Jer 43 | XteSC | STEP | Uda, Allah Yahwehdi ne Yeremia tep, ‘Yehuda tara tupa kunmai Israel yala nesala tep, aupu dopra perbenkurume,’ pepra deipneu upu, nedi anesala tep aupu konum bena pepsi. Ada, Israel nesaladi, si eremnung Allah, sun nai bo Allah Yahwehdi ne tep lap peipneu upu konum lap peipsi.

Jeremiah 43

Yohanandi, Yeremia cap, yuk Israel yala nesala cap dopra, Mesir mutu dubeia tep upu

1 Uda, Allah Yahwehdi ne Yeremia tep, ‘Yehuda tara tupa kunmai Israel yala nesala tep, aupu dopra perbenkurume,’ pepra deipneu upu, nedi anesala tep aupu konum bena pepsi. Ada, Israel nesaladi, si eremnung Allah, sun nai bo Allah Yahwehdi ne tep lap peipneu upu konum lap peipsi. 2 Bena lap pepsipa, sun dipru erepra sal nong-nong kamna neng ada, Hosaya erdi deiamu ngebo Asarya cap, Kareahdi deiamu ngebo Yohanan cap, sun yuk balila kemna neng yuma cap, gung tenpu keprapidi, ne Yeremia tep, aupu pepnei. “Kanda mok upupu penmasereme. Nundi si eremnup Allah, er si Yahwehdi, ‘Sunda Mesir mutu men bena kunkamrume,’ men pepmaserpapu, kandi tali upupu penmasereme,’ pepnei.

3 Tonda, sundi ne Yeremia tep pepnei. ‘Nun kangeda, nimi si Neria, erdi deiamu ngebo Baruk, erdi upu puto di kan tep, ‘Upepkurume,’ pepkeua cadi, kanda erdi peipkeu upu pepmasereme. Deiyoda, tupa gawal kunmap Yehuda tara neitamai kunup neng, nun damai bena peptapsemempa, nundi teka tenepra kunmapepanen, amenda taru Babel mutu yu nengdi yana taleprapmengedi, popkamsenge’ tenena tep, aupu pepmasereme. Agum dingeda, ‘Sun Babel nengdi, aYudea tara tupa kunge Israel nesala yuma doupra, Babel mutu nengdi, sun pe mutu dubenkamsenge’ tenen, angebo Barukdi upepmakerpa, kandi yana penmaserema,” pepnei.

4 Sun balila kepra kunmai nengdi, aupu pepya deiki di, Kareahdi deiamu ngebo Yohanan cap, tonda er cap kikiman kunmai jen talena deiyo neng yuma cap, tonda tupa gawal kunmai Yehuda tara neitamai kunmai Israel yala nesala cap, sun yumadi, Allah Yahwehdi sun tep, “Yehuda yala neng, aca sun mutu neitamaipu kunkamarume,” peipupa, Yeremiadi bena lap peipu upuda, pio men gekepi. 5 Adeiki di, Kareahdi deiamu ngebo Yohanan cap, tonda jen talena deiyo neng yuma cap, sundi gawal tupa kunmai Yehuda tara kunmai neng, Israel yala neng yumada, doupra Mesir mutu bei. Tonda, atarupu menop taru Babel mutu dabena deiamipa, ikin deiki di dakuramyanen, Babel mutu tamupra, sun pe mutu sisa, Yudea tara yana kunmai Israel nesala peda, abalila kemai nengdi doupra, Mesir mutupu dubei.

6 Mesir mutu dubenmai nesalada ake. Ada, Israel yala neng cap, nerapu cap, tonda sun nyapu cap, Yudea mut nimi deiyo ngebo, Raja erdi deiamu ner nyapu cap yuma, Mesir mutu dubei. Tonda, sunpu gum dinin, ne Yeremia cap, Neriadi deiamu ngebo Baruk cap, tonda Babel mutu jen talena neng, sun deiyo ngebo, er si Nebusaradandi, ‘Sunda Gedalya cap kikiman kunkamrume. Ada Sapandi deiamu ngebo Ahikam, erdi deiamu ngebo Gedalyada, Yudea mutu talena tep, nimi deiyo ngebo kepra, talepredi, er kunkamraipu, sun ton acapu kunkamrum nesalada ake,’ pepra deipu nesala yuma cap, sun balila kepra kunmai nengdi, anesala yuma doupra, Mesir mutupu dubesei.

7 Ukupya deiki, Allah Yahwehdi, ‘Angeda kupkamrume, angeda pio men kupkamrume,’ pepra deipseu upuda yaniptapi. Allahdi peipseu upu yaniptapidi, nun doupra Mesir mutu neitamai dubeseidi, nun cap, sun capda Tahpanes mutupu yapu. 8 Tahpanes mutu abena kunmapu taruda, Allah Yahwehdi ne Yeremia damai yana upu pepra deipneu. Ayana peipneu upuda ake.

9 Yeremiao, kandi ila gel weikanun ton palipra doprapmemdi, Tahpanes mutu neitamai dinin, Mesir mutu ila nimi deiyo ngebo Firaunda, er ila ati dam wekra bana tep, er ati buplan damaipu bena, akerah tu neitamai palipmemdi, agel-agel yumada, tu pumbon dongopkurume. Apel dopkumem taruda, sun Yehuda tara kurami Israel yala neng, sun urasin deipmange tarapu, agat tu palipmemdi, agel yumada, bena tu pumbon dongopmemdi, inipra deipkurume.

10 Ukupmem dingeda, kan Yeremiadi sun Israel nesala gekenai tep, upepkurume. Sunda moupra gekepneso! Allah Yahweh, im deiki kunge jen talena malaikat yuma, sun deiyo ngebo kunedi, sun tep aupu pepsene. Sun Israel nesaladi, ne tep, ‘Nun nai bo,’ pepra, ne sipu eremnerume. Dinino, neda sun nai bo Allahdi, ne amutara pel donkamner ngebo Raja Nebukadnezar, ada Babel mutu yuma talerur nimi deiyo ngebo tep, doroipnepa, erdi amutu yankamre. Yaryopda, Yeremiadi agel dopra, tu palipra inipra deipmaunge, sundi acapu epmarum gelda, Raja Babel ngebodi, er amutu yuma er puto di talepra kunkamsere. Ataruda, erdi amutu yuma talenkamra peten kemna tep, er nimi deiyo kuna tep bungkamrur keca, er si tahkta, ketenepra agel deikipu deipkamre. Tonda, erdi Mesir mutu yuma talepredi, aca kunkamra peten kemna tep, er ila pala tenda keca, er si terpal, pio pala weiknge, atu deiki bepekra deipredi, co ikra adeiki deipkamre. Ada er opkal bol dodina tenda ati ketenemna tep pepne.

11 Babel mutu nimi deiyo ngebo, Nebukadnezardi, Mesir mutu yankamre taruda, Mesir mutu nesala yuma poptapra sikke buktapkamre. Ukupyopda, ne Allahdi, ‘Amutu nesala ila ikin keca, sun nong deiki deipkamne ja,’ tenemsi nesala tep nengeda, ila kange mum pu jena deiyo keca karepnepa, nimi weik depkamenge. Tonda, ne Allahdi, ‘Amutu nesalada, Babel mutu jen nengdi doupra, sun pe karen mutu dubenkamenge,’ tenemsi nengda, ateng koupmengedi doupra benkamenge. Tonda, nedi, ‘Sun anesala tep, mar pona deiki di popmengepa depkamenge,’ tenemsi nengda, Babel jen nengdi, nimi pon parang ya di dopra, anesala popmengepa, acapu depkamenge.

12 Mesir mutu kunung nesaladi, ‘Nun deiyo kecada ake,’ pepra, tali keca tep, si eremnung isok ati-ati yumada, ne Allahdi go karepnepa, Babel nimi deiyo ngebodi, akati-akati yuma, uku sekra dongoprepa uku di jepropkamre. Ukupre dingeda, Mesir mutu nengdi isok si eremna tep keca, petupra deiaminge capda, Babel mutu talerur nimi deiyo ngebodi, dakra dopredi, er pe mutu dubenkamre.

Ukupmantoda, domba pein ngebodi, ‘Ne opkal deiki amnye welepnerur’ tenen, amnye wepra poredi, er opkal yuma, pio telep kudiramretopu, Babel mutu nimi deiyo ngebo cap, er jen talena neng capdi, Mesir mutu nesaladi talenung bung keca yala-yala yumada, dalupra dopropmengedi, dubenkamenge. Tenpunge ton men tapkamenge. Ukupkameng taruda, yuk nengdi, aBabel mutu neng tep, upu men sektengedi, aneng tep men popkamenge. Akeca-keca yuma dalupra dopropmengedi, kange deipra, tali lupra sun mutu tamupra dubenkamenge.

13 Mesir mutu nesaladi, tali isok-isok si tep, ‘Nun nai,’ pepra, si eremna tep, ayumnya utopu ila lyom gel, Heliopilis mutu ingami ngeda, ada Mesir mutu neitamai ikra deiami di, Keteng tep si eremami ngeda, alyom gel ton urupra tapredi, yawa poptapkamre. Tonda tali isok si eremna tep, Mesir mutu nesaladi, sun mutu neitamai yuma, isok si eremnungai, akati-akati dominge yumada, Babel mutu nimi deiyo ngebodi, akati yuma dakra uruptapredi, uku dongopkamre.