, bicau tenepsenedi, ne pe kange dipapu pio telep kweipkamsene. Ukupkamsena deiki di, Babel mutu talerur nimi deiyo ngebodi, er peda sun tep bicau tenepseredi, melimkamsere. Tonda, Babel mutu talerur nimi deiyo ngebodi, sun tep, ‘Sun Israel yala nesala yumada, sun pe mutu sisapu, tamupra bena kunkamrume,’ pepra deipkamsere. Aupuda, ne Allahdi, ‘Ukupkamre’ tenen, konum pepra deipne.

13 Dinino, sun moupra gekepneso! Sun gawal tupa tapmasengpa, Yehuda tara kuramrum nengdi, ne pepmasen upu yanipnerumdi, ne tep, ‘Gume, nun nai Allah Yahwehdi pepmaser upu men gekepkupe. Nun si eremnup Allahdi peipmaser upu gekena gum di, amutu neitamaipu men kunkamepe,’ pepnemumnyopda, ikin weik kunkamrume. 14 Ada, sun Israel yala nesaladi, “Gume nunda amutu tupa men kunkamepe. Mesir mutupu bena kunkamepe. Mesir mutu bena kupe pangeda, yuk mutu nesaladi, nun tep men mar poryankamsenge. Tonda, jen talen nengdi, ‘Mar porbenkamep’ tenen, nun cap, yuk mutu neng cap, popdankunga tep, ‘Ketenepdankameng’ tenen, terompet lelim perameng lelim peda, men pengepa, nun ton men gekenkamepe. Tonda, jen keca gum kupbarepa, nun jen peda men putankamsere. Atep, Mesir mutu neitamaipu pio akunkamepe,” pepra, yanipnerumdi penkamnerum do?

15 Ange utopu pepnemumnyopda, nedi tek sisi pepsene. Sun Yudea tara kuramrum nesala, nimi gung yambulanunpu tupa gam kunmarum nesalada, sundi moupra gekepnerume. Ne Allah Yahwehdi pepsene. Sundi balila kepmumdi, ne tep, ‘Gume, nunda Mesir mutu bena, amutu neitamaipu pio kunkamepe,’ pepra, pepnemum pangeda, nedi wenepra popkamsene. 16 Ada, sundi, ‘Uo, yuk nengdi mar poryasenung’ tenen, kware weik kuserur ngeda, tek sisi sun damai yankamre. Tonda, sundi, ‘Uo, nun jen keca gum kuprepa, jen putana ton nun damai yaserepa doropnupe’ tenen, kwar kuserur nge peda, Mesir mutu bena kurum taru neitamaida, akwar tenerum keca yumadi dombenamserya, amutu neitamai peda yana, sun deiki yarepa doronkamrume. Ukupseryopda, sunda Mesir mutu neitamaipu depkamrume.

17 Ware nesala do yuma, sun kankan neitamai di, balila deipra, ‘Gume, nunda Mesir mutupu bena kunkamepe’ tenen, bemumdi, Mesir mutu bena kunkamrum nesala yumada, mar podana deiki di popsenegepa depkamrume. Tonda jen putana deiki di depkamrume. Tonda sakdanen embana pu, ila kange mun pu jeserya deiki di depkamrume. Tek sisi pepsene, ne Allahdi aikin keca dopra, sun balila kurum nesala deiki deipkasen ngeda, tenpu ngebo peda men tapkamsere. Aikin keca yumada doropkamrume. Aikin keca doproprumnya deiki di, sun yumada depropkamrume. Tenpu ngebo peda gam men kunkamre. Ayumada, gawal dakra deipkamsene.

18 Neda Allah Yahweh, im deiki kunge jen talena malaikat yumada, sun deiyo ngebo kununa cadi, ne puto pio weike. Sun Israel nesaladi, ne sipu eremnerum Allah kunune. Atep, nedi sun tep tek sisi pepsene. Ne yu weik kupneupa, sun Yerusalem mutu ila ati arum neitamai kurami nesala, sun deiki deiamsitopu, ukutaru sun Mesir mutu bena dakunkamrum nesala peda, ne ila yu sun deiki deipkamsene. Ukupra wenepsenedi popsenyopda, yuk mutu nesala yumadi, akupkamsen nge epmengedi, ‘Uo, uo Allahdi Israel nesala, sun wenemna tep ila di poptapra sikke buktapu ngeda, ila mambul kurure. Sunda, pio mali kununge,’ pepra, kware kuprepa, sun tep mali upu penkamsenge. Tonda, yuk mutu nesaladi, sun Israel yala nesala tep, autupra nyek-nyek penkamsenge. Nalemsengedi, sun tep mali-mali pedinkamsenge.

Ataruda, yuk mutu neng, derepdangedi, “Kanda ne song cadi, Allahdi Israel nesala tep, wenepra mali weik kwieputopu, ‘Kan peda wenepra popkamker’ tenen, wipdongopkene. Sun Israel nesala ikin keca dorongetopu, ‘Kan peda, ikin kunkamker’ tenen, wipdongopkene,” pepra, mali upu pedangedi, penkamsenge. Tonda, ataru di dipra, dorkunkamre taru yumada, sun Israel yala nesalada, sun mutu sisa, ton cap tamupra yamumdi, pio men epkamrume.” Allah Yahwehdi sun Israel nesala tep pepu.

19 Upepmasera tep, ne Yeremiadi sun tep aupu ton cap pepsene. Sun yuma moupra gekepneso! Allah Yahwehdi, sun Yehuda tara tupa akuramrum nesala yuma tep, konum pepmasere. Allahdi, sun tep, ‘Sunda Mesir mutu bana gume!’ pepra konum pepra deipmasere. Atep nengeda, ne Yeremiadi sun tep, atumi deiki di konum jenek kupra pepmasene. ‘Allahdi wenepra popseredi, gawal dakamser’ tenena, tep, sunda Mesir mutu bana gume,’ konum pepsene. 20 Sundi aupu men gekeprumnyopda, sunda pio ila mali kudidankamrume. Sun pedi, sun pe tep popdankamrume. Deiyoda ake. Ada, sundi ne tep, ‘Nun nai bo Allah, er si eremnupe. Nun nai bo Allah Yahweh tep, moropserume!’ pepra, moropmanerumpa, ange peipmanerum utopu, nedi Allah moropsisi. Tonda, sundi, ‘Gume naio, nunda Allah tep moropsemempa, erdi, nun tep peipkamser upuda, moupra gekepmepedi, angepu talepra kunkamepe. Mali tenenup nge pe, telep tenenup nge pe, Allahdi peipseretopu, moupra talepmepedi kunkamepe,’ pepra moromnerume.

21 Atep atumida, Allahdi sun tep peipmaseu upuda, nedi sun damai konum pepra deipmasene. Dinino, sundi, ‘Allah er sipu eremnupe. Nun nai bo Allah Yahweh kurure,’ perum dinin, Allah Yahwehdi peipmaser upuda, sundi tek sisi men gekeprume. Ada, Allahdi ne tep, ‘Sun Israel yala nesala tep, upepkurume,’ peipmaneupa, lap pepmasen dinin, aupu men gekenmaruma tep pepsene.

22 Ange tep nengeda, sunda moupra tenepkurume. Sundi, ‘Nun amutupu, Mesir mutu bepedi bena telep kunkamepe’ tenen, putapserpa, tenepmarum mutuda, tek sisi amutu bena kunkamrum taruda, sun yumada depkamrume. Ada, yuk mutu yu nengdi, nimi pona tep parang ya doupmengedi, poryankamsenge. Tonda, jen putana deiki di depkamrume. Tonda, sakdanen embana pu, ila kange mun pu jeserya deiki di depkamrume. Angeda konum pepmasene,” Yeremiadi pepu.

Ada Yeremiadi, sun Israel yala nesala dinin, Yudea mutu yambulanun tupa gam kunmaidi, ‘Mesir mutu bena kunkamepe,’ tenenmai nesala tep pepu.