Jeremiah 48

Moab mutu neitamai nesala tep, pepu upu

1Allah Yahwehdi, akeca keca yuma talepra, im deiki tara kunge jen talena malaikat yumada, sun deiyo ngebo kurure. Sun Israel yala nesaladi, er si erepmengedi, er tep gispal donunge. Allah Yahwehdi, sun Moab tara neitamai kunge nesala tep, aupu pepra deipu. Aupuda, ake.

“Sun Moab tara neitamai kunge nesalada, pio bicaue. Ada, Nebo mutu kunung nengda popkamenge. Amutuda konum uruptapra, sikke buktapkamenge! Ukupmenge dingeda, Kiryataim mutu kunge nesala peda, popmengedi tomopmengedi popkamenge. Ukupmengedi, ila lyom gel beilya wiami ngeda, uruptapra sikke buktapkamenge. Ange tep nengeda, sun amutu kunung nesala yumada, kware kuprepa, ali dakamenge. 2Moab mutu neitamai kunge neng, sundi talepra kungedi gemenge keca yumada, gum kupra deipkamne. Ukupnepa, sun amutu nesaladi, ila ati arum domidi, ‘Nun mutu deiyoi ake,’ pepra, Hesybon mutu wepi ngeda, sun pona tep nengdi, yana popra sikke butapkamenge. Tonda, ‘Atara mutu neitamai kunung nesala cap, sun Moab mutu neng capda, gum kupra deipkamepe. Amenda taruda, sun amutu kunge nesalada, negara ton pio men kunkamenge’ tenen, poryankamenge. Tonda, sun Madmen mutu neitamai kurumu nengdi, upu yuma penkamrum ngeda, pio dim pepra deipkamsene. Sun yumada, dim peprapu kunkamrume. Ange-ange yuma, kupkamser deiyoda, ne Allahdi go karepnepa, amutu neitamaida, sun pona tep jen talena neng dipapu poryankamenga tepa.

3Tonda, sun yuma moupra gekepso! Ada Horonaim mutu neitamai kunge nesala yumada, ila upu deiki di ngolokra mali penmange. Ada, “Uo, nunda, konum gum kupra deipseredi, konum sikke bukra tapmasere,” pepra engenmange. 4Tonda, sun Moab tara neitamai kunge nesala yuma peda, Allahdi gum kupra deipkamre. Ukupkamre taruda, sun Moab tara kunge nyapu yumadi ngolokra engenkamenge. Aengenkamenga er lelimda, orkaren mutu, er sida Zoar mutu kunge nesaladi gekenkamenge.

5Sun anyapu yumadi engengmanga deiyoda ake. Ada, Luhit mutu welepra bengedi, bamur upu gekenmangepa, engena lelim ila di penmangepa, yuk nesaladi gekepkamenge. Tonda, Horonaim mutu bisi kwerebanai peda, yuk nengdi bamur upu gekepmengedi, engenmang alelimda yuk neng ton gekepmange. 6Atep nengeda, yuk nesaladi, amutu neng tep upepkamenge. Ada, “Sunda, menmena di sepdaro benkamrume! Sun pe yana lyepdamumdi, mutu katawai mutu neitamai, bura tara tali dakuramre keledai bisam sepra baramre utopu kupra, sun peda sepdaro berumudi lyepdankurume!” pepkamenge.

7Uo sun Moab tara neitamai kurum nesalao! Sunda adipapu moupra tenepkurume. Menop taru sundi, ‘Gume, nunda puto kepmepedi, nun ila isomka nesala kunupa cadi, nunda teleppu kunkamepe,’ teneramrume. Dinino, tek sisi pepsene. Ukutaruda, sunda, sun pona tep nengdi, yana popkamsenge. Ukupsenge dingeda, sun pona tep neng dipapu poprapsengedi, sun si eremrum isok, er si Kamos cap, sun pel dona tep neng, imam-imam neng cap, tonda yuk yala nimi deiyo-deiyo neng cap, isok Kamos tep melimami neng cap yumada, Moab mutu neitamai di doupra, sun wenemna tep, pio karen mutu dubenkamsenge. Ukupkamsenga deiyoda, sundi, tali keca tep, ‘Nun nai bodi, lyepkamsere,’ pepra, isok tep teka teneramruma tepa.

8Atep, Allahdi nimi pona tep keca kareprepa, amutu neitamai yumada, sundi ila ati arum domrumnge yumada, sikke bukra tapkamre. Ukupkamre taruda, nimi ati cap, nesala capda, tenpu ngebo peda, ton tupa gam kepman dipapu pio men benkamenge. Sun kurum mutu yuma, dapu tara dinin, ila pala ban mutu tara cap yumada, adipapu gum kupra deipkamre. Tek sisi neda, Allah Yahwehdi, aupu konum pepra deipmana cadi, nong kupkamre ja!

9Upepna tep nengeda, sun adipapu Moab mutu neng kunungai, ‘Pio mali kupkamre’ tenen, ua er si garam weika di dopra, Moab mutu tu deiki yuma yukra tapkamrume. Ukupkamruma deiyoda ake. Moab mutu neitamai yuma, nimi ati weik dominge yumada, adipapu gum kupra deipkamne. Tenpunge peda ton men tapkamne. Amutu-amutu neitamai yumada, nimi ton gam men kunkamenge. Anesala yuma popnedi, pio gum kupra deipkamne. Ukupne pangeda, amutu neitamai yumada, nimi tenpu ngebo peda ton, gam men kunkamenge. Walang yopu kupkamre.

10Allah Yahwehdi, ‘Sunda ne tenemsi pel donkameng’ tenen, “Sunda ukunkamrume,” pepra, pel kareserenge yumada, tek sisi pio moupra pel talepra men doramenge nesalada, wipdongopkamre. Ange utopu, Allah Yahweh erdi, ‘Moab nesala yuma popra gawal dakameng’ tenen, yu parang ya karepupanen, er kin alen pumbon di gupra, nimi men poramre ngebo tep nengeda, Allahdi wipdongopkamre.

Moab tara neitamai kupu mutu-mutu yuma, sikke buktapkamra tep, pepu upu

11Allah Yahwehdi ne Yeremia tep pepneu.

“Ada pumun taru neitamai di dipra ukutaru peda, sun Moab mutu nengda, tali kange dipra, bouna di, dim peprapu kurami. Ukurami taruda, ton yuk mutu neng, sun pona tep nengdi, yana popnedi, sun doupra yuk karen mutu men dubenami. Sun Moab mutu neng tep, ukupmanto upu pepkune. Ada, anggur me ila me mau pumbon dinikra deipmengepa, acapu dim pepra kuramretopu kurami. Tonda anggur me er buta ngeda, amau pumbon me gwepra deipmangepa, buta kecada, er gum-gum tarapu kuramretopu, sun Moab nesala peda, dim peprapu kurami. Utopu ton, anggur me mauda, buplan men pakmengopda, er nintong tupa pio teleppu kurure. Tonda, er tau keca jepmengepa, pio telep tau peramretopu kurami. Dinino, ukutaruda, ange yumada, ne Allahdi mali kweipkamsene.

12Dinino, ne Allah Yahwehdi tek sisi pepsene. Amenda yankamre taruda, nedi “Ukupkurume,” pepnepa, sun Moab mutu nesala pona tep neng ton doproipnepa, poryankamenge. Ukupmantoda, anggur me gwepmanganen, dingtamamengtopu kupkamenge. Tonda, Moab mutu nesala yuma popnedi, gawal daknyopda, ada ukupmantonge, nimidi metek me mau adipapu dopra, puto di siptapmengedi, olongtamamengtopu kupkamne. Amutu cap, anesala capda, popra sikke bukra tapkamne ja!

13Moab mutu cap, Moab mutu neitamai kunge nesala yuma cap, mali kweipnyopda, sun Moab mutu kunge nesaladi, ali weik dangkamenge. Ada, sun si eremami isok, er si Kamos tep, ‘Uo, er dipapu warya tep, adipapu men lyepseu do?’ tenepmengedi ali dangkamenge. Ange utopu, pumun taru, sun Israel nesaladi, Betel mutu kurami taruda, sun isok si eremami keca, ‘Gispal dopkamep’ tenena tep, sapi bisam mi urasin utopu kupra, patung petupra deipidi, aisok si eremamai dinin, aisok men melimamupa, ali weik dangami. Ataruda, Israel nesaladi, ‘Uo,’ teneramidi, kange mun kange douramitopu, sun Moab nesala peda utopu kunkamenge.

14Pumun taruda, sun Moab mutu kumum nesaladi, yuk mutu neng tep, kwar tenena gum di, “Gume, nunda nimi ponada, weika di kael keamepudi, nunda pio puto weik jen talena neng kunupe. Yuk neng yumadi, nun tep, ‘Uo, sunda, tek sisi mambul neng kununge,’ tenesenunge,” peramrume Dinino, ukutaruda, sundi ware deiyo tep, ange tupa peptum do? Gume men peptume. 15Deiyoda ake. Ada, sun mutu Moab cap, amutu neitamai kurum nesala yuma cap tep, adipapu popra sikke buktapkamre deiyo ngeboda, sun damai konum poryankusere. Er konum yaryopda, sun kaber neng, jen talena neng, pio telep neng yumada, adipapu popnapu kupkamsere. Neda Allah, akeca-keca yuma talepra, deiki tara kunedi ila Raja kunune. Neda, im deiki jen talen malaikat yuma, sun deiyo ngebo kununa cadi, nedi aupu yumada, konum pepra deipmasena cadi, ange yumada, tek sisi nong kupkamre ja!

16Atep, nedi tek sisi pepsene. Moab mutu neitamai ikin keca dopra deipkamnenge yumada, konum pio damai yare. Atep go pio weik ton men kupre. Sun Moab mutu nesala yuma popra gawal dakamre deiyo ngeboda, sun damai konum yare. Sun yuma tep, yana sikke bukra tapkamare.

17Ange tep nengeda, sun Moab mutu dana-dana tara, damaipu kumumdi, ‘Uo, Moab mutu cap, amutu kunge nesala capda, pio teleppu kununga cadi, sunda ila mambul nenge,’ tenerumu nesala yumada, kange mun kange doupra, sun kayapu neng, sun Moab mutu nesala tep, ‘Uo,’ tenepra engenkamrume. Ukupmumdi, sun Moab mutu nesala tep upenkamrume. Ada, “Uo, pumun taruda, sun Moab mutu nengdi, amutu-amutu yuma talepra, puto weik kuramipa, nundi, ‘Uo, sunda pio teleppu kununge,’ teneramepu dinino, sun puto konum gum kupmardi, sunda konum sikke buktapmang adano!” pepra, ngolokra engenkamrume.

18Tonda, sun Dibon mutu neitamai kumum nesalao, sun pio telepai kumum mutu di kwerepra yankurume. Kwereyamum dingeda, ali dakmumdi, tali tu deiki cap, sikke but deiki cappu yana bukurume. Menop taruda, nimi yumadi sun tep, ‘Uo sun peda, pel telep kupra donunge,’ teneramsei dinino, ukutaruda gume. Deiyoda ake. Moab mutu neitamai kwamu keca yuma tep, yana konum gum kupra deipmau deiyo ngeboda, sun damai ton konum yakanmare. Konum yare dingeda, sundi gat keca deiki di deipra domrum ila ati arum, er si benteng yumada, urupra daktapredi, sikke bukra tapkamare.

19Uda, sun Aroer mutu kumum nesalada, sun adipapu bisi kwangdanaipu bena tekmumdi, pio moupra dimumdi, tenenkurume! Ukupkamrum taruda, sun Moab nesaladi kware kuprepa, seprapmengedi, bankameng neng cap, nerapu cap, adipapu gupra benkameng nesala yuma cap tep nengeda, asimpetenkamarume. Ada, “Uo, sunda ware kunmara tep, sun pe mutu tapra sepdaro banmarum do?” pepra asimkamrume.

20Asipmum pangeda, sun anengdi tamupra lap penkamenge. Ada, “Gume, Moab mutu neitamai domepunge yumada, konum uruptapra, sikke buktapmasenga cadi, pio ali dakra banmap adano! Atep nengeda, sun peda adipapu ngolokra engenkamrume! Atep nengeda sun pedi Arnon me damai di, yuk neng ton epmum dingeda, sun pedi, “Uo, Moab neng yuma doupra, porbengedi, sikke bungtambenmang adano!” pepra lap penkamrume!” Sun Moab mutu di sepra benkameng nengdi, sun Aroer neng tep, ukupra penkamsenge.

21Atep ne Allahdi pepsene. Ne Allah Yahwehdi, Moab tara neitamai dinin, amutu-amutu neitamaipu domi ati arum yuma peda, wenepnedi, popra gawal dangkamne. Ada, mutu gon bukamnga, dupai tara kunung nesala yumada ila kange mun wenemna kecada, sun damai dopra deipkamne. Amutu sida ake. Ada, Halon mutu cap, Yahas mutu cap, Mefaat mutu cap, 22Dibon mutu cap, Nebo mutu cap, Bet-Diblataim mutu cap, 23Kiryataim mutu cap, Bet-Gamul mutu cap, Bet-Meon mutu cap, 24Keriot mutu cap, tonda Bozra mutu cap yumada, ikin keca deipkamne. Ukupkamne taruda sun Moab tara neitamai kwamu mutu yuma cap, meneng damai akunung mutu cap, pera karen mutu kunung neng cap yumada, wenepra popnedi, gawal dakamne ja!

25Moab tara neitamai kwamu mutu-mutu yumada, gum kupra deipkamne. Ukupmantoda, nimi buru yo copyopda, pel men dopmanto kurameng utopu, Moab mutu wenepnyopda, sun ila kange mun puto talepra kuraminge yuma capda, sikke bukra tapkamne. Atep neda, Allah Yahwehdi, aupuda konum pepra deipmasena cadi, nong tek sisi kupkamre ja!

Allah Yahwehdi nabi Yeremia tep lap pepupa, seku.

“Moab mutu kunge neng yuma kange bouna di dakra kunkamenge,” pepu upu

26Allah Yahwehdi pepu, “Tonda sun Moab mutu nesala yumada, yu me jepmengepa kange yawaramamretopu kupkamenge. Ange deiyoda, sundi ne Yahweh damai tep, salnong-nong kepra gemeramidi, mali kupra deriramneiya tepa. Atep sun Moab nengda, wenepra amutara deipnepa, sun pe dukna dukmengaipu gamupdanen benkamenge. Ukunmangepa, yuk nengdi epmenge dingeda, Moab nesala tep autunkamenge. 27Angepu gum dinin, pumun taruda, sun Moab tara nesaladi, Israel tara mutu kurami neng tep, auturamrume. Tonda, sun Israel nesaladi upula men doramidi, upula don nesala cap kikiman men kurami dinin, sun Moab tara nesaladi, Israel nesala tep, autuamrumdi, mali upu cap, nyek-nyek pena upu cap, minina upu cap peamrume.

28Sun Moab mutu neitamai kumum nesalada, sun kumum mutu-mutu yumada adipapu tapra bura saka bendopkurume. Tonda bouna di dim pepra, gel bukamu mutu dupai inimbenkamrume utopu, tonda ukupmanto ngeda, im alau tara lakra embaramre ma, er si merpati madi, du deipkamya tep, kot damai tekamre co teru deiki di, ati yopra dopredi, du deriramretopu, sun peda bouna di, dim pepra inimbenkamrume. Agel bukamnga pumbon neitamai dabena kuramumpa, sun pona tep nengdi, yana men tomopkamseng atep, ne Allah Yahwehdi konum pepra deipsene.

29Sun Israel mutu neitamai kurum nesala yumadi, Moab yala nengda gemengedi, “Nunda pio telepe,” pepra, salnong-nong upu pepmengepa gekerume! Tonda, sundi, “Nunda ila mambul neng kunupe,” pengedi, sun pe dipru erepdangedi, gemenge nge yumada, dirume. Ne peda konum gekenune. 30Atep ne Allah Yahwehda, sun Moab nesaladi, “Nunda pio telepe,” pepra, gemepra kunge keca yumada, konum kael kemnune. Dinino, sundi tali upu penunga peda, tali pua. Tonda, sundi salnong-nong di penge upu cap, sundi pel donge keca cap yumada, tali keca, nong men kupmanto kecapu kurure. Ange peda ne konum kael kemnune.

31Ukununga tep nengeda, sun Moab nesala yuma tep, pio puto di engesenune. Tonda Kir-Heres mutu neitamai kunung nesala tep, nedi, ‘Uo,’ tenepra, pio engenapu kunune. 32Ange utopu, sun Sibma mutu neitamai kurum nesala tep, pio ila di engenkamne dinin, Yaezer mutu kunge neng tep nengeda, yambula dipu engenkamne. Sibma mutu neitamai di, wa pepra kouami anggur tapu, er yatenda, beleka benamnganen, ila lut mokon, er sida Laut Mati, deiamngai dourbena benamu.Tonda, Amon mutu di ila karen mutu Yaezer mutu benamu. Dinino ukutaruda, bupu li taruda, du mouna tep taru kupmar dinin, sun anggur tapu du yumada, men kipkamrume. Akeca yuma sikke buktapkamra deiyonge dokotepnepa, sun damai yaryopda, ange yuma peda, gum kupropkamre.

33Moab mutu neitamai, wa pena tep tu, pio telep kupra kuramu mutu yumada, adipapu gum kupra deipne pangeda, kange deipra teleppu kuraminge yuma peda, gum kupkamre. Tonda, nedi anggur me ketekemna tep, purupra derinungaida, mali kweipnepa, anggur me ton tupa men embankamre. Ange peda gum kupra deipnyopda, ataru di dipra, dorkunkamre taruda, amutu nesaladi anggur me men ketekemkamenge. Tonda, telep kange doupra men kunkamenge. Upu ila di penkamengeda, kange deipra kunange tep gume, kange mun kange doupmengedi, ngolokra engenkamenge.

34Sundi engepra ngolokameng taruda, sun engenkameng lelimda, karen mutu kunge nesala peda gekenkamenge. Ada, Hesybon mutu neng cap, Eleale mutu neng cap, Yahas mutu neng cap, Zoar mutu neng cap, tonda adinin dipdongopra Horonaim mutu neng cap, Eglat-Selisia mutu neng cap, sun yumada, engenkamenge. Ukupra engenkamenga deiyoda, ametek Nimrim me yumada, pio cepropredi gum kupkamra tepa.

35Moab tara kunge nesala tep wenepkamne taruda, ne Allah Yahwehdi, Moab mutu neitamai siltong keca doupra yangedi, sun isok si eremna tep, mutu buma deiki uku dongonungai yumada, gum kupra deipkamne. Tonda sun atali keca, isok si eremna tep, gam keca popra uku dongonungai cap, isok si eremnung nesala capda, gum kupra deipnepa, sundi isok si ton cap tupa men eremkamenge. Atep neda, Allah Yahwehdi konum pepra deipmasena tep, ange yumada, tek sisi nong kupkamre ja.

36Ange tep nengeda, Kir-Heres mutu neitamai yuma di, talepra kunung keca cap, Moab mutu neitamai di, talepra kunung keca yuma capda, konum gum kupra deipkamne. Nedi ukupnepa, sun anesaladi kunkamenge nge tep, epnedi bicau kunkamnere. Neda nimi depmangepa, epmengedi bicau kuprepa, mut pen keca, er sida seruling doupra, mut perameng utopu, ne kange dipru neitamai dipu, engenkamne. 37Ukunkamne taruda, sun anesala yumada, sun podan nengdi, ‘Ali dangkameng’ tenen, sun giso potong yuma toupkamenge. Tonda bana potong peda toupkamenge. Tonda, sun buruda tema di sekmengopda, dila katuai kupkamre. Tonda, telep opkal kenengami ngeda, kwiriptapmengedi, tali kain opkal bol dopra, sun deiyo damai getepmengedi, kunkameng ngeda, sun bicau kuna tepa.

38Ne Allah Yahwehdi pepsene. Ukupmantoda, nimidi, ‘Ayambul botol me mauda, ton cap men putapkamnere’ tenen, akeca olokra sikke buktapra tamamengtopu kupra, nedi sun Moab tara kunge nesala tep, weika di wenepra popkamne. Ange konum kupnyopda, sun ati arum deiki, gat keca di ban kupra dopya deiki tara cap, sun ila ati arum neitamai, ‘Upu talenkamep’ tenen, nimi bulumnungaida, nimi weika di gekepmengedi, engepra ngolongkamenge. Ada, nimi depmengepa, deipmangedi, ila di engepra mali peramengtopu kunkamenge.

39Uo, uo, sunda bicaue! Nedi Moab mutu kwamu keca yumada, sikke bukra tapkamne! Ukupne pangeda, yuk-yuk mutu nesaladi, sun Moab mutu neitamai kunge nesala yuma tep, nyek-nyek pepra autunkamenge. Ukupmengopda, sun Moab tara nesala yumada, ali dakmengedi, engenkamenge! Nedi, Moab tara nesala wenepra popnyopda, yuk-yuk mutu kunge nesala epmengedi, Moab tara neng tep, ‘Gume, sunda pio malipu kununga cadi, walito popka!’ tenepmengedi, kware kunkamenge. Tonda, ongopdongopi mutu ban-ban yuma dakunge nesaladi, Moab tara neng tep, nyek-nyek pepra, autunkamenge. Neda Allah Yahwehdi, konum pepra deipne.

“Moab mutu nengda, sun lyemna tep, yuk bisi ton men benmanto kunkamenge,” pepu upu

40Neda Allah Yahwehdi, aupu pepsene. Ukupmantoda, ayam poramre ma, er si Raja wali ma, tonda seng-seng pena ma, amadi, ‘Ayam mi ton dan cei popra jepkun do?’ tenen, im alau tara di lakra embanmaryanen, tuai kwereryaredi, er pol pereng tamrure. Ange utopu, ne Allahdi go karepnepa, tenpu mutu neng ton, ila puto di Moab mutu poryankamenge.

41Poryankameng taruda, Moab mutu neitamai, sun pona tep neng yangedi, ila di gel deipra, beilya wipra, domi ila ati arum, er si benteng-benteng yumada, warekmengedi, popra ange yumada dopropkamenge. Tonda, sun yuk-yuk ati arum dominge yuma peda, dalupra dopropkamenge. Ukupmantoda, nerapu mundu douamenga derinmanepa, kware kuprepa, puto bounpu kuramretopu, sun Moab mutu jen talena neng yuma peda, kware kuprepa, puto bounpu kuprepa, kwar kunkamenge. 42Moab mutu neitamai kunge nesala yumada, sundi ne Allah Yahweh damai tep, sal nong-nong kapra gemengedi, ‘Er upuda men gekenkamepe,’ pepra yanitamnenunga tep, nedi sun aneng yuma popra sikke bukra tapkamne. Ukupne pangeda, sun Moab tara kunge nesala yumada, popnedi gawal dakamne. Amenda taruda, nimidi, ‘E, amutu neitamai kunge nesalada, Moab yala nesala akununge,’ pio men tenenkamenge. Ayala nesala yumada, sun si gum kupra deipkamne.

43Uo, sun Moab tara neitamai kurumu nesala tep, pio bicau tenesenune! Deiyoda ake. Nimi pona tep, tu pumbon ila palipkameng neitamai di, saka popkamsere. Tonda, nimidi pena pemenga pumbon wekrepa kapang mangkaudi wekrepa youramretopu kupkamsere. 44Ware ngebo do yuma, tu paliamenga pumbon neitamai wekamre. Apumbon neitamai dipu, er pedi, ‘Lyepdankun’ tenen, kange di welepredi, bura saka benkamre ngeboda, amenda taruda, mangkau bandenkap, kapang pena pemenga pumbon wengamrepa, youramretopu, kupkamre. ‘Ange yumada, ukupkamre,’ tenepsi taru konum damai kupyopda, tek sisi kupkamre. Ada, ne Allahdi Moab mutu neitamai yumada, wenepra popnedi, sikke bukra tapkamne.

45Ukupnepa, sun Moab mutu neng ton, ‘Sepra bepedi, lyepdankamep’ tenen, sunda karen mutu, Hesybon mutu wengbenkamenge. Dinino amutu neitamai peda, nimi deiyo ngebo er si Raja Sihon, er pio telep ati, er si istana peda, uku deipnepa, ukudi jenkamre. Auku jenkamre taru dipapu, sun mutu wilimdonai tep wiliamyai yuma peda, gum kupra deipkamre. Tonda, Moab tara dinin, iknapi dam tara, mutu dupai peda, gum kupra deipkamre. Atep nengeda, sun menop taru, balila weik kuramidi, ‘Nunda pio puto weik neng kunupa cadi, yuk mutu nesala tep, tali lupra porbenkamepe,’ pepra, salnong-nong kamami nesala, sun Moab tara nesala yumada, popra gawal dakamne.

46Ange tep nengeda, sun Moab mutu kurumu nesalada, sunda pio bicaue. Ada, ila kange mun kecada, sun damai konum yankamsere! Amutu neitamai kurumudi, sundi isok si eremrum keca, er si Kamosda, sun tep wenepsenedi, gum kupra deipkamsene. Ukupne pangeda, sun pona tep yankameng nengda, sundi deiamrum nyapu cap, sundi deiamrum ner nyapu cap yumada, tomopra doprapmengedi, sun pe karen mutupu tamupra dubengedi, wenemna ati dongopkamenge.

47Ne Allahdi aupu pepmasena yumada, tek sisi kupkamre. Dinino, doryankamre taruda, nedi Moab mutu neitamai yuma cap, Moab mutu kunkameng nesala cap tep, kange di tamupra telep kweipkamne ja! Aupu yumada, neda Allah Yahwehdi konum pepra deipmasena cadi, ange yumada tek sisi nong kupkamre ja!

“Atep nengeda, ne Allah Yahwehdi, sun Moab nesala tep, wenepra popkamne keca tep nengeda, akonum pepsene. Ton cap dukdongopra men pepkusene. Akonuma pepne.

Allah Yahwehdi pepupa, nabi Yeremiadi seku.