Jer 47 | XteSC | STEP | Mesir mutu nimi deiyo talepra kuramu ngebo, Firaundi gonga kepra, Gaza mutu kapul men porbeu taruda, Filistin mutu nesala tep, Allah Yahwehdi ne Yeremia damai yana, upu pepra deipneu.

Jeremiah 47

Allah Yahwehdi Filistin nesala tep, “Ukunkamrume,” pepra deipu upu

1 Mesir mutu nimi deiyo talepra kuramu ngebo, Firaundi gonga kepra, Gaza mutu kapul men porbeu taruda, Filistin mutu nesala tep, Allah Yahwehdi ne Yeremia damai yana, upu pepra deipneu. 2 Ada Allah Yahwehdi pepu, “Ne Allah Yahwehdi upepsene. “Sunda moupra dinkurume. Ukupmanto ngeda pepsene. Ada, arah utara, dapu tara di, ila meda opra yankamre. Tonda meda, ila puto di opra yanapredi, weleramretopu, kupredi amutu nesala yuma cap, amutu kupu keca cap yumada, popkamre. Utopu, Yerusalem mutu neitamai talepra kunge keca cap, nesala cap yumada, me opra yaredi popkamre. Ukunkamre taruda, amutu nesala yumadi, ‘Uo, nun nai melipseo!’ pepra, ila upu deiki di moropmengedi, engenkamenge. Ange utopu Yudea tara mutu neitamai kunge nesala yumadi engenapu kunkamenge. Ange nongda, sun pona tep yu nengda, jen talena nenge pio denge weika di, poryankamsenga tep pepsene.

3 Ukunkamre taruda, sun anesala yumadi, ila lelim gekenkamengada, kuda bisam yan lelim sepra baredi, yan lelim peprepa gekeramengtopu kupra kunkamre. Ange utopu kereta perang barepa, ila lelim peramretopu kupra, perepa sundi gekenkamenge. Tonda, er yan roda deiki di busukbarepa, lelim penkamrenge yuma peda, gekenkamenge. Ukunkamre taruda, sun wisi nengda, puto boun kupkamre. Ukuprepa, sun nyapu tep, ‘Uo, nun nyapuda, dan cei kunmang do?’ tenena kange peda, pio ton men tenenkamenge. Sundi adipapu, ‘Lyepdatepe’ tenen, sepdaro bendopkamenge.

4 Ange yuma kupkamra deiyoda ake. Ataru neitamaida, ne Allahdi karepnepa, sun Filistin nesala yuma cap, amutu neitamai kupu mutu cap yuma, gum kupra derina tep taru konum damai yankamre. Atep nengeda, sun Tirus mutu neng cap, Sidon mutu neng cap tep, sun melimami nesalada, ton cap pio men melipkamenge. Atep neda Allah Yahweh, nedi sun Filistin nesala yuma tep, poryankamna tepa. Sun Filistin neng metekanun peda, ton gam men kunkamenge. Sun pe, tonda pumun taru, sun Kaftor mutu di yana, Filistin mutu neitamai kunge nesala yuma peda, nedi gum kupra deipkamne.

5 Ukupkamne taruda, sun Gaza mutu neitamai kunung nesala yumada, ila kange mun kange doupra, ali dangkamenga cadi, sun giso potong yuma, toupmengopda, delau nesalapu kunkamenge. Ada, ‘Yuk neng epsengedi, ‘Uo, sunda pio kange mun kange dounmang adano,’ tenenkamseng, tenena tepa. Ange utopu, sun Askelon mutu neng peda, kange mun kange doupmengedi, ‘Uo’ tenen, upu pena gum di, pio dim peprapu kunkamenge. Ukupnepa upu pio men pepmanto kunkamenge. Ukupne pangeda, sun Filistin nesala tupa yambulanun akunkamrum nesaladi, adepkameng neng tep, ‘Bicau’ tenen, engenkamrum ngeda, ware kuprap taruda, ton engenapu kunkamrum do? 6 Atep sun Filistin nengdi, ila upu deiki di ngolokra penkamenge. Ada, “Uo, Allah Yahweh kanda ila puto deiki di, kan yu tema utopu kunge nesaladi, nun yana pona tep nesalada, parang ya doupra, yanmangdi nun poryanmaseng nengda, ware kuprap taru ton, tupa poryakankamseng do? Dan taru di, sun aneng tep, kandi, ‘Sunda tapso!’ pepkamrum do? Ukupmantoda, jen talen nengdi, sun yu temada, er kin alen pumbon neitamaipu moupra kipdongopmengedi, tali kange deipra bungamengtopu, kan peda dan taru di tapkamserum do? Kandi nun poryakankamseng neng tep, “Sun tapra bendopso!” peptumopda, sundi bendopkamenge. Ukuptenge pangeda, nun peda, tali dim pepra kupkamtepe.

7 Dinino, Allah er yu tema, pio men dim pepra kunkamra deiyoda, ne Allah Yahwehdi konum ayu tema tep, “Askelon mutu cap, ila laut mokon me pirman tara kunung neng cap, sun yuma tep nengeda, nedi, “Anesala yumada, konum porbenkamrume,” pepra deipsi cadi, sun Filistin tara neitamai kurumu nesala poryakanmangada, putoda men boun kupkamre pepsene.

Gume, ne Allah Yahwehdi, “Sun Filistin nesala kunge mutu neitamai kunge nesala yumada, porbenkurume,” pepra, konum deipsa tep, sun pona tep taruda, pio tek sisi nong kupkamre ja!