Jer 45 | XteSC | STEP | Yosia erdi deiamu ngebo Raja Yoyakimdi, Yehuda yala neng kurami mutu yuma talepu taru kuramupanen, keteng tamun empat tahun mapu taruda, ne Yeremiadi, nimi si Neria erdi deiamu ngebo, surat sengna deiyo ngebo, er si Baruk tep, “Apepkuken keca, tenpu buku neitamai ton sekra deipkurume,” pepsipa, apepra deipsi upu yumada, sekretaris Barukdi konum seku. Aseku upuda ake.

Jeremiah 45

Allahdi Baruk er damai yana, pedina upu peipu

1 Yosia erdi deiamu ngebo Raja Yoyakimdi, Yehuda yala neng kurami mutu yuma talepu taru kuramupanen, keteng tamun empat tahun mapu taruda, ne Yeremiadi, nimi si Neria erdi deiamu ngebo, surat sengna deiyo ngebo, er si Baruk ^{▼▼Baruk – Angebo Barukda, er nai boda, Neria kuramu. Barukda, nabi Yeremiadi peramu upu sengna deiyo ngebo, sekretaris pel talepra doramu.} tep, “Apepkuken keca, tenpu buku neitamai ton sekra deipkurume,” pepsipa, apepra deipsi upu yumada, sekretaris Barukdi konum seku. Aseku upuda ake.

2 Sun Israel nesaladi si eremnung Allah, er si Yahwehdi aupu yumada, nabi Yeremia tep peipupa, Yeremia erdi surat sengna pel talepra doramnga deiyo ngebo, Baruk tep pepupa, apepu upuda Barukdi sekra deipu. 3 Ne Allah Yahwehdi, kanda Baruk tep aupu pepra deipkene. Kandi utenepra perume, “Uo, Allahdi ikin keca weik kareamneupa, neda ikin deikipu kununa cadi, ne mambul kange doupra kunune. Ne ikin keca dopropsidi, kange mun pio weik kunerure. Ukunerur tarupu, Allahdi ton cap tapakra, ikin keca weikanun ton ne deiki derinerure. Atep nengeda, nedi, ‘Uo, angeda ware keca deiyo tep kunerur do?’ tenen, tenimtonapu kunune. Tonda, neda dim pepra men kunune. Ikin kecapu yanerepa dopropnedi, kange mun kange doupra kununa cadi, beipye men peikmanto kunune. Ukunerepa, ne puto bounpu konum kununa cadi, men kupmanto kunune.” Kanda Barukdi ne Allah tep upepra, mali penerume. Ne Allahdi kan Baruk tep pepkene,” pepu.

4 Upepu dingeda, aupu ton dukdongopra pepu. “Dinino, kanda Baruko! Ne Allah Yahwehdi pepken upuda, moupra gekepkurume. Ne Allahdi Yehuda tara neitamai di doamsi keca yala-yala yumada, konum gonga kepra dangtamane. Ukupmantoda, ne Allah Yahwehdi, amutu neitamai di konum kouamsi keca yumada, kwepra tamane. Ada, aYudea mutu neitamai pel domsinge yumada, amutu ban-ban yuma, sikke buktapnapu kupkune. 5 Ange tep nengeda, kanda Barukdi, ‘Ne tep nengeda, Allahdi ne damaida telep ngepu kupnetue. Tonda, yuk neng yumadi, ne tep, ‘Erda telep ngebo,’ tenepnengedi, teleppu kupkamnenunge,’ tenenmaremada warya tep do? Ato keca tenepmaremada, tenena gume! Baruko kandi ange tenemaremada, adipapu yapkurume. Ne Allah Yahwehdi tuai nesala ban-ban yuma kunge nesala yumada, sun deiki ila ikin keca deipra wenemkamna tepa.

Ukupne pangeda, kan peda ikin weik kunkamrum dinin, ukunmana peda, kanda dan tara mutu do, bememnya peda, men depkamrume. Ada, ne Allahdi kan tep, lyepropkamkene. Lyepropkenepa, kanda gampu kunkamreme. Ukupmantoda, jen talen nengdi, nimi podanai di tamupra yangedi, ‘E, nun podanmapuai di, nedi atelep keca ton dopropsi ngeda, ake,’ peramengtopu, kandi kan tupa gam kunkamremnge tep, aupu utopu penkamrume. Aupuda ne Allah Yahwehdi kan Baruk tep konum peipkene.” Allahdi pepu.