Jer 44 | XteSC | STEP | Allah Yahwehdi Mesir mutu neitamai dinin, Migdol mutu cap, Tahpanes mutu cap, Memfis mutu cap, tonda iknapi dam tara, arah selatan tara neitamai ati arum dopra kurami Israel nesala cap tep, tenepudi ne Yeremia damai yana peipneu. Allahdi peipneu upuda ake.

Jeremiah 44

Allahdi Mesir mutu kurami Israel yala nesala tep, peipu upu

1 Allah Yahwehdi Mesir mutu neitamai dinin, Migdol mutu cap, Tahpanes mutu cap, Memfis mutu cap, tonda iknapi dam tara, arah selatan tara neitamai ati arum dopra kurami Israel nesala cap tep, tenepudi ne Yeremia damai yana peipneu. Allahdi peipneu upuda ake. 2 Israel nesaladi, ‘Nun nai bo,’ pepra, sundi si eremnung Allahda, ne Yahwehdi pepsene. Neda im deiki kunge jen talena malaikat yumada, sun deiyo ngebo kununa cadi, ne puto weik ngebodi pepsene. Uda, sun yuma moupra tenepkurume! Yerusalem mutu cap, Yehuda tara neitamai kunge nesala yuma, sun ati arum dopra kunung mutu yuma capda, nedi sun wenemna tep, ikin keca deipsipa, kange mun kange doupra kunungada, sun ton konum dirume.

Ukutaruda, sundi amutu neitamai tep tenipkurume. Sun wenemna tep, go karepsipa, sun yuk mutu yu nengdi, yanamidi, Yerusalem mutu cap, Yehuda tara ila ati arum dopra kurami mutu yuma capda, urupra yawa poptapipa, ton nesala depi, ton nesala dubenami. Atep nengeda, sun mutu sisada, walangyopu kurure. Nimi ton amutu neitamai men kununge. Angeda, ne Allah di ikin keca dopra, sun deiki deipsipa, sundi konum epra kael keprume.

3 Ange ukupsa deiyoda, tali tep gume. Deiyoda, sun amutu kurami nesaladi, mali weik tupa-tupa kuramipa, ne yu kuramneua deiki di kupsi. Sun amutu kurami nesaladi, sun si kael kemna gum keca dinin, tali isok cap, yuk tali dewa ^{▼▼dewa – Aupu deiyoda, ake. Dewa peramengada, isok si eremna keca tep penunge.} keca cap, gispal dona tep, yapi keca popra kareryakaramidi, atali keca tep si eremamya tepa. Atali keca cap, isok capda, sun ataru Yehuda mutu neitamai kurami nesala pe, sun ataru kunmarum nesala pe, sun apu yapu men taru kurami nesala peda, akeca yumada, sun si men kael keamrume.

4 Nedi sun Israel nesala, sun apu yapu cap, sun ataru kurum nesala cap tep, ‘Uo, mali kupmengepa, wenepsenun’ tenen, nedi tupa-tupa teneramsisidi, ne upu lap pena cap, amenda kupkamre keca lap pena cap tep, pel dona neng, sun nabi-nabi neng dopra deriramsipa, anengdi, sun amali kuramrum Israel yala nesala tep, doproiamsisipa, ne upu lap perami. Sun nabi neng deiki peramsisi ngeda, “Anengo, Allahdi, ‘Apio mali keca yumada, men kunkamrume. Ange yumada, ne pio song cadi, ukuna pio gume,’ teneserura tep, sunda amali kunmarumada, adipapu tapkurume,” pepra, nabi nengdi perami upu deiki peramsisi 5 Dinino, sun nabi nengdi aperamsei upuda, men pio moupra men gekeramrume. Tonda, ‘Angeda tek sisi penmasenga,’ men teneramrumdi, men gekeramrume. Tonda, sundi, ‘Uo, nun mali kunup kecada, adipapu tapkupe,’ men teneramrume. Ada, sundi tali isok-isok tep, yapi keca popra karerbaramrum nge peda, men tamrume.

6 Ange tep nengeda, sun mali kuramrumnge tep, ne yu weik kupneupa, wenemna keca dopra sun deiki deipsisi. Tonda, Yehuda tara neitamai kurami nesala, sun ati arum dopra kuramyai cap, Yerusalem mutu ila ati arum neitamai kurami nesala, sun bisi yapra deiamidi embaramyai cap yumada, ne yu kupneupa, amutu yumada, popra sikke buktapsipa, walangyopu kupu. Ukupmantoda, nimidi uku deipmengedi jeproprepa, tu yuma gelal serur utopu ngeda, ukutaru Yehuda tara yuma epra kael kemrume.

7 Ton ukutaruda, sun Israel yala nesaladi, ‘Nun nai bo,’ pepra ne si eremnerum Allahda, im deiki kunge jen talena malaikat yuma, sun deiyo ngebo kununa cadi, ne puto weik kunune. Neda Allah Yahwehdi sun tep asipetepmasene. Ware keca deiyo tep, sun pedi, sun pe tep, mali kudina keca dopra, sun nong deiki deridarum do? Ukupmantoda, sun pedi, podidana keca dopra, sun pe deiki deipdarumdi, kange mun kuserur do? Mali weik tupa kupruma deiki di, wenepsenepa, sun Yehuda tara neitamai kurum nesalada, nimi pe, nerapu peda, tonda sun nyapu pe, sun pio metek milo nyapu pe yumada, gum kupkamre. Sundi, ‘Gume, nun yala nesala gum kuprepa, tenpu pe men kunkamepe,’ teneprumdi, tupa mali-malipu kurum do?

8 Tonda, sunda warya tep, ne yu kemdina kecapu, tupa kurum do? Sun Mesir mutu yana konum akurumnyada, nimi bo neng yana kurum dinin, sundi amutu nesaladi talenung isok-isok si eremna cap, sun Israel nesaladi yapi keca popra, kareryakarumudi, tali keca tep si eremrume! Ukumumdi, sun pe deikipu mali kupra deipdarume. Atep, amenda taru sun ban-ban yuma kunung nesaladi, sun Israel yala nesala tep, ‘Uo, sunda pio mali nesala kununge,’ pepra, autupra nalemkamsenge. Tonda, yuk nengdi sun si tep nengeda, ‘Sunda wipdongopu nesala penkamsenga tep kurum do?’ pepra, mali upu penkamenge.

9 Sun co puna neng, Yehuda tara neitamai kurami nesala cap, tonda Yerusalem mutu neitamai bisi-bisi embarami nesala cap, tonda Yehuda yala neng tep, nimi deiyo neng kepra, Raja-Raja kurami neng cap, sun Raja nengdi domi nerapu yuma capdi, mali kupyakarami ngeda, konum luprorum do? Tonda, sun ataru akunmarum neng cap, sundi doprum nerapu yuma capdi, pio tupa mali kurumnge capda, sundi konum luprorum do?

10 Dinino, sun apu yapu, pumun taru kurami neng pe, ataru gam tupa kurum nesala peda, ‘Uo, nunda tek sisi pio mali kunmap ngeda, adipapu tapkamepe,’ pepra, sun dipru amutara kepra, bouna di men kunmarume. Nedi sun co puna neng cap, sun ataru kurum neng cap tep, ‘Telep kunada ake. Ange-angepu talepra, dumsisipu kunkamrume,” peiamsisi upuda, moupra men taleprumdi, ne si tek sisi pio men eremnerume. 11 Ukuruma tep nengeda, sun Israel yala nesaladi, ‘Nun nai bo,’ pepra, sundi ne tep, si eremnerum Allahda, ne Yahwehdi pepsene. Neda im deiki kunge jen talena malaikat yumada, sun deiyo ngebo kununa cadi, ne puto weik ngebodi pepsene. Ne Allah Yahwehdi, ange konum tenepsa tep, tek sisi kupkamsene. Sun Yehuda tara neitamai kurum nesala yumada, sun Israel yala neng yumada, popra yawa poptapsenedi gawal dangkamsene. Sun yuma popra sikke buktapkamsene.

12 Tonda, Babel mutu nengdi men pomipa, sun Yehuda yala neng, tupa gawal kunmarum nesaladi, ‘Mesir mutupu bepedi, kunkamepe’ tenen, benkameng nesala yumada, Mesir mutu neitamaipu dadepkamenge. Ada, yambul neng pe, ila neng peda, sun yumada Mesir mutu dipapu depkamenge. Ada, mar podana deiki cap, jen keca gum kuprepa, jen putana deiki capdi, sun anesala yumada depkamenge. Sun anesala depmengepa, yuk nengdi ange epmengedi, “Uo, anesala kupitopu kupserur de!” pepra, kware kunkamre. Tonda, ton nengdi yuk neng tep nengeda, “Allahdi anesala wipdongopu utopu, sun peda wipdongoptue,” pepra, yuk neng tep, mali upu penkamenge.

13 Tonda, nedi Yerusalem mutu neitamai kurami nesala tep, wenepsitopu, sun Mesir mutu kunkamrum nesala peda, wenepkamsene. Ada mar podana deiki cap, jen putana deiki cap, tonda sakdanen embaramre pu jena deiki capdi, sun yumada depropkamenge. 14 Yehuda yala neng tupa gawal kunmange nesaladi, “Nunda Mesir mutupu benkupe,” pepra, amutu konum bei nesalada, tenpu neng peda, ton kaukeptapnepa, men gam kunkammenge. Sun anesala kankan di tenpu neng peda, Mesir mutu tapmengedi, Yehuda yala neng sun mutu sisa men tamupra yankamenge. Teka, sun anesala weika di, ‘Nun pe mutu tamupra yatepe,’ tenenkameng dinin, nimi weika di men yankamenge. Dinino, nesala metekanunpu sun mutu tamupra yankamenge. Allahdi Yeremia tep konum lap peipu upuda, Yeremiadi aupu pepu.

15 Yeremiadi aupu konum pepupa, er upu gekenmai nesala kankandi, nimi ton sun domi nerapudi isok si eremna tep, gam keca popra karerbaramipa, kael keami nimi cap, tonda, Yeremia damai tengyanmai nerapu cap, Mesir mutu dinin, itara tara, Patros mutu kunmai nesala cap, denge pio weik acapu bulupra yanmaidi gekenmai. Ayanmai nesaladi Yeremia tep aupu pepi. 16 “Gume, kandi nun tep, Allah Yahweh er si deiki di pepmaserem upuda, nundi, ‘E, angeda tek penmasere’ tenen, men gekenkamkepe.

17 Nundi, ‘Ukunkamepe,’ pepra pedina upu deiki di konum peipmepunge yumada, men tapkamepe. Nundi ange yuma adipapu kupkamep ja! Ada, nundi Allah si eremna tep gum dinin, yuk-yuk keca tep, im deiki kurur nimi deiyo ner, er si eremna tep, telep karen keca doupra karerbankamepe. Tonda, ‘Akaren keca pio telep kupkamre’ tenen, akeca deiki di, anggur me ton dingdongonkamepe. Ange yumada, nun isok ner er si eremna tep, karerbanapu kunkamepe. Ange kunkamepada, nun ataru kunup neng cap, Yehuda yala neng nun apu yapu cap, nimi deiyo kepra, nun mutu taleamsei neng, nun ila nimi deiyo-deiyo neng cap, sun amutara pel dona deiyo-deiyo neng capda, ange utopu kurami.

Tonda, Yerusalem mutu neitamai bisi yo embandarami nesala cap, tonda Yehuda mutu neitamai ati arum domidi dakurami nesala cap, nun yumadi, men taru aisok ner si eremameputopu, ataru peda, er sipu tupa eremkamepe. Ukupmepya peda, nun deiki ikin keca men yankamsere. Utopu menop taru, isok si eremamepu taruda, nun pel doramepunge yumada teleppu kwamu. Tonda, nun jen keca yala-yala weik akwamupa, weika di jepra teleppu kuramepu. Atep nengeda, nun yumadi akecapu talepra kunkamepe.

18 Dinino, nundi tenenmap ngeda ake. Ada, im deiki kurur nimi deiyo ner, aisok ner tep, nundi yapi keca popra men karerbaramepudi, akeca telep kudina tep, anggur me doupra men dingdongoramepudi, ange yuma tapmepu taruda, nun putan keca yala-yala yumada, pio gum kupramseu. Tonda nun tara neng yumada, yuk mutu yu nengdi, mar podana deiki di, poramseipa konum deprami. Tonda, jen keca gum kupupa, jen putana deiki di konum deprami.” Anerapudi Yeremia tep, pepi.

19 Atep nengeda, sun anerapudi aupu tamupra pepi. “Kanda moupra tenepkurume. Nun nenge yapu, sundi ton melimsenunga cadi, nun isok ner tep, telep karen keca karenupe. Ada, tamna gum di, nun isok ner er si eremna tep, roti kwaneng, er si kue dapmepedi, isok ner er urasin utopu kupra, akue deiki keteneipmepedi, karenupe. Tonda, er gispal dona tep, siltong telep keca dopra uku dongona cap, tonda nun karenup keca deiki anggur me dingdongona capda, er aisok ner tep karerbanapu kunkamepe. Nun nenge yapu melimsenunga deiki di, ‘Telepe ukupkamrume,’ pepsengepa, nundi angeda pio men tamkamepe. Pio karenapu kunkamepe,” pepra, sun anerapu yumadi, Yeremia tep pepi.

20 Upepya tep nengeda, Yeremiadi, abulupra wekmai nimi cap, nerapu cap yuma, sundi apu pepi pangeda, sun tep, aupu ton tampra pepu.

21 “Uda, sun gekepneso! Yerusalem mutu neitamai bisi embandanai yuma cap, tonda Yehuda mutu neitamai ati arum yuma domidi, dakurami nesala yuma cap, tonda sun apu yapu yuma cap, sun nimi deiyo kepra taleamseidi, nimi deiyo-deiyo kurami neng cap, sun amutara pel dona deiyo-deiyo neng cap, atara neitamai yuma dakurami nesala yuma capdi, menop taru isok-isok tep, sun si erepra yapi keca popra karerbaramrum ngeda, nun nai Allah Yahwehdi men epka cadi, men teneramu. Tonda, ange yuma konum luprou,’ tenenmarumdi aupu pepmanerum do? Allah Yahwehdi, ‘Nun mali kun keca yuma kange di ton cap men teneramu,’ tenepmarum do? Gume, sun walwal dipapu ange tenepmarumdi pepmanerume.

22 Tek sisi ngeda, pepkusene. Isok-isok si eremna tep, sundi yapi keca popra karerbarumudi, akeca deiki anggur me dingdongoramrum ngeda, Allahdi epra kael keamnga cadi, ange men kaukeptapseu. Gume, sun amali kurumnge deiki di, Allah er tep tulum kemdirume. Tonda, Allahdi sun tep, ‘Gume, amutu nesala pio mali kunung ngeda, tupa men dinkamne, ange yumada, ne dabale weik kunerure,’ teneamu. Atep, menop taru di dipra, aneitam taru cap, ukutaru capda, sun men di kuramrum mutu yumada, Allahdi konum yawa popra tapseua cadi, walangyopu kupu. Ada, amutu tu pumbon di akeca-keca ton tupa men paramnga cadi, tupa men parure. Tonda, nimidi amutu neitamai tupa men kununge. Tonda, yuk nengdi sun mutu mali kupbaramunge epmengedi, ‘Uo, amutu neitamaida, Allahdi wipdongopu nesala ikin weik kuramitopu, sun peda utopu kunkamrume,’ pepra, yuk neng tep widongonunge. Tonda yuk nesaladi epsengopda, sun tep nyek-nyek penkamsenge.

23 Sun mutu walangyopu kupka deiyoda, ake. Ada, Allah Yahwehdi, ‘Angeda kunkamrume, angeda pio men kunkamrume,’ pepra deipseu upu yumada, sundi yaniptapmarume. Allahdi mem upu peipseunge peda, sundi men gekeprumdi, angepu talepra men kuramrume. Tonda, erdi ‘Telep kunada ake, mali kuna ngeda ake,’ pepra peteremamseu upu peda, talepra men dombaramrume. Ange tep nengeda, Allah er yu kupupa, er ila puto deiki di sun men di kuramrum mutu yumada, mali kudiramupa, pio malipu kupu. Tek sisi, ataru peda, ange yuma tupa dinupe. Nun mutu sisada, pio malipu kurure.

24 Yeremiadi, er damai bulupra wekmai nesala yuma cap, isok si erepra aupu penmai nerapu cap tep upepu. “Anesalao, sun Yehuda tara men di kuramrum nesala dinin, amutu tapra Mesir mutu yana akunmarum nesala tep pepsene. 25 Sun Israel nesaladi, ‘Nun nai bo,’ pepra, men di er si eremamrum Allah Yahwehdi aupu pepsere. Erda im deiki kunge jen talena malaikat yumada, sun deiyo ngebo kuredi, ila puto weik ngebodi aupu pepsere.

Sun Israel yala neng cap, sundi doprum nerapu cap, sun yumadi, ‘Gume, im deiki kurur nimi deiyo ner, aisok er si eremna tep, telep karen keca karepmepedi, anggur me akeca deiki dingdongonkamepe. Angeda, tamna gum dipapu, pio kunkamepe,’ pepra konum pedina upu deiki peiprum ngeda, tek sisi apepra deiprumtopu konum kurume. Atep nengeda, telepe walito, apeprumtopu dakunkamrume!

26 Dinino, ukutaru Allah ^{▼▼Allah – Acada, Ibrani upu deiki di, Allah er si tep, ‘Yahweh’ cap, tonda, ‘Adonay’ cap, pepra sekya cadi, sun kael kemna tep, nundi aupu deiyo ngeda, konum jenek kupra sekmepu.} Yahwehdi sun tep pepkuser upuda moupra gekepkurume! Ada, sun Yehuda tara neitamai kuramrum dinin, amutu tapra Mesir mutu yana tupa acapu kurum nesala tep pepsene. Ne Allah Yahweh, akeca-keca yuma talenedi, ila puto weik deiyo ngebo kunune. Atep, ne pe si deiki di, apedina upu pepsene. Uo, sun Israel yala nesala, Yehuda tara kuramrum nesala dinin, ukutaruda Mesir mutu konum kurum nesalada, ataru di dipra, dorkunkamre taru yumada, sun sipyal di ne pio telep si ton pio men penkamrume. Ada sundi, ‘Pedina upu pepkup’ tenepmum taruda, ne si deiki di pedina upu ton men penkamrume. Sundi, ‘Allah Yahweh tek sisi gam pio kurura utopu, ukupkamne,’ pepra, pedina upu ton cap pio men penkamrume.

27 Tonda, ne Allahdi, sun Israel yala nesala tep, moupra epsenedi, tupa dinkamsen dinino, ada, ‘Anesala tep, telep kudinkamne,’ men tenenkamne. Ange gum dinin, nedi sun akurum nesala tep, ‘Anesala mali kupra deipnepa, ikin weik kunkameng’ tenen, moupra dinkamsene. Ada tali tep men pepsene. Sun Yehuda tara men di kuramrum dinin, amutu tapra Mesir mutu yana ataru akunmarum nesalada, ikin kangepu doupra kuramumyanen, sun yumada mar podana deiki cap, ila kange mun pu jerepa, sakdanen emban pu jena deiki cap di depkamrume. Ukupra metek kupbaramrumyanen, sirya taruda, sun yuma gawal daksenyopda, gum kupkamrume. Ataruda, sun yala ngebo tenpunge peda, Mesir mutu neitamai pio men kunkamre.

28 Dinino, sun ware kuprap nesala do, men depkameng dinin, sun anesala Mesir mutu di tamupra, Yehuda tara neitamai, sun mutu sisapu bena kunkameng nesalada, metekanunpu tamupra yankamenge. Ukupmenge pangeda, ataru di, sun Yehuda yala nesalada moupra kael kepkamenge. Ada, men di Yehuda tara tamamidi, Mesir mutu yana kurami nesalada, sundi perami upu nong konum kupmar do? Agum dingeda, ne Allahdi pemsisi upuda, nong konum kupmar do?’ tenen, moupra epmengedi, kael kepkamenge.

29 Ne Allah Yahwehdi aupu ton pepsene. Uda, ataruda, Mesir mutu neitamai, aca tupa kurum nesalada, sundi dumsisi pio men kuramrumdi, mali kun kecapu talepra kuruma tep, amutu neitama dipu, wenepra popkamsena tep, ‘Sun kael kepkamrum’ tenen, nedi petenkemna keca ton karepkusene. ‘Sun deiki ila ikin keca deipkamsene’ tenen, ketenepsi ngeda, pio tek sisi sun damai kupkamne. Sun kael kemna tep peten kemna tep, ukupkamsene. Ada ake. 30 Uda, ne Allah Yahwehdi pepsene. Mesir mutu nimi deiyo kepra, Raja ngebo Firaun, er sida Hofra tep, Mesir mutu talepra kurur dinin, nedi go karepnepa, yuk mutu nengdi, ‘Uo, angebo Hofra tep poptepe,’ tenenung neng, sun deiki nedi dopra deipkamne. Menop taru kuramsitopu, Yehuda mutu taleamu ngebo, Raja Zedekia dopra, er pona tep neng karepkamne.

Ada, Babel mutu talepra kure ngebo, Raja Nebukadnezardi, ‘Angebo Raja Zedekiada, poptene’ tenerur ngebo, er deiki karepsipa, Zekekia popu utopu, ukutaruda, ne Allahdi, Mesir mutu talerur deiyo ngebo, Firaun Hofra dopra, er pona tep nesala, sun deiki deipkamne. Sun anesaladi Firaun Hofra popkamenge. Ne Allah Yahwehdi aupu pepmansena cadi, angeda, tek sisi nong kupkamre ja!